Kodaku

तेह दिन रे बचन दोहो एना, अवुर हेना बचन भगवान सुदा दोहो एना, अवुर हेना बचन भगवान दोहो एना। ने-ना बचन पहील वरी भगवान सुदा दोहो एना। भगवान सींड़ चीज ने-ना राः दोवारा तेय बनो केडा, अवुर जो कुछिय बनो केडा, हेना मेंडे कनारा हेना बिगर ते बेगारिय बनोआँ। हेना बचन रे जीवन दोहो एना, अवुर हेंय राः जीवन होड़कू लगड इंजोत दोहो एना। इंजोत अंधरा ओत रे चमकोआ, लेकिन अंधरा ओत इंजोत मेने ईड़िज सको गना।
भगवान अनेज हनवरी मियाँहोड़ होड़िय कुलतेडा, हेंय ञुमू एहुन्‍ना मेनते दोहो एना। अवुर हेंय इंजोत राः बारे ते गोवाही ए-मिय मेजेना, ताकि सींड़कू हेना गोवाही अँजोम केते इंजोत रेकू बिसवासे। हेंय अनानेज इंजोत मेनेय दोहो गना, लेकिन हेंय इंजोत राः गोवाही ए-मिय मेजेना। जेयसे अंधरा ओत रे इंजोत चमकोःरे सींड़ चीज टिपा जोमा। हेन घयते न इंजोत मेजुः रे सींड़ होड़कू भगवान राः सही बचन समझो कुआ। नआँ इंजोत दुनिया रे मेजुआ मेनाआँ हवे।
अवुर न इंजोत दुनिया रे दोहो एना, अवुर सींड़ चीज हें-नराः दोवारा ते बनो केना। हेंडे रेहो दुनिया रेनकू होड़कू हेना मेने कू चिन्हों गडा। हेंय अपन होड़कू थरेय मेजेना। लेकिन हेंकू मेनेकू अपनो गडिया। लेकिन जेतना होड़कू हेंय कू अपनो तेडिया, अवुर हेंय थरे कू बिसवास तेडा, हेंकू हेंय भगवान होपोन बनोः राः अधिकारिय ओवड कुआ। नेकू होड़कू रेनकू खुटी खनदान वरी अवुर होड़कू राः मन ते अवुर इंग आप राः बिचार ते बेगर कू जनामा। लेकिन नेकू भगवान वरी कू जनम केना।
अवुर हेना बचन होड़ राः रूप ते जनम एना। अवुर अबू राः मँझर रेय डेरा एना। हेंय दया अवुर सच्‍चाई तेय भरो तना, अवुर अले हेंय राः महिमा ते भरो तना जीवन ले ञेंलवाडा, भगवान रेनिय मिनियें टंगाअय कोड़ा होपोन राः महिमा घयते। अवुर एहुन्‍ना हेंय राः बारे ते गोवाहिय एमतेडा, अवुर हाक केनतेय कहनी तेडा, “नेय हें-नी हवे, जे राः बारे तेंञ लाय तेडा कि जे इंञ तयोम तेय मेजुः तना, हेंय इंञ वरी होय बडे गिआ, कहेकि हेंय इंञ जनम एना, हेना वरी हो पहील तेय दोहो एना।” कहेकि हेंय अखीरिय दया वबू अते, अबू आसीस उपर आसीस ञँमकेना। भगवान अनेज राः नियम मूसा राः दोवारा तेय ओवड बुआ, लेकिन किरपा अवुर सच्‍चाई ईसु मसीह राः दोवारा ते मेजेना।
भगवान कनय कबोह बेगारिय ञेंलेया, लेकिन हेंय रेनिय मियाँटंगाअय कोड़ा होपोन तू अपत सुदा मियाँ तेय दोहोना, अवुर नेय खुद भगवान हवे, ने-नी होड़कू राः मझँर रे भगवानिय देखर केडा।


एक दिन राः दिन रे एरुसलेम रेनकू गोटाचार एहूदिकू रेनकू मुखियाकू, अम ईया हवे? मेनाआँ, पपाड़ी लगड एहुन्‍ना थरे आजककू अवुर लेवी कुकू कुलतेडा। हेना वरी हेंय हेंकू थरे मेनेय उकू बेड़ा गडते, “इंञ भगवान कुलकेडिया मसीहा न लगे” मेनते फरी फरी तेय लाय तेडा।
तहाँ हेंकू होंबोर तेडिया, “हेंडे दो अम ईया हवे? अम एलियाह हवे किदो?” हेना वरी हेंय कहनी तेडा, “इंञ न लगे।” तहाँ हेंकू फेरेच कू होंबोर तेडिया, “अच्छा दो, भविस्यवक्‍ताकू कुल लगाडिय जबान केडा, हेंय अनाम हवे किदो?” हेना रेहो हेंय कहनी तेडा, “हेंय हो इंञ न लगे।” हेंकू फेरेच कू होंबोर तेडिया, “दो अम ईया हवे? अले लाय वलेमू, ताकि अले कू कुलकेड हेंकू सेनकोः तेले लाय वकू। अम अना मआँ बारे ते ची मेनतेम कहनी यडा?”
तहाँ हेंय कहनी तेडा, “एसायाह भविस्यवक्‍ता न याःतेय कहनी केडा, ‘इंञ परभु लगड होर पे सोझ साझू’ मेनते सुनहर ओत रे मियाँहोड़ होड़ गोहार यडा, हें-नी राः आवाज हवे।” अवुर नेकू फरीसिकू कुलतेड कू दोहो एनु।
हेंकू एहुन्‍ना कू होंबोर तेडा, “अगर अम मसीहा हो न लगे, एलियाह हो न लगे, अवुर अम भगवान कुलेय लगाडिय जबान केडा, हेंय भविस्यवक्‍ता हो न लगे, हेंडे दो अम बतिस्मा ची लगड मी ओवाकू तना?” तहाँ एहुन्‍ना जबाब वडकू, “इंञ दो दाः ते भर बतिस्मांञ ओवा पेताना, लेकिन निहों अपे मँझर रे मियाँहोड़ होड़ इदानिया, हेंय अपे मेने पे पपाड़ी तना।
नेय इंञ तयोम तेय मेजुआ मेनाअय हवे, अवुर इंञ हेंय राः जूता रसी लड़ा लायिक हो कोवाञाँ।” नआँ सींड़ टेबोः बयतानियाह गाँव रे होया एना। बयतानियाह, जरदन जोड़ वरी पुरूब गतर रे इदाना। अवुर हें-डे एहुन्‍ना बतिस्माय ओवाकू दोहो एनु।

हेना ञींदावत एहुन्‍ना, ईसु अनेज हनते मेजुः तोलोग ञेंलकेडिय तेय कहनी तेडा, “ञेंलेय पे, नेय भगवान रेनिय पठरू हवे। नेय दुनिया रेनकू होड़कू राः पापिय रिम गोःयाडा। नेय हें-नी हवे, नेय राः बारे ते ‘मियाँहोड़ होड़ इंञ तयोम तेय मेजुः तना, हेंय इंञ वरिय बडे गिआ, कहेकि हेंय इंञ वरी पहील तेय दोहो एना’ मेनतेंञ लाय तड दोहो एनु। अवुर इंञ नेय मसीहा हवे मेनाआँ, मेनेंञ पपाड़ी दोहो एनु, लेकिन आबिंञ थितो गोत्तेडिया। अवुर इसराएल देस रेनकू सींड़कू थितोविय लगड दाः ते बतिस्मा ए-मिंञ मेजकेना।”
अवुर एहुन्‍ना न याःते ईसु राः बारे ते गोवाहिय एमतेडा, “इंञ अगास वरी पवितर आत्मा परेवाँ घयते अगड़ू एन हेनांञ ञेंलवाडा, अवुर हेंय थरेय चड़ाँ एना। इंञ पहील मसीहा हवे मेनते मेनेंञ थितोविय दोहो एनु, लेकिन जे इंञ दाः ते बतिस्मा एम लगाडिय कुलकेडिञाँः, हें-नी लाय वडिञाँ कि जे थरे पवितर आत्मा अगड़ुः तोलोग अवुर चड़ाँः तोलोग मी ञें-लेआ, हें-नी पवितर आत्मा ते होड़कू बतिस्माय ओवा कुआ। अवुर इंञ ञेंलकेडिय ते गोवाहिंञ एमतेडा कि ने-नी भगवान होपोन हवे मेनते।”

तहाँ हेना ञींदावत एहुन्‍ना अनेज रेनकींञ बा होड़ चेला कींञतय सुदा हेनेन्डेय चड़ाँ तना, अवुर एहुन्‍ना ईसु चलोः तोलोग ञेंलकेडिय तेय कहनी तेडा, “ञेंलेय बा, नेय भगवान रेनिय पठरू हवे।”
तहाँ हेंकींञ बना होड़ चेला कींञ हेना अँजोम केते ईसु तयोम तेकींञ सेनतेडा। हेना वरी ईसु तयोम हनिय तेरेज दो हेंकींञ मेजुः दोहोएन किञूँ, हेना वरी हेंकीञिंय होंबोर तेडा, “अबा ईया बा छपा यडा?” तहाँ हेंकींञ होकींञ होंबोर तेडिया, “ए रब्बी, (मतलोब ए गुरू) अम करेम दोहोना?” हेना वरी हेंकीञिंय लाय वडा,
“इंञ सुदा बा सेनुः रेदो ञें-लेआ बा।” हेना वरी हेंय सुदा सेनकेन ते हेंय दोहोन हेना जघा कींञ ञेंलतेडा, अवुर हेना तोलोग करीब करीब चार बजो यनते हेना चेका हें-नी सुदा कींञ दोहो यनु।
एहुन्‍ना राः टेबोः अँजोम केते, ईसु तयोम ते सेनेन हेंकींञ मेंडे मियाँहोड़ सिमोन पतरस बोहोत, अन्दिरयास दोहो एना। हेंय मड़ंग ते अनेज मगत सिमोन सुदाय जुमो एना अवुर “अलंग लगड ख्रिस्त मतलोब मसीहा ञँमियाना” मेनतेय लाय वडियू। हेना वरी हेंय, मगत ईसु थरेय इदी तेडिया। तहाँ ईसु ञेंलकेडिय तेय कहनी तेडा, “अम एहुन्‍ना होपोन सिमोन हवे। तेसींञ वरी अम केफा मेनतेंञ ञुमू यडमिआँ।”

हेना ञींदावत ईसु गलील जिला सेनुः लगाडिय सँबह एना। हेना हन सेनुः वरी मड़ंग ते ईसु फिलिपुस सुदाय जुमो एना, तहाँ हेंय थरेय कहनी तेडा, “इंञ तयोम तेम मेजुऊ।”
फिलिपुस बयेतसदा सहर रेनिय दोहो एना, अवुर अन्दिरयास अवुर पतरस एडकींञ हो हेनेन सहर रेनकींञ दोहो एना।
हेना वरी फिलिपुस नतनएल सुदाय जुमो एना, तहाँ हाँःतेय लाय वडिय दोहो एनु, “जे राः बारे ते मूसा राः नियम अवुर भविस्यवक्‍ताकू लिखो केड हेना, अबू लगड ञँमियाना। हेंय नसरेत गाँव रे दोहोनाय, उसुफ होपोन ईसु हवे।” हेना वरी नतनएल हेंय थरेय कहनी तेडा, “नसरेत गाँव वरी कनय हो बढ़ियाँअय होड़ एनेरोई पयदा एना।” तहाँ फिलिपुस कहनी तेडा,
“दू, ञेंल अगेय मी।”
हेना वरी ईसु नतनएल अनेज हनते मेजुः हेना ञेंलकेते, हेंय राः बारे तेय कहनी तेडा, “अँजोम पे, नेय पक्‍का इसराएली हवे, नेय थरे कनर छल कपट कोवाआ।” तहाँ नतनएल हेंयिय होंबोर तेडा, “इंञ काःतेम थितो यडिञाँ?” हेना वरी ईसु हेंयिय लाय वडा, “फिलिपुस राःतेड मिआँ, हेना वरी पहील ते अंजीर दुबी रेम दोहोएन तोलोगिंञ ञेंलवड मिआँ।”
हेना वरी नतनएल हेंय थरेय कहनी तेडा, “ए गुरू, अम भगवान होपोन हवे; अवुर इसराएलिकू रेनिय राजा हवे।” हेना वरी ईसु कहनी तेडा, “अम अंजीर दुबी रेंञ ञेंलवड मिआँ मेनतेंञ कहनी तेडा, हेनातेम बिसवास यडा किदो? अम नआँ वरी हो बडे बडेआ काम इंञ वरिम ञें-लेआ।” हेना वरी फेरेच ईसु कहनी तेडा, “इंञ अम थरे सही मेतेंञ कहनी यडा, सरग राः दुवर जिजकोः तोलोग अवुर भगवान रेनकू सरगदूतकू, इंञ होड़ होपोन थरे अगड़ुः तोलोग अवुर रकब तोलोग पे ञेंलकुआ।”

Koute एहुन्‍ना 1