Mixtec, Southwestern Tlaxiaco: Mixtec. Southwest Tlaxiaco (New Testament)

Mixtec. Southwest Tlaxiaco

Jee nkuvi tiñu yaꞌá ɨɨn ki̱vɨ̱ꞌ sáá xínéꞌénꞌ Jesús Tu̱ꞌun Ndiosíꞌ nu̱u̱nꞌ rá ñɨvɨ chíkéꞌi iniꞌ veñu̱ꞌun káꞌnú, jee stékútu̱ꞌún re̱ꞌ tu̱ꞌun váꞌa Ndiosíꞌ nu̱u̱nꞌ rá ñɨvɨ. Saájee nkenta rá su̱tu̱ꞌ kúñáꞌnú ka̱ꞌ, jín rá te̱e ya̱ xínéꞌénꞌ tu̱ꞌun nta̱túníꞌ Ndiosíꞌ jín suni rá te̱e kúñáꞌnú nu̱u̱nꞌ ñuunꞌ vá. Jee nkachiꞌ ráa nu̱u̱nꞌ re̱ꞌ:
―Kachiꞌ nú nu̱u̱nꞌ ránꞌ, ¿na̱ tiñu níso nú ya̱ sáꞌá nú rá tiñu yaꞌá?, áxí, ¿né ɨɨn ntaji tiñu yaꞌá nu̱u̱nꞌ nú sáꞌá nú maa rúja? ―nkachiꞌ ráa.
Jee nna̱xiníkó Jesús, jee nkachiꞌ re̱ꞌ nu̱u̱nꞌ ráa:
―Suni ka̱ka̱tu̱ꞌún ni̱ꞌ ránoꞌó ɨɨn tu̱ꞌun, jee kachiꞌ rán maa nu̱u̱nꞌ ni̱ꞌ: ¿né ɨɨn njia̱ꞌa tiñu nu̱u̱nꞌ Juan nkisikuánuté re̱ꞌ?, ¿á Ndiosíꞌ, ya̱ nééꞌ antivɨ́ súkún?, áxí, ¿á rá te̱e njia̱ꞌa maa rúja? ―nkachiꞌ Jesús. Saájee nna̱túꞌún maáráa, jee nkachiꞌ ráa:
―Retú kachiꞌ‑ó ya̱ Ndiosíꞌ, ya̱ nééꞌ antivɨ́, njia̱ꞌa‑a tiñu vá kuniso Juan, jee kachiꞌ re̱ꞌ: “Saájee, ¿na̱kui chi ntu nínúꞌ iniꞌ rán rá tu̱ꞌun ya̱ nkachiꞌ Juan rúja?” Jee retú kachiꞌ‑ó ya̱ rá te̱e njia̱ꞌa tiñu vá nu̱u̱nꞌ Juan, jee ntáká rá ñɨvɨ kuun ráa yu̱u̱ꞌ yó kaꞌniꞌ ráa yó, chi nɨꞌɨ rá ñɨvɨ jínúꞌ nijia iniꞌ ráa ya̱ Juan nkuvi nijia re̱ꞌ ɨɨn te̱e nákani re̱ꞌ tu̱ꞌun kéne yuꞌú máá maá Ndiosíꞌ ―nkachiꞌ ráa nna̱túꞌún ráa.
Saájee nna̱xiníkó ráa:
―Ntu jíníꞌ ránꞌ né núꞌ va̱ji tiñu nniso Juan ―nkachiꞌ ráa.
Saájee nkachiꞌ Jesús nu̱u̱nꞌ ráa:
―Nuꞌuꞌ ranika̱ꞌ suni nsáꞌ kachiꞌ ni̱ꞌ nu̱u̱nꞌ rán na̱ tiñu níso ni̱ꞌ ya̱ sáꞌá ni̱ꞌ rá tiñu yaꞌá ―nkachiꞌ Jesús.


Jee nka̱jiéꞌé Jesús káchíꞌ re̱ꞌ nu̱u̱nꞌ rá ñɨvɨ tu̱ꞌun kúnkunuún yaꞌá suꞌva:
―Ɨɨn te̱e ntee re̱ꞌ rá yokúꞌúꞌ uva nu̱u̱nꞌ ñu̱ꞌún re̱ꞌ. Jee njia̱núún re̱ꞌ maa nu̱u̱nꞌ rá te̱e sátíñú maa, jee nkene re̱ꞌ kua̱ꞌa̱nꞌ re̱ꞌ kue̱ꞌe̱ꞌ tiempúꞌ. Jee sáá nkenta tiempúꞌ nastútú rá uva, jee nchu̱ichí re̱ꞌ ɨɨn musúꞌ re̱ꞌ nu̱u̱nꞌ rá te̱e sátíñú vá sáva naku̱ꞌva ráa sava tataꞌ sáꞌá vá nu̱u̱nꞌ musúꞌ re̱ꞌ, soo rá te̱e sátíñú vá njia̱ꞌa ráa maa, jee nna̱chuichí saɨn ráa maa.
’Jee tukuni nchu̱ichí re̱ꞌ inka ka̱ꞌ musúꞌ re̱ꞌ, soo suni njia̱ꞌa ráa maa, jee nsi̱kánuun ráa maa jee nna̱chuichí saɨn ráa maa. Jee tukuni nchu̱ichí re̱ꞌ musúꞌ uníꞌ re̱ꞌ, jee suni nstu̱fíꞌ ráa maa jee nta̱níkɨ́nꞌ ráa maa kua̱ꞌa̱nꞌ‑a.
’Saájee maáréꞌ ya̱ kúvi re̱ꞌ I̱toꞌoꞌ xín ñuꞌun vá, nkachiꞌ re̱ꞌ: “¿Ná kúvi ya̱ saꞌá ni̱ꞌ? Chuichí ni̱ꞌ se̱ꞌya yɨ́ɨ́ ni̱ꞌ ya̱ ñúnúunꞌ víꞌí ni̱ꞌ, chi sa̱naanꞌ jee koo ya̱ ñáꞌnú nu̱u̱nꞌ ráa kaníjiá ráa maa”, nkachiꞌ re̱ꞌ.
’Soo sáá niniꞌ rá te̱e sátíñú vá maa, jee nna̱túꞌún ɨɨn inka ráa, jee nkachiꞌ ráa: “Te̱e yaꞌá chi nu̱u̱nꞌ re̱ꞌ kino̱o ta̱ꞌvi̱ꞌ ñuꞌun yaꞌá. Kaꞌniꞌ‑ó maa, sáva ta̱ꞌvi̱ꞌ‑ó nuvi ñuꞌun yaꞌá”, nkachiꞌ ráa. Saájee ntavaꞌ iyo ráa maa nu̱u̱nꞌ ñu̱ꞌún káá tataꞌ uva vá, jee ñaꞌniꞌ ráa maa.
’Saájee, ¿ná kúvi ya̱ saꞌá te̱e xín ñuꞌun vá rá te̱e kánéꞌén sátíñú vá rúja? Kiji re̱ꞌ jee xináánꞌ re̱ꞌ rá te̱e sátíñú vá. Jee ku̱ꞌvanúún re̱ꞌ ñuꞌun vá nu̱u̱nꞌ káá tataꞌ uva nu̱u̱nꞌ rá inka ka̱ꞌ rá ñɨvɨ ―nkachiꞌ Jesús.
Jee sáá nteso̱ꞌo rá ñɨvɨ ya̱ nkachiꞌ Jesús sukuán, jee nkachiꞌ ráa:
―Vankée sukuán ―nkachiꞌ ráa.
Saájee nna̱kune̱ꞌyá váꞌa Jesús nu̱u̱nꞌ ráa, jee nkachiꞌ re̱ꞌ:
―¿Na̱ jie̱ꞌe̱ꞌ káꞌánꞌ tu̱ꞌun yaꞌá ya̱ níso nu̱u̱nꞌ Tutuꞌ Ííꞌ Ndiosíꞌ ya̱ kachiꞌ‑i:
Yu̱u̱ꞌ, ya̱ nku̱ichi iniꞌ rá te̱e jiáni veꞌi,
jee yu̱u̱ꞌ vá nkenta kúvi yu̱u̱ꞌ máá ñáꞌnú ka̱ꞌ ya̱ íyótiñu‑u jiáꞌa‑a fuersáꞌ veꞌi vá,
káchíꞌ nu̱u̱nꞌ Tutuꞌ Ííꞌ?
’Jee ntáká ñɨvɨ ya̱ ku̱te̱ꞌ‑e nu̱u̱nꞌ yu̱u̱ꞌ vá jee ta̱ꞌnu̱ꞌ‑u ne̱ kuliꞌiꞌ‑i. Jee ñɨvɨ ya̱ ku̱te̱ꞌ yu̱u̱ꞌ vá ya̱ta̱ꞌ‑a jee ta̱xi̱nꞌ liꞌiꞌ ñɨvɨ vá saꞌá‑a ―nkachiꞌ Jesús [jie̱ꞌe̱ꞌ rá ñɨvɨ kúíchi iniꞌ ráa re̱ꞌ].


Jee rá su̱tu̱ꞌ kúñáꞌnú ka̱ꞌ jín rá te̱e xínéꞌénꞌ jie̱ꞌe̱ꞌ tu̱ꞌun nta̱túníꞌ Ndiosíꞌ, nnu̱kú ráa tɨɨn ráa Jesús máá hora yukuán, chi ña̱ku̱ꞌun iniꞌ ráa ya̱ si̱kɨ̱ꞌ maáráa nkaꞌanꞌ re̱ꞌ jie̱ꞌe̱ꞌ tu̱ꞌun kúnkunuún nkachiꞌ re̱ꞌ jie̱ꞌe̱ꞌ rá te̱e kánéꞌén sátíñú vá, soo ntu nkúvi chi yúꞌví ráa rá ñɨvɨ ñuunꞌ. Saájee nání ráa re̱ꞌ jee nchu̱ichí ráa sava rá te̱e nání yuꞌuꞌ rává Jesús. Jee sáꞌá rává nika̱ꞌ ya̱ kúvi rává te̱e na̱a̱ꞌ, sáva natavaꞌ ráa yuꞌú re̱ꞌ jia̱ꞌa yuꞌú re̱ꞌ nu̱u̱nꞌ tu̱ꞌun káꞌánꞌ re̱ꞌ jee ni̱ꞌi̱nꞌ ráa na̱ja sijíta ráa re̱ꞌ nu̱u̱nꞌ rá tu̱ꞌun káchíꞌ re̱ꞌ, sáva ni̱ꞌi̱nꞌ ráa re̱ꞌ naku̱ꞌva ráa re̱ꞌ xi̱ntíín te̱e nísotíñú. Saáva ni̱ka̱tu̱ꞌún ráa re̱ꞌ, jee nkachiꞌ ráa:
―Mestrúꞌ, jíníꞌ ránꞌ ya̱ na̱a̱ꞌ káchíꞌ nú jín ya̱ xínéꞌénꞌ nú, chi ntu sáꞌá nú kuéntáꞌ na̱ja íyó rá ñɨvɨ, chi ɨɨn ni kúvi rá ñɨvɨ nu̱u̱nꞌ nú. Jee na̱a̱ꞌ xínéꞌénꞌ nú rá ñɨvɨ ichi Ndiosíꞌ. ¿Á yɨ́netuꞌ ya̱ chunáán‑ó xu̱ꞌún náneeꞌ te̱e tátúníꞌ nación Roma áxí ntu̱ví? ―nkachiꞌ ráa.
Soo ntɨɨn kuéntáꞌ re̱ꞌ rá máñáꞌ ráa jee nkachiꞌ re̱ꞌ nu̱u̱nꞌ ráa:
―[¿Na̱kui chi jítotúníꞌ rán nuꞌuꞌ?] Xinéꞌénꞌ rán ɨɨn xu̱ꞌún ka̱a nuꞌuꞌ. ¿Né ɨɨn xín nu̱u̱nꞌ te̱e ví ya̱ nééꞌ nu̱u̱nꞌ xu̱ꞌún ka̱a yaꞌá rúja?, jín, ¿né ɨɨn súví níso nu̱u̱nꞌ‑u? ―nkachiꞌ Jesús.
Jee nkachiꞌ ráa:
―Te̱e tátúníꞌ nación Roma ví‑i ―nkachiꞌ ráa.
Saájee nkachiꞌ re̱ꞌ nu̱u̱nꞌ ráa:
―Saáva rá kúvi nantíñú te̱e nísotíñú tátúníꞌ re̱ꞌ nu̱u̱nꞌ nación Roma naku̱ꞌva rán maa nu̱u̱nꞌ te̱e tátúníꞌ nación Roma. Jee rá kúvi nantíñú Ndiosíꞌ naku̱ꞌva rán maa nu̱u̱nꞌ Ndiosíꞌ ―nkachiꞌ Jesús.
Jee ni ntu nkúvi tavaꞌ ráa yuꞌú re̱ꞌ ɨɨn tu̱ꞌun ichinúúnꞌ rá ñɨvɨ ya̱ kuvi xi̱kóñáꞌán ráa re̱ꞌ nu̱u̱nꞌ tu̱ꞌun káꞌánꞌ re̱ꞌ. Saájee nti̱vɨ́ xíniꞌ ráa jie̱ꞌe̱ꞌ rá tu̱ꞌun nna̱xiníkó re̱ꞌ, saájee ñasɨꞌ rá te̱e vá yuꞌú ráa jee níín nkuvi ráa.


Saájee rá te̱e yɨ́ꞌɨ́ ñujiínꞌ saduceo ya̱ maáráa vá káchíꞌ ráa ya̱ nsáꞌ natekuꞌ i̱i̱ꞌ rá níyɨ jee ni nsáꞌ nako̱o rá ni̱yɨ, jee ña̱kuyatin sava ráa nu̱u̱nꞌ Jesús jee ni̱ka̱tu̱ꞌún ráa re̱ꞌ jee nkachiꞌ ráa:
―Mestrúꞌ, ntee Moisés yanaꞌán víꞌí nu̱u̱nꞌ tutuꞌ nkino̱o kúmí‑ó jee nkachiꞌ‑i nu̱u̱nꞌ‑ó ya̱ retú ɨɨn te̱e ya̱ íyó ñaniꞌ re̱ꞌ jee kuviꞌ re̱ꞌ, jee retú kino̱o ñasɨ́ꞌɨ́ re̱ꞌ, jee ntu níyo se̱ꞌya re̱ꞌ jín ña, jee íyó natana̱ꞌá ñaniꞌ re̱ꞌ jín ñasɨ́ꞌɨ́ re̱ꞌ, sáva koo se̱ꞌya ña jín ñaniꞌ re̱ꞌ sáva kuvi kuéntáꞌ se̱ꞌya re̱ꞌ. Saájee ni̱yo u̱xa̱ꞌ rá te̱e nkuvi ñaniꞌ ya̱ nkaku jíꞌín ráa. Jee ñaniꞌ xíꞌnañúꞌún nta̱na̱ꞌá re̱ꞌ jín ɨɨn ñaꞌan, soo ni̱ꞌi̱ꞌ re̱ꞌ jee ni ntu níyo se̱ꞌya re̱ꞌ. Saájee ñaniꞌ uvíꞌ nna̱tana̱ꞌá re̱ꞌ jín ña, [jee suni ni̱ꞌi̱ꞌ re̱ꞌ jee suni ntu níyo se̱ꞌya re̱ꞌ jín ña]. Jee suni sukuán ñaniꞌ uníꞌ nna̱tana̱ꞌá‑a jín ña, jee sukuán nkuvi jín ni uxáꞌ ráa ya̱ nna̱tana̱ꞌá jín ña, chi ntáká ráa ni̱ꞌi̱ꞌ jee ni ntu níyo se̱ꞌya ráa jín ña. Jee ne̱ nu̱u̱nꞌ nɨ́ꞌɨ suni ni̱ꞌi̱ꞌ ñaꞌan vá ranika̱ꞌ. Saájee ki̱vɨ̱ꞌ ya̱ natekuꞌ i̱i̱ꞌ tuku nɨꞌɨ rá ñɨvɨ níꞌiꞌ, sáá nako̱o tuku rá ni̱yɨ, jee, ¿né ɨɨn ráa xí ñasɨ́ꞌɨ́ kuvi tuku ñaꞌan vá rúja? Chi ni uxáꞌ ráa nna̱tana̱ꞌá jín ña ―nkachiꞌ rá te̱e saduceo vá.
Saájee nkachiꞌ Jesús nu̱u̱nꞌ ráa:
―Rá ñɨvɨ íyó ñɨ̱vɨ́ yaꞌá tánáꞌá ráa jee stánáꞌá ráa rá se̱ꞌya ráa. Soo rá ñɨvɨ ya̱ nkuna̱a̱ꞌ iniꞌ Ndiosíꞌ ya̱ íyó níꞌinꞌ ráa ya̱ kuvi kutekuꞌ ráa jín Ndiosíꞌ ki̱vɨ̱ꞌ kiji jee natekuꞌ i̱i̱ꞌ ráa kene ráa nteñu rá níyɨ, jee ni nsáꞌ tana̱ꞌá ráa ka̱ꞌ jee ni nsáꞌ xitánáꞌá ráa rá se̱ꞌya ráa, jee ni nsáꞌ kuvi kuviꞌ ráa ka̱ꞌ, chi sukuán koo ráa kuéntáꞌ kua̱ꞌ íyó rá najiáꞌáꞌ ííꞌ Ndiosíꞌ ya̱ ntu jíꞌíꞌ rává, jee kuvi ráa se̱ꞌya Ndiosíꞌ chi maáréꞌ nxi̱nátekuꞌ i̱i̱ꞌ re̱ꞌ ráa. Soo suni ne̱ maá Moisés nstúvi re̱ꞌ ya̱ natekuꞌ i̱i̱ꞌ rá ni̱yɨ sáá ntee re̱ꞌ nu̱u̱nꞌ Tutuꞌ Ííꞌ, jie̱ꞌe̱ꞌ ɨɨn tunkúꞌúꞌ ya̱ káyúꞌ, chi nkachiꞌ Moisés ya̱ I̱toꞌoꞌ‑ó kúvi re̱ꞌ Ndiosíꞌ ya̱ néñu̱ꞌun Abraham jín Isaac jín Jacob re̱ꞌ. Jee ntu kúvi re̱ꞌ Ndiosíꞌ nu̱u̱nꞌ rá níyɨ, chisaꞌ kúvi re̱ꞌ Ndiosíꞌ nu̱u̱nꞌ rá ñɨvɨ tékúꞌ, chi tékúꞌ ntáká ráa nu̱u̱nꞌ re̱ꞌ ―nkachiꞌ Jesús.
Saájee nna̱xiníkó sava rá te̱e xínéꞌénꞌ jie̱ꞌe̱ꞌ tu̱ꞌun nta̱túníꞌ Ndiosíꞌ, jee nkachiꞌ ráa:
―Va̱tu̱ni káchíꞌ nú ká Mestrúꞌ ―nkachiꞌ ráa.
Saájee ni ntu nkiji ka̱ꞌ iniꞌ ráa ka̱ka̱tu̱ꞌún ráa ni ɨɨn ka̱ꞌ tu̱ꞌun Jesús.


Saájee nkachiꞌ Jesús nu̱u̱nꞌ ráa:
―¿Na̱ja chi káchíꞌ rá ñɨvɨ ya̱ Cristo kúvi re̱ꞌ Se̱ꞌya tataꞌ veꞌi ichiyúkúnꞌ va̱ji ne̱ nu̱u̱nꞌ David? Chi ne̱ maá David nkachiꞌ re̱ꞌ tu̱ꞌun ntee re̱ꞌ nu̱u̱nꞌ Tutuꞌ Ííꞌ Salmo:
Nkachiꞌ I̱toꞌoꞌ‑ó Ndiosíꞌ nu̱u̱nꞌ I̱toꞌoꞌ ni̱ꞌ:
“Kuneeꞌ ichi kuáꞌá ni̱ꞌ nu̱u̱nꞌ tatúníꞌ nú jín ni̱ꞌ.
Jee kuneeꞌ nú yukuán ne̱kua̱ꞌ kuneí ni̱ꞌ jín rá jíníꞌ u̱ꞌvi̱ꞌ néꞌyá ráa noꞌó kakɨnꞌ ni̱ꞌ ráa chi̱ji jie̱ꞌe̱ꞌ nú
kuéntáꞌ ɨɨn teyuꞌ”, nkachiꞌ Ndiosíꞌ,
nkachiꞌ David. Saájee ne̱ maá David nkachiꞌ‑i ya̱: I̱toꞌoꞌ ni̱ꞌ kúvi Cristo. Saáva, ¿na̱ja vá kúvi Cristo ɨɨn se̱ꞌya ichiyúkúnꞌ nkene nu̱u̱nꞌ David rúja? ―nkachiꞌ Jesús.


Ni kua̱íyó rá ñɨvɨ íñɨ́ tésóꞌo ya̱ káchíꞌ re̱ꞌ, jee nkachiꞌ re̱ꞌ nu̱u̱nꞌ rá te̱e kútáꞌán jín re̱ꞌ súkuáꞌa re̱ꞌ ráa:
―Kumí rán maárán nu̱u̱nꞌ rá te̱e xínéꞌénꞌ jie̱ꞌe̱ꞌ tu̱ꞌun nta̱túníꞌ Ndiosíꞌ yanaꞌán, ya̱ táꞌánꞌ iniꞌ ráa jíkónúun ráa kuꞌun ráa saꞌma kání jee náꞌánꞌ ya̱ kúñáꞌnú ráa, jee ñúnúunꞌ ráa ya̱ káꞌánꞌ yɨ́ñúꞌún rá ñɨvɨ jín ráa rá nu̱yáꞌvi. Jee ñúnúunꞌ ráa máá rá teyuꞌ kúñáꞌnú ka̱ꞌ kuneeꞌ ráa iniꞌ rá veꞌi sinagoga nu̱u̱nꞌ nútútú rá ñɨvɨ Israel, jín máá rá teyuꞌ kúñáꞌnú ka̱ꞌ kuneeꞌ ráa nu̱u̱nꞌ íyó rá viko nu̱u̱nꞌ yájíꞌ rá ñɨvɨ. Jee rá te̱e vá jíchi ráa rá ñaꞌan náꞌví, káneeꞌ ráa veꞌi ráña. Jee káñunkúún sáꞌá ráa nika̱ꞌ ya̱ naꞌán víꞌí jíkánꞌ táꞌvíꞌ ráa nu̱u̱nꞌ Ndiosíꞌ. Maáráa vá xe̱e̱nꞌ ka̱ꞌ ni̱ꞌi̱nꞌ ráa tu̱nóꞌó ya̱ sijíta Ndiosíꞌ ráa ―nkachiꞌ Jesús.

Koute Lucas 20