Hyolmo - WBT (NT) Non Drama

Hyolmo - WBT (NT) Drama

ओहले येशूगी राहङगी ल़ेह-पेन च्‍यिङ्यी़ला क़े क्‍याहप नाङसीन ओहले खुङला मेहचाङा नाम्‍स्‍यीया़ तेन्‍गेन दाङ नामे-नाजो नाहजाया़ टा़ह-च्‍यू़ नाङगेन्‍गी ओङ नाङसीन।
ओ़ह ल़ेह-पेन च्‍यिङ्यी़गी मिहन दिया़राङ यिहम्‍बा– तोहङस्‍योदी पत्रुस मिहन ज़्‍या़क्‍योगी सिमोन, ओहले सिमोनगी नो़ह अन्‍द्रियास, जब्‍दियागी पुह याकूब दाङ खोगी नो़ह यूहन्‍ना, फिलिप दाङ बारथोलोमाइ, थोमा दाङ ठाल तुहएँगी मत्ती, अल्‍फयसकी पुह याकूब दाङ थेदियस, देशभक्त छो़बागी सिमोन कनानी, ओहले येशूला ज़ुङ च्‍य़ूएँगी यहूदा इस्‍करियोत।
येशूगी ओ़ह ल़ेह-पेन च्‍यिङ्यी़ला दि ल़ेहमु सुङदी ताङ नाङसीन, “ख्‍याया़ लेहमेन क्‍यिहपागी मिहया़साला ओहले सामरियागी क्‍याहसाया़ला माहन्‍डो। यिहॱनाङ इस्राएल क्‍यिहपागी तोरक्‍यो ल़ूहया़ साला सोङ। मिहया़ला ‘किन्‍ज्‍योगी क्‍याहल्‍बु जेकेन्‍गी ती़हजी लेप्‍च्‍ये पेहती येह’ म़ेदी स्‍येतोङ। नेहपाया़ला टा़ह च्‍य़ूदोङ, स्‍यिक्‍यो मिहया़ला सोम्‍बो लो़ह च्‍य़ूदोङ, जे-ने़ह थेन्‍ग्‍यो मिहया़ला टा़ह च्‍य़ूदोङ, ओहले ल्‍हेन्‍डीया़ला तेन्‍दोङ। ख्‍याया़गी आहन्‍डाराङ ज्‍योर्सीन, आहन्‍डाराङ तेर्तोङ! ख्‍याया़ राहङगी क्‍येपाला सेर, ङुल दाङ साहङ-टाङ च्‍यिॱआङ मा़हथो। लाहमला डोएँमु काहल्‍दा, छ्युबा ङ्यी़, लेकाम दाङ प्रेहका मा़हथो। च्‍यिबेमाना ल़ेहमीगी खोगी तोप्‍च्‍या ज्‍योर कोहकें।”
“ख्‍याया़ क्‍याहसा दाङ युहलया़ला स्‍य़ूहगेमु ख्‍याया़ला चा़ पेहकेन्‍गी मिहला छोल्‍दोङ ओहले ओ़ह युहललेगी थेन्‍दी माहकाहल थु ख्‍याया़ खोसालाराङ तेहतोङ। खोगी खाङबा नाहङला स्‍य़ूहगेमु ‘ख्‍याया़ला सेम लो तेहमु ओहङज्‍यु’ म़ेदी म़ेदोङ। ओ़ह खाङबागी मे़हमेया़ ख्‍याया़गी तेरक्‍योगी मेलाम सी़हज्‍ये येहसीमाना ओ़ह खाङबाला मेलाम थोप्‍च्‍ये येह। यिहॱनाङ खुङया़ मेलाम थोप्‍च्‍ये सी़हज्‍ये मे़हसीमानानी ख्‍याया़गी तेरक्‍योगी मेलाम ख्‍यासालाॱराङ लो़ह ओहङज्‍ये येह। का़हलेॱआङ सुज्‍यीगी ख्‍याया़ला चा़ मेहबेसीमाना, ओहले ख्‍याया़गी तामॱराङ मिहङ्यीहन्‍सीमानानी ओ़ह खाङबा क्‍यिनी ओ़ह क्‍याहसालेगी थेन्‍दी डोएँमु ख्‍याया़गी काङबागी थाल्‍बी प्रू़ ज़्‍या़दोङ। तेहम्‍बाराङ ङाहगी ख्‍याया़ला माएँ, ठिम ताङ नाङगेन ङ्यिहमाला ओ़ह क्‍याहसाकी मिहया़गी तुहक्‍पु म़ेदीनी सदोम दाङ गमोरा क्‍याहसाकी मिहया़गी तुहक्‍पु गा ना़ खू़-दाङ ओहङज्‍ये येह।”


“त़ेदोङ, ल़ूहया़ला फाराया़गी पाहरक्‍यीला ताङगे ल़ेहमुराङ ङाह ख्‍याया़ला मिहया़गी पाहरक्‍यीला ताङगो येह। ओ़ह सोङबे ख्‍याया़ प्रुहल ल़ेहमु टिहम्‍बु दाङ दुङगुकुर ल़ेहमु थेका ओहङ कोहकें। यिहॱनाङ मिहया़ ङ्याम्‍बु जेम्‍बु पेह, च्‍यिबेमाना खुङया़गी ख्‍याया़ला ठिमखाङया़ला ख्‍येर्च्‍ये येह ओहले खुङया़गी छो़खाङया़ला ख्‍याया़ला ताक्‍स्‍यु क्‍याहप्‍च्‍ये येह। ङाहगी तेहन्‍दागी पेहती ख्‍याया़ला पोम्‍बो छ्यिम्‍बु दाङ क्‍याहल्‍बुया़गी दिनला लाहङ च्‍य़ूज्‍ये येह। ओहजेला ख्‍याया़गी खुङया़ला ओहले लेहमेन क्‍यिहपागी मिहया़ला ङाहगी तेहन्‍दाला पाङबु तेर कोहच्‍ये येह। ख्‍याया़ला ज़ुङदी ख्‍येर्केन ती़हजीला ख्‍याया़गी च्‍यि मा कोहकें यिहम्‍बा ओहले काहन्‍डुमु पेहती मा कोहकें यिहम्‍बा म़ेदी तुहङाल माहबे। च्‍यिबेमाना ख्‍याया़गी मा कोहएँगी ताम ओ़हजेलाराङ ज्‍योर्च्‍ये येह। च्‍यिबेमाना ओहजेला ख्‍याया़गी माएँगी ताम ख्‍या राहङदीराङ ओहङज्‍ये म़ेह, किन्‍ज्‍यो याहपकी थु ख्‍या लाहमले स्‍याहल सुङ नाङज्‍ये येह।”
“नो़हगी नो़हला सेच्‍येला ज़ुङ च्‍य़ूज्‍ये येह, आबागी पुह पोहमोला, पुह पोहमोगी आबा-आमाला टाह पेहच्‍ये येह ओहले खुङया़ला से च्‍य़ूज्‍ये येह। ङाहगी मिहनगी पेहती ख्‍याया़ला मिह थाम्‍ज्‍यीगी ङेन्‍ज्‍येन पेहच्‍ये येह। यिहॱनाङ तिङ थु ङाहला यिह-छ्य़े पेहती तेहकेन्‍दी थार्च्‍ये येह। मिहया़गी ख्‍याया़ला युहल च्‍यी़ला तुहक्‍पु तेर्सीमाना लेहमेन युहलला प्रे़हदी सोङ। तेहम्‍बाराङ ङाह ख्‍याया़ला माएँ, मिहगी स़ेबु फेप नाङगेन म़ेदी तोहङले ख्‍याया़गी इस्राएल क्‍याहल-खापगी युहल थाम्‍ज्‍यीलाराङ ल़ेह पेह सिहन्‍ग्‍यो ओहङज्‍ये म़ेह।”
“स्‍याहप्‍च्‍यी लोबेन म़ेदी छ्यिम्‍बु दाङ योक्‍पु राहङगी ताहक्‍पु म़ेदी छ्यिम्‍बु ओहङ मी़हखुएँ। ओ़ह सोङबे स्‍याहप्‍च्‍यी राहङगी लोबेनचेबाॱराङ, ओहले योक्‍पु राहङगी ताहक्‍पुजेबाराङ काहल्‍ग्‍योगी तेहन्‍दाला सेम लो तेहमु पेहच्‍यु। का़हलेॱआङ खुङगी खाङबागी ताहक्‍पुलाॱराङ ती़ह गो-छ्येवा बालजिबुल म़ेदी मासीमानानी खोगी खाङबा मे़हमेया़लानी तोहरोङ च्‍यि मारो?” म़ेदी येशूगी सुङ नाङसीन।


“ओ़ह सोङबे ख्‍याया़ खुङ ङ्याम्‍बु मा़हन्‍ज्‍यी। च्‍यिबेमाना उप्‍ते मेहथोङगे दाङ पे़हदी मेहछोरकें से़हया़ च्‍यिॱआङ म़ेह। ङाहगी ख्‍याया़ला ना़-जुबेला माक्‍योगी ताम ख्‍याया़गी क्‍या-साङेला थाम्‍ज्‍यीला स्‍ये तेर, ओहले नाम्‍ज्‍योला खाजुम्‍बा पेहती स्‍येक्‍योगी तामया़ खाङबागी किल्‍दुङले थाम्‍ज्‍यीला फे़रा तेन्‍दी ख्‍येप्‍टा ताङदोङ। मिहया़गीनी ख्‍याया़गी ज़ुबु च्‍यी़ला से खू़गे, ख्‍याया़गी यिहलानी खुङगी च्‍यिॱआङ ने क्‍याल मी़हखुएँ! ओ़ह सोङबे यिहला से मी़हखुएँया़ ङ्याम्‍बु मा़हन्‍ज्‍यी, ख्‍याया़गी यिह दाङ ज़ुबु ङ्यिकालाराङ ङ्याल्‍वाला छ्यि च्‍य़ू थुप्‍कें किन्‍ज्‍यो ङ्याम्‍बु च्‍यी़राङ ज्‍यी़दोङ। यिहॱनाङ ते़, च्‍यि च्‍युर्कानी ङ्यी़ टाङगा च्‍यी़ला ग्‍युरक्‍यो ख्‍याया़गी माहथोङ ले? यिहॱनाङ किन्‍ज्‍योगी थुला मिहठुङसीमाना च्‍युर्कानी च्‍यी़ॱआङ साला मेहताहप्‍कें। ख्‍याया़गी गो़गी टा क्‍युहङबा रे़ह-रे़हॱआङ किन्‍ज्‍योगी टाहङजी क्‍याहप नाङदी येहबा। ओ़ह सोङबे ख्‍याया़ मा़हन्‍ज्‍यी, ख्‍याया़ च्‍युर्कानीया़ म़ेदी माहङबुराङ चा़ छ्यिम्‍बु यिहन।”
“ओ़ह सोङबे सु सुगी ङाहला मिहया़गी दिनला ङाहगी चो़वो छ्येवा म़ेदी लोक पेहकें, खोला ङाहगीॱआङ स्‍यिहङगामला ज़्‍य़ू नाङगेन ङाहगी किन्‍ज्‍यो याहपकी दिनला खो ङाहदी यिहन म़ेदी लोक पेहच्‍ये येह। यिहॱनाङ सु सुगी ङाहला मिहया़गी दिनला मा-लोक पेहकें, खोला ङाहगीॱआङ स्‍यिहङगामला ज़्‍य़ू नाङगेन ङाहगी किन्‍ज्‍यो याहपकी दिनला ङाह मा-लोक पेहच्‍ये येह।”


“ङाह जाम्‍बुलीङला मिहया़ला थिन च्‍य़ूज्‍येला ओहङग्‍यो यिहन म़ेदी मा़हने। ङाह मिहया़ला थिन च्‍य़ूज्‍येला ओहङग्‍यो मिहम्‍बा पादाङ याप्‍च्‍येला गा ओहङग्‍यो यिहन। च्‍यिबेमाना ङाहनी, पुह आबा ङ्याम्‍बु, पोहमो आमा ङ्याम्‍बु ओहले नामा क्‍यू़हमु ङ्याम्‍बु टाह पेहती ठू़ च्‍य़ूज्‍येला ओहङग्‍यो यिहम्‍बा। मिहया़गी टाह खुङ राहङगी खाङबा नाहङलेॱराङ थेन्‍ज्‍ये येह। ङाहला म़ेदी राहङगी आबा-आमाला चा़ पेहकेन मिह ङाहगी स्‍याहप्‍च्‍यी ओहङज्‍ये मी़हसीहएँ। ओ़ह ल़ेहमुराङ ङाहला म़ेदी राहङगी पुह पोहमोला च्‍याहम्‍बा पेहकेन्‍दीॱआङ ङाहगी स्‍याहप्‍च्‍यी ओहङज्‍ये मी़हसीहएँ। ख्‍ये राहङगी क्‍याहङस्‍यीङ खुर्ती ङाहगी तिङदा तिङ मेहयोहङगेन मिह ङाहगी स्‍याहप्‍च्‍यी ओहङज्‍ये मी़हसीहएँ। राहङगी मिहली सी़ज्‍ये छोल्‍गेन्‍दीगी मिहलीॱराङ तोर च्‍य़ूज्‍ये येह, ओहले राहङगी मिहली ङाहगी तेहन्‍दाला तोर च्‍य़ूगेन्‍दीगी मिहली साम्‍बा ज्‍योर्च्‍ये येह।”


“ख्‍याया़ला चा़ पेहकेन्‍दीगी ङाहला चा़ पेहकेन ओहले ङाहला चा़ पेहकेन्‍दीगी ङाहला ताङ नाङगेन्‍दीॱलाङ चा़ पेहकें। लुहङतेम्‍बाला ‘लुहङतेम्‍बा यिहन’ म़ेदी चा़ पेहकेन्‍दीगी लुहङतेम्‍बागी ल़ेहमु च्‍याहगा ज्‍योर्च्‍ये येह। ओ़ह ल़ेहमुराङ किन्‍ज्‍योगी दिनला टाहङबु सी़हक्‍यो मिहला चा़ पेहकेन्‍दीगी टाहङबु मिहगी ल़ेहमुराङ च्‍याहगा ज्‍योर्च्‍ये येह। सुज्‍यीगीॱआङ फेमा म़ेदी फेमाया़ला ङाहगी स्‍याहप्‍च्‍यी यिहन म़ेदी छ्यु टाहङमु स्‍याहलु काहङ च्‍यी़राङ तेर्सीमाना खोगी तेहम्‍बाराङ च्‍याहगा ज्‍योर्च्‍ये येह” म़ेदी येशूगी सुङ नाङसीन।

Koute मत्ती 10