Qooccanchi Kitaaba 30
30
1Raaheele Yaaqoobina ooso qattobee'isa moo'lla'a lasage is aayyanne to'achchito'o; Yaaqoobinam «At iina ooso uwwe; eebee'las an lehoommo» yito'o.
2Yaaqoobim Raaheelnne quuqaa «An ooso at qattoobee'isa isseena Waa'i ihummonnihe?» yukko.
3Ee lasage isem ixxena «I agishsho Baala'a tuto'o; at isenne; iinse'e ise i gubeedonne iina ooso qattona; ee'isinne an oos amatte iheena xanoommo» yito'o. 4Ee bikkina is awwaadaancho Baala'a Yaaqoobina meentichchotte ikkona uwwito'o; ixxim maraa isenne iinse'ukko. 5Baala'am lamfoorette ikka'a Yaaqoobina goonchi beeto qatto'o. 6Raaheelem «Waa'i iina oogatukko i uunxatom macceesaa goonchi beeto iina uwwukko» yito'o; ee bikkina beetika summa Daana#30:6 Ibro'isinne Daana yimmi oogataakko yimma. yita'a weeshsho'o. 7Raaheelena awwaadaancho Baala'a odim lamfoorette ikka'a Yaaqoobina goonchi beeto qatto'o 8Raaheelem «An iyyaayyanne malaayyaam gubbancha gubbamaa kaa'aammo» yito'o. Ee bikkina beetika summa Niftaaleema#30:8 Ibro'isinne Niftaaleema yimmi gubbancha yimma. yita'a weeshsho'o.
9Liya'a ooso qarimma uullisso'isa moo'llo'i ammanenne isena awwaadaanchotte hee'llo'i Zilfa'a massita'a Yaaqoobina meentichchotti ikkona uwwito'o. 10Ee lasage Liya'i awwaadaancho Zilfa'a Yaaqoobina goonchi beeto qatto'o. 11Liya'am «An hinkido'i er gada'aamotte» yita'a beetika summa Gaada#30:11 Ibro'isinne Gaada yimmi er gada'a yimma. yita'a weeshsho'o. 12Liya'ana awwaadaancho Zilfa'am la'mmekam goonchi beeto qatto'o. 13Liya'am «An lobakata liiramaammo; kanniinsi eehid meenti hundim eese ‹Liiranto'oo meentichchotte yookko› yita'a ixxi summa Aseera#30:13 Ibro'isinne Aseera yimmi liirancha yimma. » yita'a weeshsho'o. 14Arasa murakkam agananne Roobeel haqqoro maraa wobax haqqi'nnoo'oka siidukko; ixxom eebaa ixxi amatte hee'llo'i Liya'ana uwwukko; Raaheelem Liya'ana «Ki beet eebu wobax haqqika iina uwwe» yita'a uunxito'o.
15Ihukkaarem Liya'a «Iinniinsi i aro'o hoottittok hoffe'aatennihe? Kaba odim i beet eebu wobax haqqichcho labookkoka hoottaa massiteena hassaatennihe?» yito'o; Raaheelem «At ki beet eebu wobax haqqa laboo haqqichchiinsi iina uwwitta'n at maaro'o Yaaqoobinne iinse'llam hee'llitto» yito'o.
16Yaaqoobim maaro'onne haqqioriinsi waarukko. Liya'am ixxo aa'lleena miniinsi fitta'a «I beet eebu wobax haqqichchinne keese bitaa'ummi bikkina at kaballa gattoottok iinninnette» yito'o. Ee bikkina ee hiimo isenne maqire garukko.
17Waa'im Liya'aka uunxato macceesukko; isem lamfoorette ikka'a Yaaqoobina ontika goonchi beeto qatto'o 18Liya'am «I awwaadaancho i aro'ina uwwummi bikkina Waa'i iina bito miqaakko» yita'a beetika summa Yisaakoora#30:18 Ibro'isinne Yisaakoora yimmi miqo'o yimma. yita'a weeshsho'o. 19Liya'a odim lamfoorette ikka'a Yaaqoobina lohikam goonchi beeto qatto'o. 20Liya'am «Waa'i iina er irifo'o irifaakko; kabada'i i aro'i eese lonsookko; mashka'oomim an ixxena loh goo'n ooso qaraammo» yita'a beetika summa Zaabiloona#30:20 «Zaabiloona» yimmi Ibro'isinne «Lonsaakko» yimma. yita'a weeshsho'o. 21Ee lasage ise landichcho qatto'o; landichchokkam summa Diina#30:21 «Diina» yimmi Ibro'isinne «Oogataakko» yimma. yita'a weeshsho'o.
22Waa'im Raaheele sawwukko, is uunxatom macceesaa ise qattam goosa fooqaa'ukko. 23Isem lamfoorette ikka'a goonchi beeto qatto'o; ee bikkina «Waa'im iinam goonchi beeto uwwukko; i game'llatom iinniinsi hoorukko. 24Odim iina mulli goonchi beetom edaa uwwona» yita'a ee beetika summa Yooseefa yita'a weesho'o.
Yaaqoob Laaba'anne Fitamukkisa
25Raaheele Yooseefa qatta'a lasage Yaaqoob Laaba'ana «An qaramummi uulla daba'llaa marona eese geegeese. 26I meentoo i oosoo iina uwwe; ixxuwwi bikkina an kiina hinkaa'nna awwaadumda'e at laqqootto» yukko.
27Ihukkaarem Laaba'a ixxena «Kiina liiransulas at iinninne maqire afuure; Waa'i ki mashka'inne eese lobakata maase'ukkisa an mareexxaammo. 28Kiinam miqoommi luwwa kure; an eekka kiina uwwoommo» yukko.
29Yaaqoobim «An kiina hinkaa'nna awwaadumda'e ki diinaxxi allaachchim an allaarummaanniinsi ki'isaa hinkaa'nna fikkaannuda'e at laqqootto. 30An ki beyyo waareena illageen kiina hofqax hee'u ki diinaxxi allaachchi kaba lobakata fikkaannaakko; an ki beyyo waarummi bikkina Waa'i keese maase'aakko; an odim i mi'n abaroosina baxoommok hinka'i ammane?» yukko.
31Laaba'am «Eehannah an kiina hinkaa'nna miqahe?» yaa xa'mmukko. Yaaqoobim «An kiinniinsi ma'lluchchom hasoommoyyo; iina kaka issitlas odim ki gereebba allaaroommo.
Yaaqoobim «An kiina yoommok xale'i mat luwwa iina issitlas an ki diinaxxi allaachcha odim allaaroommo. 32An kaballa ki gereebbi geexxuwwi lambe'innee fella'i geexxuwwi lambe'innee higoommo; bir digib fella'i geexxuwwaa odim heemaddi gereebbi geexxuwwaa mulli keeniinsi annanni issoommo; ixxuwwim iina miqo'i ikkamo. 33At i beyyonne yoo ki diinate moo'lleena waattoo ammane an xummaanchi ihummisa at moo'lleena xantootto; i beyyonnem bir fella'iinsi, digib fella'iinsii heemaddi gereebbiinsii mullek siidamulas game'ummaannisa xige» yukko.
34Laaba'am «Ihona at yittaannonne hundannem iittamoommo» yukko. 35Ihukkaarem ee ayyaamo Laaba'a fella'i ambulluwwiinsi gadar hagarii bir hagar mare'ii yoo keenoo hundem meenti fella'iinsim, biroo'm mare'i yoo keenoo qadaalloom yoo keenoo hundam odim heemaddi gereebbi hundamii annanni issaa ixxi oosina allaattona uwwukko. 36Ixxim ee lasage Yaaqoobiinsi sas balli googo ihoo qaxa qeessukko; Yaaqoobim Laaba'aka gatu fella'aa gereebbaa allaaram hee'ukko.
37Yaaqoobim siigeeda haruureeshshaa leegaa laboo haqquwwiinsi aashaalli biccuwwa fissaa eebukko; ee biccuwwikam hobara coo'aa deegar issukko. 38Ixxim ee coo'aa gudisu biccuwwa gereebbii fella'ii wo'ina waatto'i ammanenne wo'o agisakkam wongi'l woronne gereebbi illagennee feella'i illagennee dissukko. Fella'ii gereebbii wo'o aggeena waattam ammane mooraa'llam hee'llo'o. 39Gereebbii fella'ii ee biccuwwi illagenne moora heele'llam hee'llo'o; ixxuwwim guba'nnito'i bikkina gadalluwwaa billuwwaa mare'i yoo keeno qatto'o.
40Yaaqoobim wotalluwwa annanni issaa Laaba'i gadar fella'i kollonne heemaddi gereebbi ille dabarukko; ixxi gereebbaa fella'am annanni issukko. Ee'isinne ixxi diinate Laaba'i diinatiinsi annanni issukko.
41Odim qoxxaalli fayya'i gereebbii fella'ii hundim guba'nto'i ammane fella'ii gereebbii biccuwwa moo'lla'a ee biccuwwa laboo keeno qattamisina ee biccuwwa gereebbi wo'o agoo wongi'l woronne ixxuwwi illagenne dissukko. 42Ihukkaarem jiir gereebbi illagennee fella'i illagennee bicco dissam hee'ukkoyyo. Ee'isinne jiir keen Laaba'an ihukko; qoxxaalli keen odim Yaaqooban ihukko.
43Ixxenam lobakat diinat, goon awwaadaan, meenti awwaadaan, gaameela'ii hallii hee'ukko.
वर्तमान में चयनित:
Qooccanchi Kitaaba 30: KeesKita
हाइलाइट
शेयर
कॉपी
Want to have your highlights saved across all your devices? Sign up or sign in
