2 Samyèl 11:1-27

Nan prentan apre sa, nan epòk wa yo konn sòti pou al fè lagè, David voye Joab ansanm ak tout lòt ofisye yo alatèt lame pèp Izrayèl la al goumen ak moun Amon yo. Yo ravaje peyi Amon an, yo sènen lavil Raba. David menm te rete lavil Jerizalèm. Yon jou, bò aswè, David te fin fè yon ti poze, li leve, li sòti al sou teras ki anwo palè a. Antan li la, li wè yon fanm ki t'ap benyen. Fanm lan te bèl anpi. Li voye chache konnen ki fanm sa a. Yo vin di li se Batcheba, pitit fi Eliyam, madanm Iri, moun peyi Et la. David voye moun ankachèt al pran li mennen ba li. Li kouche ak madanm lan. Lè sa a, Batcheba te fèk fin fè sèvis apre règ li. Apre sa, Batcheba tounen lakay li. Fanm lan vin ansent, epi li voye fè David konnen sa. David voye yon mesay bay Joab, li mande l pou l voye Ouri, moun peyi Et la, ba li. Se konsa, Joab voye Ouri bay David. Lè Ouri rive, David mande l nouvèl Joab ak sòlda yo, ki jan batay la ye. Apre sa, li di Ouri: — Desann al lakay ou non! Al poze kò ou! Ouri sòti. David voye yon kado pou li lakay li. Men Ouri pa al lakay li. Li kouche bò pòtay palè a ansanm ak tout lòt sòlda wa yo. Lè David vin konnen Ouri pat al lakay li, li mande l: — Ou fenk antre sòti nan vwayaj, poukisa ou pa al lakay ou? Ouri reponn David: — Sòlda Izrayèl yo ak sòlda Jida yo byen lwen ap fè lagè, Bwat Kontra Senyè a ansanm ak yo. Kòmandan Joab ak lòt chèf lame monwa yo ap pase nwit deyò nan plenn yo. Ki jan ou vle pou mal lakay mwen, manje, bwè, kouche ak madanm mwen? Mwen fè sèman sou tèt ou, menm jan ou vivan an, m pa ka janm fè bagay konsa. David di li: — Bon. Ou mèt rete pase rès jounen an isit la. Denmen m'a voye ou ale. Se konsa, Ouri rete lavil Jerizalèm pou de jou ankò. David envite li vin manje avè li. Li fè li bwè jouk li sou. Menm jou swa sa a tou, Iri pa desann lakay li. Li dòmi dòmi li ak gad palè yo. Nan denmen, David ekri Jowab. Li bay Iri lèt pote ale. Li voye di Jowab: W'a mete Iri devan nèt, kote batay la pi anraje a. Apre sa, rale kò ou dèyè pou yo ka touye li. Se konsa, Joab ki te sènen lavil Raba a voye Ouri kote li te konnen lènmi yo te pi fò a. Lame lènmi yo sòti nan lavil la, yo vin kontre ak lame Joab la. Gen anpil sòlda ak anpil ofisye lame David la ki te mouri. Ouri, moun peyi Et la, mouri tou. Joab voye rakonte David tout ti detay sou jan batay la pase. Epi li bay mesaje a lòd sa a: — Lè w'a fin rakonte wa a tout ti detay batay la, li ka fè kòlè, li ka di ou: Poukisa nou te pwoche pre lavil la konsa pou m te goumen ak lènmi yo? Se konnen nou pa konnen yo te ka rete sou tèt miray la pou yo tire flèch sou nou? Nou genlè bliye jan Abimelèk, pitit Jedeyon an te mouri lavil Tebès? Se yon fanm ki te rete sou tèt miray la, li voye yo wòl moulen sou li, li touye l frèt. Poukisa atò nou te pwoche pre lavil la konsa? Si wa a pale konsa avè ou, w'a di l: Ouri, moun peyi Et la, ofisye lame ou la, mouri tou. Mesaje a ale, li rakonte David tou sa Joab te ba li lòd rakonte l la. Li di l: — Lènmi nou yo te pi fò pase nou. Yo fè yon sòti nan lavil la, yo vin goumen avè nou nan plenn lan. Men nou fè yo kase tèt tounen, nou kouri dèyè yo jouk devan pòtay lavil la. Se lè sa a, yo rete sou tèt miray yo, yo voye flèch sou nou. Gen kèk ofisye lame wa a ki mouri. Ouri, moun peyi Et la, ofisye wa a, mouri tou. David di mesaje a: — Ankouraje Joab. Di li li pa bezwen kite sa fatige l twòp. Se toujou konsa lè y'ap fè lagè. Ou pa janm konnen kilès ki pral mouri. Di li pare pou li fè yon gwo atak sou lavil la pou li pran l. Lè Batcheba vin pran nouvèl mari l te mouri, li pran lapenn pou li. Lè seremoni lantèman yo fini, David voye chache l, li pran l lakay li. Batcheba vin madanm li. Li fè yon pitit gason pou David. Men, sa David te fè a pat fè Senyè a plezi menm.