Mataio 6
6
1Uaba nole nakuarare uaba nase lu le ra opem, iaueakai uiaba erdali ua mokakalam ikerare; ege nole uaba bodomalam nagri abielam uaba Aba emerilu kotor ge.
2Epe ike, ese ma abi nase lu nakuarare, ma nole maber dibiri mara opem mokakalam bes le giz a sunago ge, a gab ge, iaueakai le giz uiabi naosepereda. Ageakar kaka uabi detagereda, Uiaba nagri bodomalam.
3Ese ma nakuarare uader nase lu, debele mara ber tag nole asmer kak abele lu mara tuter tag ikerare:
4Iaueakai gaire mara nase lu nole le asmer kak; epe mara Baba dasmerauem abele lu mude ge, E mari ikuar paret kak mari bodomalam.
5Ese ma abi esorerapare, ma nole mokakalam bes le giz; abelelam uiaba lagelag esorerapare sunago ge a gab uasuli opem gaire le, iaueakai gaire le uiabi darasmerare. Ageakar kaka uabi detagereda, Uiaba nagri bodomalam.
6Ese ma esorerapare, ma ge bao mabi uteb ge, a dimi abara te, ege ma abi esorerapare mara Baba penoka dali ardar kak uteb ge; mara Baba E darasmerare abele ardar kak uteb ge, E mari nakuaroa paret kak mari bodomalam.
7Ese uaba esorerapare nole mer mer ko etomeret mokakalam gaire nog le giz; abelelam uiaba dikiaporare ese gaire mer Ade uiabi nase ge.
8Dasmerare, uaba nole mokakalam uiaba; abelelam uaba Aba ge erdar gaire lu uridili uaba nole nagri, a ua nole amosi kak.
9Dasmerare, uaba esorerapare mokakalam: Keriba Aba kotor ge, zogoem mara nei.
10Mamoro mara baselaia sepem uatabu. Ikeroa mabara lag abele gesep ge, mokakalam kotor ge.
11Keribi ikuar leuer abkoreb abele gerger.
12Adem dikri keriba uit, mokakalam keriba dikri ui uridili keribim dedkoeda.
13Nole keribi tegeredare abele mirem; epe keriba ditkedarare uitelam; Abelelam mari dog baselaia, a adigir, a deseper, niai karem. Amen.
14Abelelam ese uaba dikri le la uit; ege uaba Aba dali kotor ge adem dikri uaba uit.
15Ese uaba nole dikri le la uit, uaba Abet nole ua dikri uaba uit.
16Ese uaba leuer baili, nole opauzi mokakalam bes le giz; abelelam uiaba dedkoli uiaba op, iaueakai gaire le nardarare uiaba leuer baili. Ageakar ka uabi detagereda, Uiaba bodomalam nagri.
17Ese ma leuer baili, ma idu desas mabara kerem; a dirup mara op;
18Iaueakai gaire le nole ardar kak ma leuer baili, epe mara Aba penoka dali ardar kak uteb ge; a mara Aba E ua dasmerare abele ardar kak uteb, E mari etomer paret kak mari bodomalam.
19Uaba nole aukase deraimerare uaba gesep lu, a nagri degem gako lee umele eseamulu, a nagri le eroam, E abi daiui a ko eroam:
20Epe uaba aukase deraimerare uaba kotor lu, nole degem a nole lee umer kak eseamulu, nole le eroam, E abi daiui a ko eroam;
21Abelelam abele uteb uaba lu nagri, a uaba nerkep abi dog.
22Abele pone, gem ra lamepa; ese mara pone debele, a mara gem datki uridili.
23Ese mara pone adud, a mara gem kupikup uridili. Dasmer, ese kupikup abele be muige mari dog, uaiai au kupikup!
24Umer kak le memeg neis opole; abelelam E derar nerute le, epe E nase nerute le; ese nole, E ekpi nerute le ge, epe dituaki nerute le. Uaba umer kak memeg le Adim a gako mamona.
25Abelelam kaka uabi detagereda, Uaba nole okadeskeda uaba eded, na leuer uaba eroare, a na ni uaba ereare; gako uaba gem na lu uaba ameare. Nako eded nole aule abele leuerlam, gako abele gem abele amelam?
26Uaba dasmerare ebur giz epereda; uiaba nole saido dikri, a nole deregeir, a nole azig saido meta ge; epe uaba Aba, emerilu kotor ge, uiabi darasisieda. Nako uaba nole au debele uiabim?
27Na le dali uaba umele abara okadeskeda, E asaimer abara eded netat kubita?
28Nalugem uaba okadeskeda uaba am uali? Ua dikiaporare abele sumez goago, nako tonar omeilu; uiaba nole dorge a nole erat.
29Kaka uabi detagereda, Ege Solomona, gako abara au debe lu giz, E nole abara am uali mokakalam abele nerute uiaba.
30Ese Ade abi ikuar mokakalam am uali abele gaire lu ged sumez, eded abele gerger a ko batauered idim ge abele amei uteb, nako uaba nole au debe am uali nagri, uaba kebi oituli?
31Dasmerare, uaba nole okadeskeda, gako mer mokakalam, Na leuer meriba aroare? a na ni meriba ere? a na am uali meriba amear?
32Abelelam gaire lu peike gaire nogle giz deraimerare; abelelam uaba Aba penoka dali abele kotor ge, E dasmerauem gaire lu uridili abkoreb uabim.
33Ege uaba kekiam deraimerare abele Ade ra baselaia, gako abara barkak tonar, iaueakai uaba gaire lu uridili nagri.
34Dasmerare, uaba nole okadeskeda abele idim ge; abelelam okadeskeda idim ge abgerger abara lu, abkoreb abele gerger abara adud.
वर्तमान में चयनित:
Mataio 6: ulk1902
हाइलाइट
शेयर
कॉपी
Want to have your highlights saved across all your devices? Sign up or sign in
Published by the British and Foreign Bible Society in 1902.
