If you would like a copy of this version please contact info@davaraudiobibles.org

Lahuali New Testament, CC-BY-SA-4.0, The Love Fellowship. Lahuali New Testament Audio Bible, CC-BY-SA-4.0, Davar Partners International, The Love Fellowship, 2022.

Lahuali New Testament

Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.

दिह गप्पो थल यीशु गलील प्रदेशो ऊई ठहरि रिंङ यात्रा लहज़ी लेहती, छना कुचे यहुदी सेंहणार दोबि सच़िमी कोशिश लहज़ी लेहकी तोईरे, दिऊ थल्जी दुह यहूदिया प्रदेशंङ इबि मिन्ज़ते। यहुदी मीहतु इच्च़ा त्यार अपिमी तोहई अपि तम्बू ऊ त्यार कुट्री, अपिमी तोहई। दिऊ थल्जी यीशु ज़ि न्वा ज़ि दोऊ हखा कुंई दिह प्रदेश केट्रा यहुदिया प्रदेशो हखा इला कि अंऊ केई मोह्ड़े कम लहज़ातन दुहरे कांह चेलार ला खमोर। अगर केई जुंज़ातन कि मीहरे कांह पाहठी ञेंहपोर ता कनिंङ भत्ते तु तुईज़ी दिहरे हेरानी ऊ कम लहज़ी जूंस। छना कुचे यीशु ऊ न्वारे ला यीशु ऊ टोहकठे विशवास माह लहज़ातेर।
दोथल यीशु ज़ि दोतंङ साते कुंई, “केहतु सही टेम ता अपेहल अपि तरपोतो पर गिऊ सही टेम अईता अंज़े माह। संसारो मीहरे केतंङ साते बैर लेह मरपोर पर दोरे गेरंङ साते बैर लहज़ातोर, छना कुचे गेह दोतु खिलाप दिह गवाही रंड्रातग, कि दोतु कम मांजी तोह। केहरे तम्बू ऊ त्याहरो थल्जी इलांई; गेह दिह त्याहरो थल्जी माह योग, छना कुचे अईता तचेक गिऊ सही टेम पुरा माह शुह।” दिह कुट्रा मसीह यीशु गलील प्रदेशंङ ए बंङज़ा इलि।

एनोह न्वातु तम्बू ऊ त्यारा रिंङ इबिमी थल दुह ला ब्याके ते दोर्तिंङ इलि। त्यारा रिंङ यहुदी मीहरे यीशु बि दिह कुट्रा ते पेट्री लेहतिर दंङ पुछताछ लहज़ी लेहतिर, “कि दुह अंऊर तोह?” दंङ मीहतु बिचंङ यीशु ऊ पाहठी गप्पा शुबी लेहती। अच़िया कुट्रातेर, “कि दुह रुठे मीह शुह” दंङ अतुआ कुट्री तोहई, “कि दुह भरमाएच़ा मीह शुह दंङ भत्ते तंङ साते धोखा लहज़ा।” तांला यहुदी सेंहणातु बेह्द चेहके अच़िला यीशु पाहठी भत्तेतु तुईज़ी माह कुट्रातेर।

अपेहल तम्बू ऊ त्याहरो अधा ध्याड़ारे योह्सा इलिर; ता यीशु यहुदी मंदिरंङ इलजे शिक्षा रंड्री लेहती। दोपहल यहुदी मीहरे हेरान शुहचे कुट्री लेहतिर, “दिह्बी बिना पढ़ेके पवित्र शास्त्रो ‍‍ज्ञान अंऊरच़ि अति?” यीशु ज़ि दोतिंङ जुबाब रेंई, “गिऊ शिक्षा गिऊ घेंङौ मशत, पर परमेश्वरो दोरच़ी शुह, अच़ि गेह च़रसी शुगाह। अगर अरीया दोऊ हिटी ओ टोहकठे ज़ोअतो ता दोई ञेंह केहतो कि गिऊ शिक्षा परमेश्वरो दोरच़ी अपा या गिऊ दोरच़ी। अच़ि एनोहो दोरच़ी छा कुट्रा, दोई एनोहो ए तारीफ जुंज़ा, पर अच़ि एनोहो च़रच़ा दोऊ तारीफ जुंज़ा दुह ए ईमानदार शुह, दंङ दोऊ अंद्रेग बेईमानी माह। छि मूसा ज़ि केतिंङ कानून माह रौंऊआ? तांला केहतु बिचंङ च़ि अरीला कानूनो हिसाबे माह जोज़ा। केहरे छिला गिह्बी सच़िमी तातंई?”
मीहच़ी जुबाब रेंईर; “अच़ि कनिंङ सपोर? कांह अंद्रेग ता मांजी आत्मा तोह!” यीशु ज़ि दोबि जुबाब रेंई, “गेह इच्च़ा कम अरामो ध्याड़ा रिंङ लहतग दंङ केहरे भत्तेर हेरानी लहज़ातंई दिऊ बजह च़ि मूसा ए केतिंङ खतना लहज़िमी आज्ञा रांहषी ततो, दिह मशत कि दुह मुसाओ दोरच़ी शुह पर बाह मेमेतु टेमा च़ि तोह, दंङ केहरे अरामो ध्याड़ारिंङ मीहतु खतना लहज़ातंई। अपेहल अरामो ध्याड़ारिंङ मीहतु खतना लहज़ी कि मूसा ओ कानूनो आज्ञा ओ उलंघन शुबी माह जूंस, ता केहरे छिला दिऊ थल्जी रोषेक्च़ातोन कि गेह अरामो ध्याड़ारिंङ इच्च़ा मीहबी पुरा रिति रंङ साते ठीक लहतग। मोद खांई फेंसला था लांही, पर ठीक-ठीक फेंसला लांही।”

दोथर अंयों शुह्दा यरूशलेम शहरो मीहरे कुट्री लेहतिर, “छि दिह दुह ए मशत अतिंङ सेंहणार सच़िमी कोशिश लहज़ी लेहकी तोईरे? पर खंणुई, दिह ता भत्ते तु तुईज़ी गप्पा लाह दंङ अच़िला दोबि छले माह कुट्रातोर; छि झांह ता माह शुहआ कि दोच़ी ञेंहई केहतोर कि दिहे मसीह शुह? दिह्बी ता ञेंहच़ी ञेंहनी, कि दिह अंऊखि शुह; पर अपेहल मसीह अपतो ता अच़िला माह ञेंओर कि दुह अंऊखि शुह।”
दोथर यीशु ज़ि यहुदी मंदिरंङ शिक्षा रंड्रा हाऊष रें कुंई, “केहरे गिह्बी दंङ दिह ला ञेंहच़ातंई कि गेह अंऊखि शुगाह। गेह ता घेंङा ए अंज़े माह शुगाह पर गिह्बी च़रच़ा हेले सत्यवादी तोह, दोबि केहच़ी माह ञेंहनी। पर गेह दोबि ञेंहच़ातग; छना कुचे गेह दोऊ दोरच़ी शुगाह दंङ दोई गेह च़रसी शुगाह।” दिरंङ यहुदी सेंहणा ज़ि दोबि च़ुमज़ि तरेर तांला अच़िला दोबि गिरफ्तार माह लहरिर, छना कुचे दोऊ सिमी सही टेम अईता अंज़े माह तोहई। दंङ भीड़ो बिचंङ च़ि महसे मीहज़ी दोऊ टोहकठे विशवास लहरिर, दंङ कुट्री लेहतिर, “मसीह अंऊ मुक्का अपतो, ता छि दिहबे ला महसे चिन्ह चमत्कार कंबोतो आ?”

फरीसी मीहज़ी ऊई मीहतिंङ यीशु ऊ पाहठी गप्पा लहज़ी रेड्रिर; दंङ यहुदी मोह्ड़े पुरोहित ज़ि ए फरिसी मीहज़ी दोबि च़ुज़िमी थल्जी सैनिकारे च़रतिर अरी यहुदी मंदिरो पहरेदार तोईर। दिरंङ यीशु ज़ि कुंई, “गेह थोड़े अरे टेमो थल्जी केतंङ साते शुगाह; दोऊ थल गेह, गिह्बी च़रच़ा ओ कछंङ वापिस अच़ा योग। केहरे गिह्बी पेट्री अपोन, पर माह खोक्पोन; दंङ अंऊर गेह तोतग, दोर्तिंङ केहरे अपि मरपोंई।”
यहुदी सेंहणार एनातु बिचंङ कुट्री लेहतिर, “दिह अंऊखा योतो कि ञेंहच़ी दिबी माह खोक्पोन? शायद दिह दुह यहुदी मीहतु कछंङ योतो अरी यूनानी शहरंङ शताह-शताह शुहचे बंङज़ातोर। दंङ दोतिंङ ला मीहतिंङ ला शिक्षा रमतो। दोऊ कुट्रिमी छि मतलब शुह, कि केहरे गिह्बी पेट्रोनी, पर माह खोक्पोन: अंऊर गेह तोतग, दोर्तिंङ केहरे अपि मरपोंई?”

तम्बू त्याहरो योहसिमी ध्याड़ा रिंङ, अंऊ मोह्ड़े ध्याड़ा शुहबी, यीशु ज़ि खड़े शुहचे मीहतु हखा हाऊष रेंई कुंई, “अगर अरीया तिस्कररिंङ तोह ता गिऊ कछंङ अतंई दंङ तुंङ। अच़ि गिऊ टोहकठे विशवास लोहतो, छना पवित्र शास्त्रा रिंङ च़ेहसी तोह, ‘दोऊ सेहमो अंद्रेग च़ि तिऊ बेंडी अच़ि जीवन रंड्री हुंच़ा अपतो।’” यीशु ज़ि दीह गप्पा पवित्र आत्माओ पाहठी कुहते, अंऊ दोऊ टोहकठे विशवास लहज़ा दोरे खोकसिमी तरेर; पवित्र आत्मा अईता तचेक तक्सी माह तोहई, छना कुचे परमेश्वरे अईता यीशु ऊ महिमा प्रगट लहसी माह तोहई।
दिह भत्ते धिर रेड्रा भीड़ो बिचंङ च़ि रेह मीहरे कुट्री लेहतिर, “हेले दिए दुह भविष्यवक्ता शुह अतु ञेंतिंङ उम्मीद तोई।” ऊईज़ि कुईर, “दि मसीह शुह,” पर अच़िया कुईर, “छिला? छि मसीह गलील प्रदेशंङ च़ि अपतो आ? पर पवित्रशास्त्रा रिंङ दिह च़ेहसी तोह कि मसीह रज्ज़ा दाऊदो खानदान ए बेतलहम नगरंङ च़ि अपतो, अंऊर रज्ज़ा दाऊद बंङज़ा।” झांह लेह दिऊ बजह च़ि मीहतु बिचंङ फूट अच़ा इलि। दोतु बिचंङ तेमिर दोबि च़ुमज़िमी तातेर, पर अच़िला दोबि गिरफ्तार माह लहरिर।

दोथल सेनिकर यहुदी मोह्ड़े पुरोहित ए फरीसी मीहतु कछंङ अतिर, दंङ दोच़ी दोतु हखा कुंई, “केहच़ी दुह छारिंङ माह हतिन?” सिपाही ज़ि जुबाब रेंईर, “अच़िला मीहे अपेहला झांह ठ्रोह गप्पा माह लहरी।” फरीसी मीहज़ी दोतिंङ जुबाब रेंईर, “छि केहरे ला दोऊ गप्पा रिंङ अच़ा अतिया? छि अधिकारी ए फरीसी मीहतु बिचंङ च़ि अच़िया दोऊ टोहकठे विशवास लाहतेर? पर दिहरे मीहरे अच़ि मूसा ओ कानून माह ञेंहच़ातोर, परमेश्वरो दोरच़ी श्रापित तोतोर।”
दोथर नीकुदेमुस ज़ि, अरी यहुदी नेतातु बिचंङ च़ि तोहई दंङ यीशु रंङ साते तुई ए दोआ इल्जी तोहई, दोतंङ साते कुंई, “छि ञेंहतु कानून अच़िया मीहू माह रेड्राते ए दोऊ चाल चलन माह ञेंह दोबि अपराधी घोषित लोहतो आ?” दोच़ी दोबि जुबाब रेंईर, “छि कांह गलील प्रदेशो शुनाह आ? पवित्र शास्त्रा रिंङ खंणु, कि अरीला भविष्यवक्ता गलील प्रदेशंङ च़ि माह अपतो।”
दिऊ थल भत्ते मीहरे एनोह-एनोह चुंखा अच़ा इलिर।

Koute यहून्नो 7