Bulu ntam pɔpwɛ; Nkonya

Kwasieda, igyi ndawɔtswɩtɔ ɛkɛ gyankpapʋ bakɛ a, atsɩ amʋ bɔkʋsʋ tsu afa amʋʋ bɔkwɛ yaɩ amʋ yɔ Yesu ntsan amʋ asɩ. Bowun ánɩ́ bamina ibwi amʋʋ bɔpʋtin ɔbɔ amʋ ɔnɔ amʋ lɛ ɩnʋ. Mʋ́ sʋ bebitiwie ɔbɔ amʋtɔ, tamɛ bʋmowun Yesu fuli amʋ. Besi bʋlɩɩ bʋdɛ nwuntɔ bu. Bɛkɩ a, ayin abanyɔ akʋ lɩɩ amʋ́ wa ɩnʋ a. Amʋ́ atadɩɛ dɛ ogya kpa. Ifu lɛkɩta atsɩ amʋ, bɛda akpawunu pʋ ansɩtɔ bun ɔsʋlʋtɔ. Tamɛ ayin amʋ bɛfɩtɛ amʋ́ bɛɛ, “Ntogyi sʋ mlɩdɛ ɔkɩankpapʋ dunka afulitɔ? Ɔma nfɩ, alakʋsʋ! Mlɩkaɩn asʋn amʋʋ ɔlɛbla mlɩ brɛá mlɩa mʋnyɔ mlɩbʋ Galilea ɔmátɔ amʋsʋ. Ɔbɛɛ, ‘Ilehian ánɩ́ bɛ́lɛ mɩ, Nyankpʋsa-Mʋ-Bi anfɩ ha lakpan abwɛpʋ. Bɛ́da mɩ manta oyikpalihɛsʋ. Mʋ́ ɛkɛ sasɩ a, nɔ́kʋsʋ tsu afulitɔ.> ” Ɩnʋ atsɩ amʋ bɛkaɩn Yesu asʋn anfɩsʋ. Beyinki tsu ntsan amʋ asɩ bɛbla sumbi ayɔpʋ duɔkʋn amʋ pʋ́ aha atrahɛ amʋʋ bʋbʋ ɩnʋ amʋ fɛ́ɛ́ tɔá bayowun.
Atsɩá bɔyɔ ntsan amʋ asɩ gyi, Magdalayintse Maria, Yohana pʋ́ Yakobo mʋ yin Maria. Amʋ́a atsɩ akʋá bʋbʋ amʋ́tɔ lɛkla asʋn anfɩ suna sumbi ayɔpʋ amʋ. Asʋn amʋ lɔbwɛ sumbi ayɔpʋ amʋ fɛ mimlala. Mʋ́ sʋ bʋmɔhɔ mʋ́sʋ gyi. Tamɛ Petro mʋ́ lɔkʋsʋ, tsii ɔsrɩ yɔ ntsan amʋ asɩ. Olobun kpɛlɛkɩ ɔbɔ amʋtɔ. Tati amʋʋ bɔpʋpula Yesu nkʋlɛ olowun ánɩ́ ɩda fʋntɔ. Oleyinki yɔ woyitɔ, ɔdɛ nwuntɔ bu tsu asʋn anfɩ ɩlaba anfɩ ɩwɩ.


Ɛkɛ amʋ kɛn a, abuopʋ amʋtɔ abanyɔ bɛnatɩ bɔyɔ wulu kʋá bʋtɛtɩ mʋ́ Emaustɔ. Tsu Yerusalem ya ɩnʋ bɔ́bwɛ fɛ maɩlɩ asienɔ. Amʋ́ nkʋlɛ bʋna bʋdɛ nkɔmbɔ gyi tsu asʋn amʋʋ ɩlaba amʋ ɩwɩ. Brɛá bʋdɛ mʋ́tɔ yɔ a, Yesu onuto ɛ lɔbɔtʋ amʋ́, mʋa amʋ́nyɔ bʋna. Bulu letin amʋ́ ansɩ. Mʋ́ sʋ bʋmɛbɩ mʋ. Yesu lɛfɩtɛ amʋ́ ɔbɛɛ, “Amansʋ ɩwɩ nkɔmbɔ mlɩna mlɩdegyi alɩ?”
Besi lɩɩ tikpa, awɩrɛhɔ lɛkɩta amʋ́. Amʋ́tɔ ɔkʋlɛá bʋtɛtɩ mʋ Kleopa lɛfɩtɛ ɔbɛɛ, “Fʋ nkʋlɛ gyi ɔfɔɔ Yerusalem wulutɔ, fʋmeyin asʋn ánɩ́ ɩlaba ɩnʋ nkɛ anfɩtɔ?”
Yesu lɛfɩtɛ mʋ ɔbɛɛ, “Amansʋ igyi?”
Bɛbla mʋ bɛɛ, “Yesu, Nasaretyin amʋ ɩwɩ asʋn igyi. Bulu ɔnɔsʋ ɔtɔɩpʋ ogyi. Ɔlɔbwɛ ofula akpɔnkpɔntɩ, blɩ Bulu asʋn tumisʋ, Bulu mʋa anyankpʋsa fɛ́ɛ́ ansɩtɔ. Anɩ Bulu igyi ahapʋ dɛhɛn pʋ́ wulu ahandɛ bapʋ mʋ ha aha, baha mʋ lowu ɩpɔn, da mʋ manta oyikpalihɛsʋ. Tɛkɩ mʋgyi ɔha ánɩ́ anɩlɛkɩ ɔkpa anɩaa, ɔbɛ́ka lɛ anɩ Israelfɔ nɩ. Ndɛ ɛkɛ sasɩ ɔpá asʋn anfɩ lɛba. Mʋ́a ɩdʋn kʋraa a, anɩtɔ atsɩ akʋ bayɔ mʋ ntsan amʋ asɩ bakɩɛnɩ, tamɛ bʋmowun mʋ fuli amʋ. Bɛɛ, bayowun Bulu-abɔpʋ akʋ babla amʋ́ bɛɛ, ɔbʋ nkpa. Tɔá beyinki bɛbla anɩ lawa anɩ wanwan. Ɩnɩ sʋ anɩtɔ akʋ ɛ basrɩ yɔ ntsan amʋ asɩ, bayowun mʋ́ fɛ alɩá atsɩ amʋ bɛba bɛblɩ. Amʋ́ ɛ bʋmowun fuli amʋ.”
Yesu lɛbla amʋ́ ɔbɛɛ, “Mlɩlemimla o! Mlɩ agywɩɩn tamayɔ agyʋma ɔsasʋ. Nkalɩ igyi sʋ mlɩmɔhɔ asʋn amʋʋ Bulu ɔnɔsʋ atɔɩpʋ bɛblɩ tswɩ amʋ fɛ́ɛ́sʋ gyi? Mlɩmeyin mlɩaa, ilehian ánɩ́ Kristo (ɔha ánɩ́ Bulu lada mʋ ofuli amʋ) obówun ɩwɩɔsɩn, asa obénya mʋ numnyam?” Ɩnʋ Yesu lɛlɛ mʋ ɩwɩ asʋn ánɩ́ bɔwanlɩn wa Bulu asʋn wanlɩnhɛ amʋtɔ, tsu Mosesʋ bɔtʋ Bulu ɔnɔsʋ atɔɩpʋ amʋ fɛ́ɛ́sʋ asɩ suna amʋ́.
Brɛá bowie wulu amʋtɔ bɔyɔ a, Yesu lɔbwɛ fɛ ɔdɛtsʋn ɔyɔ ɔtɩnɛ bamba. Tamɛ abuopʋ amʋ bɛbla mʋ bɛɛ, “Anɩ sɩ, owi lapɔn. Dɩ anɩ wa ndɛ.” Mʋ́ sʋ Yesu lɛbaɩ yɔ amʋ́ wa. Brɛá bʋdɛ atɔ gyi a, Yesu lɛlɛ bodobodo ipin, da Bulu ɩpan. Mʋʋ olebiabia mʋ́tɔ pʋha amʋ́. Ɩnʋnʋ amʋ́ ansɩsʋ lɛtɩtɩ amʋ́, bɛbɩ mʋ, tamɛ ɔlɔfwɩ si amʋ́. Ɩnʋ bɛfɩtɛ aba bɛɛ, “Ansɩ mɛhɩɛ gyi anɩ brɛ amʋʋ anɩa mʋnyɔ anɩna, ɔdɛ anɩ asʋn bla, ɔdɛ Bulu asʋn wanlɩnhɛ amʋ asɩ lɛ suna anɩ amʋ?”
Bɔkʋsʋ ɩnʋnʋ yinki ba Yerusalem. Bɛba a, sumbi ayɔpʋ duɔkʋn amʋ pʋ́ aha trahɛ bafia, bʋdɛblɩ bɛɛ, “Lɛlɛ, anɩ Wie lakʋsʋ. Alalɛ ɩwɩ ɔwan suna Simon!”
Mʋ́ sʋ aha abanyɔ amʋ ɛ bɛblɩ tɔá bayowun ɔkpatɔ. Tɔá bɔpʋbɩ mʋ gyi bodobodo amʋʋ oleye ha amʋ́ amʋ.


Aha abanyɔ amʋ bʋbʋ mʋ́sʋ bʋdɛtɔɩ alɩ Yesu onuto lɛba bɛlɩɩ amʋ́ nsɩnɛ. Ɔlɛblɩ ɔbɛɛ, “Ɩwɩ ilwii mlɩ.”
Opuni letsii amʋ́, bɔwan. Ɩlɔbwɛ amʋ́ fɛ fuli bʋdewun. Ɩnʋ Yesu lɛfɩtɛ amʋ́ ɔbɛɛ, “Ntogyi sʋ mlɩdɛ ifu nya, mlɩdɛ nwɛn gyi mlɩ klʋntɔ alɩ? Mlɩkɩ mɩ ɩbɩ, amlɩkɩ mɩ ayabiasɩ. Megyi mɩ onuto nɩ? Mlɩkɩta mɩ amlɩkɩ. Fuli ma ɔyʋlʋ mʋ́a awú fɛ alɩá mbʋ.”
Brɛá ɔlɛblɩ asʋn anfɩ ta a, ɔlɔpʋ mʋ ɩbɩ pʋ́ mʋ ayabi suna amʋ́. Ansɩ lɛhɩɛ gyi amʋ́, asʋn amʋ ɛ lɔwa amʋ́ wanwan. Mʋ́ sʋ bʋmohogyi ánɩ́ lɛlɛ mʋ nɩ. Ɩnʋ ɔlɛfɩtɛ amʋ́ ɔbɛɛ, “Mlɩbʋ atogyihɛ kʋ nfɩ?” Bɛha mʋ iye tɔhɛ itin kʋ, ɔlɔhɔ mʋ́, wɩ mʋ́ amʋ́ ansɩtɔ ɩnʋ.
Ɩnʋ ɔlɛbla amʋ́ ɔbɛɛ, “Ɩnɩgyi asʋn ánɩ́ nɛbla mlɩ brɛá mbʋ mlɩ wa nɩ. Nɛ́bla mlɩ mbɛɛ, ilehian ánɩ́ mɩ ɩwɩ asʋn kugyikʋá bɔwanlɩn wa Mose Mbla, Bulu ɔnɔsʋ atɔɩpʋ nwʋlʋ pʋ́ Israelfɔ ɩlʋ ɔwʋlʋtɔ fɛ́ɛ́ bɛ́ba mʋ́tɔ.”
Ɩnʋ olobwii amʋ́ agywɩɩn, mɛnɩ bónu Bulu asʋn wanlɩnhɛ amʋ asɩ. Ɔlɛbla amʋ́ ɔbɛɛ, “Bɔwanlɩn tswɩ bɛɛ, Kristo (ɔha amʋʋ Bulu lada mʋ ofuli amʋ) amʋ obówun ɩwɩɔsɩn, wu; Bulu ɔbɔ́kʋsʋa mʋ mʋ́ ɛkɛ sasɩ tsu afulitɔ. Mʋ́ ɔma a, aha bɛ́da Bulu asʋn wanklaan amʋ ɔkan mɩ ɩdatɔ ha ɔmá fɛ́ɛ́ bɛɛ bʋdamli klʋntɔ, fɛ́kɩ Bulu obési amʋ́ lakpan kie amʋ́. Béfi mʋ́ asɩ tsu Yerusalem. Mlɩgyi mɩ adansɩfɔ ha asʋn anfɩ nɩ. Nɔ́pʋ Ɔŋɛ Wankɩhɛ amʋʋ mɩ Sɩ lɛhɩɛ yaɩ ha mlɩ amʋ sɩsɩ mlɩ. Mʋ́ sʋ mlɩtsia wulu anfɩtɔ alɩɩ yɔfʋn ɛkɛá Ɔŋɛ Wankɩhɛ amʋ obótsu ɔsʋsʋ ba bɛha mlɩ tumi.”


Brɛá Yesu lɛblɩ asʋn anfɩ ta a, ɔlɛkpa amʋ́ dalɩ, bɔyɔ Betania wulutɔ. Ɩnʋ olotsu ɩbɩ fʋa, yula amʋ́. Brɛá ɔdɛ amʋ́ yula a, mʋa amʋ́nyɔ nsɩnɛ lɔwa ɩfɔ wa bɩ, Bulu lotsu mʋ ya ɔsʋsʋ. Ɩnʋ bɛda akpawunu sum mʋ, bɔpʋ ansigyi kpɔnkpɔntɩ yinki yetsia Yerusalem. Betsia yɔ Bulu ɔtswɛkpa ɩnʋ bregyibrɛ, yɛkanfʋ Bulu.

Koute Luka 24