Madiu 13
13
Witi atuna 'adi tolelewana
(Maki 4:1-9; Luke 8:4-8)
1Gote 'asiyata nina 'enaya Yesu anuwa nina 'enega 'iapwesa ga 'idolo le'awaya ga 'imiyatowa. 2'Enega boda sinabwana siegogonama 'enaya, ga 'ebweu waga 'idoedoe 'enaya 'igelu ga 'imiyatowa, ta pwalu le'awaya sitootoolo. 3Ga e'ita yaudi 'i'ebwa'edi onasemalimaliyega, 'igwae, “Tobagula 'ebweu 'ina bagulaya 'itauya, ga witi atuna 'ilelewanedi, 4ga 'aina atuna 'edaya sibe'u, 'enega manuwa si'itedi, ga simwa'uta ga si'enidi. 5Ta 'aina atuna bwa'a logulegulewana 'enaya sibe'u, ta muliyega sitabwa manini, manuna bwa'a gidalina tuga, 6'enega ala 'itudimwedi ga si'oapelu, manuna lamudi nigeya bwa'a gonituna silobaloba.
7“Ta 'aina atuna kwakwakwala 'ediya sibe'u ga sitabwa enoenowa, ta kwakwakwala 'iewaiwai ga 'ididi emwawasidi. 8Ta 'aina atuna bwa'a bobo'ana 'enaya sibe'u, ga sitabwama ga sisinabwa ga siuwa, 'enega 'aina atuna uwadi 'adi yau analedi, ta 'aina sikisiti, be wate 'aina teti.
9“'Eguma matenami ona gete wada nono.”
Onasemalimali 'ina apwesa 'alena.
(Maki 4:10-12; Luke 8:9-10)
10'Enega 'ina tononoyao siapwesama ga Yesu sieonena, sigwae, “To'ase manuna onasemalimaliyega boda nidi 'ediya 'ue'ie'ita?”
11 #
1 Ko 2:10
'Enega Yesu 'igwae, “'Omi ni'atu Yaubada 'emiya 'itagwala be 'ina loina sola'ai'ailidi 'ana tomwalatoiyao, ta boda getedi nigeya. 12#Md 25:29; Lu 8:18'Eguma yaisigedi nadigega ma idi mwalatoi, 'iabe loeposeyana sinabwa wawasae siloba, ta esi 'eguma yaisigedi nigeya 'idi mwalatoimo ta to'ase nai 'ediya simiyami 'iabe maibo'ana siloseyedi. 13Gete 'alena 'enega onasemalimaliyega yae'ie'ita 'ediya, manuna 'idi dune 'ediyega nigeya sida 'ita 'ai'aila, ta wate 'idi nono 'ediyega nigeya sida nuwasabwalena. 14#Ais 6:9-10; Yo 12:40Tomota getedi manudi lowa Aisea 'igimisimana, 'igwae,
‘Ma'etamo waenoenono ta geya'abo nuwami 'isabwasabwalena.
Be wate wadunedune tuga, ta geya'abo sa'i wa'ita'ita.
15Manuna tomota getedi 'idi nuwanuwao
si'elokwani, ga tenadi 'itui,
ta wate matadi 'ikebo.
'Abona nai matadiyega si'ita,
ta tenadiyega sinono be sinuwa sabwalena,
be 'eguya sida sanaila,
be yagie bobo'anedi.’
16“Ta 'omi ma imi gwausowala, manuna matamiyega wa'ita'ita ta tenamiyega wanonono. 17#1 Pi 1:10-12Ona'ai'aila, yage getedi wa'ita'itadi ta wanononodi lowa palopitao be topalupaluyao nuwanuwadi sinabwana be sida 'itadi nai sida nonodi, ta nigeya silobalobadi.
Atu 'ana onasemalimali 'ana li'ama
(Maki 4:13-20; Luke 8:11-15)
18“'Enega atu 'ana 'elelewana 'ana mwalatoi wada nono. 19'Eguma yaita Yaubada 'ina loina tetelina 'inono namo, ta nigeya 'inuwanuwa sabwaleni, ma'etamo togieto'umali nina 'imamai be ona nidi tai 'atenega 'i'ewayauledi. Nate atu nidi sibe'ube'u 'edaya 'adi mwalatoi.
20“Ta wate atu nidi bwa'a logulegulewana 'enaya sibe'ube'u taudi tetela bobo'ana sinonoi ta ma idi gwausowala sitatagwala, 21#Kol 2:7ta nigeya lamudi 'ipa'apa'ala, 'enega tuta gidalina namo 'enaya sida miyami, be 'abo to tuta 'enaya tetela bobo'ana 'ana emisa manuna mwau nai etalauwala silobai, sibe'u manini.
22 #
Lu 12:16-21; 1 Ti 6:9-10 “Ta atu nidi kwakwakwala 'ediya sibe'uya taudi tetela bobo'ana sinonona, ta 'idi nuwanuwa bale'u be esaesa 'ana nuwanuwao 'ediyega tetela bobo'ana siloemwawasina, 'enega nigeya sawesawenaya be siuuwa.
23“Ta atuna nidi bwa'a bobo'ana 'enaya sibe'uya taudi tetela bobo'ana sinonona ga 'ana mwalatoi 'ediya 'imiyami ga uwadi bobo'adi sisa'udi. 'Aina uwadiyao analedi, ta 'aina sikisiti, ta 'aina teti.”
Onasemalimali witi ta pwatula manudi.
24'Enega onasemalimali 'ebweu wate Yesu 'i'ebwa'edi, 'igwae, “Yaubada 'ina loina 'atuwa nadigega 'ebweu tai witi atuna bobo'adi 'ina bagulaya 'ilelewanedi. 25'Enega boiboiya si'eno mwataya, ta 'ana talauwala 'ebweu 'imai bagulaya ga pwatula 'ana 'ita 'atuwa witi wate 'ilelewanedi witi 'ai'aila soladiya, ga muliyega 'itauya. 26'Enega maibo'adi sitabwama ga siuwa ga pwatula nidi topaisewao si'ita lobedi. 27'Enega 'inapwana nina 'ina topaisewao simai ga sieonena, ‘'Inapwana, atuna bobo'ana 'imu bagulaya lowa 'ulelewanedi, ta mwa'adega ga 'enega pwatula ma'ediyao sitabwa leleleyama?’
28“Ta tonibagula 'igwae, ‘Nai 'agu talauwala 'ebweu 'ilelewanedi.’
“'Enega 'ina toguinuwao siona, ‘Mwa'adega? Kapekapeyana be pwatula nidi 'adabu yauledi?’
29“Ta 'inapwana nina 'igwae, ‘Tuwa! Wasa'u be sitabwa leleleyama, manuna 'eguma watoo be pwatula wadabu yauledi, nai 'aina witi wate ma'ediyao wadabu egogonedi. 30#Md 3:12Ta tuta sesoi esiya 'enaya topaisewao yada eonadi be pwatula siegogone nuganedi be sibwagilidi ta 'enega sigabu yauledi, ta witi siegogonedi be 'igu anuwa masulaya siedododi.”
Atuna gidalina be 'ebe gieseseya 'adi onasemalimali
(Maki 4:30-32; Luke 13:18-21)
31'Ebweu wate onasemalimali 'i'ebwa'edi, 'igwae, “Yaubada 'ina etoloina 'atuwa nadigega beno atuna 'ebweuna tai 'i'ewena ga bagulaya 'iasona. 32Beno atuna gidalina tuga ta 'ina tabwa mulinaya 'iekaiwe be 'enega manuwao simama be nalinao 'ediya 'idi newa si'abidi.”
33'Ebweu wate onasemalimali 'i'ebwa'edi, 'igwae, “Yaubada 'ina etoloina 'atuwa nadigega pwalawa 'ana 'ebe gieseseya. Gidalina tuga waine 'i'ewena ga pwalawa sinabwana ma'iyana 'i'einisina, 'enega maibo'ana 'iseseya.”
Onasemalimali 'ina apwesa 'alena
(Maki 4:33-34)
34Yesu 'ina ona getedi maibo'adi onasemalimali 'ediyega pwalu 'ie'itedi, manuna tauna tuta yauna onasemalimaliyega 'ie'ie'ita tomota 'ediya. 35#Sam 78:2Gete 'enega palopita 'ina onaupaupa 'iapwesa, nate lowaenei 'igimisimanena, 'igwae,
“Onasemalimaliyega yada simana be to'ase Yaubada 'ikwaiyena bale'u 'ana mweluluwa'unu 'enega yada onaei.”
Tolelewana 'ina guinuwa 'ana mwalatoi
36'Enega Yesu pwalu 'ipilisinedi ga 'ilugu anuwaya, ta 'ina tononoyao simai ga 'ena sigwae, “Onasemalimali pwatula bagulaya 'ana mwalatoi 'uda li'ami be 'ada nuwa sabwaleni.”
37'Enega Yesu 'igwae, “Witi atuna 'ana tolelewana nate Tomota Natuna,#13:37 Tomota Natuna: Yesu tauna 'ieesena The Son of Man, 'ana mwalatoi tomota tuga. Yesu taunamo 'ieesena Tomota Natuna, ta 'ina'itao e'ediyega tomota simwalatonina 'aene tauna To'etoseyana lKeiso. 38#1 Ko 3:9ta bagula nate bale'u maibo'ana, ta witi nate taudi Yaubada 'ina loina 'ana tomuliyao, ta pwatula nate taudi to'umalina 'ana toguinuwao, 39ta pwatula 'ana tolelewana nate tauna Seitani, ta tuta sesoi nate tuta 'ana 'ebe losalowa, ta tosesoi taudi aniloseyao, 40be tuta 'ana 'ebe losalowa 'enaya toto'umalidi taudi 'atuwa pwatula sida egogonedi be sida gabu yauledi. 41#Md 25:31-46Ta Tomota Natuna 'ina aniloseyao 'ida etunedi be to'umalina 'ana toe'itao be 'ana toguinuwao sida egogonedima be 'ina 'ebeloina 'enega 42sida ula apwesedi kaiwe 'ala'alasina solanaya, nate sena nina 'enaya tomota sida dedoi be sida esala'i'ita 'elouya 'enega.
43 #
Dan 12:3
“Be muliyega topalupaluyao Tamadi 'ina 'ebeloina solanaya sida tuyayala, sinala nadigega.
“'Eguma yaita matenana 'ida nono.
Onasemalimali 'etoi wate
44“Yaubada 'ina loina 'atuwa nadigega esaesa sinabwana, lowa 'ebweu bwa'a 'enaya sikwaiyena ta 'ebweu tai 'ilobena, ga 'ikwaiya limena, 'enega ma ina gwausowala 'itauya ga 'ina gwegweyao maibo'adi 'iegimwaneyedi, ga 'adi maisa 'i'ewena ga bwa'a nina 'igimwanena.
45“Ta wate Yaubada 'ina loina 'atuwa nadigega to'une 'ebweuna mwali bobo'ana nuwanuwana. 46'Enega 'ebweu mwali bobo'ana wawasae 'ilobena ga 'enega tauna 'ina bagi maibo'adi 'ipeledi be 'aene mwali nina bobo'ana wawasae 'ida 'ewa.
47“Ta wate Yaubada 'ina loina 'atuwa nadigega gomana tomota siyauyena olaya, ga mali iyana be mali iyana si'onedi, 48ga gomana nina 'imaa geyogeyoi ta silisina dabalaya, ga simiyatowa, ta iyana maibo'adi siweyalidi, be iyana bobo'adi gaeba 'ediya sisa'udi ta iyana to'umalidi siuledi. 49Nadigega wate, tuta 'ana 'ebe losalowa 'enaya, aniloseyao sida ma be toto'umalidi sida weyalidi tobobo'adi 'ediyega, 50be sida ula apwesedi kaiwe 'ala'alasina solanaya, be 'ena sida dedoi ta siesala'i'ita 'elouya 'enega.”
Gwegwe esaesa auwaudi ta kadekadelidi
51'Enega Yesu 'ienaidedi, 'igwae, “Mwa'adega onasemalimali getedi maibo'adi wamwalatonidiya?” Ta sinono ga silotamo, sigwae, “O!” 52'Enega 'ieonedi, “Gete tuga wada mwalatoni 'aene loina 'ana toe'itao 'eguma ni'atu Yaubada 'ina loina sipanaita 'ai'ailena, taudi 'atuwa nadigega 'ebweu tonianuwa 'ina gwegwe kadekadelidi ta auwaudi soladiya esaesa 'imiyami.”
Me Nasaleta Yesu siguitoyasena
(Maki 6:1-6; Luke 4:16-30)
53 #
Yo 7:15
Yesu 'ina onasemalimali getedi 'ilosalonidi, ga sena gote 'ipilisinena, 54ga 'iila 'ina 'asaya, ta 'idi Anuwa Tapwalolo 'ena 'ilugu ga 'ie'itedi, ta tomota nuwadi 'iowana ga sigwae, “Tai gete mane 'enega 'ina sinasinapu be 'ina guinuwa waiwaidi 'i'ewa'ewa?”
55 #
Yo 6:42
Ta wate sigwae, “Nai tai gete to'abi'abi tuga natuna? Ta sinana Meli, ta tasinao Yemesa be Yosepa be Saimoni be Yudasa, 56ta wate nuunao ma'edao tamiyami. Ta mwa'adega sana ga tai gete nadigega 'isinasinapu'esa?”
57'Enega siguitoyasena. Ta Yesu 'ieonedi, 'igwae, “Palopitao 'adi 'amayaba silobaloba mali 'asa 'ediya. Ta taudi 'idi 'asaya nai 'idi anuwaya nigeya 'adi 'amayabamo.” 58'Enega Yesu nada 'ina guinuwa waiwaidi nigeya yaudi 'iguiguinuwedi, manuna nigeya sida emisena.
Trenutno odabrano:
Madiu 13: dob
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2013, Wycliffe Bible Translators, Inc. All rights reserved.
