Mwaluko 3
3
Kuhinduka kwa Adamu
1Izoka lyali isugu kusinda migongolo jeng'ha ja kisolo jilumbigwe na Mkulu Nguluwi. Lelo izoka nalimlonjela ayo mdala, “Hambi Nguluwi nakalonga yokomya, mleche kulya mafuza ga mgodi woneche kuli kamgunda?” 2Mdala nakalidichila alyo izoka, “Toweza kulya mafuza ga mgodi woneche kuli kamgunda, 3ila Nguluwi nakalonga, ‘Mleche kulya mafuza ga mgodi uwele hagati ha kamgunda, kahi mleche kuudoliza, leka mleche kubagama.’ ” 4Izoka nalimlonjela mdala, “Ndangukomya hambagama hebu. 5Nguluwi nakalonga ahyo kwa vila nakavizela kota wone mulye mafuza ga mgodi awo mogubulilwa meho, na hemwe mowa kota Nguluwi, movizela ganojile na gehile.”
6Lelo mdala loyawene kota mgodi awo unoga kwa chilyo, wangunojeza hameho, na kota unoga kwa kuwa na luhala, kabawa ifuza lya igodi, nakalya. Nakamha mlume wa heye na heye, kahi kalya. 7Baho du meho gawo nagagubuligwa, wavizela kota wamwazi, ahyo nawehonela mahamba ga igodi lya ikuyu, weditila salule ya kuvala mchuno.
8Matinazo, mhela wa kwesela mlubehelo, ayo mlume na mdala wa heye wahulika Mkulu Nguluwi yojenda mli kamgunda, na hewo wevisa hagati ha migodi jiwele mumo, leka Mkulu Nguluwi yaleche kuwona. 9Ila Mkulu Nguluwi nakamchema ayo mlume, “Kwa kohi?” 10Na heye nakamwidichila, “Nyhulika kujendajenda kwa hegwe kuli kamgunda, nandumba na kivisa kwa vila nandali mwazi.” 11Mkulu Nguluwi nakamuuza, “Yali kohi yakulonjele kota kwa mwazi? Ndaze, kulya ifuza lya mgodi wondikulonjele uleche kulya?” 12Ayo mlume nakamwidichila, “Mdala youmhele yekale hamwe na heni ndo yamhele ifuza lya mgodi awo, na heni ndiya.”
13Aho Mkulu Nguluwi nakamuuza ayo mdala, “Kudita choni hegwe?” Mdala nakamwidichila, “Izoka nalimbada, na heni ndiya.”
Kugaya
14Hamba Mkulu Nguluwi nakalilonjela izoka,
“Kwa vila nakudita ahyo,
nakupanjilwa kusinda migongolo jeng'ha ja kufujigwa,
na migongolo jeng'ha ja kisolo.
Kwa lida kotambala,
na kulya nhimbwisi mazuwa gose ga ukomu wa hegwe.
15Ndowika ung'honyo hagati ha hegwe na ayo mdala,
hagati ha lulelo lwako na lulelo lwake,
heye kochitowa chitwi cha hegwe,
na hegwe kochitowa chisigino cha heye.”
16Hamba nakamlonjela mdala,
“Ndokonjezela usungu wa kuponda,
kwa usungu koponda wana,
kowa na maya na mlume wa hegwe,
ila heye kowa na ludali lwa kukulongoza.”
17Hamba nakamlonjela Adamu,
“Kwa vila hegwe nakumhulichiza mdala wa hegwe,
nakulya mafuza ga mgodi wondiwalajize mleche kulya,
ahyo, kwa wihe wa hegwe isi ipanjilwa.
Kwa kitunya kochipalila chilyo cha hegwe,
mazuwa gose ga ukomu wa hegwe.
18Isi yokulelela miwa na migugu,
na hegwe yokugana kulya mizuchila.
19Kwa chituguti kopala chilyo,
mbaka louhiluka kuli misanga koulawile,
mina hegwe kwa misanga, na kuli misanga kohiluka.”
20Adamu nakamchemela mdala wa heye itagwa, “Hawa#3:20 Hawa Kwa Chiebulaniya ndo ukomu wa wanhu.,” kwa vila nayali mamo wa wanhu weng'ha. 21Mkulu Nguluwi nakawagongomanyila Adamu na mdala wa heye ivalo lya igozi, kawavaliza.
Adamu na Hawa wanguwinjigwa kuli kamgunda
22Hamba Mkulu Nguluwi nakalonga, “Sambi munhu kawa kota yumwe wa hetwe, kavizela ganojile na gehile. Igana kumlemeza kulya alila ifuza lya mgodi wa ukomu, kwa vila wone yalye, kochikala mazuwa gose.” 23Lelo Mkulu Nguluwi nakamuwinga Adamu kunze mwa kamgunda ka Edeni, leka yakalime mmisanga moyalawile. 24Nakamuwinga kunze, na kuwawika wamizi wahilisi nzingo kolilawilaga isanya kuli kamgunda ka Edeni na sengo ya chiluli ilinguhinduka ako na ako, nakwamila nzila ilingulutila kuli mgodi wa ukomu.
Chwazi Kounye ya:
Mwaluko 3: Chividunda
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators