Mwanduso 3
3
Munhu viyalekile kutegeleza
1Mgendela hasi kakala mvizi kubanza wanyama wose wa kumuhulo walumbigwe na Mndewa Imulungu. Avo mgendela hasi kamuuza mtwanzi ayo, “Vino Imulungu kawalongela sikumuje tunda da biki jojose dili mumgunda?”
2Mtwanzi ayo kamwidika, “Todaha kuja tunda da biki jojose dili mumgunda, 3lakini Imulungu katulongela, ‘Sikumuje matunda ga biki dili hagati ya mgunda, hebu kudikwasa, mwahatenda vivo, mofa.’ ”
4Mgendela hasi kamulongela mtwanzi ayo, “Hamufa bule. 5Imulungu kalonga avo kwavija kojuwa kamba mwahaja matunda ga biki dijo meso genu gogubuligwa na mokuwa kamba Imulungu, mogajuwa ganogile na gehile.”
6Mtwanzi ayo viyonile matunda ga biki dijo viganogile kudigwa, na dibiki vidinogeza mgameso na kagelegeza vivinogile kuwa na nzewele, avo kakondola tunda kadija, diyagwe kamgwaa mkasano wake, na heyo vivija kadija. 7Viweshilize kuja, meso gao gagubuka, wajuwa kamba wakala mwazi. Avo wasoneleza mijani ya biki da mtini, waigubika.
8Ichungulo wahulika Mndewa Imulungu kotembela mumgunda, hewo waifisa mna imibiki. 9Lakini Mndewa Imulungu kamkema imbigalo, kamuuza, “Kwa kwahi?”
10Heyo kamwidika, “Nikuhulika mumgunda, nidumba na kuifisa, kwavija nikala mwazi.”
11Imulungu kamuuza, “Nani yakulongele kukala mwazi? Vino, gweye kuja tunda dinikugomese sikuuje?”
12Mbigalo ayo kamwidika, “Mtwanzi yuungwelele ng'hale na heyo hamoja ayo yangwelele tunda da biki dijo, na niye nidija.”
13Abaho Mndewa Imulungu kamuuza imtwanzi, “Habali utendile vivo?”
Kamwidika, “Mgendela hasi ayo yanivizile nije.”
Imulungu kowatagusa
14Abaho Mndewa Imulungu kamulongela mgendela hasi, “Kwavija kutenda avo, gweye wiiyeka kuduwiligwa kubanza wanyama wose ofugigwa, na kubanza wanyama wose wa kumuhulo, kulawa sambi kotambala kwa inda yako, na koja timbwisi siku zose za ugima wako. 15Nokutenda gweye na mtwanzi mwiihile, ulelo wako na ulelo wake oihila, heyo kokuhonda pala jako, na gweye kokiluma kisiginho chake.”
16Abaho kamulongela imtwanzi, “Nokwengezela usungu wa kulela, kwa usungu kolela wana. Komsulukila mkasano wako na heyo kokutawala.”
17Abaho kamulongela imbigalo, “Kwavija gweye kumtegeleza mwehe wako, na kuja tunda da biki dinikugomese sikuuje, kwa mbuli ayo, isi yose iduwiligwa. Kwa kulawa fuguti kopata ndiya yako, siku zose za ugima wako. 18Isi yokulelela miba na misani, na gweye koja minoga ya kumuhulo. 19Kwa fuguti jako kopata ndiya yako, mbaka vonda ubwele muulongo muulumbigwe, kwavija gweye kulawa mditimbwisi, avo kobwela kabili mditimbwisi.”
20Adamu kamgwaa mwehe wake twaga da Hawa, kwavija kakala mama wa wanhu wose. 21Abaho Mndewa Imulungu kawatendela Adamu na mwehe wake viwalo va ng'hwembe, kawavaza.
Adamu na Hawa owingigwa mumgunda
22Abaho Mndewa Imulungu kalonga, “Sambi wanhu wano waigala kamba imoja wetu na ogajuwa ganogile na gehile. Olondigwa wagomesigwe sikuwaje tunda da biki da ugima, kwavija wahaja okuwa wagima milele.” 23Avo Mndewa Imulungu kawaswaswanya mumgunda wa Edeni na kawatenda walime mwiisi iwalumbiligwe. 24Abaho kuna umwambu wa kudilawila zuwa wa mgunda awo keka wasenga wa kuulanga na sime dikwaka dikalile dozunguluka banzi zose, kuikimila nzila ilongoza kudibiki da ugima.
Chwazi Kounye ya:
Mwanduso 3: King'hutu
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
NT: © 2014 Pioneer Bible Translators and The Word for the World
OT: © 2019 Pioneer Bible Translators