លូកា 20
20
នាវទើយឞ្រាសយេឆូ
(មថ ២១:២៣-២៧; មក ១១:២៧-៣៣)
1គែសទូនារឞ្រាសយេឆូ គុនតីប៝នលានតាជ៝ង់គូងញីសជានឞ្រាសមាកោរាញឞ្រាស នទ្រែលមាមឞើសងក៝ចនាវមហែមហានអ្វែស។ ជេសរីគែសមពោលកោរាញជានឞ្រាស ផូងនើមនតីនាវវៃផូងអីឆ្រាអែល នទ្រែលមាកោរាញអាបាៈអេងជឹត ខាន់ពាង់លែវឞាល់ហាន់តានៃដ៝ង់ 2អោបឞ្រាសយេឆូ រី៖ “ទាន់មឞើសអ៝ន់មាហេនគឹត នទើមៃជានអ្យាឞើសតាៈនាវទើយ? ឞូម៝សអ៝ន់នាវទើយអីនៃមាមៃមេស?” 3ឞ្រាសយេឆូ អើសមាខាន់ពាង់៖ “គ៝ប់ទាន់អោបទូនាវមាខាន់មៃប៝ត់ ល៝ង់ខាន់មៃមឞើសមាគ៝ប់៖ 4លាសនទ្រីឞូម៝សដាៈយោហាន-បាប់តែម ជានបាប់តែមយុកមាទាក? តាៈឞើសកោរាញឞ្រាស មោលាសតាៈឞើសឞូនុយ្ស?” 5មពោលអីនៃតឹមញច្រាៈឞាល់៖ “លាសឞ៝ន់លាស៖ «តាៈឞើសកោរាញឞ្រាស» ពាង់មរាលាសឞ៝ន់៖ «លាសនទ្រីមើមទឹងខាន់មៃមោអ្យាត់នាវពាង់?»#លក ៧:២៩-៣០ 6លាសឞ៝ន់លាស៖ «តាៈឞើសឞូនុយ្ស» ប៝នលានមរានតុបឞ៝ន់មាលុរ៝ យ៝រលាសឞូគឹតនហេលយោហាន-បាប់តែម ពាង់ឞូនុយ្សនតើយ្សនាវងើយកោរាញឞ្រាសងាន់”។#មថ ១៤:៥ 7ជេសរីខាន់ពាង់អើសមាឞ្រាសយេឆូ ៖ “ហេនមោគឹតអោស ឞូម៝សដាៈពាង់ជាន”។ 8ជេសរីឞ្រាសយេឆូ អើសមាខាន់ពាង់ដ៝ង់៖ “លាសនទ្រីគ៝ប់មោដ៝ង់មឞើសអ៝ន់មាខាន់មៃគឹត ឞូម៝សអ៝ន់នាវទើយគ៝ប់ជានអ្យា”។
នាវនតឹតមាឞូនុយ្សអ្យើសម៝ត់អ្វាញ់មីរតើមព្លៃយុងយារប៝ន
(មថ ២១:៣៣-៤៦; មក ១២:១-១២)
9ជេសរីឞ្រាសយេឆូ ងើយនតឹតអ៝ន់មាផូងប៝នលាន៖ “គែសទូហ្វេឞូក្លោតាម់តើមព្លៃយុងយារប៝នទូលោកមីរ ជេសរីអ៝ន់ឞូម៝ត់មីរអីនៃ ដាៈឞូពាៈព្លៃមាពាង់អាប់នាម់។ អីពាង់នើមរីហាន់គុជឹតឞ្រីអេងជ៝ៈងាន់។#អេឆា ៥:១-៧ 10ត៝ត់ទីខៃទុមព្លៃយុងយារប៝នរី ពាង់ដាៈទូហ្វេទឹកពាង់ហាន់តឹមម៝ប់មាមពោលម៝ត់មីរអីនៃ គៃមាឆ៝ៈព្លៃអីឞូពាៈនៃ។ តីសមាលែៈមពោលអីនៃលើសអោឞាល់ ជេសរីនត្រុតអោឞាល់អ៝ន់ឆឹតទើម។ 11ពាង់ដាៈតៃទូហ្វេទឹកជឹតហាន់ មពោលម៝ត់មីរអីនៃលើសអោឞាល់ រាកឆ្វាយ នត្រុតអោឞាល់អ៝ន់ឆឹតទើមដ៝ង់។ 12ជេសរីពាង់អីតើមមីរនៃដាៈតៃទូហ្វេទឹកជឹត។ ត៝ត់តានៃមពោលម៝ត់មីរអីនៃលើសមឞាងអោឞាល់ត៝ត់មាឆោតរាមាញ ពឺមអារ់អោឞាល់ឞើសទីសមីររី។
13ជេសរីពាង់អីតើមមីររីលាសអេងឆាក់ពាង់នើម៖ «មើមគ៝ប់ជានហៃ? អាបៃអ្យាដាៈក៝នឞូក្លោអីគ៝ប់នើមរ៝ង់ហោងាន់អ្យា អ៝ន់ពាង់ហាន់ប៝ត់ លាសខាន់ពាង់ឆៃក្លាប់លាសខាន់ពាង់អ្យាត់ពាង់រ៝»។ 14ត៝ត់មាមពោលម៝ត់មីរអីនៃឆៃពាង់ ជេសរីខាន់ពាង់តឹមលាសនទ្រាង់ខាន់ពាង់នើម៖ «ពាង់អីនៃរ៝នត្រ៝ៈនទើនមីរអ្យានារជឹតនាប់តៃ ហាន់ឞ៝ន់ងខឹតលើយពាង់អីនៃទោស មីរអ្យានហ៝គែសមាឞ៝ន់រ៝»។ 15ជេសរីឞូមអារ់អោឞាល់ឞើសទីសមីររី ងខឹតលើយអោឞាល់។ លាសនទ្រីពាង់អីតើមមីរអីនៃ មើមពាង់ជានមាមពោលម៝ត់មីរអីនៃ?#ហេឞ ១៣:១២ 16ពាង់មរាហាន់ងខឹតលើយខាន់ពាង់ ជេសរីអ៝ន់ឞូអេងជឹតម៝ត់មីរអីនៃ”។ ត៝ត់មាតាង់នាវអីនៃឞូលាស៖ “មោអោស! លើយអោសអ៝ន់គែសកើតអីនៃ”។ 17ជេសរីឞ្រាសយេឆូ អ្វាញ់ជឹតឞូ ពាង់លាស៖ “តាឆ៝ម់បុតនាវកោរាញឞ្រាសងើយលាស៖
«ឞូនុយ្សឞ្លាវជានជៃលុឞ្ល៝នលែៈមអារ់លើយទូមល៝ម់លុឞ្ល៝ន
យើនមាលុឞ្ល៝នអីនៃជេងលុឞ្ល៝នទុតន៝ប់ខ្លៃរាលាវឞូមាជានជៃ»#នម ១១៨:២២។#អេឆា ២៨:១៦
18លាសនទ្រីម៝សនាវឞូនតឹតអ្យា? លុឞ្ល៝នអីនៃជេងនតឹតមាគ៝ប់។ ជេសរីឞូម៝សរាលាច់មាគ៝ប់តឹមឞានមាឞូនុយ្សចោតតាកាលើលុអីនៃ ជេសរីនាវផាតទោយ្សគ៝ប់តាជឹតនាប់តៃ តឹមឞានមាលុតុបតាកាលើឞូនុយ្ស។ ឞូម៝សអីចោតតាកាលើលុឞ្ល៝នអីនៃ ពាង់អីនៃលេករាហ៝ច់រ៝។ ជេសរីលាសលុឞ្ល៝នអីនៃតុបកាលើទូហ្វេឞូនុយ្ស ឞូនុយ្សអីនៃហាច់លែៈផ្យៅ”។
នាវព្រាក់អីផូងប៝នលានអ៝ន់មាកោរាញឞ្រីទាក
(មថ ២២:១៥-២២; មក ១២:១៣-១៧)
19ជេសខាន់ពាង់តាង់ឞ្រាសយេឆូ ងើយនាវនតឹតនៃ ផូងនើមនតីនាវវៃផូងអីឆ្រាអែល នទ្រែលមាមពោលកោរាញជានឞ្រាស ខាន់ពាង់គឹតវ៝ត់នាវងើយអីនៃលាសមាឆាក់ខាន់ពាង់រ៝ នទ្រីទឹងខាន់ពាង់អុចញុបឞ្រាសយេឆូ តានៃរ៝ យើនមាក្លាចផូងប៝នលានលើស។ 20នទ្រីខាន់ពាង់អីនៃក៝ប់អ្វាញ់នអោយឞ្រាសយេឆូ ជេសរីដាៈឞូគ្រ៝យពាង់។ មពោលអីនៃគុងាវជានកើតឞូនុយ្សឆ៝ង់ គៃមានទើមពាង់ញុបនាវតីសតានទើពាង់មឞើសងក៝ច។ ខាន់ពាង់អុចគែសនាវមាញជុនពាង់តាកោរាញក្វ៝ង់ពីលាត អ៝ន់តេៈទោយ្សពាង់។
21ជេសរីមពោលអីនៃអោបឞ្រាសយេឆូ ៖ “ហើយនើមនតី! ហេនគឹតទឹងលែៈនាវមៃមឞើសនតីនៃជេងទីទាទេងាន់។ មៃមោអោសក្លាចមាឞូនុយ្ស មោអោសកើយ្សឞូនុយ្ស មៃនតីនាវកោរាញឞ្រាសអ៝ន់ទី។ 22ទាន់មឞើសមាហេនតឹងនាវវៃឞ៝ន់ ទីដ៝ង់អ៝ន់ព្រាក់អីកោរាញកាដាច់តាឞ្រីរោម ដាៈឞ៝ន់អ៝ន់នៃមោលាសមោ?” 23យើនមាឞ្រាសយេឆូ លែៈគឹតអីនាវខាន់ពាង់អុចអោបនៃ ជេងអោបរាល៝ងពាង់ លាសពាង់លាសទី ផូងប៝នលានមោហោមរ៝ង់មាពាង់ យ៝រលាសខាន់ពាង់ឞ្យាញ់អ៝ន់ព្រាក់អីនៃ។ លាសពាង់លាសមោទី ខាន់ពាង់អុចនតោនពាង់តាកោរាញក្វ៝ង់ពីលាត យ៝រលាសពាង់ងើយតឹមរាទ៝ង់ដាសឞ្រីរោម មោអ៝ន់ប៝នលានអ៝ន់ព្រាក់មាកោរាញ តឹងកាដាច់ក្វ៝ង់តាឞ្រីអីនៃដាៈ។ ជេសរីពាង់លាសកើតនអា៖ 24“ល៝ង់ញហើព្រាក់អីអ៝ន់មាកាដាច់អីនៃទូមល៝ម់#២០:២៤៖ «ព្រាក់អីអ៝ន់មាកាដាច់អីនៃទូមល៝ម់» មោលាស «ទូដេនារី »។។ តាកាលើកាក់នៃឞូម៝សរូប នទ្រែលមាឞូម៝សគែសរាញា?” ឞូអើសមាពាង់៖ “គែសរូប នទ្រែលមាគែសរាញាកាដាច់ក្វ៝ង់តាឞ្រីរោម ”។ 25ឞ្រាសយេឆូ លាសមាខាន់ពាង់៖ “លាសនទ្រី នទើកោរាញកាដាច់តាឞ្រីរោម មព្លឹអ៝ន់មាពាង់ នទើកោរាញឞ្រាស#២០:២៥៖ «នទើកោរាញឞ្រាស»ជេងនទើតឹមឞានមាអ៝ន់កោរាញឞ្រាសម៝ត់អ្វាញ់មានាវរេស នាវញឆីង នាវរ៝ង់ នាវយើកមឞាស នាវអ្យាត់ នាវលាសអ្វែស នាវរានេ។មព្លឹអ៝ន់មាកោរាញឞ្រាសនើម”។#រម ១៣:៧ 26នទ្រីខាន់ពាង់មោអោសទើយញុបឞ្រាសយេឆូ តានាប់ឞាល់ផូង យ៝រលាសតានាវពាង់ងើយមោអោសឆៃគែសតីស។ ខាន់ពាង់នទ្រ៝ត់ហីសរាហ៝ល់ងាន់យ៝រមាតាង់នាវពាង់អើសឞ្លាវងាន់ ជេសរីខាន់ពាង់គុអ្យាត់ឆាក់រាក់ក្លាក់ទើម។
នាវខឹត នទ្រែលមានាវទ៝ក់រេស
(មថ ២២:២៣-៣៣; មក ១២:១៨-២៧)
27ជេសរីគែសផូងឆាដោឆី #២០:២៧៖ ផូងឆាដោឆី ខាន់ពាង់ជេងផូងអីឆ្រាអែល ដ៝ង់ ខាន់ពាង់នតីនាវវៃផូងអីឆ្រាអែល អ៝ក់ងាន់ យើនមាខាន់ពាង់ញអោតឆ៝ម់បុតអីមោឆេ ញចីសព្រាម់អឹទើម។អាបាៈហាន់អោបឞ្រាសយេឆូ ផូងអីនៃកោរាញតាផូងអីឆ្រាអែល ដ៝ង់ តីសមាខាន់ពាង់មោអ្យាត់អោសឞូនុយ្សលែៈខឹតហោមទ៝ក់រេសជឹត។#ការ ២៣:៦-៨ 28ខាន់ពាង់អោបរាល៝ង៖ “ហើយនើមនតី មោឆេ កាល់អែនើសលែៈញចីសជេសតាឆ៝ម់បុតអ៝ន់មាឞ៝ន់អីផូងអីឆ្រាអែល លាសកើតនអា៖ «លាសឞូក្លោឆ៝ៈអូរ ជេសរីពាង់ខឹត លាសពាង់មោគែសក៝ន ដាៈអីអ៝សនោពាង់រីនត្រ៝ៈឆ៝ៈអូរពាង់គៃមាគែសក៝នមាពាង់»។#នវ ២៥:៥-៦ 29នតឹតលាស លាសគែសពើសនុយ្សអ៝សនោ អីនោឞោកទាករីឆ៝ៈអូរ ជេសរីពាង់ខឹត ពាង់មោអោសគែសក៝ន។ 30អីអ៝សគ្រ៝យឞើសកើយពាង់នៃនត្រ៝ៈឆ៝ៈ ខឹតមោគែសក៝នដ៝ង់។ 31ជេសរីអីអ៝សត៝ល់ពែនៃនត្រ៝ៈឆ៝ៈដ៝ង់ នហ៝មាលែៈពើសនុយ្សខាន់ពាង់នៃឆ៝ៈពាង់ទាទេ តីសមាមោអោសគែសក៝ន។ 32កេងមាទុតមាទេលឞូអូរអីនៃខឹតដ៝ង់។ 33ត៝ត់នារឞូនុយ្សទ៝ក់រេសតៃ លាសនទ្រីឞូម៝សឆ៝ៈឞូអូរអីនៃ? យ៝រលាសលែៈពើសនុយ្សខាន់ពាង់នើសលែៈតាៈឆ៝ៈពាង់ទាទេ”។
34 ឞ្រាសយេឆូ អើសមាខាន់ពាង់៖ “ឞូនុយ្សតានែសនតូអ្យាវៃឆ៝ៈអូរឆ៝ៈឆាយ។ 35យើនមានារជឹតនាប់តៃ ឞូម៝សអីកោរាញឞ្រាសទែទីមារាក្លាយ្សឞើសខឹត ខាន់ពាង់ទ៝ក់រេសគុតាប៝នអ្វែសតាកាលើ ឞូនុយ្សអីនៃមោហោមអោសឆ៝ៈអូរឆ៝ៈឆាយជឹត។ 36ខាន់ពាង់មោហោមអោសឞ្លាវខឹតជឹត ខាន់ពាង់ជេងតឹមឞានមាតោងពារ់កោរាញឞ្រាស ខាន់ពាង់លែៈជេងក៝នកោរាញឞ្រាសងាន់ យ៝រមាខាន់ពាង់លែៈទ៝ក់រេសជេស។#១កោ ១៥:៣៥-៤៤ 37មោឆេ លែៈងក៝ចជេសមាឞូនុយ្សខឹតទ៝ក់រេស ពាង់គែសញចីសលាសតាព្លាង់ត្រ៝ងពុមល៝កអីគែសហីតអុញ នតុកនៃពាង់ក្វាល់កោរាញឞ្រាសលាស «ជេងឞ្រាសអាឞ្រាហាម់ យើកមឞាស ជេងឞ្រាសអីឆាក់ យើកមឞាស ជេងឞ្រាសយាកោប យើកមឞាស»#នង ៣:៦។ 38នោកមោឆេ ងើយនាវអីនៃលែៈពែនុយ្សខាន់ពាង់អីនៃលែៈខឹតអ៝ក់នាម់ជេស យើនមាឞើសនាវកោរាញឞ្រាសងើយគឹតនាល់ខាន់ពាង់ហោមរេសមាកោរាញឞ្រាស។ កោរាញឞ្រាសមោអោសទីឞ្រាសមាឞូនុយ្សខឹត ពាង់ឞ្រាសមាឞូនុយ្សរេស”។#រម ១៤:៨ 39ជេសរីគែសផូងនើមនតីនាវវៃផូងអីឆ្រាអែល អាបាៈលាសមាឞ្រាសយេឆូ ៖ “ហើយនើមនតី! នាវមៃអើសអីនៃឞ្លាវអ្វែសងាន់”។ 40ជេសរីឞូមោហោមអោសឞាញ់អោបពាង់នាវអេងៗជឹត។
ឞ្រាសក្រីស ជេងកោរាញមាកាដាច់ដាវីត
(មថ ២២:៤១-៤៦; មក ១២:៣៥-៣៧)
41ជេសរីឞ្រាសយេឆូ អោបឞូ៖ “មើមទឹងឞូក្វាល់ឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់រីលាសក៝នឆៅកាដាច់ដាវីត ទើម?#មថ ២០:៣០-៣១ 42យ៝រលាសតាឆ៝ម់បុតនាវមព្រើអើមកាដាច់ដាវីត គែសងក៝ចល៝រមាឞ្រាសក្រីស ពាង់លាស៖
«កោរាញឞ្រាសលាសមាកោរាញគ៝ប់៖
«គុមពែសឞើសមាគ៝ប់ហ៝ម់ តានតុកឞូយើករាលាវឞូ។
43ក៝ប់ត៝ត់គ៝ប់អ៝ន់ផូងរាលាង់ដាសមៃជេងនតុករាកើលជ៝ង់មៃប៝ត់»»#នម ១១០:១។#យោឆ ១០:២២
44លាសលែៈកាដាច់ដាវីត នើមក្វាល់ឞ្រាសក្រីស លាសកោរាញពាង់នើមកើតនៃ យើនមាក៝នឆៅមោគែសក្វ៝ង់រាលាវមាអូចែ លាសនទ្រីឞ្រាសក្រីស មើមហោមឞ្លាវក៝នឆៅកាដាច់ដាវីត ជឹត?”
ឞ្រាសយេឆូ ដាៈញជ្រាង់មាផូងនើមនតី
(មថ ២៣:១-៣៦; មក ១២:៣៨-៤០)
45នោកប៝នលានហោមអែគុអ្យាត់នាវឞ្រាសយេឆូ ងើយនៃ ជេសរីពាង់លាសមាមពោលអ៝សម៝នពាង់៖ 46“អ៝ន់ខាន់អៃមៃញជ្រាង់ងាន់ដាសមាផូងនើមនតីនាវវៃផូងឞ៝ន់នៃ យ៝រលាសខាន់ពាង់អុចញឆ៝សអាវជ៝ងអីអ្វែស ជេសរីឞ្រោៈរាឆ៝ង គៃមាអ៝ន់ឞូគឹតលាសខាន់ពាង់គែសនាវខ្លៃងាន់ អុចអ៝ន់ឞូមឞាសកុញឞោកមាខាន់ពាង់រ៝ៈនតុកឞូតាច់រាគ៝ល់ទ្រាប់នទើ មោលាសរ៝ៈត្រ៝ងក្វ៝ង់ នទ្រែលមាអុចគុឞើសនាប់ឞូតានតុកឞូលឺតាញីសរាបុនផូងឞ៝ន់ ជេសរីលាសញេតក្វ៝ង់ឆោងក្វ៝ង់នៃអុចគុតានតុកឞូយើកដ៝ង់។#លក ១១:៤៣ 47តីសមាខាន់ពាង់មរោសរាលាម់ឞូអូរនទ្រោលែៈខឹតឆាយគៃមាឆ៝ៈពីតទ្រាប់នទើញីសជៃឞូអូរនទ្រោអីនៃ។ ជេសរីខាន់ពាង់ជានមឞើសឆើមទុតជ៝ៈងាន់អ៝ន់ឞូអេងតាង់ គៃមាញហើខាន់ពាង់នើមជេងឞូនុយ្សរ៝ង់មាកោរាញឞ្រាសងាន់។ ផូងអីនៃកោរាញឞ្រាសតេៈទោយ្សទុតជ្រូរ៝តានារជឹតនាប់តៃ”។#នង ២២:២១-២២
Chwazi Kounye ya:
លូកា 20: cmoK
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© (Active) Wycliffe Bible Translators, Inc. All rights reserved.