Ebik 26
26
Paulo naayetonganirra omumaiso g'Omukama Agiripa
1Rukirabasaija Agiripa yagambira Paulo ati: “Hati oikiriziibwe kwetonganirra.” Aho Paulo yaimukya omukono gwe, yatandika kwetonganirra ati:
2“Omukama Agiripa, ninyeyeta w'omugisa kiro kya hati kwetonganira omumaiso gawe habw'ebi byona Abayudaaya ebi barukunjunaana. 3Okukira muno habwokuba iwe omanyiire kimu engeso zoona n'empaka ez'Abayudaaya. Nahabweki ninkwesengereza ogumiisirize ompulirize.
4“Abayudaaya boona nibamanya engeso zange ezi naakuliiremu okuruga omu buto, omu bantu ab'ihanga lyange n'omu Yerusaalemu. 5#Ebik 23:6; Baf 3:5.Bakaba nibammanya okuruga ira kandi basobora kukigumya hati, kakuba nibenda, nkooku ndi Mufalisaayo anyakukuraatira ekitebe ekirukukira ebindi byona kuhikya engeso z'ediini yaitu. 6Hati nyemeriire hanu ninjunanwa habw'okunihira Ruhanga eki yaraganiize baisenkuruitwe, 7kandi n'enganda zaitu ikumi na ibiri eki zirukunihira kutunga obu baba nibeehayo kuramya Ruhanga ekiro na nyamusana. Waitu, habw'okunihira oku nikyo Abayudaaya barukunjunaanira. 8#2Mak 7:9.Baitu inywe habwaki mutarukwikiriza Ruhanga nkooku asobora kuhumbuura abafiire?
9 #
Ebik 8:3; 22:4,5. “Na nyowe nyenka nkaba ninyikiririza kimu nkooku nsemeriire kucwa amagezi goona kurwanisa ibara lya Yesu owa Nazareeti. 10Nukwo naakozire Yerusaalemu. Nakwasa abaikiriza baingi omu nkomo habw'obusobozi obu naheebwaga banyakatagara abakuru. Tikiri eki kyonka, baitu obu bakaba nibacwerwa omusango gw'okufa, na nyowe nkakisagika. 11Emirundi nyingi nabafubiraga omu masorrokaniro goona, nkalengaho kubahambiriza nukwo beehakane enyikiriza yabo. Nkabakwatirwa muno ekiniga, nukwo kubahiiganiriza nimbakurata n'omu mbuga ez'amahanga agandi.”
Paulo naabaza ha kuhinduka kwe
12“Omu kubakurata omu mbuga z'amahanga, nkaba ningenda Damasiko, mpairwe obusobozi kandi ntumirwe banyakatagara abakuru. 13Omu ihangwe obu nkaba ningenda, Waitu, nkarora ekyererezi nikiruga omwiguru, nikimuliikana okukira izooba, kyayaka kyanyehinguliriza nyowe n'abo aba nkaba ningenda nabo. 14Itwena twagwa hansi, nubwo naahuliire iraka nirinnyeta omu Ruhebburaayo liti: ‘Saulo, Saulo noompiiganiriza ki? Nooyesaaliza wenka kusamba ha mihunda.’ 15Namukaguza nti: ‘Niiwe oha, Waitu?’ MUKAMA yangarukamu ati: ‘Ninyowe Yesu ou orukuhiiganiza. 16Hati nu imuka, oyemerre. Eki ngenderiire kukubonekera nukwo kukukoma ompeereze kandi obe kaiso ow'okugumya nkooku ondozire, n'ow'okugumya ebindi ebi ndikweyolekeramu. 17Ndaakujuna abantu ab'ihanga lyawe, nkwihe n'omu mikono y'Abanyamahanga nambere ndukwija kukutuma, 18obaigule amaiso, baruge omu mwirima, baije omu musana; baruge omu busobozi bwa Sitaani, beehongere Ruhanga, kandi habw'okunyikiriza baganyirwe ebibi kandi batunge ekiikaro hamu n'abo abayeziibwe.’ ”
Paulo naasoborra omulimo gwe
19“Nahabweki nu, Agutamba Agiripa, okubonekerwa oku okw'omwiguru ntakwigalirize, 20#Ebik 9:20,28,29.baitu nkabanza kukurangirra aba Damasiko, nakusoborra aba Yerusaalemu n'ab'omu Buyudaaya yoona, kandi n'Abanyamahanga, nimbateererra beegarukemu, bagaruke hali Ruhanga, nibakora ebikorwa ebisemeriire abeegarukiremu kwo. 21Eki nikyo Abayudaaya bankwatiire ndi omunju ya Ruhanga, baalengaho kunnyita. 22Baitu habw'okukonyerwa Ruhanga, nikyo kinyemeriize hanu n'okuhika hati, nimmanyisa abakuru n'abato nkooku ntaina kindi eki ndukwegesa kwihaho abarangi na Musa ebi baarangire ngu, nibiija kubaho: 23#1Kor 15:20; Is 42:6; 49:6.Kristo nkooku asemeriire kubonabonesibwa, kandi habw'okusangwa ali w'okubanza okuhumbuuka omu bafu, nuwe alimanyisa ab'ihanga linu n'Abanyamahanga boona omusana nkooku gwaizire omunsi.”
Paulo naasoonasoona Agiripa
24Paulo obu akaba naakyayetonganirra ati, Fesito yamugambira n'iraka likooto ati: “Paulo ohunguutukire, amagezi gaawe amaingi gaija kukunaga iraro.” 25Baitu Paulo yamugarukamu ati: “Oweekitiinisa Fesito, tingwire iraro; baitu nimbaza amazima kandi ebihikire. 26Omukama Agiripa, ebigambo ebi abimanyireho, kandi nimmubaliza ntaina eki ndukutiina; habwokuba ningumiza kimu ebi byona nkooku arukubyetegereza, tibiri bintu ebyakoliirwe omu nsita. 27Agutamba Agiripa, noikiriza eby'abarangi? Nyowe nimmanya nkooku orukubiikiriza.” 28Agiripa nukwo kugarukamu Paulo ati: “Mara iwe noogonza kumpindura Mukristo omu kasumi kake!” 29Nandiki Paulo ati: “Obu karaaba kali kasumi kake rundi kaingi, baitu nyowe eki ndukusaba Ruhanga, tihali habwawe wenka, baitu na boona abarukumpurra ha kiro kya hati, mube nka nyowe--kwihaho muleke kubohwa omu njegere zinu.”
30Nubwo omukama yaimukire, hamu n'omulemi omukuru na Bereniike, n'abandi boona abakaba baikaliire nabo. 31Obu baamazire kuturuka aheeru, baatandika kugambirangana bati: “Omusaija onu taina eki akozire ekisemeriire kumwisa rundi kumutaisa omu nkomo.” 32Agiripa yagambira Fesito ati: “Omuntu onu akusoboire kulekerwa, kakuba atarajuliire hali Kaisaali.”
Trenutno odabrano:
Ebik 26: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.