David reyini tout chèf lame a, ni sa ki te alatèt rejiman mil (1.000) sòlda yo ni sa ki te alatèt divizyon san sòlda yo, li pran konsèy nan men yo. Lèfini, David di pèp Izrayèl la:
— Si nou wè se yon bon lide, si se volonte Senyè a, Bondye nou an, nou pral voye misyon bay tout frè nou yo ki rete toupatou nan tout peyi a, bay tout prèt yo ak tout moun Levi yo nan lavil kote yo rete ak nan savann kote yo fè gadinaj, pou yo vin mete tèt yo ansanm ak nou, pou n'al chache Bwat Kontra Bondye nou an, paske nou te bliye l pandan tout reny Sayil la.
Tout pèp la te dakò pou yo te fè sa, paske yo wè se te yon bon lide.
Se konsa, David reyini tout pèp Izrayèl la nan tout peyi a, depi kannal Sikò sou fontyè ak peyi Lejip la rive jouk Pas Amat la, pou y'al chache Bwat Kontra a lavil Kiriyat-Jarim. Se konsa li pati avèk tout pèp Izrayèl la, pou lavil Kiriyat-Jarim yo te rele Baala tou, nan peyi Jida, pou y'al chache Bwat Kontra Bondye a, bwat ki pote non Senyè ki gen tout pouvwa a, Senyè ki gen fòtèy li anwo zanj cheriben yo. Lè yo rive kay Abinadab, yo pran Bwat la, yo mete l sou yon kabwa tou nèf. Ouza ak Akijo t'ap mennen kabwa a. David ansam ak tout moun Izrayèl yo menm t'ap danse ak tout nanm yo. Yo t'ap chante fè lwanj Senyè a, yo t'ap jwe gita ak bandjo, yo t'ap bat tanbouren ak senbal, yo t'ap kònen twonpèt.
Lè yo rive bò glasi Kidon an, bèf yo bite, yo manke tonbe. Ouza lonje men l pou kenbe Bwat Kontra a. Men, Senyè a move sou Ouza, li touye l frèt, paske li pat dwe manyen Bwat Kontra a. Bondye touye l, Ouza mouri la menm devan Bondye.
Ap Bib la
Ap Bib pou timoun
