Mesye yo leve, yo pati, yo mete tèt sou Sodòm. Yo rive kote yo te ka voye je yo gade anba pou wè Sodòm. Abraram menm t'ap mache ak yo. Li t'ap kondi yo mete pi devan sou wout la. Senyè a di nan kè l:
— Mwen pa kapab kache Abraram sa m pral fè a. Pitit pitit li yo pral tounen yon gwo nasyon ki va gen pouvwa. Gremesi Abraram, tout nasyon sou latè pral jwenn benediksyon. Mwen te chwazi l pou l te pase pitit li yo ak tout rès fanmi l k'ap vin apre li yo lòd pou yo mache nan chemen Senyè a met devan yo, pou yo fè sa ki kòrèk ak sa ki dwat devan Bondye. Se konsa m'a fè pou li tou sa mwen te pwomèt li a.
Apre sa, Senyè a di:
— Se pa ti kras bagay y'ap di sou moun Sodòm ak moun Gomò, paske peche moun sa yo lou anpil. M'ap desann pou m wè ak je mwen si sa y'ap di sou yo a se vre. Si se pa vre, m'a konnen.
Mesye yo pati, yo mete tèt sou Sodòm. Men, Senyè a te rete ak Abraram. Abraram pwoche bò kote Senyè a, li mande l:
— Eske se vre ou pral touye inonsan yo ansanm ak koupab yo? Si gen senkant moun inonsan nan lavil la, eske w'ap detwi tout lavil la? Eske ou p'ap fè pa lavil la poutèt senkant inonsan sa yo? Aa! Pou di w'ap fè inonsan peri ak koupab? Se pa posib. Ou pa ka fè sa. Se lenjistis pou inonsan gen menm sò ak koupab. Non, sa pa ka fèt. Bondye k'ap jije tout moun sou tè a pa ka nan fè lenjistis.
Senyè a reponn:
— Si mwen jwenn senkant inonsan nan lavil Sodòm, m'ap fè pa tout lavil la, poutèt senkant inonsan sa yo.
Abraram pale ankò, li di:
— Eskize m wi! Senyè, si m penmèt mwen pale ankò. Se moun ase mwen ye, mwen pa gendwa di ou anyen. Men, si se karannsenk moun inonsan sèlman ou jwenn, eske ou pral detwi tout lavil la paske manke senk pou fè senkant lan?
Senyè a reponn:
— Si mwen jwenn karannsenk inonsan sèlman, mwen p'ap detwi lavil la.
Abraram pale ankò, li di:
— Ou pa janm konnen, ka gen karant inonsan ase?
Senyè a reponn:
— Si gen karant inonsan, mwen p'ap detwi lavil la.
Abraram di:
— Tanpri, Senyè, pa fache sou mwen non. M'ap di ou yon ti mo ankò. Ou pa janm konnen, ou ka jwenn trant inonsan ase nan lavil la.
Senyè a reponn:
— Si mwen jwenn trant, m'ap fè pa lavil la.
Abraram di:
— Eskize m wi, Senyè, si m penmèt mwen pale toujou. Men, sipoze ou jwenn ven inonsan sèlman?
Senyè a reponn li:
— Si mwen jwenn ven inonsan, m'ap fè pa lavil la.
Abraram di ankò:
— Tanpri, Senyè, pa fache sou mwen non. M'ap di yon dènye mo. Si ou jwenn dis inonsan ase?
Senyè a reponn li:
— Si mwen jwenn dis inonsan, m'ap fè pa lavil la.
Ap Bib la
Ap Bib pou timoun
