N'KANGULU WUMOONË

Fë mbusë, Yeesu wusë ke yendaangë ku lisimu li liyaangë li Ngalilee bën'teelë yivaandi liyaangë li Tibelëyaadë. Nkoongë baatu yilë ke n'laandaangë cibilë bëlëmonaangë biliimbu bi bimaaku byo kulëvaangaangë mu kubelusi bibeedo. Yeesu wusë makë fë yilu moongo i wukukalë foofo yimunë bilaanzi byaandi. Paakë, n'saangu Sizwiifë, wabë wabelëmë. Yeesu kwe tali i kwe moni nkoongë baatu yilëkwisë ke naandi, wusë kufulë Filiipë: « Kuni twakun'sumbilë mëmpa mu kulikilë bakë booso obee? » – Yeesu wutubilë obo mu kuseengë Filiipë, cibilë naandi wuzaabë ntetë linë kufitë vaangë. – Filiipë wun'vutulilë : « Bumweekë yimunë nkamë-wali li binkongulu bi mboongo, byaawu kufwaanë ve mu kusumbilë m'pooku mëmpa bwiinji kadë muutu mu baawu wubakë citinë. » Cilaanzi cimesi, Andëlee, nkoombë Simu li Pyeelë, wun'kaambë : « Faafë fëke cilesi bakëlë cike yi mëmpa më taanu mëvangininë mu olëzë i mbisi wali. Kasi byaawu kufwaanë ve mu nkoongë yooso yi baatu ayi? » Yeesu wusë tubooso : « Kasyaanu bakë booso. » Faawu fabë mpaapë bitiiti. Bakë booso bisë kalë, baawu babë kwaasu ku biveefi bi taanu bi bëbakëlë. Yeesu wusë boongë mëmpa i fë mbusë kutoondë Nzaambi, naandi wusë kabilë ke banë babë faawu. Naandi wubëvaanë yivaandi simbisi, bunë bwabë n'ciinzaawu. Bunë baawu bamani kulya yi kukutu, Yeesu wusë kaambë bilaanzi byaandi: « Noongaanu bitini byasyaalë mu kumaangë byaawu kubungënë. » Baawu bënoongë byaawu i bëwaasi kuumi mikutë wali yi bitini bi mëmpa bi olëzë byo bisyaalë. Baatu, abu bamoni ciliimbu ci cimaaku cyo Yeesu kuvaangë, baawu bisë tubë : « Naandyaawu, cyelikë m'bici wakwiisë mu buloongo! » Yeesu abu kwe zaabi ti baatu bëfitë kwiisë mu kun'kaangë mu mëngolo mu kun'tuunvi n'tinu, naandi wusë be kwendooso naveekë ku yilu moongo.


Bwiisi abu bwe yili, bilaanzi byaandi bëkulumukë mu ndaambu liyaangë, baawu bëmakë mu bwaatu i bësabukë liyaangë mu kweendë ku Kapelënawuumë. Bwiisi bwabë bwakwiilë i Yeesu wabë yibuunu kuba yaawu cintwaali. Masi më liyaangë mëlënikukaangë, cibilë mpeemo yinenë yilë pukaangë. Bilaanzi bëvwiilë fë mwa mitakë taanu kaambofo yi samunu, bunë bamonë Yeesu wulëbelëmë yi bwaatu mu kulyaatë fë yilu masi i baawu bisë ba mu boomë. Kasi Yeesu wusë bëkaambë : « Awu miinu, kebaanu lulë ba mu boomë. » Bilaanzi bëlëtoombë kum'boongë mu bwaatu, kasi kuzimbukulë ofo baawu bisë seesë fë liloondo kunë bëlëkwendë.

Cilumbu cilandëkënë, nkoongë baatu yo yisyaalë ku lisimu li liyaangë bëkutebukë moonyi ti faawu fabë bwaatu bumweekë, baatu bëzaabë ti Yeesu sye makë mu bwaatu yimunë bilaanzi byaandi ko, kasi baawu bëyendë baveekë. Myaatu yimesë, yifuminë ku libweeti li Tibelëyaadë, yisë belëmë fanë bëliilë mëmpa manë Fumu wutondilë Nzaambi. Bunë baatu bamoni ti Yeesu i bilaanzi byaandi bisye ba faawu ko, baawu bisë makë mu myaatu i bëyendë ku livulë li Kapelënawuumë mu kun'toombë.

Baawu bisë kuzakënë Yeesu ku lisimu li liyaangë i bisë kun'kaambë : « A Fumu, njeeyi ntaangu mbici wakwisilë akwe? » Yeesu wusë bëvutulilë : « Cibeeni, miinu beeno yin'kaambë li licyelikë: beeno lulë mu kun'tombilë cibilë beeno lwalya limpa lwakukutu, yaaku ti cibilë lwabakulë suundu yi biliimbu bi bimaaku byaami. Salilaanu yaaku ti mu ndiiwu yim'bungënë, kasi mu ndiiwu yin'vaanë luziingu lu sakë yi sakë. Ndiiwu be yooyo, Mwaanë Muutu wuluvaanë yaawu, cibilë Nzaambi Taatë watuulë mu naandi ciliimbu ci lutumu lwaandi. » Baawu bën'yufulooso : « Beeso buni tufwenikini kusiilë mu kusalë bisalu bizolisi Nzaambye? » Yeesu wusë bëvutulilë : « Cisalu cinë Nzaambi kuzolisi mu beeno, mati luta maanë mu wunë naandi kufilë. » Baawu bisë n'kaambë : « Ciliimbu ci cimaaku mbici njeeyi wufwenikini kutuleesi bwiinji beeso tukuteelë maanë? Cisalu mbici wuzolisi kuvaangë? Sinkaakë siitu mu ntaandu ciyumi, bëlya livwe-vwetë. Bo bën'tubilë libuungu: “Naandi wubëvaanë mu kulya limpa lifuminë ku yilu.” » Yeesu wusë bëvutulilë : « Cibeeni, yilukaambë licyelikë : yaaku ti Moyiizë na wuluvaanë limpa li yilu, kasi Tataami na wuluvaanë limpa licyelikë li yilu. Cibilë limpa linë Nzaambi kun'vaanaangë mati lin'fuminaangë ku yilu i lyaawu lin'vaanaangë luziingu mu buloongo. » Baawu bisë n'kaambooso: « A Fumu, tuvaanë limpa be lyoolyo ntaangu syooso. »
Yeesu wusë bëkaambë : « Miinu limpa li luziingu. Wunë wun'kwisë ke miinu, wusë ntaatë nzalë kuve i wunë wun'ta maanë mu miinu wusë m'ba yi mpwiilë ko. Kasi miinu yalukaambë: beeno lwakum'monë i lusye kun'teelë maanë ko. Bakë booso banë Taatë wukum'paanë, bën'kwisë ke miinu i yisë m'bumë ko wunë wun'kwisë ke miinu. Cibilë yifuminë ku yilu yaaku ti mu kuvaangë n'vwiilwaami, kasi n'vwiilu yi wunë wukun'filë. Tala linë lizolisi wunë wukun'filë: mati yileembu kuzimbisi wun'viipë mu banë naandi wukum'paanë, kasi bwiinji miinu yibëvulumunë mu cilumbu ci siitu. Cibeeni, tala linë Tataami wun'toombë : bakë booso bëm'monë Mwaanë i bën'ta maanë mu naandi, bëbakë luziingu lu sakë yi sakë, i miinu yibëvulumunë mu cilumbu ci siitu. »
Sizwiifë bëlëmimëtaangë mu Yeesu cibilë bo kutubë : « Miinu limpa lifuminë ku yilu. » I baawu bëlëtubaangë : « Naandi kwe Yeesu, mwaanë Zozeefë? Beeso tube zaabë buboti tataandi i mamaandi. Kwisilë buni naandi mu kutubë ti wafuminë ku yilu? » Yeesu wusë bëvutulilë : « Leembwaanu kumimëtë benuveekë yi benuveekë. Muutu ve wum'podi kwiisë ke miinu ningë Taatë wo wukun'filë wusye n'natë kuve i miinu, yikun'vulumunë mu cilumbu ci siitu. Mibici bësonikë : “Nzaambi wun'sinë baatu bakë booso.” Wosuku wun'kuwulu Taatë i wun'tambulë liloonji lyaandi wun'kwisë ke miinu. Lya lyooli, lisë n'tubë kuve ti wun'viipë wumonë Taatë, kasi tokë wunë wufuminë ke Nzaambi na wumonë Taatë. Licyelikë, licyelikë miinu yilukaambë : wunë wun'ta maanë, wum'bakë luziingu lu sakë yi sakë. Miinu limpa li luziingu. Sinkaakë siinu bëlya livwe-vwetë mu ntaandu ciyumi, kasi baawu bëfwa. Kasi limpa lyo lyafuminë ku yilu, wunë wulilya, kusë n'fwa ko. Miinu limpa li luziingu lyafuminë ku yilu, wunë wun'lya lyaawu, naandi wun'ziingë sakë yi sakë. Limpa yin'vaanë miinu, mati n'sunyaami, miinu yiwuvaanë bwiinji baatu bëtambulë luziingu. »
Fa foofo, Sizwiifë bëlëfindënë mpakë baveekë yi baveekë i bëtubë : « Kwisilë buni mu muutu awu mu kutuvaanë n'sunyaandi mu kulya? » Yeesu wusë bëkaambë : « Licyelikë, licyelikë miinu yilukaambë : ningë beeno lusye lya n'sunyi wu Mwaanë muutu ko, i ningë beeno lube maangë kunwa meengë maandi, beeno lusë mbakë luziingu ko. Wunë wun'lya n'sunyaami i wun'nwa meengë maami, naandyoowo wum'bakë luziingu lu sakë yi sakë i miinu yikun'vulumunë mu cilumbu ci siitu. Cibilë n'sunyaami ndiiwu yi cibeeni i meengë maami mëlafu më cibeeni. Wunë wun'lya n'sunyaami i wun'nwa meengë maami, naandi wun'zingilë mu miinu i miinu mu naandi. Taatë wunë wukun'filë ke moonyi i miinu yin'zingilaangë mu naandi, dedë mweekë wunë wun'lya n'sunyaami wun'zingilë mu miinu. Lyaawu ali limpa lyafuminë ku yilu. Lyaawu likeeli dedë mweekë ko yi linë sinkaakë siinu bëlya, banë bëfwa. Kasi wunë wun'lya limpa be liili wun'ziingë sakë yi sakë. » Yeesu wutubë mëbuungu be maama, fanë kululongilaangë mu cizutununu ci Kapelënawuumë.

Fo bayuwu maambu mo Yeesu kutubë, mpaapë mu bilaanzi bisë tubë : « Afa naandi wavyosilë cisafu! Buni tum'podi kuvitikilë mawee? »
Yeesu wubakulë ti bilaanzi byaandi bëlëmimëtaangë mu cibilë ci maambu kulë tubaangë. Bwaawu naandi wubëkambilë: « Manë yatubë maluvaangë simpasi? » Cilumbu lum'monë Mwaanë Muutu wun'vutukë ko kufuminë, buni lim'belee? Mati Ciluunzi ci Nzaambi cyaawu cin'vaanaangë luziingu. Muutu naveekë wukeeli yi n'ciinzë ko. Maambu manë yilukaambë, maawu Ciluunzi i luziingu. Kasi bën'viipë mu nkoongiinu bëkaambu kuta maanë. Cyelikë, Yeesu wulëzaabaangë fanë ntonunu banë bëkaambu kun'teelë maanë, i naandi wulëzaabaangë nani wukun'vakulë. Naandi wutubooso: « Mu bwaawu yilukaambilë ti muutu ve wum'podi kwiisë ke miinu ningë Taatë wusye n'vaanë n'swa ko. »
Mu boobo mpaapë bilaanzi bëvutukë mbusë i bëmaangë kweendë yaandi. Yeesu wusë kaambë likuumi bë bwaali li bilaanzi : « Beeno, luzolisi kweendë yiviinwe? » Simu li Pyeelë wusë n'vutulilë : « A Fumu, ke nani beeso tufwenikini kweendë? Njeeyi ke yi mëbuungu më luziingu lu sakë yi sakë. Beeso twata maanë, twazaabë ti njeeyi Cisemi cyo Nzaambi wafilë. » Yeesu wusë bëvutulilë : « Abu miinu kwe yilusoolë likuumi bë bwaali? Wumweekë mu beeno dyaabu! » Naandi wulëtubilaangë mu cibilë ci Zuda, mwaanë Simu Iskalyootë. Naandi mu likuumi bë bwaali na wukun'sumbisi.

Koute Za 6