លូកា 22
22
ឞូតឹមទីនាវញុបឞ្រាសយេឆូ
(មថ ២៦:១-៥, ១៤-១៦; មក ១៤:១-២, ១០-១១; យហ ១១:៤៥-៥៣)
1ជេសរីបុននុមពាង់មោគែសនទ្រូយ អីឞូក្វាល់លាសបុននហ៝តដ៝ង់ លែៈឞើយមាត៝ត់ជេស។#នង ១២:១៥-២០ 2មពោលកោរាញជានឞ្រាស នទ្រែលមាផូងនើមនតីនាវវៃផូងអីឆ្រាអែល ជ៝យនាវមើមជានគៃមាងខឹតលើយឞ្រាសយេឆូ មោអ៝ន់គែសនាវអុសអាស យ៝រមាខាន់ពាង់ក្លាចផូងប៝នលាននូយ្សនោកញុបពាង់។ 3ជេសរីឆាតាង់ អីកោរាញមពោលឞ្រាសអ្យើសលាប់គុតាយូដាស អីឞូក្វាល់អីឆាការីយោត ដ៝ង់។ ពាង់ជេងទូហ្វេឞូនុយ្សតា ១២ នុយ្សមពោលកោរាញអ៝សម៝ននៃដ៝ង់។#យហ ១៣:២, ២៧ 4ពាង់ហាន់ម៝ប់មាមពោលកោរាញជានឞ្រាស នទ្រែលមាមពោលកោរាញតាហែនញីសជានឞ្រាស គៃមាញច្រាៈឞាល់មើមជ៝យនាវគៃមាគែសញជុនឞ្រាសយេឆូ មាខាន់ពាង់។ 5ជេសញច្រាៈឞាល់នាវអីនៃ ផូងអីនៃរាម់ងាន់ ខាន់ពាង់លែៈតឹមទីត៝នអ៝ន់ព្រាក់មាពាង់។ 6យូដាស-អីឆាការីយោត អុចដ៝ង់ ជេសរីជ៝យម៝ងគៃមាលែវឞូហាន់ញុបឞ្រាសយេឆូ នោកផូងប៝នលានមោគែសគុនទ្រែលពាង់។
ឞ្រាសយេឆូ ដាៈឞូនទ្រាប់ជានញេតបុននហ៝ត
(មថ ២៦:១៧-២៥; មក ១៤:១២-២១; យហ ១៣:២១-៣០)
7ជេសរីនារនទ្រាប់ញេតបុននុមពាង់មោគែសនទ្រូយលែៈត៝ត់ជេស ជេងនារឞូងខឹតក៝នឞែឞ្យាប់មាជានឞ្រាស នទ្រែលមាញេតបុននហ៝ត។#នង ១២:៣-៦ 8ជេសរីឞ្រាសយេឆូ ដាៈឞារហៃកោរាញអ៝សម៝នពេត្រោស នទ្រែលយោហាន ហាន់ល៝រ ពាង់លាសមាខាន់ពាង់៖ “ខាន់មៃហាន់នទ្រាប់នាវញេតបុននហ៝តអ្យាឞ៝ន់ទែមាឆោងឆា”។ 9ខាន់ពាង់អោបឞ្រាសយេឆូ ៖ “ហើយកោរាញ អាសនតុកមៃអុចអ៝ន់ហេននទ្រាប់នាវញេតឆោងឆាអ្យាមេស?” 10ឞ្រាសយេឆូ អើស៖ “អ្យាត់គ៝ប់ហ៝ម់ ត៝ត់លាប់តាប៝នយេរូឆាលឹម រីតៃ ខាន់មៃឆៃទូហ្វេឞូក្លោតេៈទាកយាង់តាមលីក។ អ៝ន់ខាន់មៃហាន់តឹងពាង់នហ៝មាត៝ត់ពាង់លាប់តាត្រោមជៃ។#លក ១៩:៣០-៣១ 11ជេសរីខាន់មៃងើយដាសមាតើមជៃអីនៃលាស៖ «នើមនតីហេនដាៈហេនហាន់អោបមៃ ជ្រោមាពាង់ញេតបុននទ្រែលអ៝សម៝នតានារញេតបុននហ៝តអ្យា អាសនតុកមេស?» 12ឞូនុយ្សតើមជៃនៃលែវមាខាន់មៃរ៝តានតុកកាលើរី។ ជ្រោហ្វីងាន់ លែៈអើមជេសនទ្រាប់ផ្យៅ អ៝ន់ខាន់មៃនទ្រាប់នាវញេតឆោងអ៝ន់មាឞ៝ន់តាជ្រោនៃរ៝”។ 13ជេសរីឞារហៃខាន់ពាង់នៃឞ្រោៈទ្រើនរ៝ ត៝ត់អារីឆៃកើតនាវឞ្រាសយេឆូ លាសនើស ជេសរីខាន់ពាង់នទ្រាប់នទើឆោងឆាមានាវញេតបុននហ៝តអីនៃ។
នាវញេតឆាងកាសក្ល៝សអ្វែស
(មថ ២៦:២៦-៣០; មក ១៤:២២-២៦; ១កោ ១១:២៣-២៥)
14ត៝ត់ទីម៝ងនៃ ឞ្រាសយេឆូ គុឆោងឆាតាញឆឺងនទ្រែលមពោលកោរាញអ៝សម៝ន 15ពាង់លាស៖ “ហើយអ៝សម៝ន គ៝ប់អុចហោងាន់ឆោងឆានទ្រែលខាន់មៃតានារញេតបុននហ៝តអ្យា អេល៝រមាគ៝ប់គែសនាវជេរជ៝ត់។ 16គ៝ប់មឞើសមាខាន់មៃ គ៝ប់មោហោមអោសឆោងឆាញេតបុននហ៝តអ្យាជឹត នហ៝មាត៝ត់ញេតបុនអ្យាគែសនោកកោរាញឞ្រាសម៝ត់អ្វាញ់ទឹងលែៈឞូនុយ្សងាន់រីមើ”។#លក ២២:៣០; ១៣:២៩ 17ជេសរីឞ្រាសយេឆូ ឆ៝ៈកាច៝កនទ្រាញ់ព្លៃយុងយារប៝ន លាសអ្វែសមាកោរាញឞ្រាស។ ជេសលាសអ្វែសរីពាង់លាស៖ “ឆ៝ៈកាច៝កអ្យាតឹមពាៈឞាល់ញេត។ 18គ៝ប់មឞើសមាខាន់មៃ នតើមឞើសអាបៃអ្យាគ៝ប់មោហោមអោសញេតនទ្រាញ់ព្លៃយុងយារប៝នជឹត នហ៝មាត៝ត់កោរាញឞ្រាសម៝ត់អ្វាញ់ទឹងលែៈឞូនុយ្សងាន់មើ”។ 19ជេសរីពាង់ឆ៝ៈដ៝ង់នុមពាង់លាសអ្វែសមាកោរាញឞ្រាស ពាង់គិចនុមពាង់អីនៃអ៝ន់ខាន់ពាង់ឆានហ៝មាលាស៖ “អ្យាជេងឆាក់ជាន់គ៝ប់#២២:១៩៖ មោលាស «ជេងនទើមឞេនមាឆាក់ជាន់គ៝ប់នើម»។ អីគ៝ប់អ៝ន់មាខាន់មៃតៃ អ៝ន់ខាន់មៃជានកើតនអាលែតជឹតនាប់តៃ គៃមាកាសគឹតមាគ៝ប់”។#លក ២៤:៣០ 20លោចជេសនាវញេតឆោងនៃ ឞ្រាសយេឆូ ឆ៝ៈកាច៝កនទ្រាញ់ព្លៃយុងយារប៝នជានកើតអីនៃដ៝ង់ ពាង់លាស៖ “នទ្រាញ់ព្លៃយុងយារប៝នតាកាច៝កអ្យាជេងនាវតឹមរាង្លាប់មហែកោរាញឞ្រាសនទ្រែលខាន់មៃ។ នាវតឹមរាង្លាប់មហែអីនៃគ៝ប់ជានមាខាន់មៃមាមហាមគ៝ប់អីហ៝ចឞើសឆាក់ជាន់គ៝ប់នោកគ៝ប់ខឹតតៃ។#២២:២០៖ មោលាស «នទ្រាញ់ព្លៃយុងយារប៝នតាកាច៝កអ្យាជេងនទើមឞេនមាមហាមគ៝ប់អីហ៝ចឞើសឆាក់ជាន់គ៝ប់នោកគ៝ប់ខឹតតៃ មហាមអីនៃជាននាវតឹមរាង្លាប់មហែកោរាញឞ្រាសនទ្រែលខាន់មៃ»។#នង ២៤:៨; យេរ ៣១:៣១-៣៤ 21ល៝ង់ឞូនុយ្សអីញជុនគ៝ប់មាផូងរាលាង់ដាសគ៝ប់ ពាង់គុឆោងឆានទ្រែលគ៝ប់តាញឆឺងអ្យាដ៝ង់។ 22អ្យាត់មាគ៝ប់អីក៝នឞូនុយ្សតាៈឞើសកោរាញឞ្រាសមរាខឹត តឹងកោរាញឞ្រាសនើមលែៈអុច យើនមាឞូនុយ្សអីញជុនគ៝ប់គែសនាវរេសរាញាល់ងាន់រ៝មាពាង់”។#អេឆា ៥៣:៨-៩ 23ជេសរីមពោលកោរាញអ៝សម៝នអីនៃតឹមអោបនទ្រាង់ខាន់ពាង់នើម ឞូម៝សពាង់អីជាននាវអីនៃតាមពោលខាន់ពាង់នើមរី។
អ៝ន់កោរាញឆើមកើលជានការមាឞូ
24នោកនៃមពោលកោរាញអ៝សម៝នគែសនាវតឹមរាលាច់ឞាល់ ឞូម៝សពាង់អីក្វ៝ង់រាលាវឞូតាមពោលខាន់ពាង់នើម។#លក ៩:៤៦ 25ឞ្រាសយេឆូ លាសមាខាន់ពាង់៖ “ទឹងលែៈកាដាច់ឞ្រីអីមោទីផូងឞ្រីឞ៝ន់ ខាន់ពាង់ក្វាន់ឞោកផូងប៝នលានខាន់ពាង់នើម ជេសរីមពោលអីគែសនាវទើយអីនៃលាសអេងឆាក់ខាន់ពាង់នើមជេងឞូនុយ្សអ្វែស។ 26យើនមាតាមពោលខាន់មៃលើយអោសជានកើតនៃ។ ឞូម៝សពាង់អីក្វ៝ង់រាលាវឞូអ៝ន់ជានតឹមឞានមាឞូនុយ្សជេៈតាន៝ម់ឞូ។ ឞូម៝សអីកោរាញ អ៝ន់ពាង់ជានតឹមឞានមាឞូនុយ្សឆើមកើលជានការមាឞូ។ 27យ៝រលាសឞូនុយ្សគុឆោងតាញឆឺង ដាសមាឞូនុយ្សឆើមឆ៝ៈព្យាង់ត្រាវ ឞូម៝សលើក្វ៝ង់? ឞូវៃលាសក្វ៝ង់រាលាវជេងឞូនុយ្សអីគុឆោងតាញឆឺងរី មាដាសឞូនុយ្សឆើមឆ៝ៈព្យាង់ត្រាវ។ ល៝ង់គ៝ប់អ្យាកោរាញខាន់មៃគុនទ្រែលខាន់មៃ គ៝ប់ជេងតឹមឞានមាឞូនុយ្សឆើមកើលជានការឆើមឆ៝ៈព្យាង់ត្រាវទើម។#យហ ១៣:១២-១៥ 28ខាន់មៃលែៈញឆ្រោយ្សនទ្រែលគ៝ប់តានាវជេរគ៝ប់ដ៝ង់។#យហ ៦:៦៧-៦៩ 29កើតឞឹគ៝ប់លែៈអ៝ន់មាគ៝ប់ កើតនទ្រីទឹងគ៝ប់អ៝ន់មាខាន់មៃម៝ត់អ្វាញ់ផូងញឆីងមាគ៝ប់ដ៝ង់#លក ១២:៣២ 30គៃមាខាន់មៃគុឆោងឆាតាញឆឺងនទ្រែលគ៝ប់នោកគ៝ប់ជេងកាដាច់ងាន់។ នហ៝មាខាន់មៃគុតារានើលកាដាច់ គៃមាផាតទោយ្សលែៈឞូនុយ្សតា ១២ មពោលរាន៝យទែសឞ៝ន់#២២:៣០៖ ផូងអីឆ្រាអែល កើបមពោលក្វ៝ង់តឹងក៝នឞូក្លោយាកោប ១២ នុយ្ស។នៃ”។#១កោ ៦:២; នតម ៣:២១
ឞ្រាសយេឆូ លាសពេត្រោស រាលាច់មោគឹតនាល់ពាង់
(មថ ២៦:៣១-៣៤; មក ១៤:២៧-៣១; យហ ១៣:៣៦-៣៨)
31 ឞ្រាសយេឆូ លាស៖ “ហើយឆីមោន #២២:៣១៖ ឆីមោន អ្យាឞូក្វាល់ពេត្រោស ដ៝ង់។ ហើយឆីមោន អ្យាត់គ៝ប់ហ៝ម់! លែៈឆាតាង់ អីកោរាញមពោលឞ្រាសអ្យើសទាន់មាកោរាញឞ្រាសរាល៝ងខាន់មៃ។ ជេសរីកោរាញឞ្រាសអ៝ន់ជានកើតនទ្រី។ ឆាតាង់ អុចអ៝ន់នាវនទើមមាខាន់មៃ គៃមាឆៃឞូម៝សអីមោញឆីងងាន់មាគ៝ប់ ពាង់ជេងតឹមឞានមាឞូរាឆែងផែគៃមាលោសល៝ក់។#២កោ ២:១១ 32យើនមាលែៈគ៝ប់មឞើសឆើមទាន់មាឞឹ លើយអ៝ន់មៃឞាសញឆីងមាគ៝ប់។ ជេសរីត៝ត់មៃព្លឹឆឹតតៃមាគ៝ប់ ញឆីងមាគ៝ប់ជឹត អ៝ន់មៃកើលអ៝សម៝នគ៝ប់អ៝ន់ខាន់ពាង់ញឆីងន៝ប់មាគ៝ប់”។#យហ ១៧:៩-១៥; ២១:១៥ 33ឆីមោន អីឞូក្វាល់ពេត្រោស ដ៝ង់ ពាង់អើស៖ “ហើយកោរាញ! គ៝ប់លែៈជេសនទ្រាប់ឆាក់ជាន់ អាសនតុកមៃហាន់ គ៝ប់តឹងហាន់ដ៝ង់ ឞ៝លលាសគុនទ្រូង មោលាសត៝ត់ខឹតឆាក់”។ 34ឞ្រាសយេឆូ លាសមាពាង់៖ “ហើយពេត្រោស ! គ៝ប់មឞើសមាមៃ មាង់អ្យាអ្យារ់អេហ៝ៈនទ្រាវ ត៝ត់មាមៃរាលាច់ពែតឹលាសមោគឹតនាល់គ៝ប់”។#លក ២២:៦០-៦១
35ជេសរីឞ្រាសយេឆូ លាសមាខាន់ពាង់៖ “នោកគ៝ប់ដាៈខាន់មៃហាន់គៃមាមឞើសនាវមហែមហានអ្វែសនើស មោគែសព្រាក់ មោគែសទុង មោគែសញអោតនតោជ៝ត លែៈរឹងឞើស?” អ៝សម៝នអើសមាពាង់៖ “អើ លែៈរឹង”។#លក ៩:២-៣; ១០:៤ 36ឞ្រាសយេឆូ លាស៖ “អាបៃអ្យា ឞូម៝សគែសទុងព្រាក់ ឞូម៝សគែសទុងចែង អ៝ន់ពាង់ញអោតតាឆាក់ពាង់នើម។ ឞូម៝សអីមោគែសដាវ អ៝ន់ពាង់តាច់អាវក្វ៝ង់ពាង់នើមមារាវាត់ទូងគ៝រ់ដាវ។ 37គ៝ប់មឞើសមាខាន់មៃ តាឆ៝ម់បុតនាវកោរាញឞ្រាសងើយលែៈញចីសលាសមាគ៝ប់៖ «ឞូកើបពាង់ជេងតឹមឞានមាឞូនុយ្សគែសទោយ្ស»។ អ្យាត់មានទើអ្យាជេងត៝ត់ងាន់ យ៝រមាអ្យាត់មាទឹងលែៈនទើអីគែសញចីសមាគ៝ប់ជេងត៝ត់ងាន់រ៝”។#អេឆា ៥៣:១២ 38អ៝សម៝នអើសមាពាង់៖ “ហើយកោរាញ! ឞ៝ន់គែសឞារងគ៝រ់ដាវ”។ ឞ្រាសយេឆូ អើស៖ “អើ ងើយទាសនៃលែៈគាប់ហើយ្ស”។
ឞ្រាសយេឆូ គុមឞើសឆើមតាយោកតើមអោលីវ
(មថ ២៦:៣៦-៤៦; មក ១៤:៣២-៤២)
39ជេសរីឞ្រាសយេឆូ លោសឞើសជៃនៃ តឹងមានាវវៃពាង់ ពាង់ហាន់តាយោកតើមអោលីវ រី មពោលអ៝សម៝នលែវឞាល់ហាន់តឹងពាង់ដ៝ង់។#លក ២១:៣៧ 40ត៝ត់តានតុកពាង់វៃហាន់នៃ ឞ្រាសយេឆូ លាសមាខាន់ពាង់៖ “មឞើសឆើមហ៝ម់ គៃមាមោជានតីសនោកគែសនាវនទើម”។#លក ២១:៣៦ 41ជេសរីឞ្រាសយេឆូ ហាន់បាសងាយឞើសខាន់ពាង់នៃក្លាប់លាសត្រុយ្សនតុបលុ។ ត៝ត់តារីពាង់គុច៝នម៝នកោម៝ក់ មឞើសឆើមកើតនអា៖ 42“ហើយឞឹ! លាសមៃអុច ទាន់មៃលើយអោសអ៝ន់គែសនាវជ៝ក់ជេរអ្យាមាគ៝ប់#២២:៤២៖ មោលាស «ទាន់មៃឆ៝ៈកាច៝កអ្យាបាសងាយឞើសក៝ន»។ កាច៝កនទ្រាញ់ព្លៃយុងយារប៝ន គែសអ៝ក់ជេងនាវមឞេនមានាវជេរជ៝ត់តានាវកោរាញឞ្រាសងើយ។។ យើនមាលើយអោសតឹងនូយ្សនហ៝ម់គ៝ប់អុច អ៝ន់តឹងនាវមៃអុចហ៝ៈ”។#យហ ៦:៣៨; ផល ២:៨; ហេឞ ៥:៧-៨ 43ទោលនៃគែសឆៃតោងពារ់កោរាញឞ្រាសជុរតាៈឞើសកាលើត្រោកនតុកកោរាញឞ្រាស អ៝ន់ឞ្រាសយេឆូ គែសនហ៝ម់ឆ្វានទាង់។ 44តានៃពាង់គែសនាវរាង៝តរាវៃទុតហោ ជេសរីពាង់មឞើសឆើមលើមាហោដ៝ង់ លោសទាករាហាលពាង់តឹមឞានមាហ៝ចមហាមត្រោសក្លិចងាន់តានែសរី។#ហេឞ ៥:៧ 45ឞ្រាសយេឆូ ទ៝ក់ឞើសនតុកមឞើសឆើមនៃ ហាន់ជឹតមពោលអ៝សម៝នពាង់ ឆៃមពោលអ៝សម៝ននៃហាក់ឞិចទាទេ ខាន់ពាង់រាគាញ់យ៝រមារាង៝តហោអីរតានូយ្សនហ៝ម់។ 46ពាង់រាលៃខាន់ពាង់លាស៖ “ម៝សឞិចខាន់មៃនៃ? ទ៝ក់មឞើសឆើមហ៝ម់ គៃមាមោជានតីសនោកគែសនាវនទើម”។
ឞូញុបឞ្រាសយេឆូ
(មថ ២៦:៤៧-៥៦; មក ១៤:៤៣-៥០; យហ ១៨:៣-១១)
47ទោលឞ្រាសយេឆូ ហោមងើយនៃ ទោមាត៝ត់យូដាស-អីឆាការីយោត នអ៝ប់មាលែវទូមពោលឞូនុយ្ស ពាង់ហាន់ទាច់ឞ្រាសយេឆូ ជេសរីចុមអ្វែសលាង់ឞ្រាសយេឆូ តឹងនាវវៃផូងអីឆ្រាអែល ពាង់ជេងអ៝សម៝នតាមពោល ១២ នុយ្សនៃដ៝ង់។ 48ឞ្រាសយេឆូ លាសមាពាង់៖ “ហើយយូដាស មៃជានចុមទូត៝ងកើតនៃគៃមាញជុនគ៝ប់អីក៝នឞូនុយ្សតាៈឞើសកោរាញឞ្រាសនទ្រីឞើស?” 49ជេសរីមពោលអីគុនទ្រែលឞ្រាសយេឆូ ឆៃនាវអីឞើយមាត៝ត់ លាសមាឞ្រាសយេឆូ ៖ “ហើយកោរាញ! អ៝ន់ហេនឆ៝ៈដាវមាឆ្រែសឞើស?” 50គែសទូហ្វេអ៝សម៝នរីតាក់ដាវឆ្រែសទឹកកោរាញជានឞ្រាសទុតក្វ៝ង់តាច់តោរឞើសមា។ 51តីសមាឞ្រាសយេឆូ លាស៖ “លើយហោម!” ជេសរីឞ្រាសយេឆូ ញុបតោរឞូក្លោអីនៃ ជានតោរពាង់អ៝ន់ឞាសកើតអើម។ 52ជេសរីឞ្រាសយេឆូ លាសមាមពោលកោរាញជានឞ្រាស មាមពោលកោរាញតាហែនញីសជានឞ្រាស នទ្រែលមាមពោលកោរាញអេងជឹតអីហាន់ញុបពាង់នៃ៖ “ម៝សឞ្រោៈខាន់មៃញអោតនអ៝ប់មាម៝ង់មាដាវកើតនៃ កើបគ៝ប់ជេងឞូនុយ្សនតុងឞើស? 53នោកគ៝ប់គុតាជ៝ង់គូងញីសជានឞ្រាសអាប់នារនទ្រែលខាន់មៃ ខាន់មៃមោអោសញុបគ៝ប់។ ម៝ងអ្យាជេងម៝ងកោរាញឞ្រាសអ៝ន់ខាន់មៃជាននាវអីខាន់មៃអុច ជេងម៝ងអីកោរាញឞ្រាសអ៝ន់ឆាតាង់ អីកោរាញមពោលឞ្រាសអ្យើសម៝ត់អ្វាញ់តានាវង៝រីជាននាវអីពាង់អុច”។#លក ១៩:៤៧
ពេត្រោស រាលាច់លាសមោគឹតនាល់ឞ្រាសយេឆូ
(មថ ២៦:៥៧-៥៨, ៦៩-៧៥; មក ១៤:៥៣-៥៤, ៦៦-៧២; យហ ១៨:១២-១៨, ២៥-២៧)
54ជេសរីឞូញុបលែវឞ្រាសយេឆូ ហាន់តាជៃកោរាញជានឞ្រាសរី។ ល៝ង់ពេត្រោស រីតឹងឞើសកើយឞ្រោៈនទ៝ប់ឞោកមពើលឞោក។ 55តាងក្លាងជ៝ង់គូងជៃនៃឞូទែឆុញអុញ ជេសរីគុញជ៝រ់អុញអីនៃ។ អីពេត្រោស រីគុនទ្រែលឞូតានៃដ៝ង់។ 56គែសទូហ្វេទឹកឞូអូរតានៃ ឆៃពេត្រោស តាអាងអុញរី ពាង់អ្វាញ់ផ៝ង់ជឹតពេត្រោស រីលាស៖ “ពាង់អីនៃមពោលឞូនុយ្សអីឞូញុបនៃដ៝ង់!” 57ពេត្រោស រាលាច់៖ “ហើយយោស! គ៝ប់មោអោសគឹតនាល់ពាង់”។ 58ទូនទ៝ម់ឞើសកើយនៃ គែសទូហ្វេឞូក្លោអេងឆៃពេត្រោស លាសមាពាង់ដ៝ង់៖ “មៃឞាល់មពោលឞូនុយ្សអីឞូញុបនៃដ៝ង់!” ពេត្រោស អើស៖ “មោអោស! មោទីគ៝ប់អោស!” 59ក្លាប់លាសទូម៝ងឞើសកើយនៃ គែសទូហ្វេឞូនុយ្សជឹតអ្វាញ់ជឹតពេត្រោស រីដ៝ង់ ជេសរីតឹមលាសនទ្រាង់ខាន់ពាង់៖ “ឞូក្លោអីនៃឞាល់មពោលនទ្រែលឞូនុយ្សអីឞូញុបនៃងាន់រ៝ យ៝រមាពាង់ផូងកាលីលេ ដ៝ង់ នាវងើយពាង់នាវងើយផូងកាលីលេ ”។ 60ពេត្រោស អើសលាស៖ “គ៝ប់មោគឹតម៝សនាវមៃអុចលាស”។ នោកពាង់ហោមអែងើយនៃ គែសអ្យារ់នទ្រាវរ៝។ 61ជេសរីកោរាញយេឆូ ងគឹលអ្វាញ់ជឹតពេត្រោស រី។ តានៃពេត្រោស កាសគឹតនាវកោរាញយេឆូ លាសមាពាង់នើស៖ “មាង់អ្យា ល៝រមាអ្យារ់នទ្រាវ មៃរាលាច់ពែតឹលាសមោគឹតនាល់គ៝ប់”។#លក ២២:៣៤ 62ជេសរីពេត្រោស លោសអាទីសញុមរាង៝តហោងាន់រ៝។
ឞូមឞាងរាកឆ្វាយឞ្រាសយេឆូ
(មថ ២៦:៦៧-៦៨; មក ១៤:៦៥)
63មពោលអីគុញជ្រាង់ឞ្រាសយេឆូ នតើមគើមងគ្រើសមាពាង់ លើសពាង់ 64ឆ៝ៈឞ៝កពូតលើយត្រោមមាត់ពាង់ លើសតៃពាង់ ជេសរីលាស៖ “លាសមៃជេងឞូនុយ្សនតើយ្សនាវងើយកោរាញឞ្រាសងាន់ មៃលែៈគឹតជេសឞូម៝សលើសមៃ លាសនទ្រីល៝ង់មៃមឞើសមាហេន!”#មថ ២១:១១ 65ជេសរីឞូរាកឞូឆ្វាយពាង់ហោជឹត។
ឞ្រាសយេឆូ គុឞើសនាប់មពោលកោរាញជានការឞ្រីយូដា
(មថ ២៦:៥៩-៦៦; មក ១៤:៥៥-៦៤; យហ ១៨:១៩-២៤)
66ត៝ត់អាងអោយ គែសកោរាញផូងអីឆ្រាអែល អ៝ក់តឹមម៝ប់ឞាល់ តាផូងអីនៃគែសមពោលកោរាញជានឞ្រាសដ៝ង់ នទ្រែលមាគែសផូងនើមនតីនាវវៃផូងអីឆ្រាអែល ដ៝ង់ ដាៈឞូលែវឞ្រាសយេឆូ ហាន់ឞើសនាប់ខាន់ពាង់អីមពោលកោរាញជានការផូងអីឆ្រាអែល ។ 67ជេសរីផូងអីនៃអោបឞ្រាសយេឆូ ៖ “លាសមៃជេងឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់ងាន់ ល៝ង់មៃមឞើសមាហេន”។ ឞ្រាសយេឆូ អើស៖ “លាសគ៝ប់មឞើសមាខាន់មៃ ខាន់មៃមោអ្យាត់គ៝ប់ដ៝ង់#លក ៩:២០ 68ជេសរីលាសគ៝ប់អោបខាន់មៃមាឞ្រាសក្រីស អីនៃ ខាន់មៃមោមឞើសមាគ៝ប់[ មោមអើកគ៝ប់]ដ៝ង់។ 69យើនមានតើមឞើសអ្យាជឹតនាប់ គ៝ប់អីក៝នឞូនុយ្សតាៈឞើសកោរាញឞ្រាសគុឞើសមាតីកោរាញឞ្រាសនើមអីទុតក្វ៝ង់គៃមាម៝ត់អ្វាញ់”។#នម ១១០:១; ដាន ៧:១៣-១៤ 70លែៈផូងអីនៃអោបឞ្រាសយេឆូ ៖ “លាសនទ្រីមៃអីក៝នកោរាញឞ្រាសបាស?” ឞ្រាសយេឆូ អើស៖ “នាវខាន់មៃលាសអីនៃទីងាន់ គ៝ប់អ្យារ៝”។#កល ២៤:១៦; នក ១៥:៣០ 71ខាន់ពាង់តឹមលាសនទ្រាង់ខាន់ពាង់នើម៖ “ឞ៝ន់មោហោមខាច់អោសអោបនាវឞើសឞូអេងជឹតគៃមាផាតទោយ្សពាង់ នាវពាង់ងើយអីឞ៝ន់នើមលែៈតាង់នៃលែៈគាប់ជេស។ យ៝រលាសពាង់លាសអេងឆាក់ពាង់នើមអីក៝នកោរាញឞ្រាស គែសនាវខ្លៃពាង់កើបអេងពាង់នើមតឹមឞានមាកោរាញឞ្រាស នាវអីនៃជេងគែសទោយ្សជ្រូត៝ត់មាខឹតឆាក់ងាន់”។
Chwazi Kounye ya:
លូកា 22: cmoK
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© (Active) Wycliffe Bible Translators, Inc. All rights reserved.