1 Samyèl 3:1-10

Lè sa a, Samyèl te timoun toujou, li t'ap sèvi Senyè a sou zòd Eli. Nan tan sa a se pat fasil pou Senyè a te pale ak moun. Se bagay ki te ra anpil pou Senyè a te fè moun wè l. Je Eli te fin bese. Li pa te menm ka wè. Yon jou aswè, Eli t'ap dòmi nan chanm li. Samyèl menm te kouche nan Tanp Senyè a, nan pyès kote Bwat Kontra Bondye a te ye a. Lanp lan te limen toujou. Senyè a rele Samyèl. Samyèl reponn: — Men mwen wi! Epi li leve, l'al jwenn Eli, li di l: — Men mwen wi! M tande ou rele m! Eli reponn li: — Mwen pa rele ou non! Tounen nan kabann ou. Samyèl ale, li kouche. Senyè a rele l ankò. Samyèl leve, l'al jwenn Eli, li di l: — Men mwen wi! Mwen tande ou rele m! Men, Eli reponn li: — Pitit mwen, mwen pa rele ou. Al kouche tande! Samyèl pat ankò konnen Senyè a paske Senyè a pat ankò janm pale avè l anvan sa. Senyè a rele Samyèl yon twazyèm fwa. Samyèl leve, l'al jwenn Eli, epi li di l: — Mwen tande ou rele m. Men mwen wi! Fwa sa a, Eli vin konprann se Senyè a ki t'ap rele ti gason an. Li di Samyèl konsa: — Ale kouche monchè! Si ou tande yo rele ou ankò, w'a di: Pale non, Senyè! Men sèvitè ou ap koute! Samyèl ale vre, li kouche nan kabann li. Senyè a vini, li kanpe epi li rele li jan li te fè anvan an: — Samyèl! Samyèl! Samyèl reponn: — Pale non! Men sèvitè ou ap koute ou!