Jenèz 10:1-32

Apre gwo inondasyon an, pitit Noye yo, Sèm, Kam ak Jafè, te fè pitit. Men non pitit gason yo te fè. Men pitit gason Jafè yo: Se te Gomè, Magòg, Madayi, Javan, Toubal, Mechèk ak Tiras. Gomè te fè twa pitit gason: Achkenaz, Rifat ak Togama. Se Javan ki te papa Elicha, Tasis, Kitim ak Wodanim . Se tout pitit ak pitit pitit Jafè yo sa ki zansèt tout moun k'ap viv nan zile yo, yo chak sou tè pa yo, yo chak ak lang pa yo. Yo t'ap viv ansanm, fanmi ak fanmi, nasyon ak nasyon. Men pitit gason Kam yo: Se te Kouch, Mizrayim, Pout ak Kanaran. Kouch te fè senk pitit gason: Seba, Avila, Sabta, Rama ak Sabteka. Rama menm te gen de pitit gason: Seba ak Dedan. Kouch te gen yon lòt pitit gason yo te rele: Nimwòd. Nimwòd sa a, se premye moun ki te gwo chèf sou latè. Se te yon gwo chasè devan Senyè a. Se poutèt sa yo di: Gwo chasè devan Bondye tankou Nimwòd. Nan peyi kote li t'ap gouvènen an te gen lavil sa yo: Babèl, Erèk, Akad, Kalne nan peyi Chinea. Apre sa, li kite peyi a, l'ale lavil Asou. Men lavil li bati yo: Niniv, Reobòt-Ir, Kalak. Lèfini, li bati lavil Rezèm ant Niniv ak Kalak. Kalak sa a te yon gwo lavil. Mizrayim fè pitit. Se yo ki zansèt moun peyi Lidi, peyi Anan, peyi Leyab ak peyi Naftou, peyi Patwous, peyi Kaslou ak peyi Kaftò. Se nan peyi Kaslou sa a moun Filisti yo sòti. Premye pitit Kanaran se te Sidon. Apre sa vin Et. Se Kanaran tou ki papa Jebis, Amori, Gigach, Evi, Aka, Sini, Avad, Zema, Amat. Apre sa tout fanmi Kanaran yo gaye. Lizyè tè moun Kanaran yo pati depi lavil Sidon, li mete tèt sou Gera jouk li rive Gaza. Apre sa, li vire sou Sodòm ak Gomò, Adma ak Seboyim jouk li rive Lecha. Se tout pitit ak pitit pitit Kam yo sa, yo chak sou tè pa yo, yo chak ak lang yo. Yo t'ap viv ansanm, fanmi ak fanmi, nasyon ak nasyon. Sèm te gran frè Jafè. Li te gen anpil pitit tou. Se li ki te zansèt tout pitit Ebè yo. Men pitit gason Sèm yo: Se te Elam, Asou, Apachad, Lidi ak Aram. Men pitit Aram yo: Se te Ouz, Oul, Getè ak Mach. Se Apachad ki te papa Chelak. Chelak menm te papa Ebè. Ebè te gen de pitit gason. Yonn te rele Pelèg, paske se nan tan li moun sou latè te divize yonn ak lòt. Yo te rele frè l la Joktan. Joktan te papa Almodad, Chelèf, Azmavèt, Jerak, Adoram, Ouzal, Dikla, Obal, Abimayèl, Seba, Ofi, Avila ak Jobab. Yo tout se pitit Joktan yo te ye. Tè kote yo t'ap viv la te pran depi lavil Mecha, li moute kote lavil Sefa, jouk mòn ki bò kote solèy leve a. Se tout pitit ak pitit pitit Sèm yo sa, yo chak sou tè pa yo, yo chak ak lang pa yo. Yo t'ap viv ansanm, fanmi ak fanmi, nasyon ak nasyon. Tout moun sa yo se branch fanmi pitit Noye yo, dapre zansèt yo, nasyon pa nasyon. Apre gwo inondasyon an, tout nasyon ki sou latè sòti nan pitit Noye yo.