Matta 5
5
Gɨraha da Yesu a nə nzaa pepetə
(Luka 6.20-23)
1Ite Yesu a naa təkə-təkətɨ ɓwaare hananang paya, nda nggɨrə pwa a nza mbwara motə. Lagbe dan a shi hakan. 2Nda tiya ta kənərən shee, nda sa,
3“Sə hanɨngti kaarən,
a tən myee ji-poriti a vor pitə.
Hɨnggərən nə həmnə pwa.
4Sə hanɨngti kaarən,
a tən myee a vor yedi-kɨttə ɓəgəng,
gə mya tal yedingrən.
5Sə hanɨngti kaarən,
a tən myee ka nzaa ɗongtə,
gə vɨratə ɓa gəə hɨnggərən nə.
6Sə hanɨngti kaarən,
a tən myee ka hɨmnə ɗa səfeme kɨr-kɨr.
Həmɨnpwa ɓa vərən gətə təna ɗa sa nda dɨ mwo.
7Sə hanɨngti kaarən,
a tən myee ka purutɨ ɓwaare a hubosərən.
Həmɨnpwa ɓa ɗa purusərən mgban.
8Sə hanɨngti kaarən,
a tən myee ka hubo pepetə,
gə tənə myee ɓa naa Həmɨnpwa.
9Sə hanɨngti kaarən,
a tən myee dɨ shi ka nzaa ɗoltə a waka ɓwaare,
gə tənə mye ɓa watɨrən atɨ je da Həmɨnpwa.
10Sə hanɨngti kaarən,
a tən myee mya dɨ tənəə dərən
gə ɗa səfeme darən.
Hɨnggərən nə həmnə pwa.
11“Sə hanɨngti kəwnə, mye kana dɨ shartəwnə, a tənəə dəwnə, a bwelə hase a nəngəwnə ɓaa, a nə jeronye gə le de. 12Wule shingɨn kana bəngrəwnə, kerəpəm ka hanɨngtə, gə moone dəwnə nee gbakai a pwa. Hwuna ɗyanga atɨ sə təna ɗa kpalye da Həmɨnpwa kaaɗəng.
Kəndəshe a nə fitəkwana ka ɓɨrtə
(Markus 9.50; Luka 14.34-35)
13“Hwunə fitəkwana vɨratə. Shezə fitəkwana kana təkəsə ka nɨngsən, ka mɨnə mya ɗadən nda ɓə nɨnga? Ndaa diyə wula gə itɨ lyenti, pɨrgə mya kəjidən ɓwaare a woyə nəngɨn.
14“Hwunə ɓɨrtɨ vɨratə, vɨrate kangə haa mgbənge aawa ɓo. 15Ɓwaare aawa kɨsadə tikɨle a mɨna kupən ka kpaa. Mya dɨ kangdən a pwa, gə myee kat a vor hwoɗingɨn a naa ɓɨrtə. 16Sə mgban bɨləmdə ɓɨrtɨ dəwnə a haka ɓwaare gə təna naa lyentɨ pepetɨ dəwnə, təna fukadə Baagəwnə gaarə a vor pwa.
Kəndəshe a nə ɓashitə
17“Ɓe hwunaa niyə ɓətɨ na shi vɨratə gə na kɨɗa ɓashita Musa kat ka ləməgye da kpalye da Həmɨnpwa. Ə'ə! Taa shi gə na kɨɗarən, na shi gə na naadərən. 18Diyalə na dɨ boyownə, pwa ka njiya aa dɨ pɨrə a mbəə ɓaa, sə mgban taa ndəng sə də nagi kəng-kəng dɨ vor ɓashita Həmɨnpwa a mya doro ɓa fukə njiya a pɨrə ɓaa, anda shingɨn 'ye mya doro aa naa kat. 19Ma kat ushi nagi ɓyeləng dɨ vor ɓashitə, nda mɨna kənə ɓwaare gə təna ɗaasə mgban, mangɨn ɓa gəə sɨnə ma ɓyelənge kat a vor həmnə pwa. Ma mgban koddə ɓashitɨnə, kənə ɓwaare, mangɨn nə ka fukatə kɨr-kɨr a vor həmnə pwa. 20Gə hɨnə dɨ boyownə atɨ, anda ɗa səfeme dəwnə aa pɨrgə hɨnggə Farise kat ka ji-lee kəndə ɓashita Musa, hwunaa dɨ ga pɨrə həmnə pwa nagi ka nzɨ-wurotə.
Kəndəshe a nə muune
21“Hwun kɨlə mye boyə myee kaaɗəng atɨ, ‘Ɓe ɓɨl we, kat ma ɓɨl we mya ɓashiyən.’ 22Hɨnggi, na dɨ səwnə atɨ, kat ma ɗa muune ka ama, mya ɓashiyən. Mɨni ma kat sa ama atɨ, ‘Hye sə ɓayə,’ ji-shalale da Yawude ɓa ɓashiyən. Ma mgban sa ama atɨ, ‘Hye dɨɗə,’ mangɨn ɓa pɨrə ɗiyə tənəte kaaru-kaaru.
23“Gələ angɨn na hye zə ɓa vədə həmtə a nə kɨritə, hye kana ɗyanga atɨ wakasa ka kpeyəsa aa wula, 24zə ɗaka həmtɨngɨn a mgba kɨritə, hye mɨnə a dɨ shala wakasa ka mangɨn, hye ɓə shea mɨna a vədə həmtə dəw.
25“Hye ɗadə la a wakasa ka nzə-nyaagu tan-tan a dɨ zə ɓa kaada a humwa ji-ɓashitə. Ɗamdə ləngɨn gə ɓe ləngɨn aa tɨlə haka ji-ɓashitə, gəkɨlə ndi kana kaada, ji-ɓashitə ɓa vəda a tɨfə ji-jin myee a gbərəwe, mya ɗɨkda a gbərəwe a dyengəlu. 26Diyalə na dɨ boyownə, tee dɨ dɨmagə vor gbərəwe a tee mbwagə kiirəngɨn kat.
Kəndəshe a nə sharawne
27“Hwun kɨlə mye sa atɨ, ‘Ɓe ɗa sharawne.’#5.27 Naasə: Dɨmatə 20.14. 28Hɨnggi, na dɨ səwnə atɨ, ma kat nidə metə hɨmagərə a vor hubosən, mangɨn ɗa sharawne kaarə a vor hubosən mbəə. 29Anda diisa i zɨme nə ɓa ɗɨkda hye ɗa səhase, dɨɗagərə ɗongdə ɓong-ɓong. Ndɨka hye ɗongə a basa a sɨsa, angɨn pɨrgə ite atɨ mya peda ka sɨsa kat a ɗongə ɗiyə tənəte kaaru-kaaru. 30Anda tɨfə zɨməngu nə ɓa ɗɨkda hye ɗa səhase, bənggən ɗongdən ɓong-ɓong. Ndɨka hye ɗongə a basa hiɗə a sɨsa, angɨn pɨrgə ite hye ɓa pɨrə ka sɨsa kat a ɗiyə tənəte kaaru-kaaru.
Taka nzaa hwoɗye
(Matta 19.9; Markus 10.11,12)
31“Hwun kɨlə mye sa atɨ, ‘Ma taka nzaa hwoɗye om mesən naa mangɨn a vərə malɨmtɨ taka nzaa hwoɗye.’ 32Hɨnggi, na dɨ səwnə atɨ, ma kat om mesən dɨmdə, taka nzaa hwoɗye, anda aa gə sharawne, mangɨn nee dɨ ɗɨkdə mesən a vor bəə morye, ma kat ɗɨmtɨrə, sharawnə nda dɨ ɗa kaarə.
Kəndəshe a nə gbətə
33“Hwun kɨlə mye mɨnə sa myee kaaɗəng atɨ, ‘Hye kana gbə ɓe ɓiyarə, shezə hye naadə gbəte hye gbə humwa Həmɨmiye.’ 34Hɨnggi, na dɨ səwnə atɨ, ɓe hwunaa tiyaa gbə nagi ka pwa, gəkɨlə ruutɨ da Həmɨnpwa nə, 35nagi ka njiya ga a vɨratə gəkɨlə də Həmɨnpwa a kwak mbwayingɨn, nagi ka Urshelima, gəkɨlə vɨrata Həmə kɨr-kɨrə. 36Ɓe gbi mgban ka nənanga, gəkɨlə tee dɨ mba nagi shewonti hiɗə kal-kal a mɨndə kung, naasə mgban shik-shik. 37Byele dəw a mba atɨ, ‘Aa,’ naasə mgban, ‘Ə'ə.’ Byela pɨrgə angɨn, hɨnggə ma hasə.
Diitə a moonə diitə
38“Hwun kɨlə mye sa atɨ, ‘Diitə a moonə diitə, lyintə a moonə lyintə.’#5.38 Naasə: Dɨmatə 21.24; Livitikus 24.20; Gɨraha 19.21. 39Hɨnggi, na dɨ səwnə atɨ, ɓe hwunaa kanggə ma ɗəwnə səhase. Ma kana fɨlagu a bwaka zɨme, virwi vən bwaka hiɗə mgban. 40Ma dɨ mwi atɨ nda kaada a lugu ɓarawtɨ votitɨ dəw, kpawa rukute vən. 41Anda ama mbəw ɗɨkda atɨ na hye woyo kan meltə hiɗə, woyi kan meltə kpe. 42Ma kat nyisu se, vən. Ma shi hakəw ɨl kiire mgban, ɓe kərən.
Mwo nzə-nyaatə
(Luka 6.27-28,32-36)
43“Hwun kɨlə mye sa atɨ, ‘Hye mwo nzə-vɨnəgu a kwo nzə-nyaagu.’ 44Hɨnggi, na dɨ səwnə atɨ, hwuna mwo ji-nyaagəwnə, myee dɨ tənəə dəwnə mgban, hwun ta hiwi gə le darən. 45Dɨ ha ɗatɨngɨn hwun ɓa gəə hwunə je da Baagəwnə arə gaarə a vor pwa. Nda dɨ ɗaka fəre dan nda fɨla a nə mi hashe kat ka mi fyemye. Sə mgban nda dɨ ɗɨkə ɓoole a njima a nə ji-ɗa səfeme kat ka ji-ɗa səhase. 46Hwun kana mwo myee dɨ mworəwnə ɓəmbə mɨnə wula də, mɨnə moona hwun ɓa ɗɨmə? Nagi ji-luu taa shemtə nə mgban aa sə təna dɨ ɗa? 47Hwun kana ɓawa wunaka ndewogəwnə ɓəmbə, mɨnə takəwnə ka mbiɗitɨ ɓwaare? Nagi myee aa lee Həmɨnpwa nə aa sə təna dɨ ɗa? 48Gəm ka tikɨstə ɓətɨya Baagəwnə gaarə a vor pwa a gə.
वर्तमान में चयनित:
Matta 5: bcy
हाइलाइट
शेयर
कॉपी
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
