Génesis 7
7
Tachi Akꞌõrepa na pꞌekꞌau eujã ũutꞌaada
1Maapꞌeda, Tachi Akꞌõrepa Noemaa mãgaji:
—Pɨ aupaita bapari mɨa kꞌinia bɨkꞌa. Mapa pɨchideerã ome tꞌĩupáde aji. 2Ne–animalaarã mɨ–itꞌee paapata chi ɨmɨkꞌĩra siete, chi wẽra siete atéeji. Chi apema ne–animalaarã chi ɨmɨkꞌĩra aba, chi wẽra aba ateeipia bɨ. 3Mamĩda ipanaarã kꞌĩra tꞌãdoo chi ɨmɨkꞌĩra siete, chi wẽra siete atéeji, kꞌĩra apida jõnaamerã. 4Kꞌãima siete parumaa mɨa kꞌoi chepiitꞌee kꞌãima cuarenta wãyaaru misa. Ne–inaa chokꞌai bee mɨa ooda jõmaweda jõtꞌaaitꞌeeda aji.
5Noepa jõmaweda ooji Tachi Akꞌõrepa jaradakꞌa.
6Noé seiscientos años iru bakꞌãri, Tachi Akꞌõrepa na pꞌekꞌau eujã ũupiji. 7Kꞌoi che nɨ̃beekꞌãri, barcode tꞌĩukꞌoodachida Noé, chi wẽra mãikꞌaapa chi warrarã, ãchi wẽraarã ome. 8Ne–animalaarã jĩpꞌaarã ne–animalaarã Tachi Akꞌõre–itꞌee paapata ome aukꞌa tꞌĩujida; eujãde bipa urtꞌĩu nĩuteepataarã, ipanaarã paara. 9Tachi Akꞌõrepa jaradakꞌa ne–animalaarã omee–omee, chi ɨmɨkꞌĩra, chi wẽra ome tꞌĩujida ma barcode Noé ome.
10Kꞌãima siete parumaa na pꞌekꞌau eujã ũu–ũu beeji. 11Atane omeede ewari diecisiete paji. Noé seiscientos años iru baji na pꞌekꞌau eujã ũu–ũu beekꞌãri. Ma ewate pania uchiaji na pꞌekꞌau eujã ɨ̃rɨ. Ũkꞌuru uchiaji Tachi Akꞌõrepa ma ewaraa kꞌobɨda edaikꞌa eerepema mãikꞌaapa ũkꞌuru uchiaji aɨ ɨtꞌaikꞌa eerepema. 12Kꞌãima cuarenta kꞌoi che nɨ̃baji na pꞌekꞌau eujãde. 13Ma ewate kꞌoi che nɨ̃beekꞌãri, Noé tꞌĩuji ma barcode chi warrarã Sem, Cam Jafet ome mãikꞌaapa chi wẽra, chi ãiguurã õpee ome. 14Ãra ome tꞌĩujida ne–animalaarã kꞌĩra tꞌãdoo; tausaaree, taunomaa, eujãde bipa urtꞌĩu nĩuteepata, ipanaarã paara. 15Ma ne–animalaarã jõmaweda omee–omee tꞌĩujida Noé ome. 16Tachi Akꞌõrepa Noemaa jaradakꞌa tꞌĩujida kꞌĩra chaadepema omee–omee; chi ɨmɨkꞌĩra chi wẽra ome. Mãpai Tachi Akꞌõrepa chi puerta jɨ̃a nɨ̃bɨji.
17Na pꞌekꞌau eujãde kꞌãima cuarenta kꞌoi che nɨ̃baji. Pania ũu chewãkꞌãri, ma barco bai ũu beeji. 18Waapɨara ũu chewãji. Mamĩda ma barco kꞌãiwee bai ũu beeji. 19Pania ũu chewãta, ũu chewãta, ee ɨtꞌɨara beeda kꞌãyaara ɨtꞌɨpɨara ũu–ũu beeji. 20Eujãdeepa ɨtꞌaa siete metros ũudachi. Mãpai waa ũu–e paji. 21Mãgá piujida jõmaweda eperãarã ipanaarã ome, ne–animalaarã tausaaree, taunomaa bee paara, chi eujãde bipa urtꞌĩu nĩuteepata paara. 22Jõmaweda na pꞌekꞌau eujãdepema chokꞌai pꞌanapatapꞌedaa piujida. 23Aba Noé chi barcode pꞌanadapꞌedaarã ome chokꞌai pꞌaneejida. Apemaarã jõmaweda jõjida; eperãarã, ipanaarã, ne–animalaarã kꞌĩra tꞌãdoo. 24Kꞌãima ciento cincuenta na pꞌekꞌau eujã ũu–ũu beeji.
Chwazi Kounye ya:
Génesis 7: sjaB
Pati Souliye
Pataje
Kopye
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fht.png&w=128&q=75)
Ou vle gen souliye ou yo sere sou tout aparèy ou yo? Enskri oswa konekte
©2005, 2010, 2015 Wycliffe Bible Translators, Inc. All rights reserved.