लूका 8

यीशु चेलीण

1तढ़ेया पता यीशु ग्रां ग्रां त शेहरी शेहरी प्रचार करुण लगा त परमेश्वरे राज्ये एणे बारे खुश खबरी शुणाण लगा। होर तसे बाराह प्रतिनिधि बि तस जुए साते थिए। 2त कुछ जिल्हाणु बि थी, जे कि दुष्ट आत्माई त बीमारी केआं ठीक भुओ थी। से ई भिन्थ: मरियम, जेस जे मगदलीनी बि बोतेथ। तेसे अन्तरा सत दुष्ट आत्मा नशाणो थी।#मत्ती 27:55,56; मरकुस 15:40,41; लूका 23:49 3त हेरोदेसे भण्डारी खुजे जुएली योअन्ना, त होरी सुआ जिल्हाणु जोई सूसन्नाह बि थी। ए सोब अपु अपु धन दौलती बइ तसे सेवा कतीथ।

बिएजु बाणे कथा

मत्ती 13:1-9; मरकुस 4:1-9

4जपल ग्राईं त शेहर केआं मेह्‍णु यीशु केईं एण लगे त तठि बोडा हुसुड़ा किठा भोई गा। त यीशु तेन्हि जे यक कथा शुणाई। 5“यक मेह्‍णु बिएजु बाण जे गा। बांत पेंत कुछ बिएजु बत झड़ु, त से खुरे बइ ढची गोउ त चड़ी चखुरु से खाई छउ। 6कुछ बिएजु शकरिआटी जिमि पुठ झड़ु। बेशक से लुंगु, पर तठि पोण घट भुणे बझई जोई से फुकी गोउ। 7कुछ बिएजु कांटि बुछ झड़ु त तेन्हि जोई साते साते बोडिउ। पर तेन्के औजि बेलि से तठि दबी गोउ। 8त कुछ बिएजु खरी जिमि पुठ झड़ु त तेन्हि बोडी कइ सौ गुणा फल दिता।” ई बोल कइ तेन जोरी जुओई बोलु, “अगर तुस में बोक ध्यान जोई शुणियेल त तुस समझ घेन्ते।”

कथाई मतलब

9यीशु चेली यीशु पुछा कि एस कथाई मतलब की असा?#मत्ती 13:10; मरकुस 4:10 10तेन बोलु, “तुन्धे परमेश्वरे अपु राज्ये नियको बोके समझणे बुद्धि दुतो असी, पर होरी जे मोउं कथा शुणाई कइ बोताण असु, ताकि धरमे कताबे पुठ लिखो बोक पूरी भोल। लिखो असु कि

‘से हेर हेर कइ बि ना पिछाणियेल,

त शुण शुण कइ बि ना समझियेल।’”#यशायाह 6:9-10; मत्ती 13:13-17

11“कथाई मतलब ई असु कि बिएजु जीं परमेश्वरे बोक असी। 12केहि मेह्‍णु तेस बते कनारी जिमि ईं असे, जे परमेश्वरे वचन त शुणते। पर तेन्हि चड़ी चखुरु के ईं शैतान एई कइ तेन्के मन केआं तेस वचन दूर कइ छता, ताकि तेस पुठ विश्वास कर कइ से बच ना घियेल। 13केहि मेह्‍णु तेस शकरिआटी जिमि के ईं असे, जे परमेश्वरे वचन शुणते त बोडे खुशी जुए। कुछ टेम तकर विश्वास बि कते। पर दुख तकलीफ अन्तर विश्वास करण छड़ देन्ते, किस कि तेन्के जील पक्कु ना भुन्तु। 14केहि मेह्‍णु कांटियाली जिमि ईं असे, जे परमेश्वरे वचन शुणते त जरूर, पर अगर घेई कइ धन दौलते चिन्ता त मौजमस्ति अन्तर फस घेन्ते त तेन्हि पुठ फल ना लगते। 15पर कुछ मेह्‍णु तेस खरी जिमि ईं असे। से परमेश्वरे वचन मन लाई कइ शुणते त तेन्हि पुठ टिगि बिश्ते। त तेन्हि पुठ खरा फल लगता।”

दीये कथा

मरकुस 4:21-25

16तोउं यीशु बोलु, “कोई बि दीया जाई कइ लेंसुड़ पड्डे न घटते, होर ना मन्जे पड्डे रखते, पर तस तुबारि पुठ रखते, ताकि जे बि अन्तर एन्ते तेन्हि टगड़ियार मेओ लौती।#मत्ती 5:15; लूका 11:33 17ईं कुछ ढकिये नेईं, जे सामणि ना एईयेल। होर ईं कुछ नियको नेईं जे बाहर न निस्तु।#मत्ती 10:26; लूका 12:2 18तोउं त चौकाने रिहे कि तुस कीं शुणते। किस कि जेस केईं असु, तसे धे होर बि दिईन्तु त जेस केईं नेईं, तस केआं से बि निईन्तु, जेस से अपु समझता कि में असु।”#8:18 इठि यीशु बोलुणे मतलब असा कि “अगर तुस कुछ समझणे कोशिश कते त तुसी होरी चीजी के बारे बि समझ एन्ती। अगर तुस अउं जे बोके बोलुण लगो असा तस समझणे कोशिश ना कते त जे बि समझ तुसी असी, से तुं केसे कम ना एन्ती।”#मत्ती 25:29; लूका 19:26

यीशु ई त भाई

मत्ती 12:46-50; मरकुस 3:31-35

19तढ़ेया पता तसे ई त भाई तस जुए मीण जे ए, पर हुसुड़े बेलि तस जुए मी ना बटे। 20त केनि तस जे बोलु, “तें ई त भाई तोउ जुए मीण जे बाहर खड़ खड़ बिशो असे।” 21त तेन तेन्हि जे बोलु, “में ई त भाई ई भिन्थ, जे परमेश्वरे बोक शुणते त मानते!”#लूका 10:38-42

यीशु तुफान शान्त करण

मत्ती 8:23-27; मरकुस 4:35-41

22फिर यक रोज यीशु अपु चेली जोई यक नाव पुठ चढ़ा, त तेन्हि जे बोलु, “चले, तथे ओस पार घेन्ते!” त से घेण लगे। 23जपल नाव घेण लगी, त यीशु उंघ एई गई। तपल तथ अन्तर सुआ ब्यार लगण लगी त नाव अन्तर पुओणि बि भरीण लगु। से डूबणे बाड़े थिए। 24तपल चेले तस भेएड़ घेई कइ से खड़ेरा त बोलु, “ए गुरु, ए गुरु, अस मरणे बाड़े असे।” तपल तेन खड़ भोई कइ ब्यार त पाणि तेन जे बोलु, “शान्त भोई घिए”। तिखेईंए ब्यार त पुओणि शान्त भोई गोउ। 25त तेन तेन्हि जे बोलु, “मोउं पुठ तुसी विश्वास ना थिआ ना?” पर से डरी गे त परेशान भोई कइ अपफ बुच बोलुण लगे, “ए कोउं भो भला, जेसे बोके ब्यार त पुओणि बि मानते?”

दुष्ट आत्माई भुंजो मेह्‍णु ठीक भुण

मत्ती 8:28-34; मरकुस 5:1-20

26पता यीशु गिरासेनि मेह्‍णु के इलाके पुजा, जेसे पार गलील राज्य असा। 27जपल से नाव केआं भीं आ त तेन्हि तेस इलाके यक मेह्‍णु मेआ जेस अन्तर दुष्ट आत्मा थी। से सुआ रोज केआं झिणे ना डबताथ। से गी ना बिश्ताथ, बल्कि से कब्रस्थान अन्तर बिश्ताथ। 28-29किस कि तस पुठ दुष्ट आत्मा बार बार एन्तीथ, त मेह्‍णु तस शंकीड़ी त रेजुड़ी बइ बान्‍हतेथ। तोउं बि से सोब टोड़ी टाड़ कइ रुण जे नश घेन्ताथ। त यीशु तेस दुष्ट आत्मा जे बाहर एण जे बोलु त से मेह्‍णु यीशु हेर कइ तसे अगर डूला, होर लियार दी कइ बोलु, “ए सर्व शक्तिमान परमेश्वरे कोईया, यीशु! इठि किस अओ असा? अउं तोउ जे हथ जोड़ता कि मोउं कष्ट ना दे।” 30यीशु तस केईआं पुछु, “तें नओं की असु?” तेन बोलु “सेना” किस कि सुआ दुष्ट आत्मा तसे अन्तर थी। 31दुष्ट आत्माई यीशु जे छनेअरे किउ, “असी काल खपर जे ना लंघा।” 32तठि फाट पुठ सूरी के यक बोडा मुहारा चरुण लगो थिआ, त तेन्हि यीशु जे बोलु कि तेन्हि सूरी के अन्तर घेणे इजाजत दिए। त तेन तेन्हि इजाजत दी छइ। 33तपल दुष्ट आत्माई तेस मेह्‍णु केआं निस कइ तेन्हि सूरी कें अन्तर घेई गई। त तेन्हि सूरी फाटे जिन्‍घाल्या टाउ दी कइ तथे पुओणि अन्तर डूब कइ मर गे।

34ई सोब घटना हेर कइ सूरी चारणे बाड़ी दौड़ दी कइ ग्रां त शेहर पूरी खबर शुणाई छइ। 35त ए सोब जे भुओ थी, हेरुण जे मेह्‍णु तठि ए। मेह्‍णु तठि एई कइ हेरु कि जेस मेह्‍णु अन्तर दुष्ट आत्मा थी से मेह्‍णु झिणे लाई कइ यीशु खुरी भेएड़ खरे मन जुओई बिशो असा। त से सोब यीशु हेर डर गे। 36ई सोब हेरणे बाड़ी तेन्हि जे बताउ कि दुष्ट आत्मा भुंजो मेह्‍णु कीं ठीक भुआ। 37तपल गिरासेनि इलाके सम्हाई मेह्‍णु यीशु तेन्के इलाके केआं नश घेण जे बोलु, किस कि से सुआ डर गो थिए। त यीशु वापस एण जे नाव पुठ चढ़ गा। 38जेस मेह्‍णु केआं दुष्ट आत्मा निथो थी, से यीशु जोई साते घेण जे छनेअरे करण लगा। पर यीशु से ईं बोल कइ लंघा, 39कि “अपु गी जे वापिस गा, त मेह्‍णु जे बोल कि परमेश्वरे तोउ जे कीं बोडे कम किओ असा।” त से घेई कइ पूरे शेहर अन्तर बताण लगा कि यीशु तस जे कीं बोडे कम किओ असा।

यीशु जयारे मरो कुई त बीमार जिल्हाणु ठीक करण

मत्ती 9:18-26; मरकुस 5:21-43

40जपल यीशु गलील जे वापस आ त मेह्‍णु बोडी खुशी जुएई तसे अग्रोई जे ए, किस कि से तस भाड़ बिशो थिए। 41तपल जयार नओएं यक अराधनालय मुखिया एई कइ यीशु खुरी पुठ बिठा त छनेअरे कर कइ बोलु “छने, में गी हंट। 42किस कि में बाराह साले इकलौती कुई असी, जे मरणे बाड़ी असी।”

त जीं यीशु तठिआ तेस मुखिये गी जे घेण लगा त तस पता सुआ हुसुड़ा एई गा। 43तेस अन्तरा यक ईं जिल्हाणु थी जेस कि बाराह साल केआं अखियई बीमारी थी। तेन अपु पूरी कमाई वैद केईं घेई कइ खर्च कइ छइ। तोउं बि से ठीक नेओथ भुओ। 44त तेन जिल्हाणु पती कनारा एई कइ यीशु झिणे पलो छुआ त तपले ईं तसे अखियई बीमारी खतम भोई गई। 45त यीशु पुछु “अउं केन छुआ?” सोब ना करुं लगे त पतरस त होरे साथी बोलुण लगे, “ए प्रभु, तुं चोहरो कना अत हुसुड़ा असी त की पता लगता कि तुस केन छुए?” 46पर यीशु बोलु, “अउं केनि छुओ असा, किस कि में अन्तरा शक्ति बाहर निस गो असी।” 47जपल तेन जिल्हाणु हेरु कि से नियोख ना सकती, त से ठरकती ठरकती तसे खुरी पुठ बिठी त तेन सोबी के सम्हाणि बोलु कि तेन केस बझई जुए से छुआ त कीं तपले ईं ठीक भोई गई। 48त यीशु तस जे बोलु, “कुईए, तेईं मोउं पुठ विश्वास किआ, तोउं त तु ठीक भोई गई, खरी भोई कइ गा।”

49से होता ईं बोलुणे लगो थिआ कि तपल केनि अराधनालय मुखिये गीहे एई कइ जयारे जे बोलु, “तें कुई मरि गई, अब गुरु कष्ट ना दे।” 50पर ई शुण कइ यीशु बोलु, “डर नउ; बस मोउं पुठ विश्वास कर त से बच घेन्ति।” 51तसे गी एई कइ तेन कुई ईया बोउ, पतरस, यूहन्ना, याकूब केआं अलावा कोई अन्तर एण ना दिता। 52सोब तस कुई जे रोलुण शींकुण लगो थिए; पर तेन बोलु, “रोले नोउ, ए मुओरी नेईं, बल्कि उंघो असी।” 53से ई हेर कइ कि कुई त मरी गो असी तसे फूल बणाण लगे। 54पर तेन कुई हथ टाइ कइ बोलु, “कुईए! खड़ भो।” 55तपले तस प्राण वापस एई गा त से झट खड़ भोई गई। तोउं यीशु बोलु, “एसे धे कुछ खाण जे दिए”। 56यीशु तेन्के कुई जे जे कुछ किओ थिउ, तेस हेर कइ तसे ई बोउ हैरान भोई गे। पर तेन तेन्हि जे बोलु कि ई बोक केसे जे बि ना लाण।#8:56 शयद यीशु ना चहन्ताथ कि जे मेह्‍णु तस हेर नफरत कते, तेन्हि मेह्‍णु तसे “दुबारी जीआणे ताकती” बारे पता लगे।

वर्तमान में चयनित:

लूका 8: pgg

हाइलाइट

कॉपी