1 Samyèl 25:1-35

Samyèl mouri, tout pèp Izrayèl la sanble pou yo kriye lanmò li. Lèfini, yo antere l anndan lakay li lavil Rama. Apre sa, David pati, li desann nan dezè Paran an. Te gen yon nonm moun lavil Mawon ki te gen bitasyon l lavil Kamèl. Nonm lan te rich anpil: li te gen twamil (3.000) tèt mouton ak mil (1.000) tèt kabrit. Lè sa a, mesye te lavil Kamèl pou fè taye lenn mouton l yo. Mesye te rele Nabal, madanm li te rele Abigayèl. Se te yon fanm ki te gen anpil lespri, lèfini li te bèl. Men, mari a te gen move jan, li pat konn boule byen ak moun menm. Se te fanmi moun Kalèb yo. Antan David nan dezè a, li vin konnen Nabal t'ap taye lenn mouton l yo. Li voye dis jenn gason bò kote l. Li di yo konsa: — Moute lavil Kamèl, ale lakay Nabal, n'a di l mwen voye bonjou pou li. Men sa n'a di l: David, frè-ou, voye bonjou pou ou ak pou tout moun lakay ou. Li swete tout bagay ap mache byen lakay ou. Li tande ou ap taye lenn mouton ou yo. Li voye di ou lè gadò mouton ou yo te avèk nou, nou pat janm fè yo anyen. Yo pa janm pèdi anyen pandan tout tan yo te nan zòn Kamèl la. Ou mèt mande yo, y'a di ou. David voye mande ou pou resevwa mesye pa l yo byen, paske se yon jou fèt nou rive isit la. Tanpri, mèt! Bay sa ou genyen pou nou k'ap sèvi ou, ak pou David, zanmi-ou lan. Mesye David yo rive vre, yo bay Nabal komisyon an nan non David. Epi yo rete tann. Apre yon ti tan, Nabal reponn yo: — David? Pitit gason Izayi a? Mwen pa konnen li non. Atò koulyeya, peyi a plen ak yon bann esklav ki sove kite lakay mèt yo. Anhan! Pou m pran pen ak dlo lakay mwen ak vyann bèt nou fè touye pou gadò mouton m yo, pou m bay yon bann moun mwen pa konnen kote yo sòti? Mesye yo tounen al jwenn David. Lè yo rive, yo rapòte ba li tou sa Nabal te di. David di yo: — Pran nepe nou, pase yo nan ren nou. Yo tout pase nepe yo nan ren yo. David tou. Lèfini, katsan (400) nan mesye yo ale avèk David. Lòt desan yo (200) rete dèyè ak pwovizyon yo. Yonn nan domestik Nabal yo al avèti Abigayèl, madanm Nabal, li di l: — David te voye kèk mesaje sòti nan dezè a avèk bèl bonjou pou mèt nou an. Men li menm, li pale mal ak yo. Men, mesye sa yo te bon pou nou: Yo pat janm chache nou kont. Nou pat janm pèdi anyen pandan tout tan nou te la ansanm ak yo nan savann lan. Yo te pwoteje nou lajounen kou lannwit pandan tout tan nou te la nan mitan yo ap pran swen bann mouton nou yo. Kounyeya, kalkile byen sa ou wè ou ka fè, paske bagay la ka vire mal ni pou mèt nou ni pou tout fanmi l. Mari ou sitèlman gen move jan, moun pa ka pale ak li. Abigayèl prese pran desan (200) pen, de gwo veso an po bèt plen diven, senk mouton tou kwit, de barik grenn griye, san mamit rezen chèch, desan (200) gato fèt ak figfrans chèch, li chaje tou sa sou bourik. Lèfini, li di domestik li yo: — Nou mèt pran devan, mwen menm mwen dèyè. Men li pa di Nabal, mari l anyen. Abigayèl te moute sou yon bourik. Li t'ap desann yon ti mòn lè li rive nan yon koub, li tonbe bab pou bab ak David ki t'ap mache sou li ansanm ak mesye l yo. Yo kontre. David t'ap di nan kè li: — Sa m te bezwen pwoteje tou sa nonm sa a te genyen nan dezè a fè? Li pa janm pèdi anyen nan sa ki te pou li. Epi se konsa l'ap peye m pou tout byen mwen fè pou li yo? Se pou Bondye ban m pi gwo pinisyon ki genyen si anvan denmen maten mwen pa touye dènye moun lakay li, granmoun kou timoun. Wè Abigayèl wè David, li kouri desann bourik li a, li lage kò l ajenou devan David, li bese tèt li jouk atè. Apre sa, li lage kò l nan pye David, li di l konsa: — Tanpri, chèf mwen, ban m pèmisyon pale avè ou. Tout fòt la se pou mwen. Koute sa m'ap di ou. Tanpri, pa okipe nonm yo rele Nabal la. Se yon voryen. Se pa pou gremesi yo rele l Nabal ki vle di moun fou. Mwen menm, mèt, mwen pat wè mesye ou te voye yo. Se Senyè a menm ki anpeche ou mete san deyò pou pran revanj ou. Koulyeya mwen sèmante devan Senyè a ak devan ou menm, Mèt mwen, se pou lènmi ou yo, moun ki vle fè ou mal yo, se pou yo fini tankou Nabal. Kounyeya, mèt mwen, men sa mwen pote fè ou kado pou ou bay moun k'ap mache avè ou yo. Tanpri, mèt, padonnen sa mwen fè ki mal. Senyè a va ba ou yon fanmi ki p'ap janm disparèt, paske batay w'ap mennen yo se batay Senyè a yo ye. Ou p'ap janm fè anyen ki mal nan tout lavi ou. Si yon moun konprann pou li atake ou, si l'ap chache touye ou, Senyè a, Bondye ou la, va pwoteje ou. L'a sere ou bò kote l tankou lè yon moun ap sere yon bagay li renmen anpil. Men l'ap pran lènmi ou yo, l'ap voye yo jete byen lwen tankou lè yon moun ap voye wòch nan fistibal. Konsa, lè Senyè a va fè pou ou tout bèl bagay li te pwomèt ou yo, lè l'a mete ou chèf sou pèp Izrayèl la, wi, lè sa a, mèt mwen, ou p'ap bezwen nan regrèt, ni konsyans ou p'ap boulvèse dèske ou te mete san moun deyò san rezon osinon dèske ou te pran revanj ou sou moun. Lè Senyè a va beni ou, tanpri pa bliye m. David di Abigayèl konsa: — Lwanj pou Senyè a, Bondye pèp Izrayèl la, ki voye ou jòdi a vin kontre avè m! Kite m di Bondye mèsi pou bon konprann ou genyen an, pou ou menm tou dèske jòdi a ou vin kenbe men m pou m pa mete san moun deyò, pou m pa tire revanj mwen mwen menm. Senyè a pa kite m fè ou anyen. Men tou, si ou pat prese vin kontre avè m, mwen fè sèman devan Senyè a, Bondye pèp Izrayèl la, anvan denmen maten tout gason fanmi Nabal yo, ata ti gason piti yo, t'ap pèdi lavi yo. Abigayèl renmèt David tou sa li te pote, epi David di l: — Tounen lakay ou ak kè poze! Mwen koute tou sa ou di m la a. Ou pa bezwen bat kò ou.