Yohaannisi 10
10
Yesuusi akkima sikimayta fayya' kodde
1Kamma desa Yesuusi ikide, “Anti dukaatannen ishina kiini, nama moona kahirra karopa xarra maliiyyi pora pilaatin kullino, kera ka sarampayyta. 2A xarran kullino xoori, sikimayta kahirra. 3Nama xarra tooytino nefo i'isha tura pana. Kahirraadi ka nessaadi dakayan. Isha ka kahirraadi maxxa maxxan hala ka tura qata ka lakopa sooksha. 4Ka otoo kahirraadi lakopa sooksho kammaayye, ishootta tura qata ka aana; kahirraadi ka qoota nessaadi upan malla, isha kamma aanan. 5Nessa anama pila qoota in upnin malla, alle tura qahan diisheey, kammaayye in aanan.”
6Yesuusi pahanoosene ishootta' lele; ishootta xoori wa isha haasawade matte in qapnaanne.
7Se malla Yesuusi ka oppa oore ka ishootta kideewwe, “Anti dukaatannen ishina kiini, anti an xarra kahirra. 8A ana turan de'e piisa kerewwa isho xolma toomaay, umma kahirra ishootta in dakayne. 9Xarrase ana, nama an oppan kallo idina ka kulla ka sooka ka pora deetta nefo akkada. 10Kera, hatanta ka qalatta ka patissa patta'e deeni. Anti xoori, akka ishootta caatta akkadan ka caatta immakkoota qapnaadane'en de'e.
11“Sikimayta fayya ana; sikimayta fayya kahirraadi malla toota'e isi daanni. 12Sikimayta a kaharra xaadi in koddinin ikka xaayyaan piddame ka dawwino ka sikimayta dukaata in koddinin, xoori oto Yoyta deeno ikka akkooyye, kahirra alle diinni ka kapa qahani, yoytase ka kahirraappa qapni ka olkelan pasinni. 13Sikimayse wa malla qahana qoota xaayyaan piddame ka kaharra dikanni in kinnin malla. 14Sikimayta fayya ana; anti kahirraayyo in upna; kahirraayyo nefo ka ana upan. 15Akkima Aappinno ana upo, annti ka isha upo mina'ewwen ishootta upa ka ishootta malla toota isi daanni. #Maati 11:27; Luqa 10:22 16Kahirra apila a xelloose oppa in kinninin qapaaw; ishootta kuli qeedeeta ana parpaaccisni; ishootta nessiyyo dakayan ka xelloota takka koddan; sikimaytaaysho nefo takkaaw.
17“Akkan kuli oorsado ka teyyado'e, qootan caattiiyyo daanno malla, Waaqa Aappa ana jaalanni. 18Anti heennaayyonnen caattiyyo daanni, diisheey, a ana qara qeedo takka nefo in co. Anti caattiiyyo daassata ka oorsatta ka teyyatta'e, hupna ukkumeeta'en qapa. Ajajoose nefo, aappinno qaran teyyade.”
19Haasoosen qaran xaate'e, Yihutaata ka lakki olli qiteew. 20Ishoottoppa lekaya ka kidene, “Isha orritta qapa ka taaronniiy, maana'e isha dakkaysannittan?” 21Ademo ka kideneewwe “haasoosen, afa nama a kara orritta co oppa sookna'en. Orritta inama a qara ilda paten dinissa ettaninni?”
Yihutaata akkima in amannin
22Yursaalami karaayye xayso nessuma a oppaayye tika qulqulloota harayannaan ulfeessinaane kayte. Etosen nefo soroora. 23Yesuusi ka tika qulqullootati silayta a kelandesa annaan a Selemooni kelan desa pora anni. 24Sitiiyyi Yihutaata ka Yesuusi kapopa ollopa deete ka ishi kiite “Haka aytamiti akkan kara lakki dikanno koota? Atti oton a Kiristoosiiyyi, olkela la'ayshe ka ino' lele.”
25Yesuusi ka ishootta oorshe ka kide, “Ha anti in ishina' lelli; ishina xoori a amanni a kittan. Koda an maxxa Aappinnootin koono, isha qootiyyo desa maakkummi. 26Ishina xoori, qoota xelloota a kahirraayyo oppa a qapnin malla, a amanni a kittan. 27Kahirraayyo nessiyyo dakayni, anti nefo ka ishootta upa; ishootta nefo ka ana kamma deeni. 28Anti caatta parapara'en ishootta daasha; umma pakkanna in patan, umma nama takka nefo harkiyyo oppaayye ishootta in ponqo ka in teyyado. 29Aappinno a ishootta ana daashe piisa qara qapa; umma harka Aappinno oppa a ishootta ponqo ka teyyatta ettansho takka nefo in co. 30Ana isho Waaqa Aappa, an takkan.”
31Sitiiyyi Yihutaata ka Yesuusi dakka'e lammatta dakada pohatteew. 32Yesuusi ka ishootta kide, “Waaqa Aappa kapa kodadda papaxxaara lekayan ishina akkisheey kodaddoosen oppa a xaame malla ana dakkinittan?” 33Ishootta ka ishi oorshen ka kidene “Waan malla ke dakkinninna, qoota Waaqa qara afa otitta haasawatte malla. diishe, qoota kodaayte a paxaara mallan. Sede nefo a ati nama koddite ka Waaqa isi koote malla.” #Lewi 24:16
34Yesuusi ka ishootta kide, “Seeraayshin oppa itaafamte ka kiini, ‘In kide, ishina a waaqadda.’ #mas 82:6 35Semmalla mataafa qulqulloota shaareeta in koddito; oto mataafa qulqulloota isaasine a qaaleta Waaqa ishootta deeteeti ‘waaqadda’ kide ka haleeyye, 36ka kuli isase a Waaqa Aappa xawwi reexxe ka piita qara opa erke, qoota kide ‘an inna Waaqa,’ malla, maana'e isha kiinittane ‘Waaqa qara'e qaaleta otitta haasawanni?’ 37Anti oton koda Aappinno'en an kooni an kinniniiyyi, anan amanan. 38Oton koda Aappinno'en kooniiyyi xoori, kadi punu ana a'amanni a kinniniiyyi, kodiyyo amana. Sedenne akkima Waaqa Aappa anan co, anti ka Waaqa Aappan co fayya upnaattaneey.”
39Ishootta ka amma isha qapa fadeneew, isha xoori harkaaysho oppa passade ka tawe.
40Yesuusi a lammattati kirra Yurtaanoosi tuulleew ka porase a paayyota Yohaannisi oppa pishaan orra jaqqino opa aane ka eyye jare. #Yoha 1:28 41orra lekayta ka isha kapopa de'e ka kide, “Ha Yohaannisi wa orra qawwanna takkan nefo in koone ma, wa qoota namooseti desa haasawade piisa dukaataaw.” 42Eeyye orra lekayta ka isha amane.
वर्तमान में चयनित:
Yohaannisi 10: MaQu
हाइलाइट
शेयर
कॉपी
Want to have your highlights saved across all your devices? Sign up or sign in
