Génesis 4
4
Caín ko Abel
1Adán bejuakaꞌo Eva, nchri chriꞌi ko tabeyaa nchra chjan ko binchekunkjiꞌi naa chjan biꞌin Caín, ko ndachro nchra: «Ndo Dio binchenchaon na ko chjana naa xan xii.» 2Kuthimejan binchekunkjiꞌi nchra inaa xan xii ko xan yaa biꞌin xan Abel. Ko xan Caín bancheꞌe xra ngataon jngi ko xan Abel bagakuꞌen xan kuleko.
3Ko batho nano, ko naa nchaꞌon Caín bikao ngain Ndo Dio nchin thi jeꞌe batse ngain jngi ko binchendusen ngain Ndo. 4Ko kai Abel bikao nchin kuleko guan saꞌo ngakjan kue, ko kuinchieꞌe ku icha chrjuin te ixin binchendusen ngain Ndo Dio. Ko jeꞌe Ndo bayee Ndo Abel ko thi bajon Abel. 5Aro bayeꞌa Ndo Caín ko thi bajon Caín, ko jiꞌi binchexruxinꞌa Caín ko ngakon kjuaago ixin anto guñao ko tabechiin. 6Kuthejan Ndo Dio banchiangi ngain Caín ko ndachro: «¿Unda anto rituñao ko tarrichiꞌin? 7Ja̱ sincheꞌe thi jian, ¿asinchexruxinaꞌa jaꞌan thi rincheꞌe? Aro ja̱ rincheꞌe thi jianꞌa, thi jianꞌa mee jii xraa naa kuxiigo chrintho rukatja, aro dithuaxinꞌa tsetuꞌan ngajin.»
8Ko naa nchaꞌon Caín ndachro ngain xan choo:
—Jina ngataon jngi.
Ko are tate nthiꞌa ngain jngi, Caín kjuaaya ngain xan choo ko naguenxon xan. 9Kuthimejan Ndo Dio banchiangiꞌi Caín ko ndachro:
—¿Thinoo jii Abel xan choo?
Ko Caín batheꞌe ko ndachro:
—Nunaꞌa thinoo jii xan, ¿ajikininxin na jaꞌan sarinda xan?
10Ko Ndo Dio ndachro Ndo ngain Caín:
—¿Keꞌe bincheꞌe jaꞌa? ¿Unda buꞌen xan choo? Ixin jnii xan choo thi digingo ngataꞌa nunthe, jni mee jidanchia ixin sinthaꞌa jie̱ ngain thi buen xan. 11Ko jai jaꞌa, ixin guꞌen xan choo ko kuingo jnii xan ngataꞌa nunthe, jaꞌa tangi sathuꞌe ko tangi tsuꞌan. 12Ko maski anto sinchencheꞌe xra nunthe, nunthe mee isuanꞌa, ko jaꞌa sakjika ngain inaa nunthe ko sinchiꞌa thinoo sinchejugaꞌa.
13Ko Caín ndachro ngain Ndo Dio:
—Jaꞌan tsixinaꞌa sathua thi tangi jiꞌi. 14Jai Suixin bantsjexin na nunthe jiꞌi ko irukjanꞌa na tsian thaa, ko sakjika, ko sarichundaꞌa thi sinthajugaxin ko kexeꞌo thi setan sinao suen na.
15Aro Ndo Dio batheꞌe ko ndachro:
—Tsuenꞌa yaa ixin thi suen jaꞌa yaato nthiꞌa icha tangi tsuꞌen.
Mexinxin Ndo Dio bakeꞌe Ndo naa neꞌe ngain Caín ixin thi sikon mee isuenꞌa. 16Ko jañaa Caín sakjuixin ngain thi nunthe beꞌe ko kai ngathexin kon Ndo Dio, ko Caín sakjui bigeꞌe ngain nunthe diꞌin Nod, nu thi chrinxin nchaꞌon.
Chujni bachrjeninxin Caín
17Caín bejuakaꞌo chriꞌi ko tabeyaa nchra chjan ko binchekunkjiꞌi naa chjan ko binchegiꞌin xan Enoc. Kuthimejan Caín kuexinxin binchechjian naa rajna ko rajna mee binchegiꞌin Enoc, inchin xeꞌen. 18Enoc bechunda naa xeꞌen biꞌin Irad, ko Irad kjui ndudee Mehujael, ko Mehujael kjui ndudee Metusael ko Metusael kjui ndudee Lamec. 19Ko Lamec bekaꞌo yoo nchrii; naa nchra biꞌin Ada ko inaa nchra biꞌin nchra Zila. 20Ko Ada binchekunkjiꞌi naa chjan biꞌin Jabal, ko Jabal kjui ndudee ni saꞌo binthexiꞌin nchia ndaasin, ko bagayakuꞌen na̱ kuxiigo. 21Jabal bechunda naa xan choo biꞌin Jubal, ko Jubal kjui ndudee ni saꞌo binchechjian soon kunixin nthaxro ko arpa. 22Ko Zila nchri yuxin bekaꞌo Lamec binchekunkjiꞌi naa chjan biꞌin Tubal-caín, ko xan jiꞌi banchechjian xan tsjé thi bagundeꞌe na̱ kunixin chia bronce ko hierro. Ko Tubal-caín bechunda naa xan choo xan nchrii biꞌin Naama.
23Naa nchaꞌon Lamec ndache kayui chriꞌi, Ada ko Zila:
«¡Thiꞌin ra jian thi rundachrjan:
Ja̱ chrujan thi sinchenina,
ni yeye o ni nchinchin, jaꞌan suꞌen na̱.
24Ja̱ yaato nthiꞌa tangi tsuꞌen thi suen Caín,
thi suen Lamec nii kan ko theyaato nthiꞌa icha tangi tsuꞌen.»
Xan ninxin binchekunkjiꞌi Eva
25Ko Adán kjan bejuakaꞌo chriꞌi, ko chriꞌi binchekunkjiꞌi inaa chjan ko xan mee biꞌin Set, ko ndachro nchra: «Ndo Dio chjana inaa chjan ixin xan Abel, thi xan guen Caín.»
26Ko Set kjui ndudee naa chjan biꞌin Enós. Ko nchaꞌon teꞌa chujni kuexinxin binchesayeꞌe na̱ Ndo Dio, ko nchaꞌon mee kuexiꞌin ndache na̱ Ndo Dio, Jehová.
Trenutno odabrano:
Génesis 4: plsNT
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2017, Wycliffe Bible Translators, Inc. All rights reserved.