Ezekyèl 47:1-12

Apre sa, nonm lan mennen m tounen devan pòtay pou antre nan Tanp lan. Mwen wè yon dlo k'ap sòti anba papòt kay la, li t'ap koule nan direksyon solèy leve. Se nan direksyon sa a pòtay Tanp lan te bay tou. Dlo a t'ap koule desann sòti anba fondasyon ki sou bò sid Tanp lan, li pase adwat sou bò sid lotèl la. Nonm lan fè m sòti kite lakou Tanp lan. Mwen pase nan pòtay nò a, nou fè yon detou jouk nou rive bò pòtay ki bay sou solèy leve a. Yon ti dlo t'ap koule sòti nan kwen sid pòtay la. Nonm lan swiv ti kouran dlo a desann nan direksyon solèy leve. Avèk baton mezi ki te nan men l lan, li mezire senksan (500) mèt. Rive la, li fè m janbe dlo a. Dlo a ban m nan je pye. Li mezire yon lòt senksan (500) mèt ankò, li fè m janbe dlo a, dlo a ban mwen nan jenou. Li mezire yon lòt senksan (500) mèt ankò, li fè m janbe dlo a, dlo a ban mwen nan ren. Li mezire yon lòt senksan (500) mèt. Rive la, se te yon gwo larivyè. Mwen pat ka mache janbe l ankò, dlo a te twò fon. Se naje pou m ta naje travèse l. Li di m konsa: — Nonm o! Make tou sa ou wè la a! Apre sa, li fè m tounen sou bò larivyè a. Lè m rive la, mwen wè te gen anpil pyebwa sou de bò larivyè a. Li di m konsa: — Dlo sa a ap koule desann, l'ap travèse pòsyon tè ki bay sou solèy leve a, jouk li rive nan Fon Jouden an pou l tonbe nan Lanmè Mouri a. Lè l'a tonbe nan Lanmè mouri a, l'ap fè dlo sale a tounen dlo dous. Tout kote dlo a ap koule pral gen tout kalite bèt ak pwason. Dlo larivyè a pral fè dlo Lanmè Mouri a tounen dlo dous. Kote dlo a pase, l'ap bay lavi. Depi sous Angedi yo, desann ale jouk sous Eneglayim yo, pral gen moun k'ap peche sou tout bò lanmè a. Yo pral blayi senn yo ak privye yo mete cheche. Pral gen tout kalite pweson an kantite tankou nan lanmè Mediterane a. Men, dlo ki nan lagon yo ak nan m'a dlo ki sou rivay la p'ap dous. Y'ap rete ak tout gwo sèl yo. Sou de bò larivyè a, tout kalite pyebwa pral pouse pou bay fwi pou moun manje. Fèy yo p'ap janm fennen, yo p'ap janm sispann donnen. Y'ap bay yon donn chak mwa, paske dlo k'ap koule sòti nan Tanp lan pral wouze yo. Pyebwa yo pral bay fwi pou moun manje. Fèy yo ap sèvi renmèd.