ᒦ ᐅᐌ ᑫᔑᓂᓯᑐᑕᒪᓐ ᒞᓐ ᐅᒥᓍᒋᒧᐎᓐ
ᒞᓐ ᓴ ᐃᔑᐲᐃᑫ ᐅᒪᓯᓇᐃᑲᓂᕽ ᐁᐐᑕᒫᑫᒡ ᒋᓴᓲᓐ ᐁᑎᓄᐎᓂᒡ ᑭᔐᒪᓂᑑᓐ ᐅᑎᑭᑐᐎᓂᓂ, ᐃᓂᓃᕽ ᑲᔦ ᐁᑮᐃᔑᐊᔮᓂᒡ ᒣᒀ ᐅᐅᒫ ᐊᑮᕽ ᑮᐱᒫᑎᓯᓂᒡ᙮ ᑎᐹᒋᒧ ᑲᔦ ᑭᔐᒪᓂᑑᓐ ᐁᑮᐅᓈᐸᒥᑯᓂᒡ ᒋᐱᒫᒋᐃᐌᓂᒡ, ᐁᐅᑯᓯᓯᒥᑯᓂᒡ ᐃᑕᔥ ᑲᔦ᙮ ᐊᐎᔭᓐ ᑕᔥ ᐃᑯ ᑫᑌᐺᔦᓂᒫᓂᒡ ᒋᐱᒫᒋᐃᒥᓐᒡ᙮
ᒦᓴ ᒋᓴᔅ ᐁᔑᒫᒌᑕᔑᑌᓂᑭᓐ ᑳᑮᐃᔑ ᒫᒪᑳᒋᒋᑫᒡ ᒋᐅᒋ ᑭᑫᑖᑯᓯᒡ ᐁᐋᐎᒡ ᐅᐱᒫᒋᐃᐌ᙮ ᒦᑕᔥ ᐌᐌᓂ ᑳᐃᔑᑲᑲᓅᓈᒡ ᐊᐎᔭᐞ ᐁᑮᐙᐐᑕᒪᐙᒡ ᐋᓃᓐ ᐁᓍᑌᓂᑭᓐ ᐃᓂ ᐅᒫᒪᑳᒋᒋᑫᐎᓇᓐ᙮ ᓃᐱᐗᐞ ᐃᑕᔥ ᐊᐎᔭᐞ ᐅᑮᑌᐺᔦᓂᒥᑰᐞ ᐁᑮᐱᒥᓂᔕᐅᑯᒡ᙮ ᔖᑰᒡ ᐃᑕᔥ ᑮᐹᑏᓄᐗᐞ ᐯᒫᑎᓯᓂᒡ ᑳᑮᑌᐺᑕᓯᓂᒃ, ᑕᑯ ᑕᔥ ᑳᑮᐋᓇᐌᓂᒥᑯᒡ᙮
ᒦᑕᔥ ᐃᐃᒫ ᑭᒋᐅᔑᐲᐃᑲᓂᕽ 13–17 ᐁᔑᐅᔑᐲᐃᑳᑌᓂᒃ ᐋᓃᓐ ᒋᓴᔅ ᑳᐃᔑ ᑲᑲᓅᓈᒡ ᐅᑭᑭᓄᐊᒪᐙᑲᓇᐞ ᐃᔥᒀᒡ ᑮᓂ ᐗᐐᒌᐙᒡ᙮ ᐅᑮᐊᑕᐌᓂᒫᐞ ᒋᑭᑫᑕᒥᓂᒡ ᐁᐐᓂᓯᓐᒡ, ᐃᐃ ᑕᔥ ᐁᐐᐃᔑᓇᑲᓈᒡ᙮ ᒦᔥ ᑳᑮᐃᓈᒡ ᐁᐐᐲᒋᓂᔕᐊᒪᐙᒡ ᐊᒑᑾᓐ ᑫᐐᒋᐃᑯᓂᒡ᙮ ᐅᐐᑕᒪᐙᐞ ᓂᑯᑎᕽ ᒦᓇᐙ ᑮᔑᑲᓂᓂᒃ ᐁᐐᐱᓈᓯᑲᐙᒡ, ᒦ ᐃ ᒋᐅᒋ ᒪᔥᑲᐌᑕᒥᓂᒡ᙮ ᒦᑕᔥ ᐃᐃ ᑳᑮᐊᓇᒥᐁᑕᐙᒡ᙮
ᐌᑎ ᑕᔥ ᐃᔥᒀᒡ ᐊᓂ ᐃᔑᑎᐹᒋᒫ ᐊᐊ ᒋᓴᔅ ᑮᑳᒋᑎᓂᓐᒡ, ᑮᑎᐹᑯᓂᓐᒡ, ᑮ ᐊᑯᓴᑲᐃᑲᓂᐎᒡ ᐃᑕᔥ ᑲᔦ᙮ ᒦᑕᔥ ᑳᑮ ᑮᐌᐱᒫᑎᓯᒡ, ᐁᑮᐙᐸᒥᑯᒡ ᐅᑭᑭᓄᐊᒫᐙᑲᓇᐞ᙮
ᒦᓴ ᑳᐅᒋ ᐃᔑᐲᐃᑳᑌᒃ ᐅᐅ ᒪᓯᓇᐃᑲᓐ, ᐊᐎᔭ ᐱᑯ ᑌᐺᔦᓂᒫᒡ ᒋᓴᓲᓐ ᒋᐱᒫᒋᐃᑰᐎᓯᒡ᙮
ᐯᔑᑾᔦᒃ ᐃᔑᒫᒪᑳᑌᑖᑾᓐ ᐅᐅ ᒥᓍᒋᒧᐎᓐ, ᒋᓴᔅ ᐁᑮᐋᐌᒋᑳᑫᒡ ᓂᐱ, ᐸᑴᔑᑲᓇᓐ, ᐙᓭᔮ, ᒫᓇᒑᓂᔕᐞ, ᔔᒥᓈᑎᒃ, ᑯᑕᒃ ᐃᑕᔥ ᐸᑳᓐ ᑫᑰᓇᓐ ᐁᑮᐋᐸᒋᑑᒡ ᑫᐅᒋᓂᓯᑐᒋᑳᑌᓂᑭᓐ ᑳᐊᒑᑴᑖᑾᓂᓂᑭᓐ᙮
ᒞᓐ ᐄᑐᒃ ᐯᔑᒃ ᒋᓴᔅ ᐅᑭᑭᓄᐊᒫᐙᑲᓇᓐ ᑮᑎᓄᐎ᙮ ᐋᐱᒋ ᐯᔓ ᐅᑮᐐᒌᐙᓐ ᒋᓴᓲᓐ᙮ ᑮᐃᔑᐲᐃᑫ ᓴᑯ ᑳᑮᐃᔑᐙᐸᒫᒡ, ᑳᑮᐃᔑᓅᑕᐙᒡ ᑲᔦ ᐁᐃᑭᑐᓂᒡ᙮
ᐁᑕᓱᐯᐸᑳᓂᐲᐃᑳᑌᒃ ᐅᐅ ᒪᓯᓇᐃᑲᓐ
ᐁᔑᒫᒌᔮᑐᑌᒃ ᐅᐅ ᒪᓯᓇᐃᑲᓐ 1.1-18
ᐁᑕᔑᓱᒡ ᒞᓐ ᐅᓰᑲᐊᑖᑫ, ᒋᓴᔅ ᑲᔦ ᓂᑕᒻ ᑳᑮᐊᑐᒫᒡ ᐅᑭᑭᓄᐊᒪᐙᑲᓇᐞ 1.19-51
ᒋᓴᔅ ᑳᑮᐃᔑᐸᐹᐐᒋᐋᒡ ᐊᐎᔭᐞ 2.1—12.50
ᐃᔥᒀᒡ ᐁᐊᓂᑲᑮᔑᑲᓂᓂᒃ ᒋᓴᔅ ᑮᐱᒫᑎᓯᒡ ᐌᑎ ᒉᕒᐆᓴᓬᐊᒥᕽ 13.1—19.42
ᑮᑭᐌᐱᒫᑎᓯᒡ, ᑮᓈᑯᓰᑕᐙᒡ ᐅᑭᑭᓄᐊᒪᐙᑲᓇᐞ 20.1-31
ᒦᓇᐙ ᒋᓴᔅ ᑮᓈᑯᓰᑕᐙᒡ ᐲᑕᕒᐆᓐ, ᑯᑕᒃ ᑲᔦ ᐯᒫᑎᓯᓂᓂᒡ 21.1-25

Koute ᒞᓐ ᒦ ᐅᐌ ᑫᔑᓂᓯᑐᑕᒪᓐ ᒞᓐ ᐅᒥᓍᒋᒧᐎᓐ