These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᐊᓐᑕ ᒪᐅᒡ ᓂᔅᑎᒻ, ᐊᔅᒄ ᐊᑲ ᐅᒋ ᑎᒂᒡ ᒐᒂᓐ ᓴᔅ ᒋ ᑕᐤ ᐃᔨᒧᐅᓐ᙮ ᒋ ᐎᒐᐛᐤ ᒋᓴᒪᓂᑐᐛ ᑭᔭ ᐎᔾ ᒋ ᐊᐤ ᒋᓴᒪᓂᑐᐤ ᐊᓐ ᐃᔨᒧᐅᓐ᙮ ᒧᔅ ᒋ ᑕᐤ ᒋᓴᒪᓂᑐᐤ ᐊᓐ ᒪᒃ ᐃᔨᒧᐅᓐ ᑲ ᐃᓯᓂᐧᑲᓱᑦ ᓴᔅ ᒋ ᑕᐤ ᑭᔭ ᒋ ᐎᒐᐛᐤ ᒋᓴᒪᓂᑐᐛ᙮
ᐃᔨᒧᐅᓂᒡ ᐊᑯᑕ ᒥᓯᐛ ᒐᒂᓐ ᑲ ᐅᒋ ᐅᓯᑕᑭᓄᐅᒡ᙮ ᓇᒪ ᒐᒂᓐ ᐅᒋ ᐅᓯᑕᑭᓄᐤ ᐊᑲ ᐎᔾ ᐅᒋ ᐅᓯᑕᑦ ᐃᔨᒧᐅᓐ᙮ ᐎᔾ ᐊ ᑕᑦ ᐅᒋᐱᔪᐤ ᐱᒪᑎᓯᐅᓂᔪᐤ, ᐱᒪᑎᓯᐅᓂᒡ ᒪᒃ ᐊᑯᑕ ᑲ ᐅᒋ ᐛᐸᑕᒡ ᐊᐛᓐᒋ ᐛᔅᑕᐅᓂᔪᐤ᙮ ᐊᓐ ᐛᔅᑕᐅᓐ ᒋᐧᑲᔭᔅᑕᐤ ᐊᓐᑕ ᐅᓂᑎᐱᔅᒋᓯᐅᓂᒡ, ᐅᓂᑎᐱᔅᒋᓯᐅᓐ ᒪᒃ ᓇᒪ ᒋ ᐊᔅᑐᐛᐊᒻ ᐊᓂᔭ ᐛᔅᑕᐅᓂᔪᐤ᙮

ᒋ ᑕᐤ ᓇᐸᐤ ᒋᓴᒪᓂᑐᐛ ᐊᒋ ᐸᒋ ᐃᑎᓴᐅᑯᑦ ᒠᓐ ᐊ ᐃᓯᓂᐧᑲᓱᑦ᙮ ᐅ ᒪᒃ ᒠᓐ ᒋ ᐸᒋ ᑎᑯᓯᓄᐤ ᒐᒋ ᑎᐸᑕᐧᒃ ᐛᔅᑕᐅᓂᔪᐤ ᑭᔭ ᒥᓯᐛ ᐊᐛᔪᐛ ᐸᑎᒥᔨᒐᓂ ᐅᔭ ᒥᔽᒋᒧᐅᓂᔪᐤ ᒐᒋ ᑕᑈᑎᒥᔨᒋ᙮
ᓇᒪᔭᐤ ᒪᒃ ᐎᔾ ᒠᓐ ᐅ ᐛᔅᑕᐅᓐ ᑲ ᐊᔨᒧᑕᒡ ᒥᒄ ᒪᒃ ᐎᔾ ᒋ ᐸᒋ ᐃᑎᓴᐛᑭᓄᐤ ᒐᒋ ᑎᐸᑕᐧᒃ ᐛᔅᑕᐅᓂᔪᐤ᙮ ᐅ ᐛᔅᑕᐅᓐ ᒋ ᐸᒋ ᑎᑯᓯᓄᐤ ᐅᑕ ᐊᔅᒋᒡ ᒥᓯᐛ ᐊᐛᔪᐛ ᒐᒋ ᐛᔅᑕᓂᒧᐛᑦ᙮
ᐅᑕ ᐊᔅᒋᒡ ᒋ ᑕᐤ ᐃᔨᒧᐅᓐ᙮ ᐊᑎ ᐎᔾ ᐊᒋ ᐅᓯᑕᑦ ᐅᔭ ᐊᔅᒋᔪᐤ ᐃᔭᐱᒡ ᓇᒪ ᐅᒋ ᒋᔅᒐᔨᒥᑯᐤ ᐊᐛᔪᐛ ᐃᔅᐱ ᑲ ᑎᑯᓯᐧᒃ᙮ ᑲ ᑎᑯᓯᐧᒃ ᐅᑕ ᐊᔅᒋᒡ ᐎᔾ ᑎᐱᔨᐛ ᐅᑦ ᐃᔨᒪ ᒋ ᐸᒋ ᓂᑐᐛᐱᒪᐤ, ᒥᒄ ᒪᒃ ᓇᒪ ᐅᒋ ᐊᐱᑕᔨᒥᑯᐤ᙮ ᐊᓂᔭ ᒪᒃ ᐊᐛᔪᐛ ᑲ ᐅᑎᓂᑯᑦ ᑭᔭ ᑲ ᑕᑈᔭᔨᒥᑯᑦ ᒋ ᒥᔭᐤ ᓱᐧᑲᑎᓯᐅᓂᔪᐤ ᒐᒋ ᐅᑦ ᐊᐛᓯᒥᑐᑕᑯᔨᒋ ᒋᓴᒪᓂᑐᐛ᙮ ᐊᓂᔭᔪᐛ ᒪᒃ ᑲ ᑕᑈᔭᔨᒥᑯᑦ ᐅᔅᒋ ᐱᒪᑎᓯᔪᐛ ᒋᓴᒪᓂᑐᐛ ᐊ ᑕᔨᒋ ᐅᒋ, ᓇᒪ ᐎ ᑭᔭ ᐃᔎᐛ ᑭᔭ ᓇᐸᐛ ᐊ ᑕᔨᒋ ᐅᒋ ᐱᒪᑎᓯᐅᒡ ᓇᒪ ᑭᔭ ᐃᔪᐤ ᐅᑦ ᐃᑕᔨᑎᒧᐅᓂᔨᒡ ᐅᒡ᙮ ᑕᑈ ᒋᓴᒪᓂᑐᐛ ᐊ ᑕᔨᒋ ᒋ ᐅᒋ ᐅᔅᒋ ᐱᒪᑎᓯᐅᒡ᙮
ᐊᓐ ᒪᒃ ᐃᔨᒧᐅᓐ ᐃᔪᐤ ᒋ ᐃᓯᓇᑯᐊᑭᓄᐤ᙮ ᐊᓐ ᑲ ᓴᑭᔅᒋᓇᔅᑲᑯᑦ ᒋᓴᐛᑎᓯᐅᓂᔪᐤ ᑭᔭ ᑕᑈᐅᓂᔪᐤ, ᔅᒋ ᐎᒋᒥᑯᓄᐤ ᐅᑕ ᐊᔅᒋᒡ᙮ ᔅᒋ ᐛᐱᒪᓄᐤ ᒪᒃ ᐊ ᒋᔅᑕᔨᑕᑯᓯᑦ ᒧᔭᒻ ᐊ ᐃᔅᐱᔅ ᒋᔅᑕᔨᑕᑯᓯᔨᒋ ᒋᓴᒪᓂᑐᐛ ᐊᓂᔭᔪᐛ ᐅᑕᐎᔭ ᐛᔅ ᐎᔾ ᒥᒄ ᐸᐃᑯᓱᐤ ᐊ ᐅᑯᓯᑐᑕᑯᑦ ᒋᓴᒪᓂᑐᐛ᙮
ᒠᓐ ᒋ ᐎᑎᒻ ᐊᐛᔪᐛ ᐊᓂᔭ ᒋᓴᓴ ᐊ ᐊᐎᔨᒋ᙮ ᐊᔪᐤ ᒪᒃ ᒋ ᐎᑎᒻ ᐊ ᐃᔅᒋᔄᑦ, “ᒋ ᒋᔅᒋᓯᓇᐛᐤ ᐊᓐ ᑲ ᐊᔨᒧᒥᒃ ᐊᐛᓐ ᑲ ᐃᔅᒋᔄᔭᓐ, ‘ᒋᑭ ᐸᒋ ᑎᑯᓯᓄᐤ ᐊᔅᒄ ᐊᐛᓐ ᐊᑐᐎᔅ ᐊ ᒋᔅᑕᔨᑕᑯᓯᑦ ᐃᔅᐱᔅ ᓂᔾ᙮ ᐊᐅᒄ ᐅ ᒋᓴᔅ ᑲ ᐊᔨᒧᒥᒃ ᐊᓐ ᑲ ᑕᑦ ᐊᔅᒄ ᐊᑲ ᐅᒋ ᐱᒪᑎᓯᔭᓐ ᓂᔾ᙮’ ”
ᐊᓂᔭ ᐊ ᓴᑭᔅᒋᓇᔅᑲᑯᑦ ᒋᓴᐛᑎᓯᐅᓂᔪᐤ ᒥᓯᐛ ᐊ ᑎᓯᔭᐧᒄ ᓇᔅᒡ ᑕᑈ ᒋ ᓱᐛᔨᒥᑯᓄᐤ, ᓇᒪ ᒪᒃ ᓂᑕ ᒋᑭ ᐅᒋ ᐳᓂᐱᔪᐤ ᐊ ᓱᐛᔨᒥᑕᐧᒄ᙮ ᒋᓴᒪᓂᑐᐤ ᒋ ᐊᐱᒋᐊᐤ ᐊᓂᔭᐧᑲ ᒧᓱᓴ ᒐᒋ ᐎᑎᒧᐛᔨᒋ ᐃᔪᐛ ᐅᐎᓱᐛᐅᓇ᙮ ᑭᔭ ᒋᓴᔅ ᙭ᑕ ᒋ ᐊᐱᒋᐊᐤ ᒐᒋ ᓄᑯᑕᔨᒋ ᐅᑕᑈᐅᓐ ᑭᔭ ᐅᒋᓴᐛᑎᓯᐅᓐ᙮ ᓇᒪ ᓂᑕ ᐊᐛᓐ ᐅᒋ ᐛᐱᒪᐤ ᒋᓴᒪᓂᑐᐛ, ᒥᒄ ᐊᓂᔭ ᑲ ᐸᐃᑯᓯᔨᒋ ᐅᑯᓴ ᑲ ᓴᒋᐊᑦ ᒋ ᐃᑐᑕᑯᐤ ᒐᒋ ᒋᔅᒐᔨᒪᑭᓄᐅᑦ᙮



ᒍᐤ ᑎᐸᔨᒋᒐᓱᐅᒡ ᒋ ᐃᑎᓴᐛᐅᒡ ᒍᐤ ᐊ ᐃᑎᔅᑲᓇᓯᔨᒋ ᐊᔭᒥᐊᐅᒋᒪᐛ ᑭᔭ ᐊ ᐊᔭᒥᐊᐛᑎᓯᔨᒋ ᓕᐸᐃ ᐃᔪᐛ ᒋᕈᓯᓕᒥᒡ ᐊ ᐅᒋᔨᒋ ᐊᓐᑕ ᒠᓇ ᐊ ᑕᔨᒋ ᒐᒋ ᓂᑐ ᒋᔅᒐᔨᒥᑯᑦ ᐎᔾ ᐊ ᔭᐅᒂ ᐊᓐ ᙭ ᒋᓴᒪᓂᑐᐤ ᑲ ᐸᒋ ᐃᑎᓴᐛᑦ ᒐᒋ ᐱᒪᒋᐊᔨᒋ ᐊᐛᔪᐛ᙮
ᒠᓐ ᒪᒃ ᑯᐃᔅᒄ ᒋ ᐎᑎᒧᐛᐤ ᐊ ᐃᑕᑦ, “ᓇᒪ, ᓇᒪᔭᐤ ᓂᔾ ᙭᙮”
ᐊᑯ ᑲ ᑯᒂᒋᒥᑯᑦ ᐊ ᐃᑎᑯᑦ, “ᐊᐛᓐ ᒪᒃ ᒋᔾ᙮ ᐃᓚᐃᒐ ᐊ ?” “ᓇᒪ᙮ ᓇᒪᔭᐤ ᓂᔾ ᐃᓚᐃᒐ,” ᒋ ᐃᑕᐤ ᒠᓐ᙮ “ᐊᐅᒄ ᐊ ᒋᔾ ᐊᓐ ᐅᒋᔅᒋᐛᐃᒐᓱᐤ ᓂᐸ ᐸᒋ ᐃᑎᓴᐊᒪᑯᐅᓇᓐ ?” ᒋ ᐃᑎᑯᐤ᙮ “ᓇᒪ,” ᒋ ᐃᑕᐤ ᒠᓐ᙮
ᐊᑯ ᒥᓐ ᒂ ᐃᑕᒡ, “ᐸᒋ ᐎᑎᒧᐅᓇᓐ ᒪ ᐊᐛᓐ ᒋᔾ, ᒐᒋ ᐎᑎᒧᐅᒋᒡ ᐊᓐᒡ ᑲ ᐸᒋ ᐃᑎᓴᐅᔨᒥᒡ ᐊ ᐎ ᒋᔅᒐᔨᒥᔅᒡ ᐊᐛᓐ ᐊ ᐊᐎᔨᓐ᙮”
ᐊᑯ ᒠᓐ ᒂ ᐃᔅᒋᔄᑦ, “ᐊᐅᒄ ᐊᓐ ᓂᔾ ᑲᒋ ᑎᐸᒋᒥᑦ ᐊᓂᔭᐧᑲ ᐅᒋᔅᒋᐛᐃᒐᓱᐤ ᐊᐃᓴᔭ᙮ ᒋ ᐃᔅᒋᔄᐤ,
ᒋᑭ ᑎᑯᓯᓄᐤ ᐊᐛᓐ ᐊᓐᑕ ᐸᐧᑯᑎᔅᑭᒥᑲᒡ ᐊ ᐅᑐᑕᑦ ᐊ ᐃᓯ ᑕᑈᑦ, ᐊᔭᔅᑯᐎᔅᑕᒺᐧᒄ ᐅᑎᐸᔨᒋᒐᐤ ᐅᒪᔅᑭᓇᒻ ᐊᓐᑕ ᒐ ᐱᒧᑕᑦ, ᑯᐃᔅᑯᒧᑕᐛᐧᒄ᙮”
ᐊᓐᒡ ᒪᒃ ᐸᕆᓯᐊ ᑲ ᐸᒋ ᐃᑎᓴᐅᑯᒡ ᒋ ᑯᒂᒋᒪᐅᒡ ᒠᓇ, “ᒐᒂᓐ ᒪᒃ ᐛᒋ ᓯᑲᐃᑕᒐᔨᓐ ᐊᑲ ᐊ ᐊᐎᓇ ᙭ ᑭᔭ ᒪᒃ ᐃᓚᐃᒐ ᑭᔭ ᒪᒃ ᐊᓐ ᐅᒋᔅᒋᐛᐃᒐᓱᐤ ?”
ᐊᑯ ᒠᓐ ᒂ ᐃᑕᑦ, “ᒋ ᓯᑲᐃᑕᑎᓇᐛᐤ ᓂᐱᒡ, ᒋ ᐎᒋᑲᐳᔅᑕᑯᐛᐤ ᒪᒃ ᐊᓐᑕ ᐊᐛᓐ ᐊᑲ ᒋᔅᒐᔨᒪᒄ᙮ ᐅ ᒪᒃ ᐊᔅᒄ ᒐ ᑎᑯᓯᐧᒃ ᐎᔾ ᐅᔅᑕ ᒋᔅᑕᔨᑕᑯᓱᐤ ᐃᔅᐱᔅ ᓂᔾ, ᓇᒪ ᐛᐛᒡ ᓂᑦ ᐃᔅᐱᑕᔨᑕᑯᓯᓐ ᒐᒋ ᐊᐱᐧᑯᓂᒧᒡ ᐅᒥᔅᒋᓇᔭᐱᔾ᙮”
ᐊᓐᑕ ᒪᒃ ᐸᑕᓂ ᑲ ᐃᓯᓂᐧᑲᑕᒡ ᐅᑕᓇᐤ, ᐊᑯᑕ ᐅ ᑲ ᐃᔅᐱᔨᒡ, ᐊᓐᑕ ᐃᑕᒐ ᐛᐱᓄᑕᒡ ᐊᓐ ᒠᕐᑕᓐ ᓯᐱᔾ ᐊᓐᑕ ᑲ ᓯᑲᐃᑕᒐᑦ ᒠᓐ᙮

ᒥᓐ ᒪᒃ ᐊᓂᔭ ᐎᔭᐱᓂᔨᒡ ᒠᓐ ᒋ ᐛᐱᒪᐤ ᒋᓴᓴ ᐊ ᐸᒋ ᓇᑎᑯᑦ, ᐊᑯ ᒂ ᐃᔅᒋᔄᑦ, “ᑭᓄᐛᐱᒪᐧᒄ ᒪ ᐅ ᓇᐸᐤ, ᐊᐅᒄ ᐅᔭ ᒋᓴᒪᓂᑐᐤ ᐅᒪᔭᑕᓂᓯᒪ ᑲ ᐸᒋ ᐃᑎᓴᐛᑦ ᒐᒋ ᐛᐸᔨᑎᒧᐛᑭᓄᔨᒋ ᐊᐛᔪᐛ ᐅᒥᒋᑥᐅᓂᔪᐛ᙮ ᐊᐅᒄ ᒪᒃ ᐅ ᑲ ᐊᔨᒧᑎᒪᑎᑯᒡ ᑲ ᐃᑎᑎᑯᒡ, ‘ᒋᑭ ᑎᑯᓯᓄᐤ ᓇᐸᐤ, ᐎᔾ ᒪᒃ ᐊᑐᐎᔅ ᒋᑭ ᒋᔅᑕᔨᑕᑯᓱᐤ ᐃᔅᐱᔅ ᓂᔾ ᐛᔅ ᐊᔅᒄ ᓇᒪ ᓂ ᐅᒋ ᐱᒪᑎᓯᐛᓐ ᓴᔅ ᒋ ᑕᐤ ᐎᔾ᙮’ ᓇᒪ ᓂ ᐅᒋ ᒋᔅᒐᔨᒪᐤ ᐊᐛᓐ ᐊᓐ, ᒥᒄ ᒪᒃ ᓂᒋ ᐸᒋ ᑎᑯᓯᓐ ᒐᒋ ᓯᑲᐃᑕᒐᔭᓐ ᓂᐱᒡ ᒐᒋ ᐅᒋ ᒋᔅᒐᔨᒥᑯᑦ ᒋᓴᔅ ᐃᔅᕋᐃᓪ ᐃᔪᐛ᙮”
ᒠᓐ ᒪᒃ ᒋ ᐎᑎᒻ ᑕᓐ ᑲ ᐃᓯ ᐛᐸᑕᐧᒃ ᐊ ᐃᔅᒋᔄᑦ, “ᓂᒋ ᐛᐱᒪᐤ ᑲ ᐸᔭᒋᓯᑦ ᐊᒐᐧᒄ ᒧᔭᒻ ᑲ ᐛᐱᓯᑦ ᐱᔭᓯᔅ ᒋ ᐃᓯᓇᑯᓱᐤ ᒋᒋᒋᓯᑯᒡ ᐊ ᐅᒋ ᐸᒋ ᔭᓯᔅᑕᑯᑦ, ᐊᑯ ᑲ ᑥᐅᑕᑯᑦ ᐊᓐᑕ ᐊ ᑕᑦ᙮ ᓇᒪ ᓂ ᐅᒋ ᒋᔅᒐᔨᒪᐤ, ᒥᒄ ᒪᒃ ᒋᓴᒪᓂᑐᐤ ᐊᓐ ᑲ ᐸᒋ ᐃᑎᓴᐅᑦ ᒐᒋ ᓯᑲᐃᑕᒐᐅᒡ ᓂᐱᒡ, ᓂᒋ ᐃᑎᒄ, ‘ᐊᓐ ᓇᐸᐤ ᒐ ᐛᐱᒥᑦ ᐊᒐᒂ ᐊ ᐸᒋ ᔭᓯᔅᑕᑯᑦ ᐊᓐᑕ ᒪᒃ ᐊ ᑕᑦ ᐊ ᑕᔨᒋ, ᐊᐅᒄ ᐊᓐ ᒐ ᓯᑲᐃᑕᒐᑦ ᑲ ᐸᔭᒋᓯᔨᒋ ᐊᒐᒂ᙮’ ᓂᒋ ᐛᐸᑕᓐ ᐅ ᑲ ᐃᔅᐱᔨᒡ ᑭᔭ ᒋ ᐎᑎᒪᑎᓇᐛᐤ ᐊᔪᑯᓂ ᐊᓂᔭ ᒋᓴᒪᓂᑐᐤ ᐅᑯᓴ,” ᒋ ᐃᑕᐤ ᒠᓐ᙮

ᒥᓐ ᒪᒃ ᐊᓂᔭ ᐊ ᒋᓯᑲᔨᒡ ᒥᓐ ᐊᓐᑕ ᒋ ᑕᐤ ᒠᓐ ᑭᔭ ᐊᓂᔭ ᓂᓱ ᐅᒋᔅᒋᓄᐊᒧᐛᑭᓇ᙮ ᐃᔅᐱ ᒪᒃ ᐎᔭᐱᒪᑦ ᒋᓴᓴ ᐊᓐᑕ ᐊ ᐱᒧᑕᔨᒋ, ᒋ ᐃᑕᐤ, “ᒪᐅᔭᔪᐛ ᒪᒃ ᒋᓴᒪᓂᑐᐤ ᐅᒪᔭᑕᓂᓯᒪ᙮”
ᐊᓂᔭᔪᐛ ᒪᒃ ᓂᓱ ᐅᒋᔅᒋᓄᐊᒧᐛᑭᓇ ᐱᔭᑕᑯᑦ ᐅᔭ ᐊ ᐃᔅᒋᔄᑦ, ᒋ ᐊᑎ ᐎᒐᐛᐅᒡ ᒋᓴᓴ᙮ ᒋᓴᔅ ᒪᒃ ᒋ ᒋᐱᒋᑲᐳᐤ, ᒂ ᐊᐱᓴᐱᑦ ᒂ ᐛᐱᒪᑦ ᐊᓂᔭ ᐊ ᓇᓴᐅᑯᑦ, ᐊᑯ ᒂ ᐃᑕᑦ, “ᒐᒂᓐ ᓂᔭᓂᑐᐛᐸᑎᒪᒄ ?” ᐊᑯ ᒂ ᐃᑕᒡ, “ᒋᔅᑯᑎᒪᒐᓱᐤ ᑕᓐᑕ ᐛᒋᔨᓐ ?”
ᒋ ᐃᑕᐤ ᒪᒃ, “ᐊᔅᑎᒧᒄ ᐸᒋ ᐛᐸᑎᒧᒄ᙮” ᐊᑯ ᒂ ᐎᒐᐛᒡ, ᒂ ᐛᐸᑎᒺᒡ ᑕᓐᑕ ᐛᒋᔨᒋ᙮ ᓴᓯᑲᓐ ᒪᒃ ᓇᐤ ᒋ ᐃᔅᐱᔨᒐ ᑲᒋ ᐊᐱᑕᒋᓯᑲᔨᒡ᙮ ᐊᑯᑕ ᒪᒃ ᑲ ᑕᐛᒡ ᐊᓐᑕ ᐊ ᑕᔨᒋ ᐃᔅᑭᓐ ᒋᓯᑲᐛ᙮
ᓴᐃᒥᓐ ᐱᑕᕐ ᒪᒃ ᐎᐧᑲᓂᓴ, ᐊᓐᑎᕈ ᑲ ᐃᓯᓂᐧᑲᓱᔨᒋ ᐊᐅᒄ ᐊᓐ ᐸᐃᒄ ᑲ ᐸᑐᐛᑦ ᒠᓇ ᐊᓂᔭ ᐊ ᐃᔅᒋᔄᔨᒋ ᑭᔭ ᐎᔾ ᒪᒃ ᒋ ᐊᑎ ᐎᒐᐛᐤ ᒋᓴᓴ᙮ ᑎᐛᒡ ᒪᒃ ᐊᓐᑎᕈ ᒋ ᓇᓂᑐᐛᔨᒪᐤ ᐊᓂᔭ ᐎᐧᑲᓂᓴ ᓴᐃᒥᓇ ᐊᑯ ᒂ ᐃᑕᑦ, “ᓂᒋ ᒥᔅᑯᐛᓇᓐ ᐊᓐ ᒪᓴᔭ᙮” ᒪᓴᔭ ᐊ ᐃᓇᓄᐅᒡ ᙭ ᐃᓇᓄᐤ ᐊ ᐱᔭᑭᔅᒋᑕᑯᓯᓇᓄᐅᒡ᙮ ᐊᑯ ᒂ ᐃᑐᑕᐊᑦ ᓴᐃᒥᓇ ᐊᓐᑕ ᒋᓴᓴ ᐊ ᑕᔨᒋ᙮ ᒋᓴᔅ ᒪᒃ ᒋ ᑭᓄᐛᐱᒪᐤ ᐊᓂᔭ ᓴᐃᒥᓇ ᐊᑯ ᒂ ᐃᑕᑦ, “ᒋᔾ ᓴᐃᒥᓐ, ᒠᓐ ᐅᑯᓴ, ᓯᐸᔅ ᒋᑭ ᐃᓯᓂᐧᑲᓱᓐ᙮” ᓯᐸᔅ ᐊ ᐱᔭᑭᔅᒋᑕᑯᓯᓇᓄᐅᒡ ᐱᑕᕐ ᒪᒃ ᐊᓯᓂᔾ ᐃᓇᓄᐤ᙮


ᒥᓐ ᐊᓂᔭ ᐊ ᐊᑎ ᒋᓯᑲᔨᒡ ᒋᓴᔅ ᒋ ᐃᑕᔨᑎᒻ ᑲᓕᓕ ᐊᔅᒋᒡ ᒐᒋ ᐃᑐᑕᑦ᙮ ᐊᑯᑕ ᐊᓐᑕ ᑲ ᒥᔅᑯᐛᑦ ᐱᓕᐸ ᐊᑯ ᐊᑕᑦ, “ᐸᒋ ᐎᒐᐎ᙮”
ᐱᓕᑉ ᒪᒃ ᐊᓐᑕ ᐸᑦᓴᐃᑕᒡ ᒋ ᐅᒋᐤ ᐊᓐᑕ ᐊᓂᔭ ᐅᑕᓇᔪᐤ ᐊᓐᑎᕈ ᑭᔭ ᐱᑕᕐ ᑲ ᐅᒋᒡ᙮ ᐱᓕᑉ ᒪᒃ ᒋ ᓇᓂᑐᐛᐱᒪᐤ ᓇᑕᓂᔭᓚ ᐊᑯ ᒂ ᐃᑕᑦ ᐃᔅᐱ ᑲ ᒥᔅᑯᐛᑦ, “ᓂᒋ ᒥᔅᑯᐛᓇᓐ ᐊᓂᔭ ᒧᓱᔅ ᑲ ᐊᔨᒧᒪᑦ ᐊᓐᑕ ᐎᓱᐛᐅᓂᒡ, ᑭᔭ ᐊᓐᒡ ᐅᒋᔅᒋᐛᐃᒐᓱᒡ ᑲ ᐊᔨᒧᒪᒡ᙮ ᐊᐅᒄ ᒋᓴᔅ, ᒍᓯᑉ ᐅᑯᓴ, ᐊᓐᑕ ᓇᓴᕆᑎᒡ ᑲ ᐅᒋᑦ᙮”
ᐊᑯ ᓇᑕᓂᔭᓪ ᒂ ᐃᑕᑦ, “ᒋᑭ ᒋ ᐅᒋᐤ ᐊ ᐊᐛᓐ ᐊ ᒋᔅᑕᔨᑕᑯᓯᑦ ᐊᓐᑕ ᓇᓴᕆᑎᒡ ?” ᐊᑯ ᐱᓕᑉ ᒂ ᐃᑕᑦ, “ᐊᔅᑎᒻ, ᐸᒋ ᓂᑐᐛᐱᒻ᙮”
ᐃᔅᐱ ᒪᒃ ᒋᓴᔅ ᐎᔭᐱᒪᑦ ᓇᑕᓂᔭᓚ ᐊ ᐸᑕᔅᑎᒧᑕᔨᒋ ᒋ ᐃᑕᐤ, “ᐊᐅᒄ ᒋᒋᐛ ᐃᔅᕋᐃᓪ ᐃᔪᐤ, ᓇᔅᒡ ᑕᑈ ᑯᐃᔅᑯᑕᑎᓯᐤ᙮”
ᓇᑕᓂᔭᓪ ᒪᒃ ᒋ ᐃᑕᐤ, “ᑕᓐᑕ ᑲ ᐅᒋ ᒋᔅᒐᔨᒥᔨᓐ ?” ᐊᑯ ᒋᓴᔅ ᒂ ᐃᓯ ᐎᑎᒧᐛᑦ, “ᔅᒋ ᐛᐱᒥᑎᓐ ᐊ ᐊᐱᔨᓐ ᓯᐸ ᒥᓯᓱᒥᓇᑎᑯᒡ ᐊᔅᒄ ᐊᑲ ᐅᒋ ᓂᑐᐛᐱᒥᔅᒃ ᐱᓕᑉ᙮”
ᓇᑕᓂᔭᓪ ᒂ ᐃᑕᑦ, “ᒋᔅᑯᑎᒪᒐᓱᐤ, ᐊᐅᒄ ᒋᔾ ᑕᑈ ᒋᓴᒪᓂᑐᐤ ᐅᑯᓴ, ᐊᐅᒄ ᒋᔾ ᒋᓴᐅᒋᒪᐤ ᐅᑕ ᐃᔅᕋᐃᓕᒡ᙮”
ᐊᑯ ᒋᓴᔅ ᒂ ᐃᑕᑦ, “ᒋ ᑕᑈᑕᓐ ᐊ, ᐊᓐ ᒥᒄ ᐊᒋ ᐎᑎᒪᑕᓐ ᐊᒋ ᐛᐱᒥᑕᓐ ᓯᐸ ᒥᓯᓱᒥᓇᑎᑯᒡ ? ᐊᑐᐎᔅ ᒪᒃ ᐊᔅᒄ ᒋᑭ ᐛᐸᑕᓐ ᒪᒥᔅᑲᒡ ᒐᒂᔪᐛ !” ᐊᑯ ᒥᓐ ᒂ ᐊᑎ ᐃᔅᒋᔄᑦ, “ᑯᐃᔅᒄ ᒋ ᐎᑎᒪᑎᓇᐛᐤ, ᒋᑭ ᐛᐸᑕᓇᐛᐤ ᒋᒋᒋᓯᒄ ᐊ ᔪᑕᐱᔨᒡ, ᑭᔭ ᒋᓴᒪᓂᑐᐤ ᐅᑦ ᐊᓐᒋᓂᒪ ᐊ ᐅᐱᔨᒋ ᑭᔭ ᐊ ᐸᒋ ᔭᓯᑐᑐᐛᒡ ᐃᔪᐤ ᐅᑯᓯᓴᓇ᙮”

Koute ᒠᓐ 1