Central Mnong - 2016 Edition (Non-Drama - NT)

Central Mnong - 2016 Edition (Drama - NT)

គែស​ទូ​ហ្វេ​ផូង​ ផារីឆី  ​រាញា​ នីកោដេម  ជេង​កោរាញ​ផូង​ អីឆ្រាអែល  ។ ពាង់​ហាន់​ម៝ប់​ ឞ្រាស​យេឆូ  ​ទឹង​មាង់ ពាង់​លាស៖ “ហើយ​នើម​នតី ហេន​លែៈ​គឹត​មៃ​នើម​នតី​តាៈ​ឞើស​កោរាញ​ឞ្រាស​ងាន់​រ៝ យ៝រ​លាស​លាស​មោ​គែស​កោរាញ​ឞ្រាស​គុ​នទ្រែល មោ​គែស​អោស​ឞូនុយ្ស​ទើយ​ជាន​នាវ​ខ្លៃ​កើត​មៃ​ជាន​នើស”។ ឞ្រាស​យេឆូ  ​អើស៖ “គ៝ប់​លាស​នហេល​នានេៈ​ងាន់​មា​មៃ ឞូ​ម៝ស​មោ​ទែស​មហែ ពាង់​អី​នៃ​មោ​ទើយ​អោស​លាប់​ឆៃ​តា​នាវ​កោរាញ​ឞ្រាស​ម៝ត់​អ្វាញ់”។ នីកោដេម  ​អោប​ពាង់៖ “លាស​ឞូនុយ្ស​លែៈ​រាញ មើម​ហោម​ឞ្លាវ​ទែស​តៃ? មើម​ហោម​ឞ្លាវ​គុ​តា​ត្រោម​នទុល​មែ​ឞារ​តឹ ជេសរី​ទែស​តៃ?” ឞ្រាស​យេឆូ  ​លាស៖ “គ៝ប់​លាស​នហេល​នានេៈ​ងាន់​មា​មៃ ឞូ​ម៝ស​មោ​ទែស​មា​ទាក នអ៝ប់​មា​នាវ​ទើយ​ឞ្រាស​ហ្វេង​អ្វែស មោ​ទើយ​អោស​លាប់​តា​នាវ​កោរាញ​ឞ្រាស​ម៝ត់​អ្វាញ់។ ឞូ​ម៝ស​ទែស​មពែស​មា​ឆាក់​ជាន់​ទើម ជេង​ឆាក់​ជាន់​ទើម ឞូ​ម៝ស​ទែស​មា​នាវ​ទើយ​ឞ្រាស​ហ្វេង​អ្វែស គែស​នាវ​រេស​មហែ​ជេង​ក៝ន​កោរាញ​ឞ្រាស​នើម។ លើយ​អោស​នទ្រ៝ត់​ហីស​រាហ៝ល់​នាវ​គ៝ប់​លាស​មា​មៃ៖ «អ្យាត់​មា​ខាន់​អៃ​មៃ​ទែស​មហែ»​នៃ។ នតឹត​លាស​ឆ្យាល​ខោម​ជឹត​លែត​មពែស មៃ​តាង់​នតែស​ទើម យើន​មា​មៃ​មោ​គឹត​ឞើស​តាៈ​លោស​ឆ្យាល ជឹត​លែត​ហាន់​ឆ្យាល។ នាវ​ឞូនុយ្ស​ទែស​មហែ​មា​ឞ្រាស​ហ្វេង​អ្វែស​ជេង​តឹម​ឞាន​កើត​នៃ​ដ៝ង់”។
នីកោដេម  ​អោប​ ឞ្រាស​យេឆូ  ៖ “មើម​ជាន​ទឹង​គែស​នាវ​អី​នៃ?” ឞ្រាស​យេឆូ  ​លាស​មា​ពាង់៖ “មៃ​ជេង​នើម​នតី​មា​ផូង​ អីឆ្រាអែល  មើម​ទឹង​មៃ​មោ​គឹត​វ៝ត់​នាវ​អី​នៃ? គ៝ប់​លាស​នហេល​នានេៈ​ងាន់​មា​មៃ ហេន​មឞើស​ងក៝ច​នទើ​ហេន​លែៈ​គឹត​លែៈ​ឆៃ យើន​មា​ខាន់​អៃ​មៃ​មោ​អោស​អុច​អ្យាត់​មា​នាវ​ខ្លៃ​ហេន​មឞើស​ងក៝ច។ លាស​គ៝ប់​មឞើស​ងក៝ច​នាវ​តា​នែស​នតូ​អ្យា លែៈ​ខាន់​អៃ​មៃ​មោ​អ្យាត់​កើត​នៃ។ លាស​នទ្រី​លាស​គ៝ប់​មឞើស​ងក៝ច​នាវ​កាលើ​ត្រោក​អី​នតុក​កោរាញ​ឞ្រាស​នើម​រាវ​រ៝ត់​លាស​ខាន់​អៃ​មៃ​អ្យាត់! មោ​គែស​អោស​ឞូនុយ្ស​លែៈ​គែស​ហាវ​តា​កាលើ​ត្រោក ជេសរី​ព្លឹ​ជុរ​តៃ​តា​នែស​នតូ​អ្យា ទូ​ហ្វេ​មោ​អើម គែស​ទូ​ហ្វេ​គ៝ប់​អី​ក៝ន​ឞូនុយ្ស​តាៈ​ឞើស​កោរាញ​ឞ្រាស​ទើម​អី​លែៈ​ជុរ​ឞើស​កាលើ​ត្រោក​រី។ រានោក​កាល់​អែ​តា​ឞ្រី​រាទាស​ជេង​រានោក​ផូង​ អីឆ្រាអែល  ​លោស​ឞើស​ឞ្រី​ អេឆីប ​នើស មោឆេ  ​ឆ៝ៈ​រូប​ឞេស​ជាន​មា​កោង​យោង​តា​ម៝ង់ គៃ​មា​ឞូ​ម៝ស​អី​គែស​ឞេស​ចោក​អ្វាញ់​ជឹត​រូប​ឞេស​អី​នៃ​មោ​អោស​ខឹត។ កើត​នទ្រី​ដ៝ង់​អ្យាត់​មា​គ៝ប់​អី​ក៝ន​ឞូនុយ្ស​តាៈ​ឞើស​កោរាញ​ឞ្រាស​ឞូ​យោង​កើត​អី​នៃ​ដ៝ង់‌ គៃ​មា​ឞូ​ម៝ស​ញឆីង​មា​គ៝ប់ គែស​នាវ​រេស​នហ៝​រ៝។ យ៝រ​លាស​កោរាញ​ឞ្រាស​រ៝ង់​ហោ​ងាន់​មា​ទឹង​លែៈ​ឞូនុយ្ស ត៝ត់​ពាង់​ជាវ​ក៝ន​ង្វាយ​អឹ​ពាង់​នើម​អ៝ន់​ឞូ​ងខឹត គៃ​មា​ឞូ​ម៝ស​ញឆីង​មា​ក៝ន​អី​នៃ​មោ​គែស​អោស​តេៈ​ទោយ្ស គែស​នាវ​រេស​នហ៝​រ៝​ងាន់។ កោរាញ​ឞ្រាស​ដាៈ​ក៝ន​ពាង់​ជុរ​តា​នែស​នតូ​អ្យា មោ​អោស​គៃ​មា​តេៈ​ទោយ្ស​ឞូនុយ្ស​តា​នែស​នតូ​អ្យា យើន​មា​គៃ​មា​រាក្លាយ្ស​ឞូនុយ្ស​យ៝រ​មា​ក៝ន​ពាង់​អី​នៃ។ ឞូ​ម៝ស​ញឆីង​មា​ក៝ន​អី​នៃ មោ​គែស​អោស​តេៈ​ទោយ្ស។ យើន​មា​ឞូ​ម៝ស​មោ​ញឆីង​លែៈ​គែស​តេៈ​ទោយ្ស យ៝រ​លាស​ពាង់​មោ​ញឆីង​មា​ក៝ន​ង្វាយ​អឹ​កោរាញ​ឞ្រាស​នើម។ នាវ​អាង​តាៈ​ឞើស​កាលើ​ត្រោក​លែៈ​ត៝ត់​ជេស​តា​នែស​នតូ​អ្យា។ នាវ​តេៈ​ទោយ្ស​កើត​នអៃ តាៈ​ឞើស​ឞូនុយ្ស​អុច​ដេៈ​នាវ​ង៝ ដាស​នាវ​អាង​អី​នៃ យ៝រ​លាស​ទឹង​លែៈ​នទើ​ខាន់​ពាង់​ជាន​នើស​អ្យើស​ងាន់។ ឞូ​ម៝ស​ជាន​អ្យើស ពាង់​ឞ្យាញ់​ងាន់​ដាស​នាវ​អាង ពាង់​មោ​អុច​អោស​ហាន់​តា​នាវ​អាង យ៝រ​លាស​ពាង់​ក្លាច​ឞូ​ឆៃ​នាវ​អ្យើស​ពាង់​ជាន។ យើន​មា​ឞូ​ម៝ស​ជាន​ឆ៝ង់ ពាង់​អុច​ហាន់​តា​នាវ​អាង គៃ​មា​អ៝ន់​ឞូ​ឆៃ ទឹង​លែៈ​នទើ​ពាង់​ជាន​នើស​ជេង​ទី​កើត​នាវ​កោរាញ​ឞ្រាស​អុច​ងាន់”។

ជេស​នៃ​ ឞ្រាស​យេឆូ  ​ហាន់​នទ្រែល​មពោល​អ៝ស​ម៝ន​ពាង់​តា​ឞ្រី​ យូដា  ពាង់​គុ​តា​នៃ​នទ្រែល​មពោល​អ៝ស​ម៝ន​ពាង់ នអ៝ប់​មា​ជាន​បាប់តែម​យុក​មា​ទាក​អ៝ន់​ឞូ​ដ៝ង់។ នោក​នៃ​ យោហាន-​បាប់តែម  ​គុ​ជាន​បាប់តែម​យុក​មា​ទាក​តា​ប៝ន​ អេនោន  ទាច់​កេង​ប៝ន​ ឆាលិម  យ៝រ​លាស​តា​នតុក​នៃ​គែស​អ៝ក់​ទាក​មា​ជាន​បាប់តែម។ ជេសរី​ឞូ​វាច់​អាប់​នារ​ដាៈ​ពាង់​ជាន​បាប់តែម​យុក​មា​ទាក។ នោក​នៃ​ យោហាន-​បាប់តែម  ​អេ​ហ៝ៈ​អោស​ឞូ​ក្រុង។ គែស​អ៝ស​ម៝ន​ យោហាន-​បាប់តែម  ​អាបាៈ​តឹម​រាលាច់​ដាស​ទូ​ហ្វេ​ផូង​ អីឆ្រាអែល  ​មា​នាវ​រាវ​អ៝ន់​ក្ល៝ស​តឹង​នាវ​វៃ​ផូង​ អីឆ្រាអែល  ។ ជេសរី​ខាន់​ពាង់​ហាន់​ម៝ប់​ យោហាន-​បាប់តែម  មឞើស​មា​ពាង់៖ “ហើយ​នើម​នតី ឞូ​ក្លោ​អី​គុ​នទ្រែល​មៃ​កាល់​តី​ទាក​រាលាយ​ យោរដាន់  ​នើស ឞូនុយ្ស​អី​មៃ​ងក៝ច​ជេង​ឞ្រាស​ក្រីស​នើស អាបៃ​អ្យា​ពាង់​គុ​ជាន​បាប់តែម​យុក​មា​ទាក​អ៝ន់​ឞូ​ដ៝ង់ ជេសរី​ទឹង​លែៈ​ឞូនុយ្ស​វាច់​រាន​តា​ពាង់​នៃ​ទាទេ មោ​ហោម​អោស​ហាន់​តា​ឞ៝ន់”។ យោហាន-​បាប់តែម  ​លាស​មា​ខាន់​ពាង់៖ “នាវ​ឞូនុយ្ស​ជាន​ក្វ៝ង់​មោ​ក្វ៝ង់ កោរាញ​ឞ្រាស​នើម​អ៝ន់ មោ​គែស​អោស​ឞូនុយ្ស​ទើយ​ជាន​អេង។ ខាន់​អៃ​មៃ​លែៈ​គឹត​ជេស គ៝ប់​លែៈ​មឞើស​ងក៝ច​មា​ខាន់​អៃ​មៃ គ៝ប់​មោ​អោស​ទី​ ឞ្រាស​ក្រីស  គ៝ប់​ជេង​ទូ​ហ្វេ​ឞូនុយ្ស​កោរាញ​ឞ្រាស​ទែ​ញជ្វាល់​ហាន់​ល៝រ​ពាង់​ទើម។ នតឹត​លាស​នោក​ឞូ​តឹម​នអាប់ ឞូ​ម៝ស​ឞូ​អូរ​គុ​ដាស​ពាង់ ពាង់​អី​នៃ​ជេង​ឆាយ​ឞូ​អូរ​អី​នៃ ល៝ង់​អី​មឹត​ជាង់​គុ​ទាច់​កេង​ពាង់​នៃ​រាម់​មអាក​ងាន់ យ៝រ​មា​តាង់​នាវ​ពាង់​ងើយ។ លាស​នទ្រី​គ៝ប់​រាម់​មអាក​ងាន់ តឹម​ឞាន​មា​មឹត​ជាង់​អី​នៃ​ដ៝ង់។ នាវ​ យេឆូ  ​លើ​មា​ហាវ​ក្វ៝ង់ ជេស​រី​គ៝ប់​លើ​មា​ជុរ​ជេៈ​តាៈ​ឞើស​កោរាញ​ឞ្រាស”។
“ពាង់​អី​ជុរ​តាៈ​ឞើស​កាលើ​ត្រោក​អី​នតុក​កោរាញ​ឞ្រាស​នើម ពាង់​ក្វ៝ង់​រាលាវ​ឞូ​ងាន់។ ឞូ​ម៝ស​អី​តាៈ​ឞើស​នែស​នតូ​អ្យា ពាង់​គឹត​វ៝ត់​នទើ​តា​នែស​នតូ​ទើម ពាង់​មឞើស​ងើយ​មា​នាវ​នែស​នតូ​អ្យា​ទើម។ យើន​មា​ពាង់​អី​ជុរ​តាៈ​ឞើស​កាលើ​ត្រោក ពាង់​អី​នៃ​ក្វ៝ង់​រាលាវ​ឞូ​ងាន់។ ពាង់​មឞើស​ងក៝ច​នាវ​ខ្លៃ ម៝ស​នទើ​ពាង់​លែៈ​ឆៃ​លែៈ​តាង់​តា​កាលើ​ត្រោក តីស​មា​មោ​គែស​អោស​ឞូនុយ្ស​អ្យាត់​នាវ​ពាង់​មឞើស​ងក៝ច។ យើន​មា​ឞូ​ម៝ស​អី​អ្យាត់​នាវ​ពាង់​មឞើស​ងក៝ច ឞូនុយ្ស​អី​នៃ​ជេង​តើម​មឞើស​ងក៝ច​មា​ឞូ​នាវ​ងើយ​កោរាញ​ឞ្រាស​ជេង​នាវ​ងាន់។ ឞ្រាស​ក្រីស  កោរាញ​ឞ្រាស​លែៈ​ញជ្វាល់​អ៝ន់​វាច់ ពាង់​មឞើស​ងក៝ច​នាវ​ងើយ​កោរាញ​ឞ្រាស យ៝រ​លាស​កោរាញ​ឞ្រាស​លែៈ​អ៝ន់​ឞ្រាស​ហ្វេង​អ្វែស​គុ​លែៈ​តា​ពាង់។ កោរាញ​ឞ្រាស​អី​ឞឹ​ឞ៝ន់​រ៝ង់​ហោ​ងាន់​មា​ ឞ្រាស​ក្រីស  ​អី​ក៝ន​ពាង់​នើម ជេសរី​ទឹង​លែៈ​នតីល​នទើ​ពាង់​លែៈ​អ៝ន់​អី​ក៝ន​ពាង់​នៃ​ម៝ត់​អ្វាញ់​ទាទេ។ ឞូ​ម៝ស​ញឆីង​មា​ក៝ន​អី​នៃ ពាង់​គែស​នាវ​រេស​នហ៝​រ៝ ឞូ​ម៝ស​មោ​អោស​ញឆីង​មា​ក៝ន​អី​នៃ ពាង់​មោ​គែស​អោស​នាវ​រេស​នហ៝​រ៝ នហ៝​មា​កោរាញ​ឞ្រាស​ហោម​តេៈ​ទោយ្ស​តា​ពាង់​ងាន់​រ៝”។

Koute យោហាន 3