Vèsè popilè nan Bib la ki soti nan Yo꞉n 2

Pataje

Ya꞉su eyo꞉ molo ha꞉na꞉no꞉ tamin amilo꞉ dimido꞉ a꞉no꞉ we. Eyo꞉ Ga꞉lili hen, Kana amisa꞉n a꞉nami dimido꞉. A꞉na dimidakiyo꞉ ene wi halaido꞉wo꞉ kalaba wido꞉ ko꞉lo꞉, enedo꞉ tili wida꞉sen kalu iliyo꞉ e amio꞉ a꞉na tili dabu.

Ya꞉su eyo꞉ a꞉ma꞉la꞉bo꞉ a꞉la꞉sio꞉, “Ga, ko nino꞉ma ko꞉lo꞉ nemo꞉wo꞉ sa꞉la꞉so꞉bo. Ho꞉lende nilo꞉wo꞉ o꞉semo꞉fa꞉la꞉dowo꞉.”

A꞉la꞉go꞉ko꞉lo꞉ Ya꞉su eyo꞉ nanogdo꞉ dian kalu imo꞉wo꞉ a꞉la꞉sio꞉, “Go꞉fo꞉ wenamio꞉ ho꞉ndeyo꞉ gulu alifelema.” A꞉la꞉sa꞉labiki iliyo꞉ a꞉no꞉ tambo meya wa꞉li alifela꞉i ane. A꞉la꞉dimida꞉sa꞉ga꞉yo꞉ Ya꞉su eyo꞉ imo꞉wo꞉ a꞉la꞉sio꞉, “Ho꞉n gililo꞉ gulu alifelo꞉ a꞉no꞉ go꞉fo꞉ ha꞉lu nowa wasulia꞉sa꞉ga꞉, kegeo꞉lo꞉ biso꞉ o꞉mo꞉ dia꞉ hamana.” A꞉la꞉sa꞉labiki iliyo꞉ a꞉la꞉dimido꞉.

A꞉la꞉sa꞉labiki Ya꞉su eyo꞉ a꞉ma꞉la꞉ sa꞉laki, “Malilo꞉ a we giliyo꞉ bidilia꞉ dia꞉talikiyo꞉, niyo꞉ ho꞉len otalen a꞉namio꞉ a꞉ma꞉la꞉ a꞉dialifa꞉no꞉.”

Ya꞉su eyo꞉ a꞉no꞉ ba꞉da꞉sa꞉ga꞉yo꞉, iyo꞉ yasama꞉niki me nolo꞉ kegene sunda꞉sa꞉ga꞉, iyo꞉lo꞉, ini kaowo꞉lo꞉ a꞉la꞉ta꞉ga꞉ sibiyo꞉lo꞉ ha꞉la꞉ya hamana꞉ki o꞉luso꞉no꞉. A꞉la꞉ta꞉ga꞉ Ya꞉su eyo꞉ kalu molelo꞉ a꞉nodo dia꞉len a꞉ma꞉ mole us a꞉no꞉ fifila꞉sa꞉ga꞉, ili i fofodo꞉ a꞉no꞉ nodolia꞉ga꞉ buluga꞉felo꞉. Eyo꞉ o꞉ba꞉ hilo꞉ kililia꞉len kalu imo꞉ sa꞉laki, “Kelego꞉ we dia꞉ hamana. Dowa꞉ a we kelego꞉lo꞉ kililia꞉sen a o꞉ngo꞉wo꞉ dowa꞉so꞉bo” a꞉la꞉sio꞉.