Vèsè popilè nan Bib la ki soti nan Ezayi 40

Pataje

Lè yon moun pèdi souf, li ba li fòs. Lè yon moun febli, li ba l kouray ankò!

Jenn gason konn pèdi souf, yo konn bouke. Lè konsa, yo bite, yo tonbe. Men, Senyè a ap bay moun ki mete konfyans yo nan li fòs ankò. Tankou malfini, y'ap pran zèl pou yo leve ale. Y'ap kouri san yo p'ap janm bouke. Y'ap mache, yo p'ap janm febli.

Se konnen nou pa konnen? Kouman? Se di yo pa janm di nou sa? Senyè a se Bondye ki la pou tout tan an! Se li menm ki kreye tout latè. Li pa janm bouke, li pa konn pèdi souf. Pèsonn pa ka konprann lide li gen nan tèt li.

Yo vvwa rele byen fò, li di: — Pare chemen Senyè a nan dezè a. Louvri yon wout nan savann nan pou Bondye nou an.

Wi, zèb la cheche, flè a fennen, Men, pawòl Bondye nou an la pou tout tan!

Senyè a pral fè wè pouvwa li a! Tout moun pral wè l menm lè a. Se Senyè a menm ki di sa ak bouch li.

Se pou yo konble tout fon yo! Se pou tout gwo mòn yo, tout ti mòn yo, tout mòn apik yo vin plat. Se pou tout falèz yo vin bouche plat.

Tankou yon gadò, l'ap okipe mouton l yo. Se li menm k'ap sanble yo. L'ap pote ti mouton yo sou bra l. Tou dousman l'ap mennen manman mouton ki gen pitit dèyè yo.

Leve je nou gade syèl la. Ki moun ki kreye tout sa nou wè yo? Tankou yon gwo lame, li bay yo chak plas yo. Li bay yo tout non, li konn non yo chak. Yonn pa janm manke nan syèl la! Li gen gwo pouvwa, li gen anpil fòs.

Moun ki fè l la chita anwo nèt, anlè tè a, depase syèl la. Moun ki sou latè, se tankou fwomi yo ye devan l. Li deploye syèl la tankou yon rido. Li louvri syèl la tankou yon tant kote pou moun rete.

Rele moun Jerizalèm yo! Anonse yo byen fò, anonse yo kòve yo fini. Yo fin peye sa yo fè. Senyè a pini yo kont yo pou tout peche yo te fè yo.

Yon vwa rete li di: Pale non! Yon lòt vwa reponn: Sa pou m'di? Di yo moun se zèb. Tout bèlte yo, se bèlte flè savann. Zèb la cheche, flè a fennen, lè Senyè a voye van li soufle sou yo. Se vre wi! Se tankou zèb pèp la ye!

Men Senyè ki gen tout pouvwa a! L'ap vini avèk tout fòs kouray li. Li pral pran pouvwa a nan men l. L'ap mennen moun li te delivre yo avè l. Y'ap mache devan l! Se rekonpans li. Se rezilta travay li.

Cheche dlo nou! Wi, cheche dlo nan je nou! Se Bondye nou an menm ki di sa.

Kilès ki ka mezire ak men li valè dlo nan lanmè? Kilès ki ka pran lajè syèl la ak dwèt li? Kilès ki ka mete tout tè a nan yon ti mezi? Kilès ki ka pran pèz gwo mòn yo ak ti mòn yo nan balans? Ki moun ki ka di Senyè a sa pou li fè? Ki moun ki te ba li konsèy? Ki moun Senyè a t'al jwenn pou l'te ka gen bon konprann? Ki moun ki te moutre li jan pou li rann jistis? Ki moun ki te ba li konesans? Ki moun ki te fè li konnen jan tout bagay fèt?