Kodaku

फेर ईसु चेला कुतय थरेय कहनी तेडा, “नआँ दुनिया रे होड़कू भगवान वरी अलग कू लगड पाप राः परिक्छा मेज सकोआ। लेकिन पाप रे लोलोजोराय हेंय अखीर दुख रेय पड़ोआ! जे होड़ नेकू होड होडिंञकू मेंडे कनय मियाँहोड़ मेनिय एर पापू, हेंय होटोः तुरे जनता चकी तोलकेते, समुन्धर रे अटड़ गोत्तेयू, हेना हेंय लगड भला गिआ। हेनाते इंञ अपे सँवचेती तेपे दोहोन लगाडिंञ कहनी यडा, कनय भाई पापे रेदो हेंय दबेट केय तेपे समझो वियू, अवुर हेंय पाप वरिय पसतोः रेदो माफिय पे। अगर दिन भर रे सात छेव अपे राः बिरूध रेय पापे रेदो, सातो छेव अपे थरे मेजकोः तेय कहनियूँ, ‘इंञ पाप केड हेना वरिंञ पसतोः तना’ मेनतेय कहनिय रेदो हेंय सातो छेव पे माफियू।”
तहाँ परेरितकू परभु थरे कू कहनी तेडा, “अम थरे बगरा ते बिसवासे लगड सहेतम ओवा ले।” परभु कहनी तेडा, “अपे राः बिसवास सरसों दना मेनमोट दोहोन रेदो, ‘तुड दुबी पटुः कोःते समुन्धर रे सेनकोःते जड़ी चुवेरुऊ’ मेनते पे कहनी वा रेदो, हेना अपे राः टेबोः अँजोम तेड मेनू।”

ईसु कहनी तेडा, “मान ले अपे मेंडे कनय रेनिय हरवाह नंगारिय सी सी चहे भेड़ीं कुय चरो। अवुर हेंय खेत वरिय मेजुऊ, अपे हेंय थरे ‘तुरेत्ते मेजुः सी लेटे जोम लगड दुड़ूब मी’ मेनते एरो पे कहनी तेडा किदो? अवुर हेंय हँडेः तेय कहनियाँ, ‘इंञ लगड लेटेम इसीनू अवुर अनायीनिंञ जोमुः चरोः मेन दिन खियो पियोविंञ मी, हेना वरी तयोम ते अम होम जोमुऊ?’ हरवाहकू जिमा वडकुआ हेना काम कू काम हनिय रेहो मालिक हेंकू धन्यावाद एरोय ओवड कुआ। नेन घयते अपे हो भगवान राः सींड़ टेबोःपे मनो रेदो, अपे नआँ याःतेपे कहनियूँ, ‘अले आदर ञँम लायिक कोवा लेआ, अले दो हरवाहकू हवे, जे बुताम जिमा वडलेआ हेना भर ले बुता केडा’।”

ईसु सामरिया अवुर गलील जिला मँझर ते एरुसलेम हनतेय चलोः दोहो एनु। हेन तोलोग मियाँटंग गाँव रेय बोल तोलोगू दस झन कुड़गा तनकुय ञँमतेडा। हेंकू सँगिंञ वरी हाक केनतेकू कहनी तेडा, “ओ ईसु, ओ मालिक, अले थरेम दयाऊ!” ईसु हेंकू थरेय कहनी तेडा, “चलोः पे, सेनकोःते अपन देंह आजककू पे तिःवा।” अवुर हेंकू चनालोः तोलोग कू सुद्ध यनु।
हेंकू मेंडे रे मियाँहोड़ चिकन यनाञूँ मेनाः पपाड़ी केनते, अच्छाते भगवान बडेयवा तींग तेय मिड़ाः एना। अवुर हेंय ईसु कटा दुबी रे उकड़ुम केनतेय धन्यावाद वडिया। नेय होड़ सामरी देस रेनिय दोहो एना। तहाँ ईसु होंबोर तेडा, “दसो झन मेने पे सुद्ध गना किदो, फेर हेंकू नव झन करे कुआ? भगवान बडेयवा लगड नेय एटागी जात छोड़ अवुर कनय मेने दोहो गना किदो?” तहाँ ईसु हेनी थरेय कहनी तेडा, “अम इंञ थरेम बिसवास तेडा, हेनातेम चिकन यना रिमकोःते चलोःमी।”


भगवान होड़कू थरे तिमीसीय राजेआ मेनते, मियाँ एस फरीसिकू ईसु कू होंबोर तेडा, हेना वरी ईसु हेंकुय लाय वडा, “भगवान राः राज मेड ते ञें-लेआ हेना घयते मेन ञेंलुआ। अवुर अँजोम पे, भगवान राः राज अपे जीवि पेरे इदाना, हेनाते होड़कू ‘न रेआ, मेना रेआ,’ मेनते एरो कू कहनी सको एना।”
हेना वरी फेर चेला कुतय थरेय कहनी तेडा, “एयसा समय मेजुआ, अपे इंञ होड़ होपोन मेजुआ हेना दिन ञें-ले लगड पे पसींदेआ, लेकिन एरो पे ञेंल सको एना। इंञ होड़ होपोन मिड़ाः मेजियन मेनते अपे खभेर ञँमुआ, ‘हेंय न रेया’ चहे ‘मेना रेया’ मेनाः खभेर रे अलोपे बिसवासे, अवुर हेंकू तयोम ते अलोपे से-ने। पिलकेडवा तोलोग सींड़ कुकू ञें-लेआ, हेन घयते इंञ होड़ होपोन मेजुः चेका सींड़ कुकू ञेंलेञाँ। लेकिन हेना वरी पहील ते इंञ होड़ होपोन अखीर दूखिंञ सहोआ, अवुर न जुग रेनकू होड़कू इंञ कू नहकारिञाँ। इंञ होड़ होपोन फेरिंञ मिड़ाः मेजुः रे, दुनियाँ रेनकू होड़कू थरे, नूह राः जबाना रे होया एना, हेन घयते होयाआ। नूह जहाज रे अनायीनिय रकब मेन दिन होड़कू जोमुः चरोःकू अवुर बर बियाहुः दोहो एनकू, तहाँ दाः भरो तिलतेड कुआ, अवुर कू बिलो यनु। अवुर लूत राः जबाना रेहो होड़कू जोमुः चरोः दोहो एनु। लेन देनुऊ अवुर कू खेती बरीयू अवुर ओड़ाः कू बनो दोहो एनु। जे देवह सदोम देस वरी लूत उडूंग एना, तहाँ अगस वरी सलगोः हेना दिरी अवुर सेंगेल लोजोर केनते सींड़कू भूरटो गोजतेड कुआ। इंञ होड़ होपोन मेजुः चेका हो नेन घयते होयाआ।
हेना चेका जे छत अगस रेय दोहोना, अवुर हेंय राः समान ओड़ाः रे दोहोनू, हेंय हेना उडूंग लगड अलोय अगड़ुऊ, नेन घयते कनाय खेत रे काम हेनी हो ओड़ाः हनते अलोय मिड़ाऊ। लूत इंगत कू ची एनायू उहयर तपे, सदोम राः चीज उहयर केते तयोम हनतेय तको तेड दो बूलुंग राः खुटाय बनो यनु। कनय हो नआँ दुनियाँ राः जीवन बंचोवे मेनतेय पसींदेआ, हेंय अनेज राः जीव एरोय बंचो तेडा, अवुर कनय हो ईञाः चलते ते जीवितिय गँवों रेदो हेंय राः जीव बंचोआ। इंञ अपेंञ लाय वताना, हेना चेका बा होड़ मियाँ टंगाआ परकोम रेकींञ गितीज कोआ, मियाँहोड़ीय रिम गोगेया, मियाँहोड़ीय बगी अटु वया। अवुर बा होड़ कोड़ीकींञ मियाँ तेकींञ ददाड़ोआ, मियाँहोड़ीय रिम गोगेया, मियाँहोड़ीय बगी अटु वया। अवुर बा होड़ खेत रेकींञ बुताआ, मियाँहोड़ीय रिम गोगेया अवुर मियाँहोड़ीय बगी अटु वया।”
नआँ अँजोम तेड सी हेंकू ईसु कू होंबोर तेडा, “परभु न करे होयाआ?” हेना वरी ईसु हेंकू थरेय कहनी तेडा, “जे जघा रे मड़ी मठी दोहोना, हें-डे गीद्धकू जवारुःआ।”

Koute लूका 17