1 Samyèl 4:1-11

Chak fwa Samyèl te pale, tout pèp la te koute li. Lè sa a, pèp Izrayèl la soti pou l'al goumen ak moun Filisti yo. Konsa yo moute kan yo bò lavil Ebenezè. Moun Filisti yo menm moute kan pa yo lavil Afèk. Moun Filisti yo pran pozisyon anfas moun Izrayèl yo pou yo goumen. Epi batay la konmanse. Moun Filisti yo bat moun Izrayèl yo byen bat, yo touye katmil (4000) moun konsa nan plenn kote yo t'ap goumen an. Lè sa a, sa ki te chape yo tounen nan kan yo a, tout chèf ki te reskonsab pèp Izrayèl la di: — Poukisa Senyè a kite moun Filisti yo bat nou konsa jòdi a? Ann al pran Bwat Kontra Senyè a ki lavil Silo pou li ka nan mitan nou. Konsa l'a delivre nou anba men lènmi nou yo. Se konsa yo voye kèk moun lavil Silo. Yo pran Bwat Kontra Senyè ki gen tout pouvwa a, Senyè ki chita sou fòtèy li anwo zanj cheriben yo. Yo pote l vini. Tout de pitit Eli yo, Ofni ak Fineas, te la ansanm ak Bwat Kontra a. Lè Bwat Kontra Senyè a rive nan kan an, tout moun Izrayèl yo bay yon sèl gwo rèl, tè a tranble. Moun Filisti yo tande rèl la, yo di: — Poukisa tout gwo rèl sa a nan kan moun Izrayèl yo? Lè yo vin konnen se Bwat Kontra Senyè a ki te rive nan kan an, yo vin pè, yo t'ap di: — Bondye moun sa yo rive nan kan yo a. Nou nan ka, devenn pa nou! Bagay konsa pa janm rive nou anvan sa! Ala devenn pou nou, mezanmi! Ki moun ki ka delivre nou anba men bondye sa yo ki plen pouvwa? Se bondye sa yo ki te voye tout kalite malè sou moun Lejip yo nan dezè a. Se pou nou mete gason sou nou, nou menm moun Filisti, pou nou pa tounen esklav ebre yo menm jan yo te esklav nou an. Se pou n goumen tankou vanyan gason! Moun Filisti yo goumen rèd mare, yo bat moun Izrayèl yo ki kouri chape al lakay yo. Se te yon gwo kou pou pèp Izrayèl la. Te gen trantmil (30.000) sòlda apye ki te mouri nan lame pèp Izrayèl la. Moun Filisti yo te sezi Bwat Kontra Bondye a epi tou de pitit Eli yo, Ofni ak Fineas, te mouri.