These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᐸᑎᒪ ᐊᓐᑕ ᒋᓴᔅ ᒋ ᐊᓱᐊᒻ ᑲᓕᓕ ᓴᑲᐃᑭᓂᔪᐤ᙮ ᑕᐃᐱᕆᔭᔅ ᓴᑲᐃᑭᓐ ᒋ ᐃᓯᓂᐧᑲᑕᑭᓄᐤ ᑭᔭ ᐅ ᑲᓕᓕ ᓴᑲᐃᑭᓐ᙮ ᒋ ᒥᒐᑎᔪᐛ ᒪᒃ ᐊᐛᔪᐛ ᑲ ᓇᓴᐅᑯᑦ ᐛᔅ ᒋ ᐎ ᐛᐱᒥᑯᐤ ᐊ ᒪᒥᔅᑲᒡ ᐃᑎᑦ ᐊ ᒥᓏᒋᐊᑦ ᐊᐛᔪᐛ ᐊ ᐊᐧᑯᓯᔨᒋ᙮ ᒋᓴᔅ ᒪᒃ ᒋ ᓴᑭᒋᐛᐤ ᐱᔅᑯᑎᓇᔪᐤ ᐊᑯᑕ ᐊᓐᑕ ᑲ ᐛᐛᔨᐱᑦ ᐅᒋᔅᒋᓄᐊᒧᐛᑭᓇ ᐊ ᐎᑎᐱᒪᑦ᙮ ᓴᔅ ᒋ ᐸᓱᓇᑯᓂᔪᐤ ᐊᓂᔭ ᒍᐤ ᐃᔪᒡ ᑲᒋ ᒥᑯᓴᒡ ᐎᒪᔅᑲᒐᐅ-ᒥᑯᓴᐅᓐ ᑲ ᐃᓯᓂᐧᑲᑕᔨᒡ᙮
ᒋᓴᔅ ᒪᒃ ᒋ ᐃᑕᐳᐤ ᒂ ᐛᐱᒪᑦ ᒥᒐᑦ ᐊᐛᔪᐛ ᐊ ᐸᒋ ᓂᑐᐛᐱᒥᑯᑦ, ᐊᑯ ᒂ ᐃᑕᑦ ᐊᓂᔭ ᐱᓕᐸ, “ᑕᓐᑕ ᒐᒋ ᐅᑎᓇᐧᒃ ᐸᒂᓯᑭᓐ ᒥᓯᐛ ᒐᒋ ᐊᓯᒪᐧᑯᒡ ᐅᒡ ᐃᔪᒡ ?” ᐊᐅᒄ ᐅᔭ ᑲ ᐃᓯ ᑯᒂᒋᒪᑦ ᐱᓕᐸ ᒥᒄ ᐊᒋ ᐎ ᓂᑐ ᒋᔅᒐᔨᒪᑦ ᑕᓐ ᒐ ᐃᔅᒋᔄᔨᒂᓂ ᐊᑎ ᓴᔅ ᐊᒋ ᒋᔅᒐᔨᑕᐧᒃ ᒋᓴᔅ ᑕᓐ ᒐ ᐃᑎᑦ᙮
ᐱᓕᑉ ᒂ ᐃᑕᑦ, “ᐊᑎ ᒥᒄ ᐊᐱᓯᔅ ᐊᓯᒪᐧᒄ ᐸᐸᐃᒄ ᐊᐛᓐ, ᐃᔭᐱᒡ ᐃᐛᒃ ᓂᓱ ᒥᑕᓯᒥᑎᓄᐤ ᒋᐸ ᐃᔅᐱᔪᐤ ᓱᓇᔭᐤ ᐸᒂᓯᑭᓐ ᐅᑎᓇᑭᓄᐅᑦ᙮”
ᐊᑯ ᐸᐃᒄ ᐊᓂᔭ ᑯᑎᑲ ᐅᒋᔅᒋᓄᐊᒧᐛᑭᓇ ᐊᓐᑎᕈᐊ, ᐊᓂᔭ ᓴᐃᒥᓐ ᐱᑕᕐ ᐎᐧᑲᓂᓴ ᒋ ᐃᑕᔪᐛ, “ᑕᐤ ᐅᑕ ᓇᐸᔅ ᐱᑕᑕᒡ ᐸᒂᓯᑭᓇ ᑭᔭ ᓂᓱ ᓂᒪᓴ ᐊ ᐊᔭᐛᑦ᙮ ᒋᑭ ᒋ ᐊ ᒪᒃ ᐃᔅᐱᔪᐤ ᐅ ᒥᒋᒻ ᐊ ᐃᔅᐱᒐᑎᒡ ᐅᒡ ᐃᔪᒡ ?”
ᐊᑯ ᒋᓴᔅ ᒂ ᐃᑕᑦ, “ᐃᑕᐧᑯᒡ ᐊᓐᒡ ᐃᔪᒡ ᒐᒋ ᐊᐱᒡ᙮” ᓇᔅᒡ ᒋ ᒥᔅᑯᓯᐅᔪᐤ ᐊᓐᑕ ᐊᓂᔭ ᑲ ᑕᒡ᙮ ᐊᑯ ᒥᓯᐛ ᐊᓐᒡ ᐃᔪᒡ ᒂ ᐊᐱᒡ, ᓴᓯᑲᓐ ᐱᑕᑕᒡ ᒐᓯᐱᔪᐤ ᒋ ᐃᑎᓱᐅᒡ ᓇᐸᐅᒡ᙮ ᐊᑯ ᒋᓴᔅ ᐛᑎᓇᑦ ᐊᓂᔭ ᐸᒂᓯᑭᓇ, ᒂ ᓂᓇᔅᑯᒪᑦ ᒋᓴᒪᓂᑐᐛ ᒂ ᐊᑎ ᒪᒪᑎᓂᒧᐛᑦ ᐊᓂᔭ ᐅᒋᔅᒋᓄᐊᒧᐛᑭᓇ ᐊᑯ ᒂ ᐊᑎ ᒪᑎᓄᐛᔨᒋ᙮ ᐊᐅᑯᓐ ᑲ ᐃᑐᑐᐛᑦ ᑭᔭ ᐊᓂᔭ ᓂᒪᓴ᙮ ᒥᓯᐛ ᒪᒃ ᒥᒄ ᐛ ᐃᔅᐱᔅ ᒥᒋᓱᒡ ᒋ ᐃᔅᐱᔅ ᒥᒋᓱᐅᒡ᙮
ᐃᔅᐱ ᒪᒃ ᒥᓯᐛ ᐊᐛᓐ ᑲ ᑕᐱᔅᑯᔨᑦ, ᐊᑯ ᒋᓴᔅ ᐊᑕᑦ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ, “ᒪᒧᓴᒋᓂᒧᒄ ᒥᓯᐛ ᑕᓐ ᐊᔅᐱᔅ ᐃᔅᑯᐱᔨᒡ, ᐊᑲᐎᔾ ᓇᔅᒡ ᐃᔭᔪᑕᑕᐤ ᒐᒂᓐ᙮” ᐊᑯ ᑭᑈ ᒂ ᒪᒧᓴᒋᓇᒡ, ᓂᓱᓴᑉ ᒪᒃ ᐅᑎᐱᐅᑕ ᒋ ᓴᑭᔅᒋᓂᑕᐅᒡ ᐊᒋ ᐃᔅᑯᐳᐛᑭᓄᔨᒋ ᐸᒂᓯᑭᓇ᙮
ᐊᓐᒡ ᒪᒃ ᐃᔪᒡ ᐊᓐᑕ ᑲ ᑕᒡ, ᐊᓐᒡ ᑲ ᐛᐱᒪᒡ ᒋᓴᓴ ᐊᓂᔭ ᒪᒥᔅᑲᒡ ᐃᑐᐅᓂᔪᐤ ᐊ ᐃᑐᑎᒥᔨᒋ ᒋ ᐃᑕᐅᒡ, “ᒐᔅᑎᓇᔅ ᐊᐅᒄ ᐅ ᐅᒋᔅᒋᐛᐃᒐᓱᐤ ᐊᓐ ᑲ ᐊᓱᐛᐱᒪᐧᒄ ᒐᒋ ᐸᒋ ᐃᑎᓴᐛᑭᓄᐅᑦ ᐅᑕ ᐊᔅᒋᒡ᙮” ᒋᓴᔅ ᒪᒃ ᒋ ᒋᔅᒐᔨᒪᐤ ᐊᑯ ᒐ ᐸᒋ ᓂᑐᐛᐱᒥᑯᑦ ᐊᔨᐧᑭᒻ ᒐ ᐎ ᒋᓴᐅᒋᒪᐧᑲᑎᑯᑦ, ᐊᑯ ᒂ ᔅᑐᑕᑦ, ᒥᒄ ᐎᔾ ᒐᒋ ᐸᐃᑯᓯᑦ᙮


ᐃᔅᐱ ᒪᒃ ᐊ ᐊᑎ ᐅᑕᑯᓯᔨᒡ ᒋᓴᔅ ᐅᒋᔅᒋᓄᐊᒧᐛᑭᓇ ᒋ ᓇᓯᐸᔪᐛ᙮ ᒋ ᐳᓱᐅᒡ ᒪᒃ ᐅᐤᑎᔪᐤ ᐊᒋ ᐎ ᐊᓱᐊᒡ, ᓇᑕ ᑲᐳᕐᓇᐊᒥᒡ ᐊᒋ ᐎ ᐃᔅᒋᒪᒡ᙮ ᓴᔅ ᒪᒃ ᒋ ᐊᑎ ᐊᒋᑲᔪᐤ ᐊᔅᒄ ᐊᑲ ᐅᒋ ᓂᒋᐃᑯᒡ ᒋᓴᓴ᙮ ᒐᒃ ᒋ ᒥᔅᑎ ᔪᑎᓂᔪᐤ ᑭᔭ ᒋ ᒪᒥᐧᑲᐊᓂᔪᐤ᙮ ᓂᔅᑐ ᒪᒃ ᓇᐤ ᐊᔅᐱᓴᔨᒡ ᒋ ᐃᔅᐱᔅ ᐱᒥᔅᑲᒐᓂᒋ, ᐊᑯ ᒂ ᐛᐱᒪᒡ ᒋᓴᓴ᙮ ᒋ ᐸᒋ ᓇᑎᑯᐅᒡ ᐊᓐᑕ ᐅᐤᑎᒡ ᐊ ᑕᒡ ᓂᐱᒡ ᐊ ᐱᒧᑕᔨᒋ᙮ ᓇᔅᒡ ᒪᒃ ᒋ ᑯᔅᑕᒍᐅᒡ᙮ ᒋ ᐃᑎᑯᐅᒡ ᒪᒃ ᒋᓴᓴ, “ᐊᑲᐎᔾ ᑯᔅᑕᒋᒄ, ᐊᐅᒄ ᐛᔅ ᓂᔾ᙮” ᐊᑯ ᒪᒃ ᒂ ᐱᔅᑎᓇᒡ ᒐᒋ ᐎᒋ ᐳᓯᒥᑯᒡ᙮ ᓇᒪ ᒪᒃ ᓇᐅᒡ ᓴᔅ ᒂ ᒥᓯᑲᒡ ᓇᑕ ᑲ ᐎ ᐃᔅᒋᒪᒡ᙮

ᒥᓐ ᐎᔭᐱᓂᔨᒡ ᒥᒐᑦ ᐊᐛᓐᒋ ᐊᔅᒄ ᒋ ᑕᐅᒡ ᐊᓐᑕ ᒂᔅᑕᒐᑲᒻ ᐊᓂᔭ ᓴᑲᐃᑭᓂᔪᐤ ᐊᓐᑕ ᒋᓴᔅ ᑲ ᐊᓯᒪᑦ ᒥᒐᑦ ᐊᐛᔪᐛ᙮ ᒋ ᒋᔅᒋᓱᒡ ᒪᒃ ᐊᓐᒡ ᐃᔪᒡ ᒥᒄ ᐊᒋ ᐸᐃᑯᓯᔨᒡ ᐅᐤᑎᔪᐤ ᐊᒋ ᐊᐱᒋᑕᔨᒋ ᒋᔅᒋᓄᐊᒧᐛᑭᓇ ᑭᔭ ᐊᑲ ᐅᒋ ᐳᓯᔨᒋ ᐊᓐᑕ ᒋᓴᓴ᙮ ᑯᑎᑲ ᒪᒃ ᐅᐤᑕ ᒋ ᐸᒋ ᓇᑎᑭᒪᐱᔪᐛ ᐊᓐᑕ ᑕᐃᐱᕆᔭᔅ ᐊ ᐅᒋᐱᔨᒋ᙮

ᓇᒪ ᒪᒃ ᐅᒋ ᐛᐱᒪᐅᒡ ᒋᓴᓴ ᑭᔭ ᐅᒋᔅᒋᓄᐊᒧᐛᑭᓂᔪᐛ ᒐᒋ ᑕᔨᒋ ᐊᓐᑕ ᐊᑯ ᒂ ᐳᓯᒡ ᐅᐤᑎᔪᐤ ᐊᓐᑕ ᑲᐳᕐᓇᐊᒥᒡ ᒂ ᐃᔅᒋᒪᒡ ᒐ ᓇᓂᑐᐛᐱᒪᒡ ᒋᓴᓴ᙮

ᐃᔅᐱ ᒪᔅᑯᐛᒡ ᒋᓴᓴ ᐊᓐᑕ ᒂᔅᑕᒐᑲᒻ ᐊᓂᔭ ᓴᑲᐃᑭᓂᔪᐤ ᒋ ᐃᑕᐅᒡ, “ᒋᔅᑯᑎᒪᒐᓱᐤ ᑕᐃᔅᐱ ᑲ ᑎᑯᓯᓂᔨᓐ ᐅᑕ ?”
ᒋᓴᔅ ᒂ ᐃᑕᑦ, “ᑯᐃᔅᒄ ᒋ ᐎᑎᒪᑎᓇᐛᐤ, ᓇᒪ ᒥᒄ ᐊᓐ ᐊᒋ ᐛᐱᒥᔭᒄ ᒪᒥᔅᑲᒡ ᐛᐸᑎᔨᐛᐅᓇ ᐊ ᐃᑐᑎᒪᓐ ᐛᒋ ᐸᒋ ᓇᓂᑐᐛᐱᒥᔭᒄ᙮ ᐊᓐ ᐊᒋ ᒧᐛᒄ ᐸᒂᓯᑭᓐ ᑭᔭ ᐊᒋ ᒋᔅᐳᔭᒄ ᐊᐅᒄ ᐛᒋ ᓇᓂᑐᐛᐱᒥᔭᒄ᙮ ᐊᑲᐎᔾ ᐊᑐᔅᒐᒄ ᒥᒄ ᐊ ᐎ ᐱᐧᑯᑎᒪᓱᔭᒄ ᒥᒋᒻ ᐊᓐ ᒐ ᐃᔭᔪᐛᒡ, ᐃᔭᐱᒡ ᐎ ᐱᐧᑯᑎᒪᓱᒃ ᐊᓐ ᒥᒋᒻ ᑲᒋᒡ ᒐ ᑎᒂᒡ᙮ ᐃᔪᐤ ᐅᑯᓯᓴᓐ ᒋᑭ ᒥᔨᑯᐛᐤ ᒥᒋᒥᔪᐤ ᒐ ᐊᑲ ᓂᑕ ᐅᒋ ᔭᔪᓂᔨᒡ᙮ ᐛᔅ ᒋᓴᒪᓂᑐᐤ ᐅᑕᐎᒪᐤ ᒋ ᓄᑯᑕᐤ ᑕᑈ ᐊ ᓇᐊᔨᒪᑦ᙮”
ᐊᑯ ᒂ ᑯᒂᒋᒪᒡ, “ᑕᓐ ᒪᒃ ᒐ ᑎᔭᒡ ᒐᒋ ᐊᑐᔅᑯᐅᒋᑦ ᒋᓴᒪᓂᑐᐤ ?”
ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᐊᐅᒄ ᐅᔭ ᐊ ᐃᓯ ᓂᑐᐛᔨᑕᐧᒃ ᒋᓴᒪᓂᑐᐤ ᒐᒋ ᐃᓯ ᐊᑐᔅᑯᐛᑭᓄᐅᑦ, ᒐᒋ ᑕᑈᔭᔨᒪᑯ ᐊᓂᔭ ᑲ ᐸᒋ ᐃᑎᓴᐛᑦ᙮”
ᐊᑯ ᒂ ᐃᑕᒡ ᐊᓂᔭ ᒋᓴᓴ, “ᑕᓐ ᒐᒋ ᐃᓯ ᒪᒥᔅᑲᒡ ᐃᑎᔨᓐ ᒐᒋ ᐅᒋ ᑕᑈᔭᔨᒥᑕᒡ ? ᐊᓐᑕ ᐛᔅᑭᒡ ᐊᓂᔭᐧᑲ ᓂᐛᐧᑯᒪᑭᓇᓂᒡ ᒋ ᒧᐛᐅᒡ ᐊᓂᔭ ᐸᒂᓯᑭᓇ ᑲ ᒥᔭᑭᓄᐎᒡ ᒪᒂᒡ ᐊᓐᑕ ᐸᐧᑯᑎᔅᑭᒥᑲᒡ ᑲ ᑕᒡ᙮ ᐃᑎᔅᑕᔪᐤ ᒋᓴᒪᓂᑐᐤ ᐅᑦ ᐃᔨᒧᐅᓐ,
ᒋ ᒥᔭᑭᓄᐎᒡ ᐸᒂᓯᑭᓇ ᒋᒋᒋᓯᑯᒡ ᐅᒡ᙮”
ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᑯᐃᔅᒄ ᒋ ᐎᑎᒪᑎᓇᐛᐤ, ᐊᓂᔭ ᐸᒂᓯᑭᓇ ᒧᓱᔅ ᑲ ᒥᔨᑕᒄ ᓇᒪ ᐊᓐᑕ ᒋᒋᒋᓯᑯᒡ ᐅᒡ ᐅᒋᐱᔪᐛ᙮ ᒋᓴᒪᓂᑐᐤ, ᓄᑕᐎᔾ ᐊᐅᒄ ᐊᓐ ᒪᔨᑕᒄ ᐊᓂᔭ ᒋᒋᐛ ᐸᒂᓯᑭᓇ ᒋᒋᒋᓯᑯᒡ ᑲ ᐅᒋᐱᔨᒋ᙮ ᐊᓐ ᒪᒃ ᐸᒂᓯᑭᓇ ᒋᓴᒪᓂᑐᐤ ᑲ ᒥᔨᐛᑦ ᐊᐅᑯᓐ ᐊᓐ ᒋᒋᒋᓯᑯᒡ ᑲ ᐅᒋᐱᔨᑦ, ᑭᔭ ᐊᐅᒄ ᑲ ᒥᔭᑦ ᐊᐛᔪᐛ ᐅᑕ ᐊᔅᒋᒡ ᑲ ᑕᔨᒋ ᐱᒪᑎᓯᐅᓂᔪᐤ,” ᒋ ᐃᑕᐤ ᒋᓴᔅ᙮
ᐊᑯ ᒂ ᐃᑕᒡ ᐊᓂᔭ ᒋᓴᓴ, “ᐅᑎᐸᔨᒋᒐᐤ, ᒧᔅ ᒪ ᐸᒋ ᒥᔨᓇᓐ ᐊᓐ ᐸᒂᓯᑭᓐ᙮”

ᒋᓴᔅ ᒪᒃ ᒋ ᐃᑕᐤ, “ᓂᔾ ᐊᐅᒄ ᐊᓐ ᐸᒂᓯᑭᓐ ᐊᓐᑕ ᒐᒋ ᐅᒋ ᐱᒪᑎᓯᑦ ᐊᐛᓐ᙮ ᐊᐛᓐ ᒪᒃ ᒐ ᐸᒋ ᓇᓯᒂ ᑭᔭ ᒐ ᐸᒋ ᑕᑈᔭᔨᒥᒂ, ᓇᒪ ᓂᑕ ᒥᓐ ᒋᑭ ᐅᒋ ᓯᐛᔪᐤ ᑭᔭ ᓇᒪ ᓂᑕ ᒥᓐ ᒋᑭ ᐅᒋ ᓄᑕᔭᐸᒂᐤ᙮ ᓴᔅ ᒪᒃ ᔅᒋ ᐎᑎᒪᑎᓇᐛᐤ, ᓴᔅ ᔅᒋ ᐛᐱᒥᓇᐛᐤ ᐃᔭᐱᒡ ᒪᒃ ᓇᒪ ᒋ ᐅᒋ ᐎ ᑕᑈᔭᔨᒥᓇᐛᐤ᙮ ᒥᓯᐛ ᐊᓂᔭ ᐊᐛᔪᐛ ᐅᑕᐎᒪᐤ ᑲ ᐸᒋ ᒥᔨᑦ ᓂᑭ ᐸᒋ ᓇᑎᑯᒡ᙮ ᐊᓐ ᒪᒃ ᐊᐛᓐ ᒐ ᐸᒋ ᓇᓯᑦ ᓇᒪ ᓂᑕ ᓂᑭ ᐅᒋ ᐃᒐᓇᐤ᙮ ᐛᔅ ᓂᒋ ᑎᑯᓯᓐ ᒋᒋᒋᓯᑯᒡ ᐊ ᐅᑐᑕᔭᓐ ᒐᒋ ᐃᑐᑎᒧᒡ ᒋᓴᒪᓂᑐᐤ ᐅᑦ ᐃᑕᔨᑎᒧᐅᓐ, ᐊᓐ ᑲ ᐸᒋ ᐃᑎᓴᐅᑦ᙮ ᓇᒪ ᓂ ᐅᒋ ᑎᑯᓯᓐ ᐅᑕ ᐊᔅᒋᒡ ᒥᒄ ᓂᔾ ᓂᑦ ᐃᑕᔨᑎᒧᐅᓐ ᒐᒋ ᐃᑐᑎᒪᓐ᙮ ᐊᔪᐅᒄ ᒪᒃ ᐅᔭ ᒋᓴᒪᓂᑐᐤ ᐅᑦ ᐃᑕᔨᑎᒧᐅᓐ ᐊᓐ ᑲ ᐸᒋ ᐃᑎᓴᐅᑦ, ᒐ ᐊᑲ ᒋ ᐅᓂᐃᒥᒋ ᐛᐛᒡ ᐸᐃᒄ ᐊᓂᔭ ᐊᐛᔪᐛ ᑲ ᐸᒋ ᒥᔨᑦ, ᒪᒃ ᒐᒋ ᐅᓂᔅᑲᓂᒥᒋ ᒪᔅᑕᔾ ᒋᓯᑲᔨᒐ ᑲᒋᒡ ᒐᒋ ᐱᒪᑎᓯᔨᒋ᙮ ᐛᔅ ᐊᐅᒄ ᐅᔭ ᓄᑕᐎᔾ ᐅᑦ ᐃᑕᔨᑎᒧᐅᓐ, ᒥᓯᐛ ᐊᐛᔪᐛ ᑲ ᐛᐱᒪᔨᒋ ᑭᔭ ᑲ ᑕᑈᔭᔨᒪᔨᒋ ᐅᑯᓯᓯᒪᐛ ᑲᒋᒡ ᐱᒪᑎᓯᐅᓂᔪᐤ ᒐᒋ ᐊᔭᔨᒋ᙮ ᓂᔾ ᒪᒃ ᒐ ᐅᓂᔅᑲᓂᒥᒋ ᒪᔅᑕᔾ ᒋᓯᑲᒐ᙮”


ᐃᔅᐱ ᑲᒋ ᐃᓯ ᐃᔨᒥᑦ ᒋᓴᔅ, ᐊᓐᒡ ᒍᐤ ᐃᔪᒡ ᒐᒂᔪᐤ ᒋ ᐃᑕᔨᒪᐅᒡ ᐅᔭ ᐊᒋ ᐃᔅᒋᔄᔨᒋ, “ᓂᔾ ᐊᐅᒄ ᐊᓐ ᐸᒂᓯᑭᓐ ᒋᒋᒋᓯᑯᒡ ᑲ ᐅᒋ ᐱᔅᑎᓇᑭᓄᐅᑦ᙮” ᐊᑯ ᒂ ᐃᔅᒋᔄᒡ, “ᓇᒪᔭᐤ ᐊ ᐅ ᒋᓴᔅ, ᒍᓯᑉ ᐅᑯᓴ ? ᓂ ᒋᔅᒐᔨᒪᓇᓂ ᐅᑕᐎᔭ ᑭᔭ ᐅᑲᐎᔭ᙮ ᒐᒂᔪᐤ ᒪᒃ ᐛᒋ ᐃᔅᒋᔄᑦ ᒋᒋᒋᓯᑯᒡ ᐊ ᐅᒋᑦ ?”
ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᐊᑯᓐ ᐃᔅᐱᔅ ᐳᑯᓄᒧᐛᒄ᙮ ᓇᒪ ᓂᑭ ᒋ ᐸᒋ ᓇᑎᒄ ᐊᐛᓐ ᐊᑲ ᓄᑕᐎᔭ ᐃᑐᑕᑯᒐ ᒐᒋ ᐸᒋ ᓇᓯᑦ᙮ ᒪᔅᑕᔾ ᒋᓯᑲᒐ ᒥᓯᐛ ᐊᐛᓐ ᐊᒋ ᐸᒋ ᓇᓯᑦ ᓂᑭ ᐅᓂᔅᑲᓇᐤ᙮ ᒪᐅᔭ ᑲ ᐃᑎᓯᓇᐃᒐᒡ ᐊᓂᔭᐧᑲ ᐅᒋᔅᒋᐛᐃᒐᓱᒡ,
ᒋᓴᒪᓂᑐᐤ ᒋᑭ ᒋᔅᑯᑎᒧᐛᐤ ᒥᓯᐛ ᐊᐛᔪᐛ᙮
ᒥᓯᐛ ᒪᒃ ᐊᓐᒡ ᑲ ᐸᑐᐛᒡ ᑭᔭ ᑲ ᒋᔅᑯᑎᒪᑯᒡ ᓄᑕᐎᔭ ᓂᑭ ᐸᒋ ᓇᑎᑯᒡ᙮ ᓇᒪ ᐊᐛᓐ ᐅᒋ ᐛᐱᒪᐤ ᐅᑕᐎᒪᐛ ᒥᒄ ᐊᓂᔭᔪᐛ ᒋᓴᒪᓂᑐᐤ ᑲ ᐸᒋ ᐃᑎᓴᐛᑦ ᐊᐅᑯᓐ ᐊᓐ ᑲ ᐛᐱᒪᑦ ᐅᑕᐎᒪᐛ᙮ ᑯᐃᔅᒄ ᒋ ᐎᑎᒪᑎᓇᐛᐤ, ᐊᓐ ᐊᐛᓐ ᑲ ᐸᒋ ᑕᑈᔭᔨᒥᑦ ᐊᔭᐤ ᑲᒋᒡ ᐱᒪᑎᓯᐅᓂᔪᐤ᙮ ᓂᔾ ᐊᐅᒄ ᐸᒂᓯᑭᓐ ᑲ ᒥᔨᐛᑦ ᐱᒪᑎᓯᐅᓂᔪᐤ᙮ ᐊᓐᑕ ᐛᔅᑭᒡ ᒋ ᐛᐧᑯᒪᐊᑭᓄᐅᒡ ᒋ ᒧᐛᐅᒡ ᐊᓂᔭᔪᐛ ᐸᒂᓯᑭᓇ ᒪᓇ ᐊᒋ ᐃᓯᓂᐧᑲᑕᑭᓄᔨᒋ, ᒪᒂᒡ ᐊᓐᑕ ᐸᐧᑯᑎᔅᑭᒥᑲᒡ ᑲ ᑕᒡ᙮ ᐃᔭᐱᒡ ᒪᒃ ᒋ ᓂᐳᐅᒡ᙮ ᒥᒄ ᒪᒃ ᐊᓐ ᐊᐛᓐ ᒐ ᒧᐛᒂ ᐊᓂᔭ ᐸᒂᓯᑭᓇ ᐊᓐᑕ ᒋᒋᒋᓯᑯᒡ ᑲ ᐅᒋ ᐱᔅᑎᓇᑭᓄᔨᒋ, ᓇᒪ ᓂᑕ ᒋᑭ ᐅᒋ ᓂᐳᐤ᙮”

“ᓂᔾ ᒪᒃ ᐊᓐ ᐱᒪᒋᐃᐛᐤ ᐸᒂᓯᑭᓐ ᒋᒋᒋᓯᑯᒡ ᑲ ᐅᒋ ᐱᔅᑎᓇᑭᓄᐅᑦ᙮ ᐊᐛᓐ ᒪᒃ ᒐ ᒧᐛᒂ ᐅᔭ ᐸᒂᓯᑭᓇ ᑲᒋᒡ ᐱᒪᑎᓯᐅᓂᔪᐤ ᒋᑭ ᐊᔭᐤ᙮ ᐊᓐ ᒪᒃ ᐸᒂᓯᑭᓐ ᒐ ᒥᔨᐛᔭᓐ ᐊᐅᒄ ᐅ ᓂᔭᔅ ᐊᓐᑕ ᒐᒋ ᐅᒋ ᐊᔭᒡ ᐊᐛᓐᒋ ᐱᒪᑎᓯᐅᓂᔪᐤ᙮” ᐊᔪᐅᒄ ᐅᔭ ᒋᓴᔅ ᑲ ᐃᔅᒋᔄᑦ᙮
ᐊᑯ ᐊᓐᒡ ᒍᐤ ᐃᔪᒡ ᒋ ᒥᒋᐱᔪᒡ ᐊ ᐃᔅᒋᔄᒡ, “ᑕᓐᑕ ᒐᒋ ᐅᒋ ᒥᔨᐛᑦ ᐅ ᓇᐸᐤ ᐎᔭᔅ ᒐᒋ ᐅᒋ ᒥᒋᓇᓄᐎᒡ ?”
ᒋᓴᔅ ᒂ ᐃᑕᑦ, “ᑯᐃᔅᒄ ᒋᑦ ᐃᑎᓇᐛᐤ, ᓇᒪ ᒋᑭ ᒋ ᐊᔭᓇᐛᐤ ᑲᒋᒡ ᐱᒪᑎᓯᐅᓐ ᐊᑲ ᒥᒍᐛᒂ ᐃᔪᐤ ᐅᑯᓯᓴᓐ ᐎᔭᔅ ᑭᔭ ᐊᑲ ᒥᓂᐛᒂ ᐅᒥᐧᒄ᙮ ᐊᓐ ᒪᒃ ᐊᐛᓐ ᒐ ᒥᒋᒂ ᓂᔭᓯᔪᐤ ᑭᔭ ᒐ ᒥᓂᒂ ᓂᒥᐧᑯᔪᐤ ᐊᔭᐤ ᑲᒋᒡ ᐱᒪᑎᓯᐅᓂᔪᐤ, ᑭᔭ ᓂᔾ ᓂᑭ ᐅᓂᔅᑲᓇᐤ ᒪᔅᑕᔾ ᒋᓯᑲᔨᒐ᙮ ᐛᔅ ᓂᔭᔅ ᐊᐅᒄ ᒋᒋᐛ ᒥᒋᒻ ᑭᔭ ᓂᒥᐧᒄ ᒋᒋᐛ ᒥᓂᒂᐅᓄᐅᓐ᙮”

“ᐊᓐ ᒪᒃ ᐊᐛᓐ ᒐ ᒥᒋᒂ ᓂᔭᓯᔪᐤ ᑭᔭ ᒐ ᒥᓂᒂ ᓂᒥᐧᑯᔪᐤ, ᓂ ᐱᒋᔅᑲᒄ ᑭᔭ ᓂᔾ ᒪᒃ ᓂ ᐱᒋᔅᑯᐛᐤ᙮ ᓄᑕᐎᔾ ᐊᓐ ᑲ ᒥᔨᐛᑦ ᐱᒪᑎᓯᐅᓂᔪᐤ ᓂᒋ ᐸᒋ ᐃᑎᓴᐅᒄ ᑭᔭ ᓂ ᒥᔨᒄ ᐱᒪᑎᓯᐅᓂᔪᐤ᙮ ᐊᐅᑯᓐ ᒪᒃ ᒧᔭᒻ ᑭᔭ ᐎᔾ ᐊᓐ ᐊᐛᓐ ᑲ ᒥᒋᑦ ᓂᔭᓯᔪᐤ, ᓂᑭ ᒥᔭᐤ ᒐᒋ ᐱᒪᑎᓯᑦ᙮ ᐊᐅᒄ ᐅ ᐸᒂᓯᑭᓐ ᒋᒋᒋᓯᑯᒡ ᑲ ᐅᒋ ᐱᔅᑎᓇᑭᓄᐅᑦ᙮ ᐊᐛᓐ ᒪᒃ ᒐ ᒧᐛᒂ ᐅᔭ ᐸᒂᓯᑭᓇ ᑲᒋᒡ ᐱᒪᑎᓯᐤ᙮ ᓇᒪᔭᔪᐤ ᐊᓂᔭ ᐸᒂᓯᑭᓇ ᐊᓂᔅᒐ ᒋ ᐛᐧᑯᒪᐊᑭᓄᐅᒡ ᑲ ᒧᐛᒡ ᐊᓐᑕ ᐛᔅᑭᒡ, ᐊᑎ ᐊᒋ ᒧᐛᒡ ᐊᓂᔭ ᐸᒂᓯᑭᓇ ᐃᔭᐱᒡ ᒋ ᓂᐳᐅᒡ᙮”
ᐊᐅᒄ ᐅᔭ ᒐᒂᔪᐤ ᑲ ᐊᔨᒧᑕᐧᒃ ᒋᓴᔅ ᑲ ᒋᔅᑯᑎᒪᒐᑦ ᐊᓐᑕ ᒍᐤ ᐊᔭᒥᐊᐅᒋᐛᐱᒡ ᐊᓐᑕ ᑲᐳᕐᓇᐊᒻ ᐅᑕᓇᒡ ᑲ ᑕᑦ᙮

ᐃᔅᐱ ᒪᒃ ᑲ ᐸᑕᑯᑦ ᒥᒐᑦ ᐊᓂᔭ ᑲ ᓇᓴᐅᑯᑦ ᐊᓂᔭ ᐊ ᐃᔅᒋᔄᑦ, ᒋ ᐃᔅᒋᔄᔪᐛ, “ᑕᑈ ᐊᔨᒥᓂᔪᐤ ᐊᓂᔭ ᑲ ᐃᔅᒋᔄᑦ, ᐊᐛᓐ ᒐᒋ ᓂᔅᑐᑕᐧᒃ ?”
ᒋᓴᔅ ᒪᒃ ᒋ ᒋᔅᒐᔨᒪᐤ, ᐊᑎ ᐊᑲ ᐅᒋ ᐎᑎᒧᐛᑭᓄᐅᑦ, ᑕᓐ ᐊ ᐃᑎᑐᔨᒋ ᐊᑯ ᒂ ᐃᑕᑦ, “ᒋᐅᔅᑐᐛᔨᑎᒥᐃᑯᓇᐛᐤ ᐊ ᐅ ᑲ ᐃᔅᒋᔄᔭᓐ ? ᑕᓐ ᒪᒃ ᒐ ᐃᑕᔨᑎᒪᒄ ᐛᐱᒪᒂ ᐃᔪᐤ ᐅᑯᓯᓴᓐ ᐊ ᐅᐱᔨᑦ ᐊᓐᑕ ᐃᔅ ᑲᒋ ᑕᑦ ᐊᔅᒄ ᐊᑲ ᐅᒋ ᐸᒋ ᐃᑎᓴᐛᑭᓄᐅᑦ ᐅᑕ ᐊᔅᒋᒡ᙮ ᒥᒄ ᑲ ᐸᔭᒋᓯᑦ ᐊᒐᐧᒄ ᒥᔨᐛᐤ ᑲᒋᒡ ᐱᒪᑎᓯᐅᓂᔪᐤ, ᓇᒪ ᐎ ᓇᐸᐤ ᒋᑭ ᒋ ᐃᑐᑎᒻ ᐅᔭ᙮ ᔅᒋ ᐎᑎᒪᑎᓇᐛᐤ ᒪᒃ ᑕᓐᑕ ᒐᒋ ᐅᒋ ᐊᔭᔭᒄ ᐅ ᐊᒐᐧᒄ ᐱᒪᑎᓯᐅᓐ᙮ ᐱᔅᒐ ᒪᒃ ᐅᑕ ᐊ ᑎᓯᔭᒄ ᓇᒪ ᒋ ᑕᑈᔨᑕᓇᐛᐤ᙮” ᓴᔅ ᒋ ᒋᔅᒐᔨᑎᒻ ᒋᓴᔅ ᐊᐛᔪᐛ ᒐ ᐊᑲ ᐅᒋ ᑕᑈᑎᒥᔨᒋ ᑭᔭ ᒋ ᒋᔅᒐᔨᒪᐤ ᐊᓂᔭ ᐊᐛᔪᐛ ᒐ ᐎᔭᓯᐱᔅᑎᓂᑯᑦ᙮ ᐊᑯ ᒂ ᐃᔅᒋᔄᑦ, “ᐊᐅᒄ ᒪᒃ ᐛᒋ ᐃᑎᑎᑯᒡ ᓇᒪ ᐊᐛᓐ ᓂᑭ ᒋ ᐸᒋ ᓇᑎᒄ ᐸᑐᔅ ᐅᑕᐎᒪᐛ ᒥᔨᑯᒐ ᒐᒋ ᓇᓯᑦ᙮”
ᐃᔅᐱ ᒪᒃ ᑲ ᐃᔅᒋᔄᑦ ᐅᔭ ᒥᒐᑦ ᐊᓂᔭᔪᐛ ᑲ ᓇᓴᐅᑯᑦ ᒋ ᓂᑭᑎᑯᐤ ᑭᔭ ᓇᒪ ᐅᒋ ᐎ ᐎᒐᐅᑯᐤ᙮ ᐊᑯ ᒋᓴᔅ ᒂ ᑯᒂᒋᒪᑦ ᐊᓂᔭ ᓂᓱᓴᑉ ᐅᒋᔅᒋᓄᐊᒧᐛᑭᓇ ᐊ ᐃᑕᑦ, “ᑭᔭ ᐊ ᒋᔨᐛᐤ ᒋ ᐎ ᓂᑭᓯᓇᐛᐤ ?”
ᒂ ᐃᓯ ᐎᑎᒪᑯᑦ ᓴᐃᒥᓐ ᐱᑕᕋ ᐊ ᐃᑎᑯᑦ, “ᐅᑎᐸᔨᒋᒐᐤ, ᐊᐛᓐ ᒪᒃ ᒐ ᓂᑐᐛᐱᒥᒋᒡ ? ᒋᑦ ᐃᔨᒧᐅᓂᒡ ᐊᑯᑕ ᐛᒋ ᑎᒂᒡ ᑲᒋᒡ ᐱᒪᑎᓯᐅᓐ᙮ ᓂ ᑕᑈᑕᓇᓐ ᒪᒃ ᑭᔭ ᓂ ᒋᔅᒐᔨᑕᓇᓐ ᒋᔾ ᐊ ᐊᐎᔨᓐ ᑲ ᐸᔭᒋᓯᑦ, ᐊᓐ ᑲ ᐸᒋ ᐃᑎᓴᐅᑯᑦ ᒋᓴᒪᓂᑐᐛ᙮”
ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᓇᒪᐎᔾ ᐊ ᓂᔾ ᒋ ᐅᒋ ᐅᑎᓂᑎᓇᐛᐤ ᐊ ᓂᓱᓴᐳᔭᒄ ? ᐸᐃᒄ ᒪᒃ ᐊᓐᑕ ᐊ ᑎᓯᔭᒄ ᒥᒋᒥᓂᑐᐤ᙮” ᒍᑎᔅ, ᓴᐃᒥᓐ ᐃᔅᑲᕆᔭᑦ ᐅᑯᓯᔪᐛ ᐊᐅᑯᓂ ᐊᓂᔭ ᑲ ᐊᔨᒧᒪᑦ ᐛᔅ ᐊᐅᒄ ᐊᓐ ᐸᐃᒄ ᐊᓐᑕ ᐊ ᓂᓱᓴᐳᒡ ᒐ ᐎᔭᓯᐱᔅᑎᓇᑯᐱᓇ ᐊᓂᔭ ᒋᓴᓴ᙮

Koute ᒠᓐ 6