Malɛkɛ 7

Jahudiyalu ya laanakolu

Matiyu 15.1-9

1Falisi dɔlu ni seliya kalanmɔɔ dɔlu ka bɔ mingɛ Jelusalɛmu ka na ai ladɛn Isa dafɛ, 2ai k'a ye ko a kɔbiladen dɔlu tɛɛ dɔnni kɛla k'ai bolo lasɛnɛyabali to.

3(Kamasɔlɔn Falisilu ni Jahudiya tɔlu tɛ dɔnni kɛla ni ai ma ai bolo lasɛnɛya kunfɔlɔ le ka bɛn ai bemanu ya laana ma. 4Wo boloɲa kelen ma, ni ai k'ai kɔsei ka bɔ lɔɔ lɔ, ai tɛ dɔnni kɛ damanda ni ai ma ai bolo lasɛnɛya. Ai do yi laana kɔlɔ suu siyama le labatola, iwo jiyafɛ lasɛnɛyako, ani jidaa ni sooda.)

5Wo le n'a kɛla, Falisilu ni seliya kalanmɔɔlu ka Isa maɲininga, ai vɛɛ: «Mindɛ lɔ i kɔbiladennu tɛ mɔ bemanu ya laana latelenna, mafɔ ka dɔnni kɛ ai bolo lasɛnɛyabali le?»

6Isa do k'ai javi, a vɛɛ: «Nabi Ezayi na kelayakuma minu fɔla ka bɛn àilu filangafolu ma, tuɲa le. A do ka Ala kumakan sɛvɛ, ko:

‹Mɔɔ minu yi m̀ buɲala ai da le la,

kɛɛ wo tɛ ai josokun nɔ feu!

7Ai yi m̀ batola fuun,

kamasɔlɔn aiya kalan yi adamadennu ya jamalilu le le dein.› »

8Isa vɛɛ ai yɛ kɔtunun: «Ài vɛ Ala ya jamalilu to je, k'ài bolo kɛ adamadennu ya laanalu la.»

9Isa k'a fɔ ai yɛ kɔtunun, a vɛɛ: «Ài yi Ala ya jamalilu tola je jateeya boloma, k'àiya laana lasawati. 10Kamasɔlɔn Nabi Musa vɛɛ ko: ‹I i fa ni i ba buɲa.› A vɛɛ fana ko: ‹Ni mɔɔ min v'a fa niwotɛ a ba lafeyala, fɔ wo tii yi faale.› 11Kɛɛ àilu do yi mɔɔlu kalanna ko mɔɔ yi sene a fɔla a fa niwotɛ a ba yɛ, ko: ‹I tɛɛ na madɛmɛlifen min sɔlɔn ǹ na, m̀'ɛ wo kɛ Koloban ne.› (Wo kɔlɔ le ko a vɛ bila a ta fan Ala yɛ). 12Ni a yi ten ne, ài tɛ diɲala wo tii yi foi kɛ a wolobalu yɛ butu. 13Wo boloɲa ma, ài vɛ Ala kumakan to je ka bɛn àiya laana ma, ài yi dɔlu kalanna min na. Ài do yi wo ɲɔɔzii siyama le kɛla.»

Ko minu yi mɔɔ lakɔsɔla

Matiyu 15.10-20

14Wo kɔ, Isa ka jama kili kɔtunun k'a fɔ ai yɛ, a vɛɛ: «Ài bɛ y'ài tolomalɔ ka ko min ɲaye. 15Mɔɔ yi fen fen donna i da k'a dɔn, wo suu suu tɛ se mɔɔ lakɔsɔla. Kɛɛ ko minu yi bɔla mɔɔ josokun nɔ, wolu le yi mɔɔ lakɔsɔla.»#7.15 Sɛvɛli kɔlɔ dɔlu ka haya min la a kɔkan: 7.16

17Isa ka bɔ jama fɛ mingɛ ka taa don bon na, a kɔbiladennu k'a maɲininga sana wo kɔlɔ ma. 18A do vɛɛ ai yɛ: «A yi di? Àilu fana ma se koɲayena? Ài ma hangili sɔlɔn k'a fɔ fen min yi donna mɔɔ kɔnɔ, wo tɛ se i lakɔsɔla? 19Kamasɔlɔn dɔnnifen tɛ donna mɔɔ josokun nɔ, mafɔ i kɔnɔlɔ. I vɛ taala siya fɛ, fen wolu bɔtɔle.» (Isa n'a jiyala wo lɔ ko dɔnnifen suu bɛ ladaanyine.)

20A k'a fɔ ai yɛ kɔtunun, a vɛɛ: «Ko minu yi bɔla mɔɔ josokun nɔ, wolu le yi mɔɔ lakɔsɔla. 21Kamasɔlɔn miliya yon bɛ yi bɔla mɔɔ kɔnɔ le lɔ, ani a josokun nɔ: kanukɛko, suɲali, mɔɔfaako, jalonya, 22natabaya, yonya, janvandeya, malobaliya, keleya, jɛvɛli, fannɔbaya, ani hangilindanya. 23Koyon minu bɛ yi bɔla mɔɔ josokun ne lɔ, ai v'a lakɔsɔla.»

Siboloma gbɛlɛ moso ya limaniya

Matiyu 15.21-28

24Wo kɔ, Isa ka bɔ je ka taa Tili so laminin nɔ. A do ka don bon dɔ la. A tɛɛ tɛ a fɛ mɔɔ y'a lɔn ni a yi je. Wo bɛ n'a kɛ, a ma to doon nɔ. 25Moso dɔ tɛɛ je, jinajuu tɛɛ a denmoso lɔ. A ka Isa ya ko mɛn mingɛ feeya, a ka na a ma k'i bilin a sen kɔlɔ. 26Siboloma gbɛlɛ mɔɔ le tɛɛ, min sɔlɔnnin Fenisi koovi lɔ, Siliya jamana lɔ. A do vɛ Isa madiyala ko a yi jina gbɛn k'a bɔ a denmoso lɔ. 27Kɛɛ do, Isa vɛɛ a yɛ: «I lɔ dennilu yi dɔnni kɛ k'i fa kunfɔlɔ le. A bɛnnin tɛ ka dennilu ya bulu ta k'a lafili wulunilu kɔlɔ.»

28Moso do k'a javi, a vɛɛ: «Ǹ Kuntii, tuɲa le wo le. Kɛɛ hali wulunilu gbu yi bulu kulunkulunnilu dɔnna, minu yi benna ka bɔ dennilu bolo dɔnnikɛya lɔ.»

29Wo fɔ moso bolo, Isa do vɛɛ a yɛ: «Ka bɛn iya kuma wo ma, taa iya luu ma. Jina vɛ bɔ i denmoso lɔ.»

30Moso do vɛ taala luu ma ka a den lanin ye lafen nɔ, jina tɛɛ vɛ bɔ a lɔ.

Isa ka bobo dɔ lakɛnɛya teme

31Isa ka bɔ Tili so laminin nɔ ka Sidɔn so lɔtimin ka se Galile kɔɔ fan dɔ lɔ, min yi So Tan laminin nɔ. 32A senin je, mɔɔ dɔlu ka na kɛ́ dɔ le a fɛ, min tolo ni a da gbelenin tɛɛ. Ai do vɛ Isa madiyala ko a a bolo la kɛ́ wo kɔkan k'a lakɛnɛya. 33Isa ni kɛ́ k'ai majaan jama la mingɛ, a k'a bolokɔnilu don kɛ́ tolowoolu lɔ, ka ban k'a daji kɛ a tɛɛ la, ka wo sisa kɛ́ nɛɛ kan. 34Wo kɔ, a k'a ɲa lajɛlɛ sanma k'a nunakili bakɛ. A do k'a fɔ ai balakan nɔ, a vɛɛ: «Efata.» Wo kɔlɔ le ko: «I la yi ka.»

35Kɛ́ tolo la ka ka, k'a nɛɛ julu fɔlin telemanin. A do ka se kumala kobɛn. 36Wo lɔ, Isa k'a fɔ ai yɛ k'a magbeleya ko ai kà wo ko fɔ mɔɔ suu suu yɛ. Kɛɛ a tɛɛ vɛ wo fɔla ai yɛ kotan, ai tɛɛ wo ko lajɛzɛnna ka timin a kunfɔlɔ ta la. 37Ai do ka kawakoya bubale, ai vɛɛ: «A yi ko bɛ kɛla kobɛn. A yi tologbɛlɛnnu tolo lakala ani ka bobolu lakuma!»

वर्तमान में चयनित:

Malɛkɛ 7: MBT2023

हाइलाइट

कॉपी