Genesis 16
16
Hay nitungawan Ismael
1Hi Sarai an inayan Abram ya adi pakaimbabale, mu ninomnom nan iabulut nah Hagar an muttatyunan iEgypt an ihuyop Abram. 2,3Ta hidiye nan kananan Abram di “Takomboy ihuyop mu tun muttatyuk ta kal-ina ot ya imbabaleyam ta waday imbabale ta teden adi iabulut APU DIOS an mun-imbabaleyak.” Ya inabulut Abram hidiyen kinalin Sarai. Hay naatan tuwe ya handih nala-uy himpulun toon hi niha-adan dad Kanaan. 4Nunhuyop da Abram ke Hagar ot mawadaan hi Hagar.
Handih ininnilan Hagar an nawadaan ya mumpahhiya ya namahig di pamihul na ke Sarai. 5Ot kanan Sarai ke Abram di “He-ay kon bahul hi pamihulan nan muttatyuk ke ha-on. Man-u te in-abulut kun ihuyop mu, mu nipalpu handih nawadaan ya pihupihulonak ke hiya. Hana ot ta tibon APU DIOS hin dahdiy niptok ke ditan duwa, he-a weno ha-oy.” 6Ya kanan Abram ke hiyay “He-ay kon muttatyun hiya, nangamung kah pinhod mun aton ke hiya.” Ot nahalman di aton Sarai an palohalohananah Hagar ot loktat ya binumtik.
7Indani ya inakhupan nan anghel APU DIOS hi Hagar nah ob-ob nah adi maboblayan hi pingngit di kalatan mumpaed Sur. 8Kananan hiyay “Hagar an muttatyun Sarai, tipet wada kah tu? Daanay nalpuwam ya daanay pangayam?” Ya kanan Hagar di “Binumtikak an tinayanak hi Sarai an kon muttatyun ha-on.” 9Ot kanan nan anghel ke hiyay “Mibangngad ka ke hiya ta munnanong kan muttatyuna. 10Idattan dakah dakol hi holag mun adi mabilang. 11Hinaen imbutyug mu ya lalaki. Ya deket mitungo ya ngadanam hi Ismael te dingngol APU DIOS di numpahpahmokam ke hiya. 12Hinaen ahim iimbabale ya ahi mialig nah mailom an kabayu. Ya pakaibboh-ol nay ibbanan tagu ya pakaibboh-ol damdaman di udum an tatagu. Ya ahi mihi-an hi iibana.”
13Kanan Hagar hi nomnom nay “Kon nin makulug an tinibok hi Apu Dios yaden kapyanan mataguwak ta ahik kalkalyon di mipanggep ketuwe?” Ot ngadananah APU DIOS an kimmalin hiya hi “Hanan Dios an manmannibon ha-on.” 14Ta hidiye nan hay pungngadan di tatagu kediyen ob-ob an numbattanan di Kades ya Bered ya “Ob-ob nan wadat nangamung an manmannibon ha-on.”
15Intungon Hagar nan imbabale dan lalaki ot ngadanan Abram hi Ismael. 16Hay toon Abram kediye ya nawalut onom.
Trenutno odabrano:
Genesis 16: ifkWB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2004, Wycliffe Bible Translators, Inc. All rights reserved.