Men, Senyè a, Bondye a, rele nonm lan, li di l:
— Kote ou ye?
Nonm lan reponn li:
— Mwen tande vwa ou nan jaden an, mwen pè. M'al kache pou ou, paske mwen toutouni.
Senyè a, Bondye a, di l:
— Ki moun ki di ou te toutouni? Eske ou te manje fwi pyebwa mwen te di ou pa manje a?
Adan reponn:
— Madanm ou te ban mwen an, se li menm ki ban mwen fwi a manje, mwen manje li.
Senyè a, Bondye a, mande famn lan:
— Poukisa ou fè sa?
Fanm lan reponn li:
— Se pa mwen non! Se sèpan an wi ki pran tèt mwen ki fè m manje l.
Senyè a, Bondye a, di sèpan an konsa:
— Poutèt sa ou fè a, ou madichonnen nan mitan tout bèt jaden ak tout bèt nan bwa. W'a rale sou vant ou. W'a manje pousyè tè jouk jou ou mouri. Ou menm ak fanm lan, m'ap fè nou lènmi yonn ak lòt. Pitit pitit pa l ak pitit pitit pa ou ap lènmi tou. Pitit pitit li ap kraze tèt ou, epi ou menm w'ap mòde l nan talon pye l.
Li di fanm lan:
— Lè w'ap fè pitit, m'ap fè soufrans ou vin pi rèd. W'a gen pou soufri anpil lè w'ap akouche. W'ap toujou anvi mari ou. Men, se mari ou ki va chèf ou.
Apre sa li di Adan:
— Ou koute pawòl madanm ou, pa vre! Ou manje fwi pyebwa mwen te ba ou lòd pa manje a. Poutèt sa ou fè a, m'ap madichonnen tè a. W'a gen pou travay di toutan pou fè tè a bay sa ou bezwen pou viv. Tè a va kale tout kalite pikan ak pengwen ba ou. W'a manje fèy ki pouse nan raje. Se swe kouray ou ki pou fè ou mete yon moso pen nan bouch ou jouk lè w'a tounen nan tè kote ou sòti a. Paske, se pousyè ou ye, ou gen pou tounen pousyè ankò.
Adan bay madanm li non, li rele l Ev, paske se li menm ki manman tout moun k'ap viv sou tè a.
Lè sa a, Senyè a, Bondye a, pran po bèt, li fè rad pou Adan ansanm ak madanm li, li biye yo.
Apre sa, Senyè a, Bondye a, di:
— Kounyeya, Adan vin konnen sa ki byen ak sa ki mal tankou yonn nan nou. Nou p'ap kite l lonje men l keyi fwi pyebwa ki bay lavi a pou l manje l, pou l pa viv pou tout tan.
Se konsa, Senyè a, Bondye a, mete Adan deyò nan jaden Edenn lan. Li voye l al travay tè, menm tè Bondye te pran pou fè l la.
Se konsa, li mete Adan deyò. Sou bò solèy nan jaden an, li poste zanj cheriben ak nepe yo byen klere nan men yo, epi yo t'ap veye toupatou pou anpeche moun pwoche bò pyebwa ki bay lavi a.
Ap Bib la
Ap Bib pou timoun
