Salomon te gen anpil madanm moun lòt nasyon. San konte pitit fi wa Lejip la, li te gen madanm ki soti Mowab, Amon, Edon, Sidon ak peyi Et. Li te marye ak anpil fanm ki sòti nan lòt nasyon, atout Senyè a te bay moun pèp Izrayèl yo lòd pou yo pa janm marye ak moun sa yo, pou yo pa janm kite yo mele ak yo, paske moun sa yo va pran tèt yo pou fè yo sèvi bondye pa yo. Men, Salomon te sitèlman renmen yo, li marye ak yo. Salomon te marye ak sètsan fanm ki soti nan fanmi gwo chèf. Lèfini li te pran twasan lòt fanm pou mètrès li. Medam yo te fè li vire do bay Bondye. Lè Salomon konmanse granmoun, medam yo pran tèt li, yo fè l al sèvi lòt bondye. Li pa sèvi Senyè a, Bondye li a, ak tout kè li ankò, jan David, papa l, te fè l la. Li pran sèvi Astate, bondye peyi Sidon an, ak Milkòm, vye zidòl degoutan peyi Amon an. Salomon tanmen fè sa ki mal devan Senyè a. Li pa sèvi l ak tout kè li jan David, papa l, te fè a. Sou mòn ki sou bò solèy leve lavil Jerizalèm lan, li bati de tanp, yonn kote yo fè sèvis pou Kemòch, vye zidòl degoutan peyi Mowab la, ak yonn kote yo fè sèvis pou Molòk, vye zidòl degoutan peyi Amon an. Se konsa li bati lòt tanp kote pou medam lòt nasyon li te marye yo al boule lansan ak ofri bèt pou touye pou bondye pa yo. Senyè a move sou Salomon paske Salomon te vire do bay Senyè a, Bondye pèp Izrayèl la. Atout Senyè a te parèt de fwa devan Salomon, atout li te ba li lòd pou li pa sèvi bondye lòt nasyon yo, Salomon pat koute Senyè a, li pa swiv lòd li yo. Senyè a di Salomon konsa:
— Gade sa ou fè! Ou pa respekte kontra mwen te pase avè ou la, ou pa fè sa m te ba ou lòd fè. M'ap wete baton kòmandman an nan men ou, m'ap mete yonn nan chèf ou yo nan plas ou. Men, poutèt David, papa ou, mwen p'ap fè sa nan vivan ou. Se nan men pitit gason ou lan m'ap wete gouvènman an. Men, mwen p'ap wete tout peyi a nèt anba lòd li. Poutèt David, sèvitè m lan, poutèt lavil Jerizalèm mwen chwazi pou rele m pa m lan, m'ap kite yon branch fanmi pou li.
Ap Bib la
Ap Bib pou timoun
