Kolosyen 4:7-18

Frè Tichik se yon bon zanmi m, yon bon sèvitè Kris la k'ap ban m yon bon konkou nan sèvis Senyè a. L'a ban nou tout nouvèl mwen. Mwen voye l ban nou tout espre pou l ka di nou jan mwen ye, pou l ka remoute kouray nou. Frè Onezim ki moun menm kote ak nou ap vin ansanm avè li. Se yon bon zanmi mwen renmen anpil. Yo tou de va di nou sa k'ap pase bò isit. Aristak ki nan prizon ansanm avè m voye bonjou pou nou. Mak, kouzen Banabas la, voye bonjou tou. (Mwen te deja di nou sa pou nou fè pou li: resevwa l byen si l vin lakay nou.) Jezi, ki gen ti non Jistis, voye bonjou pou nou tou. Twa mesye sa yo, se yo menm sèlman pami jwif yo k'ap travay avè m' pou gouvènman Bondye ki wa a. Yo te ban m' anpil kouraj. Epafras, ki moun Kolòs tou, voye bonjou pou nou. Sèvitè Kris sa a pa manke lapriyè anpil pou nou pou nou ka rete fèm, pou nou ka fin grandi nèt nan konfyans nou nan Bondye, pou nou ka toujou byen dispoze pou fè tou sa Bondye mande nou. Mwen ka di nou sa: l'ap fatige kò l anpil pou nou menm moun Kolòs yo, pou moun Lawodise yo ansanm ak moun Yerapolis yo. Lik, bon dòktè mwen an, ansanm ak Demas voye bonjou pou nou tou. Di tout frè Lawodise yo bonjou. Pa bliye Nenfas ansanm ak tout frè ki konn reyini lakay li yo. Lè n'a fin li lèt sa a, voye l bay legliz Lawodise a pou yo ka li l tou. Nou menm tou, n'a li lèt moun Lawodise yo va voye ban nou an. Di Achip pou mwen: Fè atansyon. Sèvis yo ba l fè nan travay Senyè a, se pou l fè l byen. Se mwen menm Pòl, ak men pa m, k'ap ekri nou kounyeya: Bonjou pou nou tout. Pa bliye m nan prizon an. Benediksyon Bondye pou nou tout.