YOHANES 21
21
I Yesus nutingkaandaghi watangeng-E su tumatuhu-E i sire pitu
1Bou e'e I Yesus nutingkaandaghi watangeng-E sau paghisa su manga tumatuhu-E su Rano Tiberias. E'e ko nariadi kere i'i: 2Pia su silou i Simon Petrus, i Tomas ko isigho si Ana hindua, i Natanael bou Kana su Galilea, manga ana i Zebedeus dang dingang i sire rua tumatuhu I Yesus ko wal᷊inge nukomol᷊i. 3#Luk. 5:5I Simon Petrus nuhabari si sire manga ringange ko wal᷊inge, “Ia neng masasae maname kina.”
“I kami tumuhu,” Angkung i sire si sie. Kuteu nasasae i sire nusumake su sakaeng. Kateho sihuwi matiwatu e'e i sire ta nakasame sarang simbua. 4Su tempo matangutiti manita maburesi, I Yesus kararisi su apeng, kateho i sire mang ta nakakil᷊al᷊a I Sie e'e ko I Yesus. 5I Yesus nangul᷊i si sire, “Manga ana, pia kina si kumu e'e?”
Nisimbahi sire “Takoae.”
6 #
Luk. 5:6
I Yesus nangul᷊i si sire, “Piloko soma i kumu pai su kuaneng u sakaeng, i kumu sarung makaal᷊a kina.” Bou e'e soma e'e nipilo i sire tamai, arawe hinsang u kaul᷊ie kina su l᷊al᷊unge, hakiu i sire ta nakatanggong sau namol᷊eng.
7Tumatuhu ko ikindaghi I Yesus nangul᷊i si Petrus, “Mawu dara e'e!” Suapang i Simon Petrus nakaringihi himoneu dara e'e ko Mawu, i sie nul᷊oho pakeange (watu'u i sie takoae pakeange) wuhue nutumumpa su ake. 8Manga tumatuhu-E ko wal᷊inge nutumuhu tarai su sakaeng sarang l᷊ul᷊unge apiru kapamol᷊enge soma ko napene u kina. I sire ta tumaniu marau bou l᷊ul᷊unge, patehang kitang manga mahasu su meteri. 9Suapang i sire natumpa bou sakaeng, i sire nakawua tutuhi u putung su se'e dang pia kina dingang u boroti timbo-timbo su wawoe. 10I Yesus nangul᷊i si sire, “Kenang wawa mai kina manga pira mbua ko wuhue naal᷊a si kumu.”
11I Simon Petrus nusumake su sakaeng, wuhue namol᷊eng soma sarang l᷊ul᷊unge. Soma e'e napene u kina ko l᷊al᷊abo; kaul᷊ie mahasul᷊imampul᷊otilu su wuange. Dang maneng kere kaul᷊ie, soma e'e mang ta naghehe. 12I Yesus nangul᷊i si sire, “Maite mamura,” Takoae sarang singkatau bou manga tumatuhu-E ko wahani mukina, “Yamang i'i ko i sai?” Watu i sire matitong I Sie ko Mawu. 13Bou e'e I Yesus nusumandighi si sire, nangal᷊a boroti e'e, dang nunggile e'e si sire. Kere l᷊ai nikoa-E dingang u kina e'e.
14I'i katilunge I Yesus nutingkaandaghi watangeng-E su manga tumatuhu-E suapang I Sie nuwangung bou papate.
I Yesus dingang i Petrus
15Suapang i sire bou nukumang, I Yesus nangul᷊i si Simon Petrus, “Simon, ana i Yona, apa i kau kumindaghi u Ia mborong nangilebe bou i sire i'i kumindaghi Ia?”
“Tingari, Mawu,” nisimbahi Petrus, “Mawu matitong ia kumindaghi u Mawu.”
I Yesus nangul᷊i si sie, “Tal᷊ungete manga ana u domba-Ku.”
16Su karuange I Yesus nukina si sie, “Simon ana i Yona, apa i kau kumindaghi u Ia?”
“Tingari, Mawu,” nisimbahi Petrus, “Mawu matitong ia kumindaghi u Mawu.”
I Yesus nangul᷊i si sie, “Tal᷊ungete manga domba-Ku.”
17Su katilunge I Yesus sau nukina si sie, “Simon ana i Yona, apa i kau kumindaghi u Ia?”
I Petrus nasusa naunge watu'u I Yesus seng pakatilu nukina si sie. Kuteu i Petrus sau nusimimbahi, “Mawu, Mawu matitong u kaul᷊i u patiku. Mawu matitong ia kumindaghi u Mawu!”
Bou e'e Yesus nangul᷊i si sie, “Tal᷊ungete manga domba-Ku. 18Mang nuhino didato-Ku i'i: Su tempo ngi kau mborong makuda, i kau sisane mangiki kal᷊uwaengu, dang l᷊umal᷊eng tumuhu kaou. Kateho boko i kau seng maghurang, i kau sarung manogori l᷊imau, dang taumata ko wal᷊inge mangiki si kau dang mamambing si kau sarang murating u manga apa ko ta i kaou.” 19(Ringang u manga didato e'e I Yesus mupakal᷊ahe u kirapa sarung i Petrus mate mupakawantughi u Mawu Ruata.) Bou e'e I Yesus nangul᷊i si Petrus, “Tuhue si Sia!”
I Yesus dingang u manga tumatuhu-E ko wal᷊inge
20 #
Yoh. 13:25
Su tempo ngi Petrus nuwihu, i sie nakawua tumatuhu ko ikukindaghi I Yesus su l᷊ikuri. (Ko i sie tempo ngi sire kakange kakangiang su sindihang I Yesus dang ko nukina si Sie, “Mawu, ko i sai musingking su Mawu?”) 21Nakawua si sie i Petrus nukina si Yesus, “Mawu, kirapa dingang i sie i'i?”
22I Yesus nusumimbahi, “Boko ia mo i sie matatana wiahi sarang ia sumongo, e'e wal᷊inge hal᷊i u. Kateho i kau tuhute si Sia!”
23Kuteu nakeke habari su tal᷊oara u manga tumatuhu I Yesus uare tumatuhu e'e seng ta mate. Sumbal᷊i I Yesus ta nangul᷊i tumatuhu e'e seng ta mate, kateho: “Boko Ia mo i sie matana wiahi sarang Ia sumongo, e'e wal᷊inge hal᷊i u.”
24Tumatuhu e'e ko seng nangonggo u kasaksiang u manga hal᷊i ko seng nariadi i'i. Ko i sie l᷊ai seng namohe u e'e. Dang i kite matitong himoneu apang ko seng niul᷊i e'e tingari.
Didato panginsuenge
25Mborong maul᷊i l᷊ai hal᷊i ko seng nikoa I Yesus. Boko kaul᷊ie iwohe pusimbau, su pundangku seng ta mukiong tampa su kal᷊abo u dunia i'i pul᷊urangeng u apang buki ko sarung iwohe e'e.
वर्तमान में चयनित:
YOHANES 21: PLT
हाइलाइट
शेयर
कॉपी
Want to have your highlights saved across all your devices? Sign up or sign in
