Huichol 2020 SIL (NT) NonDrama

Tsutɨapai Niuki kaniyɨanekaitɨni,
Niuki Kakaɨyari hetsɨa kaniuyeikakaitɨni,
Niukitɨtɨ Kakaɨyari kanihɨkɨtɨkaitɨni.
Mɨkɨtɨtɨ niuki tsutɨapai Kakaɨyari hamatɨa kaniuyeikakaitɨni.
Naitɨ katiniuneni mɨkɨ 'inetɨaku,
xɨka mɨkɨ ka'inetɨanike, pɨkanenikeyu nixewitɨ.
Mɨkɨ hetsie tukari kanixuawekaitɨni,
tukari teɨteri wahekɨariwiyame kanihɨkɨtɨkaitɨni.
Hekɨariya yɨwipa kanihekɨariwieka,
yɨriya pɨkahe'iwawe.
Merikɨtsɨ tewi Kakaɨyari meiyenɨ'a 'aniuyeikakaitɨni Wani titewatɨ. Mɨkɨ mɨtitahekɨatakɨ, hekɨariya hepaɨtsita, yunaitɨ yuri memɨteta'erienikɨ mɨkɨ tihekɨatakaku. Wani hekɨariya pɨkahɨkɨtɨkai, titahekɨatake hekɨariya hepaɨtsita xeikɨa kaninuani. Tita yurikɨ mɨtihekɨariya, tita mɨtiwahekɨatɨa yunaime teɨteri, mɨkɨ kwiepa kaninuaximekaitɨni.
Kwiepa kaniuyeikakaitɨni, kwie kaniuneni mɨkɨ 'inetɨaku, matsi kwiepa memɨtama mepɨkaheitima. Yukie kaninuani, teɨterimama mepɨka'itanaki'eri. Matsi keyupaɨmetɨ memitanaki'eri, mɨkɨ yuri memɨte'erie kemɨ'ane mɨhɨkɨtsie, mɨkɨ heitserie kaniwarupitɨani Kakaɨyari niwemama memakɨnekɨ. Teɨteri kememɨte'ununuiwatsie mepɨkayekɨ, wapaapama meyuhiwe'eriekaku teɨteri kememɨteyurie, mana mepɨkayekɨ, 'uki tɨɨri wawewimɨkɨkaku, mana mepɨkayekɨ, Kakaɨyaritsie pɨta mepɨyekɨ.
Mɨkɨ niukitɨtɨ tewi kanayani, tatsata 'ukaitɨ ratɨa. Tame tekanixeiya witsikemɨ'anekai, 'ukiyarieya witsikemɨtipitɨa yuniwe muyuxewi, kanaye'ani 'aixɨa tiuka'iyaritɨ yuri tikuxatatɨ.
Wani katinihekɨatakaitɨni hepaɨtsitana, kanahiwakaitɨni mɨpaɨ 'utaitɨ: «'Ikɨ kanihɨkɨtɨni nemikuxatakai mɨpaɨ ne'utaitɨ: “Mɨkɨ ne'utɨa 'umamie kanimariweni ne hepaɨna neka'anekaku meripaitɨ mɨmiemekɨ, ne meripaitɨ nekamiemetɨkaku”».
Mɨkɨ tinaime kemɨrexeiya, 'aixɨa tiuka'iyaritɨ teyunaime tame waɨkawa katatiniumini. 'Inɨari niukiyari tekaniupitɨarieni Muitsexi tatsi'upitɨaku. Peru matsi tepupitɨarie naki'eriya meta tita yuri mɨraine temɨtehexeiyanikɨ, Ketsutsi Kɨritsitu 'aixɨa tiuka'iyaritɨ yatatiupitɨaku. Xewitɨ hatsuaku pɨka'ixeiyawe Kakaɨyari, Nu'aya muyuxewi, Kakaɨyari mɨhɨkɨ kemɨ'ane yu'ukiyaritsie mɨtiwiya, mɨkɨ katanihekɨatsitɨiyani.

'Ikɨ kanihɨkɨtɨni Wani kemɨtiutahekɨataxɨ kepauka huriyutsixi hetsɨana memɨwareyenɨ'a mawari wewiwamete meta rewitsixi Kerutsareme memeyekɨ memita'iwawiyakɨ kemɨ'ane mɨyɨanekai. Mɨkɨ puyutahekɨataxɨ, pɨkayuku'imawakai, matsi puyutahekɨataxɨ mɨpaɨ 'utaitɨ:
—Neri Kɨritsitu nepɨkahɨkɨ.
Hikɨ mɨpaɨ mekatenita'iwawiya:
—¿Kamɨtsɨ kemɨ'ane pepɨyɨane? ¿Kamɨtsɨ 'Eriyaxi petiyɨane?
Mɨkɨ mɨpaɨ kaniutayɨni:
—Ne mɨkɨ nepɨkahɨkɨ.
—¿Kakaɨyari niukameya petiyɨane?
Mɨkɨ tiwaruta'ei:
—Hawaikɨ.
Mɨkɨ 'ayumieme mɨpaɨ mekatenitahɨawe:
—¿Kamɨtsɨ kepaikɨ pepɨyɨane? Xatsunikɨ yatemɨtewaretahɨawekɨ mɨkɨ memɨtatsiheyenɨ'a. ¿Kepetayɨni 'ahepaɨtsita?
Mɨkɨ mɨpaɨ kaniutayɨni, Kitsariyaxi Kakaɨyari niukameya kemutayɨ hepaɨ:
—Netsɨ nekanihɨkɨtɨni kemɨ'ane mahiwa makumawetsie: “Xeuraɨyeme xekeneutawewi Ti'aitame huyeya”.
Mɨkɨ memeyenɨ'arie paritseutsixi wahetsɨa mekanimiemetetɨkaitɨni. Hikɨ mɨkɨ mɨpaɨ mekatenita'iwawiya:
—Merikɨte, xɨka Kɨritsitu pekahɨkɨtɨni, xɨka 'Eriyaxi pekahɨkɨtɨni, xɨka Kakaɨyari niukameya pekahɨkɨtɨni, ¿titayari peti'ɨyane?
Wani mɨpaɨ katiniwarutahɨawe:
—Neri nekatini'ɨyaneni hakɨ, peru xetsata 'akaniuweni xewitɨ, xemɨka'imate xeme, mɨkɨ ne'utɨma 'ukanamieniri, ne 'aixɨa nepɨkatiuka'iyari nehetsie mɨtinakenikɨ yatɨni nemixɨnirienikɨ kakaiya kwitaxiyari.
Mɨpaɨ katiniuyɨni Wetaniyatsie Kurutani hatuxame 'anutaɨye, mana katini'ɨyanekaitɨni Wani.

Merikɨtsɨ 'uxa'arieka Wani kanixeiya Ketsutsi 'a'amiekame hepana, mɨpaɨ kaniutayɨni: «Kamɨ muxa nunutsi Kakaɨyari hetsɨa mieme, kwiepa memɨtama tita 'axamemɨteyurie kaniwakunawairiwani mɨkɨ. Mɨkɨ kanihɨkɨtɨni kemɨ'ane hepaɨtsita mɨpaɨ nemainekai: “Xewitɨ tewi ne'utɨma 'ukanamieni kanimariweni ne hepaɨna neka'anekaku meripaitɨ mɨmiemekɨ, ne meripaitɨ nekamiemetɨkaku”. Netsɨari nepɨkaheitimaitɨyeikakai, peru mɨmatsiɨkɨnikɨ 'ixaheritsixi wahɨxie, 'ayumieme nekaninuani hakɨ netiuka'ɨyatɨ».
Hikɨ Wani katiniutahekɨata mɨpaɨ 'utaitɨ: «Ne nekanixeiya 'Iyari taheima 'akamieme kukuru 'amakamieni hepaɨ tiyuxexeiyame meta hetsiena kaniyuhayewa. Ne nepɨka'imatekai 'akuxi, matsi kemɨ'ane mɨnetsiheyenɨ'a nemɨtiuka'ɨyanikɨ hakɨ, mɨkɨtɨtɨ mɨpaɨ pɨnetiutahɨawixɨ: “Kemɨ'ane heima pemixeiya 'Iyari 'a'akamieme hetsiena yuhayewame, mɨkɨ kanihɨkɨtɨni kemɨ'ane mɨtiuka'ɨya 'Iyari Mɨtiyupata rapitɨatɨ”. Netsɨ nekaniuniere, nekatiniutahekɨata 'ikɨ Kakaɨyari Nu'aya kanihɨkɨtɨni».


Hikɨ 'uxa'arieka tawarita mana kaniutiwekaitɨni Wani, teyɨ'ɨkitɨwametemama yuhutatɨ mana meteti'ukaita. 'Ixeiyaka Ketsutsi mana 'uyemiekaku, mɨpaɨ kaniutayɨni:
—Kamɨ muxa nunutsi Kakaɨyari hetsɨa mieme.
Yuhutatɨ teyɨ'ɨkitɨwametemama me'i'enieka mɨpaɨ haineme, Ketsutsi mekaneweiya. Hikɨ Ketsutsi ta'aurie 'aweka, waruxeiyaka 'utɨana me'uhukaku, mɨpaɨ katiniwarutahɨawe:
—¿Tita xetekuwautɨwe?
Mɨkɨ mɨpaɨ mekatenitahɨawe:
—¿Xawi, hakewa pepeka? (Xawi taniukikɨ Ti'ɨkitame panuyɨne).
Mɨkɨ mɨpaɨ katiniwarutahɨawe:
—Xekenakɨni xepɨneniere.
Hikɨ mana mekaniu'axɨani, mekaniuneniere hakewa mekatei. Mɨkɨ tukaritsie hamatɨana mekaniuyuhayewa, memenuweiyakɨ tau kɨa heuwiekaku.
Merikɨtsɨ yuhutatɨ memu'enana Wani kemainekai, Ketsutsi memewei, xewitɨ 'Atɨrexi katinitewakaitɨni Tsimuni Pekuru mɨ'iwayatɨkai. 'Atɨrexi yu'iwa Tsimuni kanetaxeiya meri, mɨpaɨ katinitahɨawe:
—Tekaneitaxeiya Metsiyaxi (taniukikɨ Kɨritsitu heitserie mupitɨarie maine).
Ketsutsi hetsɨa kaneiwitɨni, Ketsutsi 'ixeiyaka mɨpaɨ kaniutayɨni:
—'Ekɨ Tsimuni pekanihɨkɨtɨni, Wani pemɨnu'aya. Tsepaxi pepɨtiterɨwarieni (taniukikɨ Pekuru Tete manuyɨne).

Hikɨ Ketsutsi 'uxa'arieka Karereya paitɨ kaniyeimɨkɨkaitɨni. Kanitaxeiya Peripe, mɨpaɨ katinitahɨawe:
—Kenenanuweiya.
Peripe Wetsaira kanikiekametɨkaitɨni 'Atɨrexi meta Pekuru wakiekaritsie. Hikɨ Peripe Natanaheri hetaxeiyaka, mɨpaɨ katinitahɨawe:
—Kemɨ'ane xatatɨ Muitsexi mɨtiuta'utɨa 'inɨari niukiyaritsie, meta Kakaɨyari niukametemama memɨte'uti'utɨa me'ixatatɨ, mɨkɨ tekanetaxeiya, Ketsutsi kanihɨkɨtɨni Kutse nu'aya natsaretitanaka.
Natanaheri mɨpaɨ katinitahɨawe:
—¿Ketiyɨwe Natsareti hetsie 'aixɨa ti'anetɨ mɨrayeneni?
Peripe mɨpaɨ katinitahɨawe:
—Patsɨ kenenierimie.
Kepauka Ketsutsi Natanaheri muxei 'a'amiekame hetsɨana, mɨpaɨ kaniutayɨni hepaɨtsitana:
—Kamɨ, 'ikɨ yurikɨ 'ixaheri tewiyari kanihɨkɨtɨni, hetsiena 'irɨmari pumawe.
Natanaheri mɨpaɨ katinitahɨawe:
—¿Hakewa pepɨnetsihetima 'ekɨ?
Ketsutsi mɨpaɨ katinitahɨawe:
—Peripe kamatitaxatɨawekaku 'akuxi, kepauka pini hetɨa pe'ukaiku, 'ana nepɨmatsi'uxei.
Natanaheri mɨpaɨ katinita'eiya:
—Ti'ɨkitame, 'ekɨ Kakaɨyari pekaninu'ayatɨni, 'ixaheritsixi tati'aitɨwame pekanihɨkɨtɨni.
Ketsutsi mɨpaɨ katinitahɨawe:
—¿Pini hetɨa pe'ukaime nepɨmetsi'uxei, nemutayɨkɨ yuri pepɨtiuta'eri? 'Ipaɨ 'aneneme matsi waɨkawa mamariwaweme pekatinixeiyamɨkɨ.
Mɨpaɨta katinitahɨawe:
—Yurikɨ mɨpaɨ nekanaineni, xekanixeiyakuni muyuawitsie reuyepiyakame, Niuki tuayamete Kakaɨyari hetsɨa miemete xetewaxeiyata me'anutikɨkame meta me'anakakɨkame Yuri Tewi hetsie.

Koute Wani 1