Génesis 3
3
Co Yosë natëtonaraihuëꞌ, oshahuanpiso
1Sinioroso Yosë niꞌton, yaꞌipi tananquë maꞌsharoꞌsa yaꞌhuërinsopita acorin. Yaꞌhuanso nipirinhuëꞌ, aꞌnapita maꞌsharoꞌsa quëran yonqui yonquínahuan ninin. Sanapi yanonpintaton, paaparin nontacaso marëꞌ:
—¿Tëhuënchachin taꞌma Yosë apiratërinquëma yaꞌipi isopita nararoꞌsa nitërinso capamaso to? itërin.
2-3—Yaꞌipi nitërinsoꞌ, noya capaꞌhuaisoꞌ. Aꞌnaíchin huancánachin huanirinsoꞌ, co Yosë nohuantërinhuëꞌ: “Ama ina nitërinsoꞌ, caꞌcosohuëꞌ. Ama sëꞌhuacosohuëꞌ. Caꞌpatamaꞌ, tëhuënchachin chiminaramaꞌ,” itërincoi Yosë, itërin.
4-5—Co napoarinhuëꞌ. Co chiminaramahuëꞌ. Caꞌpatamasoꞌ, yaꞌipi noya nininsopita, yaꞌipi co noyahuëꞌ nininsopitantaꞌ, nitotarama huachi. Inapita nitotatomaꞌ, Yosë pochachin nisaramaꞌ. Ina nitotaton, Yosë apiratërinquëmaꞌ, itërin.
6Ina natanaton, sanapiso nara nitërinso niꞌsárin: Noyápiachin nicaton caꞌchináchin cancantërin.
“Ina caꞌpato, yaꞌipi nitotarahuë huachi,” tënin. Napoyan quëran, sëꞌpashorahuaton caꞌnin. Soꞌionta quëtohuachina, inanta caꞌnin. 7Naporo chachin nisha yonquipi huachi: “Iꞌnanpirashitë canposo paꞌsárëꞌ,” niitopi. Ninapotatonaꞌ, iquira huëron pipitopi. Inapoatonaꞌ, nipaꞌshianatopi.
8Iꞌhuanahuanquë huisontapasoꞌ, Yosëri nararoquë huëcapairinso natanpi. Natanahuatonaꞌ, naꞌpicaiso marëꞌ taꞌapi. 9Naꞌpitopirinahuëꞌ, inariso përarin:
—Atan#3.9 Atansoꞌ: Piyapi tapon naporin.. ¿Insëquëta yaꞌhuaran? itërin. 10Natanahuaton, quëmapiso tapon:
—Coꞌta oꞌmaransoꞌ natanai. Iꞌnanpirashitëcoi niꞌtoi, tëꞌhuatërainquën. Naporahuaton tapantatëinquën, naꞌpirai, itërin.
11—¡Iꞌyan! ¿Onporahuatomata nitotapanamasoꞌ? Nara aꞌnaíchin nininsoꞌ: “Ama isoso nitërinso caꞌquësohuëꞌ,” itopiranquënhuëꞌ: ¡Nani caꞌnan! itërin.
12—Iso sanapi quëtërancosoꞌ, quëtërinco niꞌton, caꞌnahuë, itërin.
13Napotohuachina, sanapi yaꞌhuërëꞌ tahuërëtahuaton, itapon:
—¿Onpoatonta naporansoꞌ? itërin.
—Yaꞌhuan nonpintërinco niꞌton, caꞌnahuë, tënin sanapi.
14Naporoꞌ Sinioroso Yosë niꞌton, yaꞌhuan yaꞌhuërëꞌ tahuërëtahuaton, co huachi noya yaꞌhuëcaso marëhuëꞌ shaꞌhuitërin:
—Piyapi nonpintëranso marëꞌ aꞌnapita maꞌsharoꞌsa quëran, paꞌpi co noyahuëꞌ niꞌnanquën. Napoaton ipora quëran huarëꞌ cancanën quëran noꞌpaꞌ paꞌtaran. Inapoaton, chiminaquë huarëꞌ nosorotaran. 15Ca nohuanto sanapi inimicotarinquën. Quëmarinta ina inimicotaran. Quëmá quëran pipipisopitantaꞌ, sanapi quëran pipipisopitarëꞌ niinimicotaponaꞌ. Aꞌna tahuëri sanapi quëran pipirinsoari#3.15 Sanapi quëran pipirinso topachina: Quisocristo ninoton napotërin. minsëmiatarinquën. Napoaponahuëꞌ, quëmarinta chiníquën ina aparisitaran, itërin.
16Ina quëran sanapi yaꞌhuërëꞌ itapon:
—Co natërancoso marëhuëꞌ, huaꞌhuanpatan paꞌpi iquin quëran huaiaran. Napoaponahuëꞌ, soꞌyan yaꞌcariantaran. Naporahuaton, soꞌyan camaiinquënso yaꞌhuërin, itërin.
17Ina quëran quëmapinta itapon:
—Saꞌan natëton, nara nitërinso co capacasohuë nipirinhuëꞌ, caꞌnan. Naporanso marëꞌ yaꞌipiroꞌpaꞌ co huachi noyatacaso marëhuëꞌ shaꞌhuitarahuë. Napoaton nitapiarin. Paꞌpi chiníquën sacataquë huarëꞌ coshataran. Chiminaquë huarëꞌ inapoaran. 18Naporahuaton, nahuanoꞌsaꞌ, shihuarinoꞌsaꞌ, inapita naꞌcon naꞌcon papotapon huachi. Nisha nisha canomëroꞌsaꞌ, nararayaroꞌsaꞌ, inapita yoniton, capon. 19Paꞌpi chiníquën sacatahuarëꞌ coshataran. Napoin quëran chiminaran huachi. Noꞌpa quëran ninanquën niꞌton, noꞌpa chachin niantamaso yaꞌhuërin, itërin.
20Atansoꞌ, saꞌin nininën acotërin, Ipa itërin. Ina quëran yaꞌipi piyapi naꞌacaiso niꞌton, ina pochin nohuitërin. 21Quëmapi saꞌinë chachin aꞌmocaiso marëꞌ maꞌsha shaꞌhuëtë quëran Yosëri nitërin. Ina quëtohuachina, aꞌmoanpi huachi. 22Naporo chachin tënin: “Iporasoꞌ, piyapi canpoa pochachin nitotërin. Noya nininso nitotahuaton, co noyahuëꞌ nininsonta nitotërin. Niꞌquëna nanpirin nara nitërinsonta caꞌpachin. Napohuachinsoꞌ, nanpimiatarin,” tënin.
23Napoaton Sinioroso Yosë niꞌton, noyápiachin nararo quëran quëmapi ocoirin. Ocoirahuaton, niquë acorin. Inaquë sacatacaso marëꞌ acorin. Noꞌpaquë chachin sacatapon huachi. 24Piyapi ocoirahuaton, piꞌi pipirin parti quëran aꞌpaito anquëniroꞌsa acorin. Inapitasoꞌ, quiropinoꞌsa itopi. Noyápiachin nararo aꞌpaicaiso marëꞌ acorin. Ina yaꞌcarintaꞌ, sahuëni orotaton huënin huënintárin acorin. Ama incari tëranta nanpirin nara yaꞌcaricaso marëhuëꞌ, aꞌpairapi.
वर्तमान में चयनित:
Génesis 3: cbt
हाइलाइट
शेयर
कॉपी
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
