Text: © Alliance Biblique du Cameroun, 1996 Audio: ℗ 2010 Hosanna

Bafia - 1996 Edition (NT) Drama

Bafia Nouveau Testament © Bible Society of Cameroon, 2019.

Ajɛ̀m ìnɛn, Ɓɛ̀yudɛ̀n ɓɛ ɓaghà rì tìcàɓ, fɔɔnnɛ Yeesus à ɓɔkà a Yorisalɛm.
A Yorisalɛm, coo kiɗig kidɛŋ ki ri wɔɔ, jàŋbog rì rìɗigì ɗi ɓi bàn ɗi lɛ, ìsuunaa wu jɔ̀ɔ̀, ɓɛ regì kɔ ɓi kìtòkì ki Ɓɛ̀yudɛ̀n lɛ: Bɛtzata; kìɗig kiǹ ki ɓaghà ɓɛ̀tuùtuu mɛtaǹ. Ɓìtuu ɓi ɓɛroroɓ ɓi nɔɔ̀nɔ̀ŋdɛ̀ngà a ɓɛ̀tuùtuu ɓɛ̀n zi, lɛ rì ɓɛ̀ɗyaŋɗyàŋ, [rì ɓɛ̀lɛnlɛm, rì ɓìwɔ̀g, ɓɛ ɓoŋɓòŋ lɛ mɛ̀nig mɛɛ nyɛŋ̀ɗɛn. Lɛ ŋwaà-fìtom àa nti à sɛngìì ɓyààmɛ̀n ɓidɛŋ ɓi kìɗig kiǹ, à nyɛ̀ŋzì mɛ̀nig; fɔɔnnɛ ki mɓalàg lɛ, i mɛ̀nig mɛ mɛ nyɛ̀ŋɗɛ̀n, ŋwaànɛ à loogh miì kì kpìi, àa soo roròɓ rìkuu ɗi firoɓ aɗi, à wɔ̀n.]
Nni roròɓ àdɛŋ à ɓaghà wɔɔ di à mɛ finɛn ɓi fìroɓ, bèg rìtin ɗì ǹtɛ̀ɗ rì taàraa. Yɛ̀ɛ Yeesus à ghɛngà nyi ǹnɔ̀nɔŋiyɛn, à ki yi lɛ, à mɛ finɛn ɓi-kɔ̀ɔ̀ wiǹ, nni à tɔkà nyi lɛ: U kɔ̀nkɔn lɛ di wàa wɔ̀ni? Roròɓ ànɛ̀n à ɓàg nyi lɛ: Kan, ǹ-yin ɗi mum ànɛ lɛ, à pìg mɛ̀ ɓi kìɗig, di mɛ̀nig mɛ mɛ nyɛŋ̀ɗɛ̀n; lɛ ki ti lɛ cààmɛ̀n ki mɛ̀ɛ nka yeeghyeèghkɛ̀n lɛ nkpi ɓi kìɗig, ŋwaàdɛŋ à log rì mɛ̀. Nni Yeesus à kpaaghà nyi lɛ: Pɛ̀sɛn aɗyòò, u teɗ kon wɔɔ̀, u kɛɛ̀ghi. Fɔɔnnɛ ŋwaànɛ̀n à ghàskà kì wɔ̀ni, à teɗ kon wiì, à tumɛ̀n rìkɛ̀ɛ̀kɛ̀ɛ̀. Ŋwos anɛ̀n à ɓaghà ŋwosi Saɓàt.
Nni Ɓɛ̀yudɛ̀n ɓɛ kpaaghà ŋwaànɛ ɓɛ wɔɔ̀zìghà ànɛn lɛ: Ŋwosi Saɓàt yɛɛ ri lɛ. Ɓìdɔ̀gsɛna ɓis ɓi gherɛɛ ɓi lɛ, u tɛg kon wɔɔ̀. Ŋwaànɛ̀n à ɓàg ɓɔ lɛ ŋwaànɛ àa wɔ̀ɔ̀zii mɛ̀, àa kpaa mɛ̀ lɛ: Tera kon wɔɔ̀, u kɛɛ̀ghi. Fɔɔnnɛ ɓɛ tɔkà min nyi lɛ: Rìkuu ɗi mum aɗi ɗyaa kpaa wɔ̀ lɔɔ lɛ tera kon wɔɔ̀, u kɛɛ̀ghi? Wɔ̀lɛ, ŋwaànɛ ɓɛ wɔɔ̀zìghà ànɛn à yighà ɓi ŋwaànɛ à kpaaghà nyi fɔlɔɔ, lɛ Yeesus à ɓaghà di à mɛ ɗim ɓi gwìy ì ɓum ìnɛ ì ɓaghà wɔɔ. Ajɛ̀m ìnɛn, Yeesus à tanɛ̀ngà rì ŋwaànɛ̀n ɓi naà-Bɛ̀ll, à kpaa nyi lɛ: Ù ghɛɛ yɛ̀ɛ ù mɛ wɔ̀n, kɔ̀ɔ kìti kiɓe, di ù rì ɓiì tulɛɛ ri ǹtɔɓ wudɛŋ wu wu cee fɔ̀lɔ̀ɔ̀. Fɔɔnnɛ ŋwaànɛ̀n à kɛ̀ngà kì kpaà Ɓɛ̀yudɛ̀n lɛ Yeesus yaa wɔ̀ɔ̀zii nyi. Kɛɛ̀ki Ɓɛ̀yudɛ̀n ɓɛ nɔɔ̀nɔ̀ɔ̀tìghà Yeesus, lɛ à kìghà kìɓan kiǹ ŋwosi saɓàt.
Nni Yeesus à ɓàkà ɓɔ lɛ: Seŋi wɛ̀m a ka sasày à kpaŋ ɓigomìnɛ, mɛ̀ ǹsasày girig. Ɓi jɛ̀ɛ̀ ìnɛn nnɛ Ɓɛ̀yudɛ̀n ɓɛ teèsìghà tì nyoo ɓi rìkaakàà ɗi bee inɛ ɓɛɛ wey nyi, àa lɛ rìyogsì ɗi à yoòyògsìghà kìcèlì ki Saɓàt ɗyɔ rì ɗyɔ, lɔŋ ɓisuulɛ à kpaaghà lɛ Bɛ̀ll à rì Seŋi wìì, à foŋɗɛn nyimiɗ ɓi nɗɛli wu Bɛ̀ll.

Nni Yeesus à ɓàkà min ɓɔ , à kpaa lɛ: Ǹkpaa mìni kɔɔ̀kɔɔ̀ à rìkpaa lɛ Man à yin lɛ à kì kìɓan kidɛŋ rì nto wìì, a kìki lɔŋ ɓiɓan ɓi a seesèè di Seŋi a kìkì. Fɔɔnnɛ ɓìɓan ɓi Seŋi a kìkì, ɓyɛɛ̀ɓi Man girig a kìkì. Ɓisuulɛ Seŋi à keesii Man, à ti à rèsàg nyi com kìcèm ki a kìkì. À ki rì nyi ɓiì rèsii ɓiɓan ɓi ɓi cee fɔlɔɔ, lɛ ɓi kuùrag. Lɛ fɛlɛ yɛ̀ɛ Seŋi à ti à ghèmzàg ɓìloŋ, à fa ɓyɔ cɛɓ, fɔlɔɔ nnɛ Man à ti à falàg girig ɓumɓɛ à kɔ̀ni cɛɓ. Seŋi à yin ɓiì renɗeni ɓiɓan ɓi ɓum, wɔ̀lɛ Man innɛ à faghà rìren ɗi ɓiɓan ɗicèm, lɛ di ɓum ɓɛ̀cèm ɓɛɛ nyaàsi Man lɔŋ yɛ̀ɛ ɓɛɛ̀ nyaanyaàsì Seŋi. I mum à nyaasii ɓi Man, di à nyaasii ɓi Seŋi ànɛ à romgày nyi. Ǹkalii mìni kɔɔ̀kɔɔ̀ à rìkpaa lɛ, ŋwaànɛ à woogh jɛ̀ɛ̀ yɛ̀m, à ki gherɛn roànɛ à romgày mɛ̀, à ti rì cɛɓ ki fiɗyàɓ fikɔ̀ɔ̀. À yin lɛ à yù a rìren ɗi ɓiɓan, kìɓan kifog, à mɛ pɛ̀sɛn yi ɓi rìwu, à ɗiŋì ɓi cɛɓ. Nkpaa mìni kɔɔ̀kɔɔ̀ à rìkpaa lɛ cààmɛ̀n ki riì, kiŋcèm kɛɛ ti lɛ, kɛɛ̀ki ɓìloŋ ɓi ɓiì woògh jɛ̀ɛ̀ ì Man à Bɛ̀ll. Fɔɔnnɛ ɓɛ̀roɓɛ ɓɛ ri ɓiì woògh jɛ̀ɛ̀ yìì, ɓɛ ɓiì ghɛɓì. Lɛ fɛlɛ yɛ̀ɛ Seŋi à rì rì ìtèɗ wu fayɛn cɛɓ, fɔɔnnɛ à kìghà lɛ, Man a ɓa girig rì ìtèɗ wu fayɛn cɛɓ. À faghà nyi ìtèɗ wulɛ a yɔm̀ ɓìɓan ɓi ɓum lɛ, à rì Man à mum. Nni kɛ̀ ɓi kuurag kiɓan kiǹ; cààmɛ̀n ki tiì, ki ɓum ɓɛ̀cèm ɓɛ ɓɛ ri ɓi zɔ̀ŋ ɓɛ ɓiì woògh jɛ̀ɛ̀ yìì, ɓɛ kpagìì. Fɔɔnnɛ ɓɛ̀roɓɛ ɓɛ kighà kìrɔɔ, ɓɛ ri ɓiì ghemɓɛɛ lɛ ɓɛɛ teɗ cɛɓ; ɓɛ̀roɓɛ ɓɛ kighà kìɓe, ɓɛ ghemɓɛ̀n lɛ ɓɛɛ teɗ bɛ̀lɛn. Mɛ̀ ǹ-yiǹ ɓiì kìkii kiɓan kidɛŋ rì nto wɛ̀m, nɗenɗen ɓiɓan lɔŋ yɛ̀ɛ mɛ̀ɛ nwowòg, fɔɔnnɛ rìren ɗyɛ̀m ɗi ɓiɓan ɗi ri lɛ saaɗ lɛ, ǹ-yin ɓiì kaakaa rikɔ̀n ɗyɛm̀, nkaakaa lɔŋ rikɔ̀n ɗi roànɛ à romgày mɛ̀.
I mɛ̀ɛmiɗ yaa rì wusìnɛ̀ɗ ànɛ ɓi kìɓan kɛm̀, di com ki ǹɗì lɛ ǹkpaa ki yin lɛ ki wooghrɛ̀n. Nni yɛ̀ɛ ŋwaàdɛŋ yɛɛ ri wusìnɛ̀ɗ ànɛ ɓi kìɓan kɛm̀, fɔɔnnɛ ǹ-yii lɛ, com ki a kpaakpaa ɓi san wɛ̀m ki ri saaɗ. Ɓì romgà ɓum yɛ̀ɛ Zyaŋ, Zyaŋ à rèsì mìni saaɗ ànɛ ɓi rìɓa ɗyɛ̀m. Ɓi san wɛ̀m, àa mum yɛɛ ri wusìnɛ̀ɗ ànɛ ɓi rìɓa ɗyɛ̀m, kìɓan kifog, ǹkpaa lɔŋ fɔlɔɔ lɛ, di ɓi ɓa rì cɛɓ. Zyaŋ à ɓaghà fɛlɛ yɛ̀ɛ lamɓà ànɛ a ròòròò, à kpeèkpèŋzì jàŋ, nni ki kɔngà mìni lɛ ɓi nyaàrɛn rì kìtɛɛtɛn kii ɓi maa cààmɛ̀n. Ǹɗì rì wusìnɛ̀ɗ ànɛ a rèresi kiɓan kɛm̀, à cee rìrèsì ɗi Zyaŋ à rèsìghà, nnyɛɛ ri ɓìɓan ɓi Tààta à faghà mɛ̀ lɛ nki. Ɓìɓan ɓiǹ ɓyɛɛ̀ rèresi lɛ Tààta yɛɛ romgày mɛ̀. Fɔɔnnɛ Tààta nyimiɗ anɛ à romgày mɛ̀, à rèsìghà girig kìɓan kɛm̀; ŋwos adɛŋ, ɓì ka wokà ɓi jɛ̀ɛ̀ yìì, kɛ̀ ɓi ki ghɛn ìsu wìì. Fɔɔnnɛ ɓìɓan ɓii ɓi yin mini ɓi nɗem, lɛ ɓì gherɛɛ ɓi roànɛ à romgày. Ɓi fifiɓi mɛkànì mɛ kaàtà à Bɛ̀ll, lɛ ɓi fèfeg lɛ ɓi mɛ̀kànì mɛǹ nnɛ ɓì rì ɓiì ɓaà rì cɛɓ ki fiɗyàɓ fikɔ̀ɔ̀. Mɛ̀kànì mɛǹ mɔ yɛɛ̀ ki rèresi kiɓan kɛm̀. Nsoò fɔlɔɔ, ɓì kɔ̀ni ɓi lɛ di ɓyàa yùu yì a lɔ̀ŋkɛm̀ lɛ ɓi ghɛǹ cɛɓ.
Ǹ-yin ɓiì kaakaa rikem a ɓum. Wɔ̀lɛ ǹ-yii mìni, ǹkɔ̀nɛ̀n à Bɛ̀ll à yin mini ɓi mɛ̀rem. Ǹ-yùghà ɓi ɗii ɗi Seŋi wɛ̀m kɛ̀ ɓi kɔ̀n lɛ ɓi ghaɓ mɛ̀, wɔ̀lɛ, i ŋwaàdɛŋ à yùu ɓi ɗii ɗii ɗi nyimiɗ, nyi nnɛ ɓì rì ɓiì ghàɓi. Lannɛ ɓì rì lɛ ɓì gherɛ̀n, di ɓi faafàlɛ̀n rìkem mìni rì mìni, kɛ̀ ɓi kaa rikem ɗi ɗi riì yɛ̀ɛ Bɛ̀ll cɛ̀ncii? Kɛ̀ ɓi fèg lɛ ǹɗì mìni ɓiì sɔmɛɛ yɛ̀ɛ Tààta; ŋwaànɛ à rì mìni ɓiì sɔmɛɛ, nnyɛɛ ri Moyis ànɛ ɓì faghà ǹtyweeyi ri nyi, ɓisuulɛ i ɓì gherɛ̀ngà Moyis, di ɓì rì lɛ ɓì gherɛ̀n mɛ̀, lɛ kìɓan kɛm̀ kɛɛ̀ki à kàngà. Nni i ɓì gherɛɛ ɓi ɓiɓan ɓi à kàngà, lannɛ ɓì rì ɓiì gherɛɛ ɓi mɛ̀ ǹkpaa?

Koute ZYAŊ 5