San Juan 1
1
Prólogo: Dios Painkulne awa namtu; Jesúsne Pitkas munazi
1Au su sarachasmin, mazane, Pit muntɨtmikane, uzazi. Usne Taitta Dioskasa uzazi. Usne Dioskasa kawarain azi. 2Su sarachasmin, an Pit muntɨtmikane, an ñancha Dioskasa sulmin uzazi. 3Us akwa Diosne wan chiwal sara. Diosne an Pit muntɨtmika akwa chiwal kirɨt. 4An Pit muntɨtmikane awaruza pailta payukima uzninamtu, awa watcha piankamanapa. 5An Pit muntɨtmikane tɨlkwilta aizmu, impil kai aiztukana. Usne tɨlkwilta chamturuza Diosta piankamninnanazi. Diablowa kwail mikwaruzne Dios kamtamtu aizpa anuppasachi.
6Diosne maza ampura ɨninta. Usne Juan munazi. Awaruza pira munnara. 7Anne at, awaruza aizmumikawa kainanana, us kaizta aizpa mɨat kit piankamat kit an Pit muntɨtmikasha nɨjkulanapa. 8Juanne kai aizmumika chi. Usmin at kit kai aizmumikawa kainanara. 9An kai aizmumika watcha i. Anne at kit wan awara kai malninamtu.
10An Pitne au sukin pianara. Diosne us akwa an su sara. An sukin uztuzne ussa piankamarachi. 11Paiña sukin pianatkas, an sukin uztuzne ussa sapparachi. 12Sunkana mɨnpazha ussa sappamturuzkas us kaizta aizpa nɨjkulamturuzkas Dios painkul namashina. 13Au sukin awaruz uspa pashparuza kawiamtukas, Diosne awaruza namashina, paiña pashparuza kawiranana. Ampune ussain Dios painkul kawirakana namninasachi. Diosmin awaruza paiña painkul namninnashina.
14An Pit muntɨtmikane awa namta. Usne awaruza pashinat kit kiwainnashimtu. Uskas aumɨza nil kamtanara, Diosta piankamanapa. Usne aukasa an sukin uzta. Aune ussa iztamakpas. Usne kwisha wat kai puzta. Diosne paiña painkultain kwisha tɨnta namninta. 15Juanne us akwa paranat kit kaizta: “Nane us akwa usparuza kainanarau. Us nawa kwizpa amtukas, usne nakin an ñancha uzta. Usne nakin anza tɨnta i.”
16Usne aumɨza akkwan wat kiat kit kiwainnamɨzta. 17Diosne Moisésta ɨninta, awa us kaizta aizpa kianapa. Mane aune Dios aumɨza panashimtu piankamtumakpas, Dios Jesucristo ɨninta akwa, watcha aumɨza kainanapa. 18Mɨnminkas Diosta izarachi. Paiña painkulmin Papihshkasa sulmin uztu. Usne aumɨza paiña Papihshta piankamninnarɨt.
Juan, munnammikane, Jesucristowa kainammtu
(Mt 3.11-12; Mr 1.7-8; Lc 3.15-17)
19Jerusalén pɨpuluras Judío awa ɨninturuzne pariyaruzakas kamtamtuzakas Juanta “¿nune mɨnmas?” mɨmanapa ɨninñara. 20Usne nil sɨnkanara:
—Nane watsat mɨlmumika chish, kiznara.
21Suasne mamasa kaizat kit mɨmaara:
—¿Nune mɨnmas? ¿Elías, Dios pit kainammmikakish?
Juanne kaiznara:
—Nane chish.
Kwizta ussa mɨmaara:
—Suasne, ¿Nune mamaz wat kainammumikakish?
Usne sɨnkanara:
—Nane chish.
22Suasne ussa kaizara:
—¿Mane nune mɨnmas? Aune au ɨnintaruza sɨnkarawamakpas. ¿Nuwa chima kiztus?
23Juanne Isaías kainammmika Juanpa kaizta aizpa sɨnkanara:
—Nane pul suwara ka kainammtus: “Nane kwianmumika ish, Anpatpa mi nil saanapa.”#Is 40.3
24Fariseo awane uspa Fariseo awaruza Juanta kwinta kinpa ɨninnat kit mɨmaat kit kaizara:
25—Nu Dios watsat mɨlmumika chine, Elías chine, kainammumika chine, ¿Chikishma munnanamtus?
26Juanne sɨnkanat kit kaiznara:
—Nane kwazikasa munnanamtus. Mazane u paizkakin kun. Une ussa pianchi. 27Us nakin kwizpa amtukas, usne nakin an ñancha uzta. Usne an tɨnta ɨninmika namnazi. Nane paiña kiwainmumika ish.
28Wanne sunkana kirɨt Betania pɨpulukin. Sun pɨpulune Jordán pi pãn puzmumakin uz. Suane Juanne awaruza munnanarɨt.
Jesúsne kwail kirɨttuza wat kultanamtu
29Tɨlawara Juanne Jesústa izta. Jesús ussa amtuasmin, Juanne awaruza kaiznara: “¡Iztain! Anne Dios ɨnintamika i. Usne ussa ɨninta, kwail kiarɨttuza wat kultananapa. 30Nane us akwa ñamin kaiztau: ‘Mazane ap kwizpa amtu. Usne nakin anza tɨnta ɨnintamika i. Uskas nakin an ñancha uzta.’ 31Nakas Dios an ɨnintamikasha pianchi arau. Nane arau, kwazikasa munnana, Israel awaruz ussa piankamanapa.”
32Sunkas Juanne kaiznara: “Nane Diospa Izpulta iztau. Sɨnam Izpulne chiyuras taiz kit ussa nukkulta. Sɨnam Izpulne utkurukana iztɨt. 33Mama nane Dios ussa ɨninta pianchi arau. Nawa kwazikasa munnana ɨninmikane kaizta: ‘Nune Diospa Izpul maza ampura taiz kit nukkulka iznazi. An ampune awaruza Sɨnam Izpulkasa winninnanazi.’ 34Na watcha sun izta akwa, nane uruza ka kaiznamtus: ‘Anne Dios Painkul i.’ ”
Jesúsne an ñamin kammuruza akwanamtu
35Tɨlawara Juankas paiña paas kanpamtuzkasa suain tuara. 36Jesús pɨntura iztuasmin, Juanne kaizta:
—Iztain. Anne Dios ɨnintamika i. Usne ussa ɨninta, awa kwail kiarɨttuza wat kultananapa.
37An paas Juanta kanpamtuzne sun kizka mɨt kit Jesústa kanpailta. 38Jesúsne ussa kwizpa kanpaka iz kit kaizta:
—¿Chima saimtuas?
Uspane kaizpailta:
—Kamtam, ¿Mɨntama uzish?
Usne sɨnkara:
—¡Izna arain!
39Uskasa ɨil kit us uzkin izpailta. Sun payuin uskasa mailta, ampara urara panapain akwa.
40Mazane, Juanta mɨramikane, Jesústa kanpara. Usne Andrés muntɨt. Usne Simón Pedrowa aimpihsh. 41An mɨmtuchasmin, Andrésne paiña aimpihshta, Simónta, saina ɨt kit kaizta:
—Aune Dios watsat mɨltamikasha, wanmaltawas. Anne Dios narɨtmika i. Aune ussa Mesías muntawas.
42Suasne Andrésne Simónta Jesús tura mɨl kit Jesústa karara. Jesús ussa iztawane, kaizta:
—Mane nune Simón muntɨt. Up taittane Juan muntɨt. Mane Cefas munnazi. (An munne Pedrokas ukkas kawarain mun).
Jesúsne Feliperakas Natanaeltakas akwanamtu
43Tɨlawarane Jesúsne Galilea sura ɨshira. Felipera wanmal kit kaizta:
—Kanpazha, ap kammumika namnapa.
44Felipene Betsaida pɨpuluras azi. Suane Andréskas Pedrokas uzpailta. 45Suasne Felipene Natanaelta sait kit kaizta:
—Aune mazara wanmaltamakpas. Moisésne us akwa Dios ɨnin pɨnkɨhta parɨt. Dios kainammtuzkas us akwa paraara. An Jesúsne Joséwa painkul i. Usne Nazaret pɨpuluras i.
46Natanaelne kaizta:
—Nasaret pɨpuluras chinkas wat puzsachi.
Felipene sɨnkara:
—At kit ussa izti.
47Natanael Jesús tukin kashara piannamtuasmin, Jesúsne ussa iz kit kaizta:
—Ussa izti. Apa wat Israel awa amtui. Watcha kwinta kimtu akwa, usne mamaztuza kain kikain.
48Natanaelne ussa mɨmara:
—¿Mizama nawa pianish?
Jesúsne sɨnkara:
—Felipe nua akwatchasmin, nane nu tukin piankamtau. Nune hiquera tɨ kwalkin uzta.
49Suasne Natanaelne kaizta:
—Ap kamtam. Nu kaiztɨt akwa, nane nu Dios painkul i pianish. Nune au Judío awawa ɨnintamika i.
50Jesúsne ussa kaizta:
—Nu hiquera tɨ kwalkin uztuasmin, nane nu tukin piankamtau. Na sun kizta akwa, ¿nawa nɨjkulmas? Nune ankin anza katsa kal iznazi.
51Jesúsne ankas kaizta:
—Watcha kaiznamtus. Mamaz payura, une chiyura izakkanazi. Wanish ɨkane, chiyu kai kinazi. Suane une Diospa ángeltuza izanazi. Uspane Jesús tukin, chiyuras ampu tukin, ɨanazi. Tas au sukin kihshanazi. Chiyuras ampu akwa, Dioskas awaruzkas usparuzain kwinta kianazi.
Chwazi Kounye ya:
San Juan 1: kwi
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2002, Wycliffe Bible Translators, Inc. All rights reserved.