Ngiemboon - 2007 Edition (NT)

Ngiemboon - 2007 - BSCAM NT Drama

Nouveau Testament en Ngienboum © Alliance Biblique du Cameroun, 2007.

Yěsô gwɔ́ tsɔ́ lyɛ̌’, ńnyé ńgwɔ́ pɔ́ tsɛ̀ɛ *jʉ’ʉ Ssé ńně ńzí’i pʉ̀a mmó ńdɔgɔ ńtsẅii Nkʉ̀ Mbòŋo mbwo lá’, *metándá pànùŋe pwɔ́’ pâ *pàkyàgte lepʉ̌ Mǒsê lâ melÿò tsɛ̀ɛ lá’ tó. Ńzɛ́te yé ngie: Shwóŋo wég, ɔ̀ lɔgɔ lezíŋ wɔ́ ńgÿo mɔɔn menò? Kwà’ wɔ̌ zɔ tumó ɔ́ ngie ɔ̀ gÿo pú’u? Yěsô tsɔ́’ɔ mbwo pɔ́b ngie: Mbɔɔ mèŋ yɔ́ɔn, mèŋ, n ge zɛ́te gẅi tà’a nò. Pi shwóŋó wɔ̀ɔn: Awɔ̌ la túmo Jâŋ Mbabtis? E Ssé kà pɔ́ pʉ̀a mesoŋ? Pɔ́ jú’, ńkwaŋte tsetsɛ̀ɛ pɔ́b ngie: Pege lɔɔn ngie e Ssé zɔ la túmo yé, mbà à ge zɛ́te wégè ngie tà mélà’a kɔ́ pege la tè zẅíŋe nò gie Jâŋ lɔ̌ɔn ńgɔɔn wɔ̂? MÀbiŋ ngie pʉ̀a mesoŋ zɔ̌ la túmo yé, mbà lá’ ge lɔg metóon téme wégè zẅé, mélà’mie pɔ́ ée nà yɔ́b twó ńne ńzsé ngie Jâŋ laa *ntsẅì nkʉ̀ Ssé. Ńkwaŋ pá’ɔɔn, ńcʉ́’ ńtsɔ́’ pɔ́ ngie pɔ́ kaa zsé. Yěsô gɔɔn yé né pɔ́b ngie: Mbɔɔ mèŋ yɔ́ɔn, n tè shwóŋó gẅi nyìŋ gẅie n dɔgɔ lezíŋ sé ńgÿo mɔɔn menò wɔ́.


Ńgɔɔn pú’u, ńzye lélɔg sagá nò ńgɔɔn né lá’ ngie: Atsɔ̌ ndÿò lǎ’ ńgẅiin nká’ wé, ńgʉa tsòló ḿbye metÿǒ mie mé kyéen mentɔ̌ɔn ńdɔgɔ ńnyɛte melù’, ńdu ssé ńgee legìŋ, ńgee tóo wó ńnéŋe tɛ’. Afʉ̀’e lékáb ntɔ̌ɔn tÿǒ gÿo ńku’, á túmo tsɔ̌ nyìŋ na pafa’a fa’ pe mbwo pʉ̀a pie ée nká’ ngie à gʉa ńkẅé mé mentɔ̌ɔn tÿǒ ńdɔg ńtó. Pɔ́ nkúu wó, ńgwoon yé ńcúa, ńjwoŋo yé á piŋ mbwó mesẅɛ̀ɛ. Á gíŋe ńtúmo wetsɔ̌, pɔ́ gíŋe wéwɛ̌ ńcúa, ńzoonte yé, ńjwoŋo yé á piŋ mbwo mesẅɛ̀ɛ. Angàŋ nká’ gíŋe ńtúmo mbɔ́ɔntè yétá, pɔ́ gíŋe ńnéŋ mefʉ̌ŋ ná wéwɛ̌, ńjwoŋo yé. Ngàŋ nká’ leen ńké ńkwaŋte ngie: Mèŋ n gÿo lêkɔ́ pé’e? Ńńnéŋe tà ngie: Mèŋ, n ge túmo Míŋ wɔ̀ɔn mie n kwoŋo yé tɛ’. Pɔ́ ge gǎ wɔ́ gÿo mekù’ mé. Múɔ gʉa ńkúu wó, pànyɛte melù’ gyá yé, ńgɔɔn tsetsɛ̀ɛ pɔ́b ngie: Njÿò ndá wɛ̂ gẅie à tóo lɛ, pege zẅé yé, ńjÿó nká’. Ńgɔɔn pú’u, éshwóŋó yé ńdɔg fó nká’ ńkẅɛ, ńzẅé yé.
Yěsô leen ńké ńzɛ́te ngie, pi gyǎ gí ngie ngàŋ nká’ ge tó gÿo lêkɔ́ ná pɔ́b? À ge tó gÿo mé zẅéte pɔɔn pànyɛte melù’, à cʉ́me nká’ mbwo pe mendyɛ̀’ɛ. Alá’ jú’ pá’ Yěsô cʉmé yɔɔn nò pú’u, ńgɔɔn ngie ngǎŋ ńgwɔ́ á le pɛ́’ɛ wɔ́! Yěsô leen ńké ńdíe wɔ́b tà ńgɔɔn ngie: Tà wɔɔn nkaŋ ŋwà’ne gẅie ée tsɛ̀ɛ ŋwà’ne Ssé ée pá’ɔɔn ńdɔgɔ ńgɔɔn ngie kɔ́: «Tóon gẅie pàpwóon ndá la gwá’, léen ńcʉ́’ʉ tóon gẅie yé zɔ pǔ ḿbi’ ndá»? Tóon ŋwɛ́ aa gẅie mbɔɔ wɛ̌ nyìŋ wɔ́ lɔɔn ńgwe mǒ, mbà ngàŋ ge pwɔ́’te. Á píŋ ńgwe ná nyìŋ, mbà à ge pú gwɔ’ɔ ngàŋ.

Pá’ *metándá pànùŋe pwɔ́’ lâ *pàkyàgte lepʉ̌ Mǒsê, la jú’ yɔɔn sagá nò, ńdiŋ ngie à gɔɔn pɔ́ ne pɔ́b la, pɔ́ fa’ shÿó légwoon yé, tá ḿbɔ́g nÿɔ́g lá’.
Ńdeen ńké ńzye légwá ḿbáte yé, ńtúm pà mánáŋ nzèm yé, tà pɔ́ gwɔ́ yɔ́b nzèm yé pɔ́ pá’ pʉ̀a mbòŋo, tá ne ńzẅí’te pá’ nò ge kẅɛ pɔ́ cwo ye tá mé lɔg ńgwoon yé ńnáa mbwo ngúmnɔ́ɔn pà *Roma. Pɔ́ tó ńzɛ́te Yěsô ngie: Tsítsà, peg ne ńzsé ngie ɔ̀ gɔɔn nò, ḿbiŋ ńda’té pɔ́ nò gie á tyé ndʉŋ ndʉŋ, ɔ̀ tè líe pʉ̀a pɔ́ nà shÿó wɔ́, ńda’te nò nénʉ́, pɔ́ pá’ Ssé ne ńzɛ́te ngie mé gÿo pú’u. Shwóŋo wég: *Lepʉ̌ ségè ée pé’e ńzẅíŋ ngie pege má’ ncùb Kása pà *Roma kà ngǎŋ? Yěsô zsé ngie pɔ́ zẅí’i pɔ́ ncwò we, ńgɔɔn né pɔ́b ngie: Pi nyɛɛ wɔ̀ɔn pàga nkáb. Wɔɔn ée shÿó wɔ̌ gẅie ée nà nkáb? Sɔɔn é gwɔ́ lezíŋ wɔ́ sie ée mǒ? Pɔ́ tsɔ́’ɔ mbwo yé ngie ée we Kása, lezíŋ gíŋ ńgwɔ́ pɔ́ sé. Yěsô lêen ńké ńgɔɔn né pɔ́b ngie: Á lɔɔn ńgwɔ́ pú’u, pi náa mmó gie áa ye Kása mbwo Kása, ńnáa ye Ssé mbwo Ssé. Pɔ́ jú’ pá’ à tsɔ̌’ pú’u, á kʉ’ʉ wɔ́b, pɔ́ té gyá tsɔ́ *lɔ̌’ nà shwóŋó gie à gɔ̌ɔn mbwo lá’ gwɔ́, ńdáŋte.


Etsɔ́ ntá’ pʉ̀a ná nùɔ pà *sadukay leen ńké ńtóo lejʉ́ŋ Yěsô, pà *sadukay ée pʉ̀a pie é té zẅíŋ ngie mepfó ge gÿo zíme nà legwé wɔ́. Ńgɔɔn ngie: Tsítsà, Mǒsê la ŋwe’e tsɛ̀ɛ *lepʉ̌ ségè ngie: Nyìŋ lɔɔn ńzɔ́’ɔ manzwě, ńkwé té cʉa mmó, mbà fɛ́ we gẅiin lésɔgɔ mpfɔ́g, pɔ́ yé zyé pènkʉ́ ńdɔg nuŋe ngẅɛ̀ fɛ́ awɛ̌. Shwóŋo wég: Etsɔ́ mefɛ́ laa wó, ńgwɔ́ mbàŋa sɔɔn mbʉ́a, ndùŋ mvfò zɔ́’, ńgÿo ńkwé té cʉa mmó. Mbɔ́ɔntè sɔgɔ mpfɔ́g, ńgíŋe ńkwé yé té cʉa mmó. Mbɔ́ɔntè yétá gíŋe sɔ́gɔ mpfɔ̌g wa, ńkwé pɔ́ tè cʉa mmó. Pɔ́ pú’u, tà pɔ́b sɔɔn mbʉ́a pu ńzɔ́’ɔ wɛ̌ manzwě, ńké ńkwé pɔ́ tè cʉa mmó. Á gwaa zsote manzwě kwé yé. Pá’ pɔ́b sɔɔn mbʉ́a la pú ńzɔ́’ɔ manzwě wɔɔn lɔɔn, mé ge lá’ zíme nà legwé, à gwɔ́ we wɔ̌ fʉ̀’ó? Yěsô tsɔ́’ɔ mbwo pɔ́b ngie: Áa nà fʉ̀’ɔɔn, mbàŋa lâ pànzwě ne ńzɔ́’ɔ. Tá ńgʉa ná pʉ̀a pie Ssé gyǎ ngie à ge zíme wɔ́b, pɔ́ kú yɔ́b tsɛ̀ɛ ngwòŋ sẅé, mbà tsɔ̌ lézɔ́’ à tè gíŋe ńgwɔ́ wó mbwo pɛ̌ mbàŋa lâ pɛ̌ pànzwě wɔ́. Ńzɔɔn ńgwaa gwɔ́ pɔ́ té gíŋe ńgee nkwě wɔ́. Mélà’mie pɔ́ cʉ́’ ńgwɔ́ pɔ́ pá’ *mecÿɔ́’ Ssé la, ńcʉ́’ púɔ Ssé, ńtí nò gie Ssé kẅě wɔ́b mbwo legwé. Kwà’ Mǒsê la shʉ̀ashʉ̀a ńda’te ngie epʉ̀a ge lá’ zíme nà legwé. Áa nà jʉ’e ŋwà’ne gie à la ŋwe’e nà nò mûɔ métÿǒ gẅie à la gyá mmɔ̌g mǒ, á tóŋo Cʉ̀apʉ̀a le, e Ssé Ábalam, ńgwɔ́ Ssé Esâg, ńgwɔ́ Ssé Yakwɔ́b, Yěsô gíŋe ńgɔɔn ngie, e Ssé tè Ssé mepfó pʉ̀a wɔ́, e Ssé ee Ssé pʉ̀a metʉ̀. Pi zsé ngie pʉ̀a mesoŋ metsèm cʉa nzèm Ssé ńgwɔ́ pʉ̀a metʉ̀. Yěsô tsɔ́’ pú’u, tsɔ́ *pàkyàgte lepʉ̌ Mǒsê tóontè ńgɔɔn ngie: Tsítsà ɔ̀ tsɔ̌’ kwà’ mboŋó. Á fo fʉ̀’ó nyìŋ tè gíŋe ńgẅiin shÿɔ́g légíŋe ńzɛ́te yé tsɔ́ nò wɔ́.


Yěsô piŋ ńgɔɔn né pɔ́b ngie: Pi kwáŋ gí ngie mé zí’i pʉ̀a ngie *Nzà’nkÿo gẅie Ssé la ka’ à ge lá’ gwɔ́ nyìŋ nà ngẅɛ̀ fùɔ Ndavíd pɛ́’ɛ̀ á lɔgɔ ńgwɔ́ lêkɔ́? Fùɔ Ndavíd yé máŋwɛ́ gɔɔn tsɛ̀ɛ ŋwà’ne mezɔ́bɔ ntse ngie:
Cʉ̀apʉ̀a Ssé gɔ̌ɔn mbwo wɔɔn Ndè ngie:
Tóo ńnéŋe nà gwoŋó pwó yɔ́ɔn ye tʉ̀,
ńzẅí’te mèŋ n dɔg megàŋ mbù pú, ńgÿo ntÿɔgɔ́ mekwò mú
Tà fùɔ Ndavíd tóŋo yé le we Ndè pá’ɔɔn, *Nzà’nkÿo piŋ ńgwɔ́ nyìŋ nà ngẅɛ̀ ye lêkɔ́?
Yěsô gÿo ńtsẅe ńně náa ntÿɔgɔ́ mbwo *ngàŋa kwò yé, alá’ ntsèm gie á laa jʉ’ó ne ńjú’u. Á gɔɔn ngie: Pi lÿɔ́’ *pàkyagte lepʉ̌ Mǒsê. Pɔ́ kwoŋo léma’ meshʉ̀shʉ̀a nzsǒ ńdɔg ńgwáa ńkʉ́’ʉ, ḿbiŋ ńkwoŋ ngie me tsyɛ’te wɔ́b á ndùmo gyɛ̌. Ńkú *mendá cú’tè, ńkaŋa yɔ́b jʉ’ pɔ́ mvfò. Pɔ́ kúu jʉ’e melínɔ́ɔn, ńnéŋé pɔ́ nà jʉ’e melÿò. Pɔ zɔ̌ gíŋe ńdɔgɔ legyè ńkẅé shúm mepfɔ̌g, ńcʉ́’ʉ létsyɛ’te Ssé, ńdɔgɔ légɔɔn nò á sag ḿbaba menÿɔ́g pʉ̀a. E Ssé ge lá’ záb yɔb ngʉ̀ngʉ̀ e tʉ tɛ’.

Koute Lukase 20