मत्ती 5
5
येशूकी सु सु भाग्यमानी ईन्दे सिन साबाते
(लूका ६:२०-२३)
1थेरू थोक काल्बेई मि घुइँचो ओङा थोङनामेकी येशूचेन टिक्पी येजेकने बोमज्यीक्तु गाल्गीन देत्सुङ। थेमे थे चेलातेबा काल्बेई थे दोन्दु लेप्सुङ। 2थेमे थेकी थेबाला दोक सिन लोपाला स्यूसुङ। 3थेकी थेबाला
“ङा ङाराङ ईन सिराच्योक मिक्किता खाला परमेश्वरला मद्धत नाङ सिरकान्ते मिओन भाग्यमानी ईन।
च्यिला सासीन थेबा स्वर्गे राज्यदु स्यूला थेरू देता ङेत्क्यो।
4पापताङ दुक्पेकी खित्सादु पीर खित्कान्ते मिओन भाग्यमानी ईन। च्यिला सासीन परमेश्वरगी थेबाला पापताङ दुक्पादुकी टाल्ला तेरग्यो।
5सुङलाङ मेलेबा मिक्किकान्ते मिओन भाग्यमानी ईन। च्यिला सासीन दि सा लुङबा गाङे थेबेतेराङ ओङगो।
6परमेश्वरगी खि साबा साबाच्योक खिता आउदी सेम खित्कान्ते मिओन भाग्यमानी ईन।
च्यिला सासीन परमेश्वरगी थेबेकी सेम खाबा च्योकराङ ओङ ज्युत्क्यो।
7ज्येनला ङिङज्ये खित्कान्ते मिओन भाग्यमानी ईन। च्यिला सासीन दोक खित्कान्ते मिओनलाराङ परमेश्वरगी ङिङज्ये खिओ।
8सेमला पाप मेताते मिओन भाग्यमानी ईन। च्यिला सासीन थेबेकी परमेश्वरला थोङा ङेत्क्यो।
9ज्येनला डिक्पा खाला तेरकान्ते मिओन भाग्यमानी ईन। च्यिला सासीन परमेश्वरगी थेबाला थे खोरोङ फुज्युङ फुमु ईन सिओ।
10परमेश्वरगी खि साबा साबाच्योक खित्जीन ज्येनगी खेदापानी खाबाते मिओन भाग्यमानी ईन।
च्यिला सासीन थेबा स्वर्गे राज्यदु स्यूला थेरू देता ङेत्क्यो।
11थेमे ङाला विश्वास खाबेकी खित्सादु ज्येनगी ख्योकोनला मेलेबा मि ईन साला मनपरी सिओ, ख्योकोनला खेदापानी खिओ थेमे ईनराङ मेन्दे बात जोला ख्योकोनला मेन्दा मेन्दे दोष लै खिओ। दोक्ते दुक्पा ङेत्कान्तेबा ख्योकोन भाग्यमानी ईन। 12थेबेकी थोक खित्जीन ख्योकोन आउदी खाला गा खि। च्यिला सासीन स्वर्गने ख्योकोनगी छ्येज्यीक इनाम ङेत्क्यो। थाङबोबा परमेश्वर बात खित्कान्ते मिओनलाङ थे बेले मिओनगी खेदापानीराङ खाबा ओतान।
येशू चेलाओन छाताङ नाम्दाक च्योकराङ ईन
(मर्कूस ९:५०; लूका १४:३४-३५)
13थेमे दि सा लुङबे मि दोन्दु ख्योकोनचेन छा च्योक्ते ईन। तर दि बात टोक माज्येत। छेते छाप्टो तोरसीन थे छेते च्यि काम, याङराङ च्यिकी थे छा छाप्टो जोच्ये? दोक्ते छानी छ्याःङ काम लै मिक्किओ सिन क्युरग्यो। थेमे क्युरसादु गाङेकी ङेन्ला झन छ्याःङ काम लै मिक्किच्या जोइओ।
14दि सा लुङबे मि दोन्दु नाम्दाक सिरातेङ ख्योकोनराङ ईन। बोमगी लाक्तु जोबाते सार गाङेपेकी गाङेकी थोङगो। 15थेमे बत्ती पारला च्याला सुङगीङ फामगी उप्ला मोज्योओ बरू खाम्बे नाङ गाङेकी नाम्दाक थोङस्यीत सिन खइँसाला थोम्बोला ज्य्वाक्यो, मेन ओना? 16बात दोक ईन्देकी ख्योकोनगी लेमु काम खि। ख्योकोनगी खाबाते लेमुते काम थोङला परमेश्वरगी खित्सादुराङ ख्योकोनगी थोक खाबाते ईन सिन छ्या स्येला मिओनगी स्वर्गने देत्कान्ते ख्योकोन आबा परमेश्वरला मान खिओ।
येशूताङ परमेश्वर नियम बात
17थेमे मोशेकी टिबाते परमेश्वर नियमताङ परमेश्वर बात खित्कान्ते मिओनगी साबाते बात था माङेन्सीनोङ ओङगो सिन लोपाला ङा दुरू वाबाते ईन्दासीन सिन ख्योकोन विचार माकेत। ङानी होथे नियम गाङे ङेन्दाला थेमे थेरू खि साबाच्योक खित्च्या सिराते च्यि ईन्दे सिन लोपालाका वाबाते ईन। 18ङा ख्योकोनला च्यि सिते सासीन दि साताङ नाम नाश गाल्ला तोरला डो डोसाकोङ परमेश्वर नियमचेन टेक्टेस्यिकराङ ईन्सीनोङ नोमुङ खुदुक मोन्डोओ, थेरू साबाच्योक गाङे ओङाराङ फाप्क्यो। 19थोगी ख्योकोन सुइँदेकी थे नियम नाङ दिनी माङेन्सीनोङ ओङगीतासीन सिराच्योक लाङच्येते नियमज्यीककामा माङेन्सीन थेमे ज्येनलाङ थे माङेन्सीन ओङगो सिन लाप्सीन थोक्ते मिला स्वर्गे राज्यदु छ्ये ईन सिन मिसिरो। थोक मिक्किता खाईन होथोक्ते नियमतेबाङ ङेन्गीन ज्येनलाङ ङेन सिन लोप्कान्ते मिलाचेन स्वर्गे राज्यदु छ्ये ईन सिन सिओ। 20बात दोक ईन्देकी ङा च्यि सिते सासीन धर्मे गुरूओनताङ फरिसी पाटी मिकी खिताच्योक खाला मेन्देकी लेमु खाईन परमेश्वर नियम ङेन्सीनकामा ख्योकोन स्वर्गे राज्यने स्यूक्पा ङेत्क्यो।
मि सेता मेङगो सिराते च्यि ईन्दे
21चुक सासीन ‘मि सेता मेङगो, मि सेत्कानला सजाय तेरा फाप्क्यो,’ सिन ङुरूङ ज्युज्यु पुर्खाला लापा ओतान सिन ख्योकोनला छ्या ओत। 22ङाचेन ख्योकोनला च्यि सिते सासीन सुइँदा दाक्पोन आज्यो न्वाताङ स्येदाङ खासुङ सासीनकामाङ थेलाङ सजाय तेरा फाप्क्यो। थेमे आज्यो न्वाला खो ङ्येबे ङ्येस्यु सिन सिरकान्ते मिला सजाय बिन सिन छ्ये छ्ये मि रूसादु खेरा फाप्क्यो। थेमे आज्यो न्वाला खोनी ठुङराङ माठुङसीन ओङच्या ओतान सिन सिरकान्ते मिनी झन सजाय ङेत्ला नरककुण्डमा मे नाङराङ स्यूइओ। 23थोगी ख्योकोन सुइँदेकी गाल्ला थानदु परमेश्वरला खइँदा चढे खिते बेलाला सुइँदा खेराङ आज्यो न्वा ख्योकोनताङ स्येदाङ खाबा ओताते बात ठेम्बा लासीन 24थे चढे खित्च्येते थेरूराङ ज्याक्ला गोमा थे मि ओत्सादु गाल्ला दाक्पोन बात डिक्पा खि। थेमेकामा वाला थे चढे खि। 25याङराङ ख्योकोनगी सुइँदाला मेलेबा खासीन थे नालिस तेराला अड्डाला ख्याम्ग्यो। थोक खाला ङिकाराङ अड्डाला डोजीन ख्योकोनगी डिगी सिन लामलाराङ खेराङ बात डिक्पा खि। थोक माक्यासीन थेकी ख्योकोनला न्यायाधीश खादु केल्ग्यो। थेमे न्यायाधीशकीचेन जेलला ल्हुक सिन पुलिसला जिम्मा तेरग्यो। 26थोक ओङनामेकी जति पैसा छ्योल साला दुक थोस्यिकराङ माच्यालथुप ख्योकोन जेलदुराङ रूल्ला देता फाप्क्यो।
रन्डीबाजी खित्च्या सिराते च्यि ईन्दे
27थेमे ‘रन्डीबाजी खिता मेङगो,’ सिन ङुरूङ ज्युज्यु पुर्खाला लापाते बादोङ ख्योकोनला छ्याराङ ओत। 28ङाचेन ख्योकोनला च्यि सिते सासीन सुइँदेकी सुइँदा फेम्मे मिला खइँदा मेलेबा विचारगी तासुङ सासीनकामाङ थेकी थे फेम्मे मित्ताङ रन्डीबाजी खाबा छेतराङ ईन सिन सिओ। 29थोगी खेराङ सामे मिगी तासादु पाप खासुङ सासीन ख्योकोनगी थे मिकराङ थेन्ला क्युर। मिकज्यीगी खित्सादु नरककुण्डमा स्यूक्पा भन्दानी काने गाल्ला देता काल्बेई लेमु ईन। 30थोकराङ खाला खेराङ सामे लाक्पेकी खित्सादु पाप खासुङ सासीन ख्योकोनगी थे लाक्पाराङ तुप्ला क्युर। लाक्पाज्यीगी खित्सादु नरककुण्डमा स्यूक्पा भन्दानी डुँरे गाल्ला देता काल्बेई लेमु ईन।
फेम्मे तोङच्येते बात
(मर्कूस १०:११-१२; लूका १६:१८)
31‘सुइँदेकी फेम्मेतेला तोङा सेम लासीन फर्स्ये टिकीन बिन्नामेईकामा तोङा ओङगो,’ सिन गोमा लापा ओतान सिरच्येते बादोङ ख्योकोनला छ्याराङ ओत। 32ङाचेन ख्योकोनला च्यि सिते सासीन सुइँदेकी फेम्मेते ज्येन मित्ताङ लै खाबा मेत्सीनोङ थेला ताङसुङ सासीन थेकी फेम्मेतेला रन्डीबाजी खित च्युताते ईन। थेमे सुइँदेकी थोक खाईन ताङाते फेम्मे मिला खुला लिच्युङ सासीन थेकीङ रन्डीबाजी खाबातेराङ ईन।
ना केल्च्येते बात
33थेमे ज्येनोङ बात च्यि सासीन ‘मेन्दे बातला ईन सिन ना माकेल। दाक्पोनगी प्रभु परमेश्वरला खाबाते कोबोल पूरो खि,’ सिन थाङबो ङुरूङ ज्युज्यु पुर्खाला लापा ओतान सिनोङ ख्योकोनला छ्याराङ ओत। 34ङाचेन ख्योकोनला च्यि सिते सासीन ख्योकोनगी ना केलराङ माकेल। ख्योकोनगी स्वर्ग जुम्ला ना माकेल। च्यिला सासीन स्वर्गचेन परमेश्वरते देत्च्येते ठाउँ ईन। 35दि पृथ्वी जुम्लाङ ना माकेल। च्यिला सासीन पृथ्वीचेन परमेश्वरते काम्बा ज्य्वाच्येते ठाउँ ईन। थेमे यरूशलेम सार जुम्लाङ ना माकेल। च्यिला सासीन यरूशलेमचेन छ्येते गेल्बो परमेश्वर सार ईन। 36थोकराङ खाला दाक्पोन गोः जुम्लाङ ना माकेल। च्यिला सासीन टे केस्राज्यीकलाङ ख्योकोनगी नाक्पोतेला कार्मुताङ कार्मुतेला नाक्पो ज्वा मुथुबो। 37थोगी ख्योकोनगी ईन्दे बातला ईन सि, मेन्सीन मेनकामा सि। दोक मिक्किता खाईन खइँदा बातला ना क्याल्सीन थोकचेन शैतानगी खित च्युताते ईन।
ज्येनला स्येदाङ सेत्च्येते बात
(लूका ६:२९-३०)
38स्येदाङ सेत्च्येते बात खिन ‘सुइँदेकी ज्येनगी मिकज्यीक च्यारसीन थेतेङ मिकज्यीक च्योरा ङेत्क्यो। साज्यीक च्याक्सीन थेतेङ साज्यीक च्य्वाबा ङेत्क्यो,’ सिन ङुरूङ ज्युज्यु पुर्खाला लापाते बादोङ ख्योकोनला छ्याराङ ओत। 39ङाचेन ख्योकोनला च्यि सिते सासीन सुइँदेकी खेराङला मेलेबा खासीन ख्योकोनगी थेबाला स्येदाङ मासेत। बरू सुइँदेकी खेराङला सामे डाम्पापा डाम्स्याकज्यीक ग्याप्सीन ख्योकोनगी थेला ज्येनते डाम्पाङ सेत्ला बिन। 40लोक्ला सुइँदेकी ख्योकोनताङ थोम्मु खाईन खेराङगी खोन्दाते फेङगाक खेरा चाल्सीन थेला खेराङगी लाक्तु खोन्दा ओताते कोटोङ टोल्ला बिन। 41थेमे सुइँदेकी ख्योकोनला जबरजस्ती खाईन कोस फेस्याकजो खेरा चाल्सीन थेत्ताङ कोसज्यीकजोराङ ग्युक। 42सुइँदेकी खइँदा नाङ खासीन थेबाला बिन। थेमे ऋण छ्याबा नाङ सिरकानलाङ मेतेरो मासेर, थेलाङ बिन।
शत्रुओनलाङ ङिङज्ये खित्च्येते बात
(लूका ६:२७-२८,३२-३६)
43थेमे ‘दाक्पोन युल्बाला ङिङज्ये खि, शत्रुओनलाचेन किला च्योकराङ खि,’ सिन ङुरूङ ज्युज्यु पुर्खाला लापा ओतान सिनोङ ख्योकोनला छ्याराङ ओत। 44ङाचेन ख्योकोनला च्यि सिते सासीन युल्बालाकामा मेन, शत्रुओनलाङ ङिङज्ये खि। थेमे खेराङला खेदापानी खित्कान्ते मिओनलाङ लेमु ओङस्यीत सिन परमेश्वरताङ प्रार्थना खि सिन सिओ। 45थोक खासीन ख्योकोनला स्वर्गने देत्कान्ते ख्योकोन आबा परमेश्वर फुज्युङ फुमु ईन सिरा सोई खिओ। च्यिला सासीन परमेश्वरगी लेमु काम खित्कान्ते ईन्सीनोङ मेलेबा काम खित्कान्ते ईन्सीनोङ, थेकी साबा साबाच्योक खित्कान्ते ईन्सीनोङ थोक मिक्किकान्ते ईन्सीनोङ मि गाङे लाईदु ङीमा स्यार च्युत्ला थेमे छ्यार्बा देक च्युत्ला गाङेला ङिङज्ये खिओ। 46ख्योकोनगी खेराङला ङिङज्ये खित्कानलाकामा ङिङज्ये खासीन परमेश्वरगी ख्योकोनला च्यि मान तेरगीतेरो? दाक्पोनला ङिङज्ये खित्कानलानी कर लिन्कान्ते मिओनगीङ ङिङज्येराङ खिओ याङ। 47ख्योकोनगी दाक्पोन मिलाकामा मान खाईन लेमु बात खासीन थे च्यि अचम्बते बात ईन्देरो? दाक्पोन मिलाकामा ङिङज्ये खित्च्येतेनी परमेश्वरला छ्या मेस्येकान्ते मिओनगीङ खिओ। 48बात दोक दोक ईन्देकी स्वर्गने देत्कान्ते ख्योकोन आबा परमेश्वरगी जे कुरोङ लेमुकामा खाबाच्योक खाला ख्योकोनगीङ लेमुकामा खि।
Trenutno odabrano:
मत्ती 5: JUL
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 1992 Wycliffe Bible Translators Inc. All rights reserved.
