Non-dramatized audio in the language of pyen.

Pyen

Haeˉ mae beu, Yuˉdaˆ ang meungˉ veu ca naeˉ Yuˉdaˆ changˉ htiˍ baˍ uiˍ Anˍtiˉokˆ vengˍ veu hkeu lui yao, Nawng ngaˍ Moˉseˍ beu ang liˍ ca naeˉ lawˉ ang hkaw baˍ haen baoˉ vaˍ, htaiˍ awkˍ naeˍ na baˍ ya taw nae yaˍ changˍ mawngˉ namˉ uiˉ na maˍ biˍ jiˍ. Pawˉluˆ nae Baˍnaˍbaˆ changˉ hingˉ uiˉ na baˍ yaˍ lang nae hteng peunˉ lang yao, awˍ lawng ningˉ na naˉ lae hu naeˉ nae, Hkritˆ yanˍ ang muˉ, Pawˉluˆ Baˍnaˍbaˆ nae aw htaˍ veu changˉ uiˉ na cheˉ yuˉ yao, Yeˍruˆsaˍlaemˍ vengˍ veu ca naeˉ naiˍ htangˍ uiˍ awn hoˉ yaˍ mangˍ htiˍ baˍ uiˍ kawngˉ piˉ lae jiˉ. Haeˉ mae yao, Hkritˆ yanˍ ang muˉ yawng na piˉ aeˉ beu, yawng ngaˍ Hpiˆniˆ ang meungˉ nae Saˍmaˍriˆ ang meungˉ na hpaiˍ jiˍ. Haeˉ mae beu, Yuˉdaˆ changˉ baˍ aˍ nae changˉ uiˉ nuing ba penˉ laˉ laeˍ jiˍ awˍ lawng na hkai bae biˍ yao, yumˉ naeˉ saˉ naeˉ uiˉ changˉ uiˉ mawnˍ saˉ jiˉ. Yawng Yeˍruˆsaˍlaemˍ vengˍ veu hkeu lui beu, Hkritˆ yanˍ ang muˉ, naiˍ htangˍ uiˍ nae, awn hoˉ yaˍ mangˍ htiˍ baˍ uiˍ yawng na hap yuˉ jiˉ. Haeˉ mae beu, Hpaˍcaoˍ yaˉ yetˍ na caiˍ yaˍ jiˍ uiˉ kanˉ, hkaˉ vaˍ jiˍ uiˉ kanˉ hkaˉ hko laˉ hko yaˉ yetˍ muiˍ yawng na hkai bae biˍ jiˍ. Caˇ, Hpaˍriˆsaeˉ ang muˉ hkaoˉ veu Yeˍsuˆ na yumˉ naeˉ changˉ htiˍ baˍ uiˍ hta laˉ yao ciˍ jiˍ yang, Yuˉdaˆ changˉ baˍ aˍ nae changˉ uiˉ na ang hkaw haen na biˍ yao, Moˉseˍ beu ang liˍ ang kawngˍ laˍ mae ya ha naeˉ uiˉ saˍ laiˍ ang tangˍ ya piˍ naeˍ nae ha biˍ jiˍ. Haeˉ mae beu, naiˍ htangˍ uiˍ muiˉ, awn hoˉ yaˍ mangˍ htiˍ baˍ uiˍ awˍ lawng ningˉ na sing lang naeˉ nae hpawm lang ga jiˉ. Awˍ lawng ningˉ na ang byaˍ cangˍ sing cat peunˉ lang yao, Peˍtruˆ hta laˉ yao yawng na ha biˍ jiˍ yang, Yaˍ changˍ mawngˉ namˉ yawng veuˉ, ga pa nae yao Yuˉdaˆ changˉ baˍ aˍ nae changˉ uiˉ mawnˍ pyawˉ naeˉ ang buinˉ tangˍ na ya kyaˍ yao yumˉ naeˉ uiˉ saˍ laiˍ, kaˉ huˍ veu nae nawng hkaoˉ veu Hpaˍcaoˍ ga na cheˉ yuˉ laˍ jiˍ na nawng ang bae yaˇ. Nuing ba na bae naeˉ Hpaˍcaoˍ maˇ, gu na Ang hkawˍ laˉ ang seungˍ sangˉ piˍ laˉ jiˍ lawˉ, yawng na muiˉ piˍ naeˍ hkaoˉ veu, yawng ya muiˉ hap yuˉ naeˉ nae saˉ hkiˉ hkamˉ jiˉ. Hpaˍcaoˍ nawˍ yawng na nae gu na baˍ piˍ peungˍ lang laˍ. Yumˉ naeˉ pa nae, yawng na naˍ hokˍ poiˉ nga biˍ yao yawng beu nuing ba na muiˉ yang piˉ seungˍ piˉ sangˉ nga laˉ byaˇ. Haeˉ mae yao, gu beu ang hpiˍ ang puˉ htiˍ baˍ uiˍ muiˉ, gu naˉ yuˉ yao baˍ kaˍ nae uiˉ ang liˍ ang kawngˍ na cuˉ yao Hpaˍcaoˍ na camˍ naeˍ uiˉ saˍ laiˍ ba ceuˉ ha yao ta peˍ uiˍ na piˉ naˉ yuˉ naeˇ. Gu muiˉ yawng lawˉ yaˇ, Ang suingˉ Yeˍsuˆ beu ang buinˉ pa nae baoˇ naeˍ naˇ htaiˍ awkˍ naeˍ na ya naeˉ nae gu ang yumˉ yaˇ nae Peˍtruˆ ha biˍ jiˍ. Haeˉ mae beu, hkaˉ hpawm laˉ jiˉ uiˉ changˉ uiˉ kyapˆ nae ca jiˉ. Baˍnaˍbaˆ nae Pawˉluˆ yaˉ yetˍ na Hpaˍcaoˍ laˍ htiˍ tanˇ hkoˇ piˍ yao, Yuˉdaˆ changˉ baˍ aˍ nae changˉ uiˉ kawngˉ manˍ kyaˍ na mek laek hkaˍ naˍ uiˍ na hkaˉ ha jiˉ uiˉ awˍ lawng na yaˉ yetˍ ha biˍ naeˍ na yawng naˉ jiˉ. Yaˉ yetˍ hkaˍ muˍ hkai peunˉ beu, Yaˍkok ciˍ jiˍ yang, Yaˍ changˍ mawngˉ namˉ yawng veuˉ, ga tangˍ ningˍ na naˉ voˍ. Hpaˍcaoˍ nawˍ, kaˉ hu veu, Yuˉdaˆ changˉ baˍ aˍ nae changˉ uiˉ beu changˉ htiˍ baˍ uiˍ na yang beu changˉ ceuˉ hpeuˍ laˍ naeˍ uiˉ saˍ laiˍ cheˉ yuˉ yao yawng na saˍ kyaˍ kyaˍ jiˍ uiˉ awˍ lawng Siˉmunˍ hkai yao maˍ laˍ byaˇ. Yang beu ciˍ tangˍ hingˍ nga, Hpaˍcaoˍ beu pa rawˉ hpaet uiˉ beu ang tangˍ uiˍ na ang capˆ lang yaˇ. Naiˍ htangˍ ang laiˍ veu ningˉ mae taemˉ saˍ jiˍ.
Ningˉ uiˉ hpeuˍ peunˍ laˉ naeˉ lawngˍ veu ga luiˍ laeˍ yao, heung nga aengˉ jiˉ Daˍvet beu yumˉ hingˉ na ga chaw laeˍ laeˍ naeˍ. Kangˍ nga chaw aengˉ jiˉ uiˉ na muiˉ ga taeng nga laeˍ yao, yumˉ hingˉ na ga pawk yao chaw laeˍ naeˍ. Haeˉ mae beu, ca suiˍ naeˍ uiˉ changˉ uiˉ aˍ, ga beu changˉ ceuˉ hpeuˍ laˍ naeˉ uiˉ saˍ laiˍ, Ang suingˉ Hpaˍcaoˍ na saˉ naeˉ. Hkaw taeˉ beu nae ningˉ lawng ningˉ na piˉ bae laˍ jiˍ Ang suingˉ Hpaˍcaoˍ maˇ ningˉ mae ciˍ saˍ jiˍ nae taemˉ saˍ jiˍ.
Hingˉ pa nae, Hpaˍcaoˍ kawngˉ hpap yao laˉ laeˍ naeˍ Yuˉdaˆ changˉ baˍ aˍ nae changˉ uiˉ na tiˍ suk tiˍ sak biˍ naeˍ ningˉ ngaˍ baˍ yaˍ. Caˇ, awˍ hang sangˉ htuˆ na chaˍ lang naeˉ ang chaˍ ang kaeˍ keungˍ na baˍ upˍ, suˉ yaˍ linˉ yaˍ naeˍ na baˍ upˍ, nuingˉ chuiˍ veu kaep saeˍ jiˍ ang saˍ na caˍ naeˍ ningˉ na baˍ upˍ, ningˉ uiˉ na hpaeˉ taw naeˉ uiˉ saˍ laiˍ, yawng na ang laiˍ taemˉ biˍ kyaˍ nae ga kuitˆ yaeˉ. Aˉ mae yao nae baoˉ vaˍ, cu sinˉ Yuˉdaˆ changˉ ceuˉ hpawm lang kyaˉ hkaoˉ veu Moˉseˍ beu ang liˍ ang kawngˍ hingˍ na hpatˆ yao, hkaw taeˉ beu nae cu vengˍ vengˍ hkaoˍ veu maˍ biˍ naeˍ uiˉ changˉ ang ca yaˇ nae Yaˍkok ha biˍ jiˍ.

Haeˉ mae beu, naiˍ htangˍ uiˍ muiˉ, awn hoˉ yaˍ mangˍ htiˍ baˍ uiˍ, Hkritˆ yanˍ ang muˉ hkaoˉ veu ca naeˉ changˉ uiˉ, yawng hkaoˉ veu changˉ na cheˉ yuˉ yao, Pawˉluˆ nae Baˍnaˍbaˆ yaˉ yetˍ kawngˉ Anˍtiˉokˆ vengˍ veu piˉ lae naeˉ nae, naiˍ htangˍ htiˍ baˍ uiˍ nae awn hoˉ yaˍ mangˍ uiˍ, Hkritˆ yanˍ ang muˉ kawngˉ htuˍ yaˍ laˉ mae nuing ba capˆ jiˉ. Yaˍ changˍ mawngˉ namˉ uiˉ hkaoˉ veu awnˍ hoˉ hpeuˍ naeˍ Baˍsaˍbaˆ nae maengˉ jiˉ Yuˉdaˆ nae Siˍlaˆ na piˉ aeˉ jiˉ. Yaˉ yetˍ hanˉ nangˉ laeˍ jiˍ ang laiˍ hingˍ hkaoˉ veu ningˉ mae taemˉ jiˉ. Naiˍ htangˍ uiˍ hkaoˉ veu awn hoˉ yaˍ mangˍ htiˍ baˍ uiˍ nae, Anˍtiˉokˆ vengˍ, Suˉriˆ ang meungˉ nae Kiˉliˉkiˆ ang meungˉ veu duingˉ naeˉ Yuˉdaˆ changˉ baˍ aˍ nae changˉ uiˉ hkaoˉ veu yumˉ naeˉ saˉ naeˉ uiˉ changˉ htiˍ baˍ uiˍ na hak naeˉ uiˉ ang tangˍ sangˍ yao fakˍ laˍ laiˍ. Gu hkaoˉ veu changˉ htiˍ baˍ baˍ uiˉ aˍ, gu baˍ piˍ aeˉ yao muiˉ, nawng kawngˉ lae yao, nawng na tiˍ suk tiˍ sak laˍ yao, nuing ba kuitˆ luˍ kuitˆ kangˍ laeˍ naeˍ uiˉ saˍ laiˍ maˍ biˍ naeˍ na gu yaˍ kyaˍ yaeˍ yaˇ. Ningˉ pa nae yao, gu sing lang cat lang yao, nuing ba htiˍ suiˍ laˍ mae taengˍ nga laeˍ yao, nawng kawngˉ lae naeˉ uiˉ saˍ laiˍ changˉ nyiˍ hu cheˉ yuˉ yaeˉ. Gu beu Ang suingˉ Yeˍsuˆ Hkritˆ saˍ laiˍ aˍ sangˍ yang beu a sak na tanˍ na jiˉ gu hak naeˉ Baˍnaˍbaˆ nae Pawˉluˆ kawngˉ yaˉ yetˍ na piˉ lae jiˉ. Hingˉ pa nae, ang laiˍ hkaoˍ veu taemˉ jiˉ awˍ lawng ningˉ na nawng na maˍ laˍ naeˍ uiˉ saˍ laiˍ Yuˉdaˆ nae Siˍlaˆ na nawng kawngˉ sa luiˍ laˍ yaeˍ. Ya hpaeˉ saˍ naeˍ uiˉ ang ceuˉ htiˍ baˍ uiˉ aˍ, aw htaˍ veu kanˉ uiˉ nawng htaˍ veu baˍ yaˍ hkeu lui naeˉ uiˉ saˍ laiˍ, Ang hkawˍ laˉ ang seungˍ sangˉ muiˉ, gu muiˉ nuing ba ang capˆ yaˇ. Nawng ya hpaeˉ saˍ naeˍ uiˍ aˍ, awˍ hang sangˉ htuˆ na tanˍ na jiˉ keungˍ aˍ baˍ caˍ jo. Nuingˉ chuiˍ veu kaep saeˍ jiˍ saˍ na baˍ ca jo. Baˍ suˍ baˍ linˍ ya jo. Ningˉ uiˉ na nawng hpaeˉ taw baoˉ vaˍ ang maenˍ yaˇ. Ca buiˍ duingˉ buiˍ nae cangˉ bu nae taemˉ yao chiˉ jiˉ. Yawng hanˍ hu awkˍ taw aengˉ yao Anˍtiˉokˆ vengˍ veu hkeu aeˉ beu, yumˉ saˉ naeˉ uiˉ changˉ ang byaˍ uiˍ na haoˉ chawnˉ yao, yawng na ang laiˍ hingˍ piˍ jiˍ. Ang laiˍ hingˍ na ang tangˍ haenˍ nae hpatˆ beu, yawng na kaˍ piˍ htaengˍ jiˍ pa nae mawnˍ pyawˉ jiˉ. Yuˉdaˆ nae Siˍlaˆ yaˉ yetˍ muiˍ, pa rawˉ hpaet hpeuˍ naeˍ pa nae, yumˉ naeˉ saˉ naeˉ uiˉ changˉ uiˉ na ang byaˍ maˍ biˍ jiˍ hkaoˉ veu, kaˍ piˍ yao yawng na yiˍ naenˉ laˉ biˍ jiˍ. Yaˉ yetˍ hiˉ keung veu iˉ yaˍ ang mangˍ ca laeˍ yao kaˉ nawngˍ veu, caiˍ ya laˍ jiˍ uiˉ changˉ uiˉ kawngˉ lae laeˍ naeˍ uiˉ saˍ laiˍ, yumˉ naeˉ saˉ naeˉ uiˉ changˉ uiˉ, ca buiˍ duingˉ buiˍ biˍ naeˍ hkaoˉ veu yaˉ yetˍ na piˉ lae laeˍ jiˍ. (Caˇ, Siˍlaˆ nawˍ hingˉ keung veu cangˉ saˍ naˇ nae kuitˆ chae laeˍ jiˍ). Caˇ, Pawˉluˆ nae Baˍnaˍbaˆ yaˉ yetˍ aˍ, Anˍtiˉokˆ vengˍ hkaoˍ veu ca yao, aw htaˍ veu changˉ uiˉ kawngˉ htuˍ yaˍ lawˉ, Ang suingˉ Hpaˍcaoˍ beu ang tangˍ maˍ yao ang buinˉ tangˍ maˍ biˍ jiˍ.

Ang nyamˍ iˉ yaˍ mangˍ ngangˍ yao, Pawˉluˆ Baˍnaˍbaˆ na ha biˍ jiˍ yang, Ang suingˉ Hpaˍcaoˍ beu ang tangˍ maˍ biˍ myang jiˉ vengˍ ku ti ti veu ca naeˉ yaˍ changˍ mawngˉ namˉ uiˉ aˉ mae ca duingˉ ngangˉ ngaeˇ nae saˉ hu aeˉ laeˍ seuˍ nae ha biˍ jiˍ. Baˍnaˍbaˆ nawˍ, Maˍkuˆ nae haoˉ naeˉ Yoˉhanˍ na suiˍ yao aeˉ siˉ naeˉ. Caˇ, Pawˉluˆ nawˍ, yang na baˍ suingˍ cae nae kuitˆ jiˉ. Aˉ mae yao nae baoˉ vaˍ, caeˉ saˍ jiˍ hingˍ ngang beu, Paˍpuˆliˆ ang meungˉ veu hkeu lae beu, yaˉ yetˍ na hpakˍ nga saˍ yao kanˉ vaˍ kyaˍ veu yaˉ yetˍ baˍ aeˍ nae pa yaˇ. Haeˉ mae yao, hingˉ lawng hingˉ pa nae, yaˉ yetˍ baˍ yaˍ lang nae hpakˍ nga lang jiˉ. Baˍnaˍbaˆ nawˍ Maˍkuˆ na suiˍ yao, Kuˇpaˉruˆ cunˉ veu heuˍ ta aengˉ jiˉ. Yumˉ naeˉ saˉ naeˉ changˉ uiˉ aˍ, Ang buinˉ piˍ naeˍ mangˉ Ang suingˉ Hpaˍcaoˍ beu laˍ puˍ hkaoˍ veu sa kap ha peunˉ naeˉ nawngˍ veu, Pawˉluˆ nawˍ, Siˍlaˆ na cheˉ yuˉ yao awkˍ taw aengˉ jiˉ. Pawˉluˆ nawˍ Suˉriˆ ang meungˉ nae Kiˉliˉkiˆ ang meungˉ hingˉ na hpaiˍ nga laengˉ yao, Hkritˆ yanˍ ang muˉ htiˍ baˍ uiˍ yiˍ naenˉ hkiˍ naeˍ uiˉ saˍ laiˍ kaˍ piˍ htaengˍ jiˍ.

Koute Naiˍ htangˍ 15