Manu - WBT (Mark,John) Non Drama

Manu - WBT (Mark,John) Drama

Bǎ ta̤cû̌bò̌tûlû̌pwè bǎ khôtô̤̌ akhanu, Běcǎ Yeshǔ sî̌ganǎ̤hto kû̌ shěkhǎ dǒ a gǔ bǎ wîkè hǎkhû̌ dě a bǎ ge dǒ apha ô̌nu a hètǒ̤hǒ. Dě a mô̤nṳ̌ akhôphijǎ dǒ a ô̌ dǒ hǎkhû̌ nutokhlǒ pṳ̂̌ taplǎ a mô̤ǐ asî tǒ̤dǒ a gutṳ̌.
Bǎnukha Běcǎ Yeshǔ kû̌ akhôphijǎ tokhlǒ ǎ lô̌khô pe dî lṳmṳ̌hǎ. Dě Khûshǐmṳ̂ Isakariyû aphû̌khû Yǔda Isakariyû tôpwa̤ nî̌ pô̤̌khô a gǔ shaǎlò̤kè Běcǎ Yeshǔ ayanu, hǎkhû̌tana Setò̤ hî̌bǎnṳ̌ hto ayô̤̌ dǒ a sǎphlǒkû hǒ. Běcǎ Yeshǔ sî̌ganǎ̤ kû̌ apha ǐlò̤ htobò lû̌û ta̤pô̤phǎ shû̌sho dǒ ta̤lǒ̤bò akhû̌ hǒ. A sî̌ganǎ̤ kû̌ a ô̌ dǒ Cǒmara hè ô̌ dě a gǔ getîkhî sô̌ dǒ Cǒmara a ô̌ pě. Pô̤̌nudě a ihtǒ dǒ asî lǎ̤ǎ dîgògǒ kòshî̌ dě a plû̌htò̌kè a jehtû htodě a coměhtò̌ a shè̌kòlô̤ kû̌ hǔphô lǎ̤htǔsû tôpṳ. A ma̤hto pô̤̌nudě, a tènṳ̌ shi dǒ balě taadû̌ koyo tôbǎ akû dě a sahtò̌ cǔbò bǎ akhôphijǎ tokhlǒ akhò̌lôpô̤̌. Dě a htǔsûkè bǎ asî kû̌ hǔphô dǒ a coměhtò̌ dǒ a shè̌kòlô̤ nutôpṳ.
A cû̌tǒ̤ dǒ Khûshǐmû Petarǔ a ô̌ dě a hî̌shěshu lû̌û kû̌, “Běcǎ na glè̌ cǔbò he khò̌lôpô̤̌ ya?”
Dě Běcǎ Yeshǔ hî̌shěshǔ lû̌û kû̌, “Ma̤titè̌ he cû̌ma̤ tǒ̤ pô̤̌onu, khònò̤̌ na sî̌ganǎ̤ nò̌khôtô̤̌ bǎbǎkǎlè tôni̤ni̤ pěnu, na sî̌ganǎ̤phlôhtò̌ tûû̌ pě.”
“Tô̤̌, na bǎ cǔbò he khò̌lôpô̤̌ tîkî̌꤮ tô̤̌,” Khûpetarǔ hî̌shěshu lû̌û dě Běcǎ Yeshǔ hî̌ lû̌û kû̌, “He kè̌ cǔbò na tô̤̌ hî̌dě, na htûbǎ he khôphijǎ tô̤̌.”
Dě Khûshǐmû Petarǔ hî̌ tîkhî kû̌, “Kè̌ ma̤pô̤̌nu hî̌dě, Běcǎ, cǔbò tǒ̤꤮ he khò̌lôpô̤̌ nô̤̌ tǎ̤mǎ̤. Cǔbò padô̌ bò̌bò he cǔde kû̌ he ikǒ.”
Dě Běcǎ Yeshǔ hî̌shěshu getîkhî lû̌û kû̌, “Kòyò dǒ a ushò̌ hto shi tôpwa̤nu, anǎ̤ plîbò tôpwa̤bò hǒ, a lǎ̤lṳ̂ cǔbò pwǎtǒ̤ akhò̌lôpô̤̌ nô̤̌pwǎ. Sî sǎphlǒ ma̤mṳ̂̌plî bòkè htohǒ lè, bǎbǎkǎlè a ma̤mṳ̂̌plî bò pṳ̂̌꤮ tôpwa̤ tô̤̌.” Ma̤titèhî̌dě a sî̌ganǎ̤ kû̌ kòyò glè̌ shaǎlò̤kè lû̌û tôpwa̤ pě, htodě a hî̌ kû̌ sî mṳ̂̌plî bò pṳ̂̌꤮ tôpwa̤ tô̤̌, a hî̌ pô̤̌nu pwǎ.
Bǎ a cǔbò hto asî khò̌lôpô̤̌ akhanu, a sô̌htò̌ sô̌ ajekhlo dě a ge hǎnòò̌ tîkhî sô̌ dǒ agûlǎ̤. Dě a gwè̌ asî kû̌, “He ma̤ bǎ sî pô̤̌o numî̌ sî sî̌yaphlô lô̌khô ya?” A hî̌ pô̤̌nu. “‘Sara,’ mè̤̌tô̤̌mî̌, ‘Běcǎ,’ sî kaǎ lô̌khô he pô̤̌numî̌ atô pwǎ, ma̤titèhî̌dě he htû mè̤̌mî̌ca pô̤̌ sî kaǎ henu. Pô̤̌nudě khònò̤̌ he htû sî Běcǎ, sî sara dě he kè̌ cǔbò bǎ sî khò̌lôpô̤̌ kè̌hî̌dě sî tô cǔbò kè̌khî bǎ lû̌û khò̌lôpô̤̌ tôpwa̤ kû̌ tôpwa̤ nî̌꤮. He ma̤lṳ̌bǎ sî ta̤kè̌lû̌mò̌mṳ tocǒ hǒ. Sî tô gû̌ma̤kû̌ lô̌khô pô̤̌ he ma̤ bǎ sînu. He hî̌cǒcǒ sî, jû̌ dû̌khlo aběcǎ tôpwǎ̤꤮ tô̤̌. Kòyò dǒ a no lû̌û tôpwa̤nu adû̌khlo kû̌ a no lû̌û nutôpwa̤ a ô̌ tôpwǎ̤꤮ tô̤̌. Khònò̤̌dě sî sî̌ganǎ̤ lô̌khô ta̤nutokhlǒ hǒ. Sî kè̌ ô̌htûpwa̤ gû̌ma̤ ta̤nu tokhlǒ hî̌nu, sî gǔ nǐ̤bǎ ta̤ǐshowî̤.


“He sǎyṳ̌ hî̌ bò sî pṳ̂̌꤮ tôpwa̤ pô̤̌nu mè̤̌tô̤̌. Lǒ̤bò sî dǒ he rû̌htò̌ tokhlǒ numî̌ he sî̌ganǎ̤ ǐtû̌ bò sî pṳ̂̌꤮ tôpwa̤. Bǎbǎkǎlè pô̤̌khô lî̤plò̌shǐkû hî̌nǎ glè̌ lǒhtò̌behtò̌ ayanu, ‘kòyò dǒ a ǎcuôcu ta̤ kû̌ he tôpwa̤ sǎkhe he dě a gǔ shaǎlò̤kè he hǒ.’
“Htû̌꤮ a htûhtò̌kè pěnu, pô̤̌khô sî gǔ yṳ̌nǐ̤nǎ̤nǐ̤ kû̌ he mî̌ Me̤shǐyanu tôpwa̤hǒ nudě, he shôbǐǐlṳ̌ bǎ sî khònò̤̌ hǒ. He hî̌cǒcǒ sî, kòyò tôpwa̤pwa̤ dǒ a kaǎmô̤shǔ kòyò dǒ he nohè a tôpwa̤ numî̌, a kaǎmô̤shǔ he hǒ. Kòyò tôpwa̤pwa̤ dǒ a kaǎmô̤shǔ he numî̌ a kaǎmô̤shǔ kòyò dǒ a nohè he nutôpwa̤ hǒ.”
A hî̌hto pô̤̌nudě, a shèwè̤ jî̌ lû̌sǎphlǒ dě a hî̌hǎhtò̌ lṳ̌lî bǎ asî kû̌, “He hî̌cǒcǒ sî, dǒ sîklanu kòyò dǒ a gǔ shaǎlò̤kè he pěnu a ô̌ tôpwa̤,” A hî̌lîtîklî̌kè asî pô̤̌nu.
A khôphijǎ tokhlǒ kè̌ǐ kè̌khîbò lû̌û tôpwa̤ kû̌ tôpwa̤ dě a sǎyṳ hî̌ bǎtè tôpwa̤nu, a gènè̤phlô lô̌khô tô̤̌, a sû̌bǐsò̌bǐ bòkè asî. Dǒ akhôphijǎ akla dǒ a mô̤ǐ jî̌ lû̌û tôpwa̤nu, a hǎnòò̌ ô̌ phǔ bǎ Běcǎ Yeshǔ kòshî̌ tôkhô. Khûshǐmû Petarǔ nǒcû̌ a ikǒ dǒ a hǎnòò̌ ô̌ phǔ lû̌û kòshî̌ nutôpwa̤ dě a hî̌ lû̌û kû̌, “Gwè̌ a nu, a sǎyṳ hî̌ mò̌pè?” A hî̌hǔ cû̌ lû̌û pô̤̌nu.
A gètè̤wǎ̤ Běcǎ Yeshǔ dě a hî̌ lû̌û kû̌, “Běcǎ, na hî̌ nutôpwa̤ nî̌ mò̌pè?” A gwè̌ lû̌û pô̤̌nu.
Běcǎ Yeshǔ hî̌ lû̌û kû̌, “He tû̌nṳ̌ mû̌ tôkô̌kî dǒ hǎsǐbalěkû dě he ǐ yǎ nutôpwa̤ mî̌ ahǒ.” A hî̌hto pô̤̌nu dě a phî̌ mû̌ tôkô̌kî dě tû̌nṳ̌ dǒ hǎsǐbalěkû dě a ǐcû̌ kû̌ phashǐmṳ̂ aphû̌khû Khûyǔda Isakariyû. Khûyǔda phî̌hto mû̌ kû̌, hǎkhû̌tana hènṳ̌ dǒ akû.
“Na glè̌ ma̤ titènu, cû̌ ma̤phwèmò̌,” Běcǎ Yeshǔ hî̌ lû̌û pô̤̌nu. Ma̤titè̌hî̌dě Běcǎ Yeshǔ cû̌ hî̌tǒ̤ lû̌û pô̤̌o numî̌, asî ô̌ bǎ dîgògǒ kòshî̌ nutokhlǒ sî̌ganǎ̤ tôpwǎ̤꤮ tô̤̌. Khûyǔda pṳ̂̌ǐ bǎ asî rukhûkhi, asî tokhlǒkhlǒ nu, a gènè̤ lô̌khô pwǎ kû̌ Běcǎ Yeshǔ nocû̌ pwî̤ lû̌û kû̌ ta̤ dǒ a lǎ̤lṳ̂ kû̌ pwèdû̌ ayanu mè̤̌tô̤̌mî̌ a nocû̌ ǐ lû̌û kû̌ kòyò shèphǔshèwè̤phû̌ tokhlǒ ta̤tocǒcǒ pwǎ, a gènè̤ lô̌khô pô̤̌nu. Khûyǔda phî̌hto mû̌ kû̌, a hǎhtò̌cû̌. Bǎnukha mî̌ lṳmṳ̌khǐ hǒ.


Khûyǔda hǎhtò̌cû̌ hto akhanu, Běcǎ Yeshǔ hî̌ asî kû̌, “Khònò̤̌ shěkhǎ hètǒ̤ dǒ Kòyòphû̌khû mî̌ he gǔ nǐ̤bǎ ta̤bwǐdû̌sîrîhtû hǒ. Cǒmara gǔ nǐ̤bǎ tutṳ̌ ta̤bwǐdû̌sîrîhtû dǒ Kòyòphû̌khû a ô̌ hǒ. Cǒmara kè̌ nǐ̤bǎ tutṳ̌ a ta̤bwǐdû̌sîrîhtû dǒ a ô̌ kè̌hî̌dě Cǒmara gǔ ǐ aphû̌khûnu ta̤bwǐdû̌sîrîhtû kû̌ anǎ̤ tûû̌ pě. A gǔ ǐ lû̌û ta̤bwǐdû̌sîrîhtû khònò̤̌.
“Hephû̌heli̤ sî, he ô̌plǒ yî̤gû̌pe nô̌ sî tô̤̌. Sî gǔ kè̌lǎsǔ he pě. Pô̤̌ he hî̌hto Yǔdaphû̌ ikǒlǒkòdû̌ tokhlǒnu, he gǔ hî̌ pô̤̌ sî khònò̤̌ kû̌ gûlǎ̤ dǒ he glè̌ cû̌nu, sî cû̌jòtô̤̌.
“Pô̤̌nudě khònò̤̌ he gǔ mǎnǎ sî yô̤̌sǎ asa tômû. Mô̤nṳ̌ lô̌khô lû̌û tôpwa̤ kû̌ tôpwa̤ nî̌꤮. Pô̤̌ he mô̤nṳ̌ sînu, sî bǎ mô̤nṳ̌ lû̌û tôpwa̤ kû̌ tôpwa̤. Sî kè̌ mô̤nṳ̌ lû̌û tôpwa̤ kû̌ tôpwa̤ hî̌dě, kòyò pṳ̂̌꤮ tôpwa̤ gǔ sî̌ganǎ̤ kû̌ sî htû he khôphijǎ pě.”
“Běcǎ, na glè̌ cû̌ bǎtè tûkû pě?” Khûshǐmû Petarǔ gwè̌ lû̌û pô̤̌nu.
Dě Běcǎ Yeshǔ hî̌shěshu lû̌û kû̌, “Gûlǎ̤ dǒ he glè̌ cû̌ nutûkûmî̌, khònò̤̌dě na gû̌ cû̌ jò kû̌ he tô̤̌. Bǎbǎkǎlè na gû̌ cû̌ jò nô̌ kû̌ he dǒ nô̌kò pě.”
“Běcǎ, he gǔ cû̌kû̌ na khònò̤̌dě a cû̌ jòcǎtô̤̌mî̌ ma̤titè? He ô̌ tîwî̌tòwò nǎhto henǎ̤ kû̌ he gǔ si dǒ naya hǒlè.” A gwè̌ lû̌û pô̤̌nu.
Hǒtaplǎdě Běcǎ Yeshǔ hî̌shěshu lû̌û kû̌, “Na ô̌ tîwî̌tòwò nǎ nanǎ̤ kû̌ na gǔ si dǒ heya mè̤̌mî̌ca hǒ ya? He hî̌cǒcǒ na, bǎ shîpha û̌ htò̌ nò̌khôtô̤̌ nu, na gǔ htè̌bǐshěshu kòyò kû̌ he sî̌ganǎ̤bǎnô̌ a tô̤̌ suplǎ pě,” A hî̌ lû̌û pô̤̌nu.

Koute Yṳ̂ha 13