Qooccanchi Kitaaba 15
15
Waa'i Abraaminne Hidi'l Sagara Aagukkisa
1Ee lasage Waa'i Abraamina kaaltinne moo'amukko. Waa'im Abraamina
«Abraama, baddititte;
an keesenne jor luwwi afoobee'isa
kiina agir ihaa egeroommo;
lobakat irifo'om uwwoommo» yukko.
2Ihukkaarem Abraam «Moollanni Waa'a! Iina oos bee'i bikkina i luwwa lago aa'ookkok Damaasqo'i Eeli'eezaratte; ee bikkina iina uwwitoo irifo'i maha issookko? 3Iina ooso uwwitbee'i bikkina i minenne qaramu awwaadaa'nnek mat i luwwa lago aa'eenatte» yaa dabarukko.
4Ee lasage odim Waa'i Abraamina «Ki gubeexxi qachchi ki luwwa lago aa'ookko bagaan ku manchi lago aa'ooyyo» yukkuuyyi macceesukko. 5#Oro 4:18; Ibr 11:12Odim ee lasage Waa'i Abraama biir beyyonne fissaa «Hino'o iimane moo'e; iima'n boollaanka xiggeena xantoolas xige; ki shumo'im ee'isa ihookko» yukko.
6 #
Oro 4:3; Gal 3:6; Yaq 2:23 Abraamim Waa'anne amma'nnukko; oohim ixxena muccuroom ihaa xigamukko.
7Odim Waa'i Abraamina «At ka uulla lago aa'llona Kalaade'i manni uullanne yoo Uuriinsi awwonsaa fissummi Waa'i anette» yukko.
8Ihukkaarem Abraam «I Moollanni Waa'a! Ka uulla an lago aa'eena xanoommisa mahinne la'eena xanoommo?» yaa xa'mmukko.
9Waa'im Abraamina «Sas hiinchi addichcho, sas hiinchi fellakkichchi geexa, sas hiinchi gereechchi ambula, ee'isam handarekkichchoo handarekkichchi wotaraa amaddaa waare» yukko. 10Abraamim ee diinate hundam Waa'ina hincaa'aa annannichchom lam gudaanchonne diqaa lam ogoranne dissukko; ihukkaarem cii'a lam beyyonne diqukkoyyo. 11Abraam diqaa dissu maara ammar iteena waarukkaare hollukko.
12 #
Iyb 4:13,14 Abraam maaro'i ballanne kee'mmaalli diriiro diriirukko. Lobakata baddisoo gambabbi tuunsim ixxonne ubukko. 13#Doy 1:1-14; Ass 7:6Waa'im Abraamina «Ki shumo'i manni uullanne waaraan ikka'a hee'llamisa la'e; ee uulli mannim ixxuwwa soor xibbi hiincho lobakata u'nnissu'uuyyi agiddanonne gassitamo. 14#Doy 12:40,41; Ass 7:7Ihukkaarem an ixxuwwa agiddano gassito'i minaadabanne oogatoommo; ee lasage lobakat amaxxa amadda'a fittamo. 15Ihukkaarem at lobakat doolle hee'llaa lasage xumminnem letaa waammantootto. 16Ki shumo'im soor qaranchiinsi lasage ka uulla daba'llookko; ee amman afeebe'e afamoo mashka'im Amoore'i mannik baaxii'l humbulli wo'mmeebe'ette» yukko.
17Eelliinchi aagaa uulli tuunsaa lasage midachchi wiriirii aphphoo giirii moo'amaa lamem ogorannem yoo maa'l lambe'inne higukko. 18#Ass 7:5Ee ayyaamom Waa'i Abraaminne «Gibxi uulli gabaliinsi ki'isaa lob Efiraaxiis daajjenne afeebe'e yoo uulla hundam ki shumo'ina uwwoommo. 19Ee'isam Qeene'i mannika, Qaaniiz mannika, Qaadmoo'n mannika, 20Hiite'i mmannika, Fariiz mannika, Raafaayim mannika, 21Amoore'i mannika, Kana'aa'n mannika, Gergeese'i mannikaa Iyyaabuus mannikaa uulla ki shumo'ina uwwoommo» yaa hidi'l sagara aagukko.
वर्तमान में चयनित:
Qooccanchi Kitaaba 15: KeesKita
हाइलाइट
शेयर
कॉपी
Want to have your highlights saved across all your devices? Sign up or sign in
