1 Wa 10:1-13

Larenn peyi Saba tande pale ki kalite moun Salomon te ye, ak jan sa te sèvi yon lwanj pou Senyè a. Li vwayaje espre lavil Jerizalèm pou li vin sonde konesans Salomon avèk kèk kesyon difisil. Se konsa, li rive lavil Jerizalèm avèk yon pakèt moun ak anpil chamo chaje fèy santi bon, bèl pyè koute chè ak kantite lò. Lè li rive devan Salomon, li mande l tout kalite kèsyon li te fè lide mande l. Salomon menm reponn tout kèsyon l yo. Pat gen anyen ki te twò difisil ni pou li reponn ni pou li esplike. Larenn peyi Saba a wè jan Salomon te gen anpil bon konprann. Li wè palè li te bati a. Li wè kalite manje yo te sèvi sou tab li ak kay li te fè bati pou chèf li yo, jan li te òganize moun k'ap travay nan palè a, rad inifòm yo te genyen, domestik ki t'ap sèvi l bweson, ak bèt li te ofri pou boule nèt pou Senyè a nan Tanp lan. Lè li wè tou sa, li pèdi lapawòl tèlman li te sezi. Li di wa Salomon konsa: — Sa m te tande nan peyi m sou ou ak sou bon konprann ou an, se te vre! Mwen pa te vle kwè toutotan mwen pa te vini wè ak pwòp je mwen. Men sa mwen te tande yo pa rive nan pwent pye sa mwen konstate. Bon konprann ou ak richès ou depase lontan sa yo te di mwen yo. Ala bèl chans madanm ou yo genyen! Ala bèl chans moun k'ap travay avè ou yo genyen! Yo toujou la devan ou ap tande pawòl bon konprann k'ap sòti nan bouch ou! Lwanj pou Senyè a, Bondye ou la! Li moutre jan li kontan avè ou. Li mete ou wa peyi Izrayèl la. Li menm ki renmen peyi Izrayèl la pou tout tan, li mete ou wa pou ou ka kenbe peyi a nan lòd, nan bon chemen san patipri. Larenn lan fè wa a kado senk tòn lò ak kantite fèy santi bon ak anpil pyè koute chè. Wa a pa janm resevwa nan lavi li kantite fèy santi bon larenn Saba te ba li lè sa a. Batiman Iram yo ki te al chache lò nan peyi Ofi, te pote sòti nan menm peyi sa a yon gwo kantite bwa koray ak anpil bèl pyè koute chè. Salomon sèvi ak bwa koray la pou fè balistrad nan Tanp lan ak nan palè a. Li fè gita ak bandjo pou mizisyen yo ak bwa sa a tou. Se te pi bon kalite bwa koray yo te janm fè antre nan peyi Izrayèl. Depi lè sa a yo pa janm wè sa ankò. Wa Salomon te bay larenn peyi Saba a tou sa li te mande l, san konte lòt kado li menm, wa Salomon, li te vle ba li. Apre sa, larenn lan tounen nan peyi Saba ansanm ak tout moun ki te avè l yo.